Saame 109:1-31
Ki he pule hivá. Saame ʻa Tēvita. Ko ha hiva.
109 ʻE ʻOtua ʻa ia ʻoku ou fakahīkihikiʻí,+ ʻoua te ke kei fakalongolongo ai pē.
2 He ko e kau fulikivanú mo e kau kākaá ʻoku ava mai honau ngutú kiate au.
ʻOku nau leaʻaki ʻa e ngaahi ʻelelo loi fekauʻaki mo au;+
3 ʻOku nau kāpui au ʻaki ʻa e ngaahi lea tāufehiʻa,Pea ʻoku nau ʻohofi taʻeʻuhinga au.+
4 Ko ʻenau tali ki heʻeku ʻofá ko ʻenau fakafepakiʻi au;+Ka ʻoku hokohoko atu pē ʻeku lotú.
5 Ko ʻeku leleí ʻoku nau totongi mai ʻaki kiate au ʻa e kovi+Mo ʻeku ʻofá ʻaki ʻa e tāufehiʻa.+
6 Fakanofo ke pule kiate ia ha tangata fulikivanu;ʻOfa ke tuʻu ʻi hono toʻomataʻú ha tokotaha fakafepaki.*
7 ʻI hono fakamāuʻi iá, ʻofa ke lau ia ʻokú ne halaia;*Naʻa mo ʻene lotú, ʻofa ke lau ia ko e angahala.+
8 Tuku ke siʻi ʻa hono ngaahi ʻahó;+Ko hono lakanga fakaetauhí, tuku ke maʻu ia ʻe ha taha kehe.+
9 Tuku ke hoko ʻo tamai-mate ʻa ʻene fānaú,*Mo hono uaifí ke hoko ko ha uitou.
10 ʻOfa ke hoko ʻa ʻene fānaú* ko e kau kolekole ʻoku nau hē holo,ʻO kumi meʻakai mei honau ngaahi ʻapi kuo maumaú.
11 ʻOfa ke puke ʻe he tokotaha ʻokú ne moʻua ki aí ʻa e meʻa kotoa ʻokú ne maʻú,Pea ʻofa ke faʻao fakamālohi ʻe he kau solá ʻa ʻene ngaahi koloá.
12 ʻOfa ke ʻoua naʻa fakaaʻu atu ʻe ha taha ha anga-ʻofa* kiate ia,Pea ʻofa ke ʻoua naʻa ʻofeina ʻe ha taha ʻa ʻene fānau tamai-maté.
13 Tuku ke tuʻusi atu ʻa hono hakó;*+ʻOfa ke tāmateʻi ʻa honau hingoá mei he toʻutangata ka hokó.
14 Tuku ke manatuʻi ʻe Sihova ʻa e faihala ʻa ʻene fanga kuí,+Pea ʻofa ke ʻoua naʻa tāmateʻi ʻa e angahala ʻa ʻene faʻeé.
15 ʻOfa ke lāuʻilo maʻu pē ʻa Sihova ki he meʻa kuo nau faí;Pea ʻofa ke ne tuʻusi atu ʻa e manatu kiate kinautolú mei he māmaní.+
16 He naʻe ʻikai te ne manatuʻi ke fakahaaʻi ʻa e anga-ʻofá,*+Ka naʻá ne hanganaki tuli ki he tangata kuo lōmekina,+ masiva mo loto-mamahíKe tāmateʻi ia.+
17 Naʻá ne manako ke fai ha talatuki, ko ia naʻe hoko mai ʻa e talatukí kiate ia;Naʻe ʻikai te ne loto ke fai ha tāpuaki, ko ia naʻe ʻikai te ne maʻu ha tāpuaki.
18 Naʻá ne kofuʻaki ʻa e talatukí ko hono teunga.
Pea naʻe malingi atu ia ki hono sinó ʻo hangē ha vaí,Ki hono ngaahi huí ʻo hangē ha loló.
19 ʻOfa ke hoko ʻene talatukí ʻo hangē ko e teunga ʻokú ne takatakai ʻaki iá+Pea hangē ha leta ʻokú ne noʻo maʻu peé.
20 Ko e totongi eni ʻoku fai ʻe Sihova ki he tokotaha ʻokú ne talitekeʻi aú+Pea ki he faʻahinga ʻoku nau leaʻaki ha kovi kiate aú.
21 Ka ko koe, ʻe Sihova ko e ʻEiki Hau,Fai mai ha meʻa maʻaku koeʻuhi ko ho huafá.+
Fakahaofi au, koeʻuhí he ʻoku lelei ʻa hoʻo ʻofa mateakí.+
22 He ʻoku ʻikai haku tokoni pea ʻoku ou masiva,+Pea kuo hokaʻi ʻa hoku lotó.+
23 ʻOku ou tāutuku atu ʻo hangē ha ʻata ʻoku mōlia atú;Kuo tupeʻi au ʻo hangē ha heʻé.
24 Ko hoku ongo tuí kuo fehipakaki tupu mei he ʻaukaí;ʻOku pakau hoku sinó, pea ʻoku ou fakaʻauʻausino.*
25 Kuó u hoko ko e meʻa ke nau lumaʻaki.+
ʻI heʻenau sio mai kiate aú, ʻoku nau kalokalo honau ʻulú.+
26 Tokoniʻi au, ʻe Sihova ko hoku ʻOtua;Fakahaofi au ʻaki hoʻo ʻofa mateakí.
27 ʻOfa ke nau ʻilo ko ho nimá kuó ne fai ʻa e meʻá ni;Ko koe ia, ʻe Sihova, kuó ke fai iá.
28 Tuku ke nau fai ha talatuki, kae ʻofa ke ke foaki mai ʻe koe ha tāpuaki.
ʻI heʻenau tuʻu mai kiate aú, tuku ke fakamaaʻi kinautolu,Kae tuku ke fiefia ʻa hoʻo sevānití.
29 Tuku ke kofuʻaki ʻe he faʻahinga ʻoku nau talitekeʻi aú ʻa e fakamā;ʻOfa ke takatakaiʻi kinautolu ʻe heʻenau maá ʻo hangē ha pulupulú.*+
30 Ko hoku ngutú te ne fakahīkihikiʻi faivelenga ʻa Sihova;Te u fakahīkihikiʻi ia ʻi muʻa ʻi he fuʻu kakai tokolahi.+
31 He te ne tuʻu ʻi he toʻomataʻu ʻo e masiváKe fakahaofi ia mei he faʻahinga ʻoku nau fakahalaiaʻi iá.
Fakamatala ‘i Lalo
^ Pe “tokotaha talatalaaki.”
^ Pe “fulikivanu.”
^ Fakafoʻilea, “hono ngaahi fohá.”
^ Fakafoʻilea, “hono ngaahi fohá.”
^ Pe “ʻofa mateaki.”
^ Pe “kakai ʻi he kahaʻú.”
^ Pe “ʻofa mateakí.”
^ Fakafoʻilea, “Kuo tutue hoku kakanó, ʻo ʻikai ha ngako (lolo).”
^ Pe “kofu taʻenimá.”
