Lute 1:1-22
1 Ko eni ʻi he ngaahi ʻaho naʻe faifakamaau ai ʻa e kau fakamāú,+ naʻe hoko ha honge ʻi he fonuá; pea naʻe ʻalu atu ha tangata mei Pētelihema+ ʻi Siutá ke nofo ko ha muli ʻi he feituʻu ʻuta ʻo Mōapé,+ ko ia fakataha mo hono uaifí mo hono ongo foha ʻe toko ua.
2 Ko e hingoa ʻo e tangatá ko ʻElimeleki,* ko e hingoa ʻo hono uaifí ko Nāomi,* pea ko e hingoa ʻo hono ongo fohá ko Māloni* mo Kilioni.* Ko e kau ʻEfalata kinautolu mei Pētelihema ʻi Siutá. Pea naʻa nau haʻu ki he feituʻu ʻuta ʻo Mōapé ʻo nofo ai.
3 Hili mei ai ha taimi, naʻe mate ʻa ʻElimeleki, ko e husepāniti ʻo Nāomí, pea naʻe toe pē ia mo ʻene ongo tamá.
4 Naʻe mali ki mui ai ʻa e ongo tangatá mo e ongo fefine Mōape; ko e taha ko hono hingoá ko ʻOpa, pea ko e taha ko hono hingoá ko Lute.+ Naʻa nau nofo ʻi ai ʻi he taʻu nai ʻe hongofulu.
5 Pea naʻe toe mate foki ʻa e ongo tamá, ʻa Māloni mo Kilioni, pea naʻe toe pē ai ʻa e fefiné ʻo ʻikai toe ʻi ai ʻene ongo tamaikí mo hono husepānití.
6 Ko ia naʻe kamata ai ke ne foki mo e ongo uaifi ʻo ʻene ongo tamá mei he feituʻu ʻuta ʻo Mōapé, he naʻá ne fanongo ʻi Mōape kuo fakahanga ʻa e tokanga ʻa Sihová ki hono kakaí ʻaki ʻene ʻoange kiate kinautolu ʻa e meʻakai.*
7 Naʻá ne mavahe mei he feituʻu naʻá ne nofo aí fakataha mo e ongo uaifi ʻo ʻene ongo tamá. ʻI heʻenau fononga atu ʻi he halá ke foki ki he fonua ko Siutá,
8 naʻe pehē ʻe Nāomi ki he ongo uaifi ʻo ʻene ongo tamá: “Mo ō, ʻo foki, ʻa kimoua taki taha ki he ʻapi ʻo ʻene faʻē. ʻOfa ke fakahaaʻi atu ʻe Sihova ʻa e ʻofa mateaki kiate kimoua,+ ʻo hangē pē ko hoʻomo fakahaaʻi ia ki he ongo tangata kuó na maté pea kiate aú.
9 ʻOfa ke tuku* ʻe Sihova ke mo maʻu taki taha ha maluʻanga* ʻi he ʻapi ʻo hono husepāniti.”+ Naʻá ne ʻuma leva kiate kinaua, pea naʻa nau fetāngihi leʻo-lahi.
10 Naʻá na hanganaki pehē kiate ia: “ʻIkai, ka te ma ō mo koe ki ho kakaí.”
11 Ka naʻe pehē ange ʻe Nāomi: “Mo foki, ʻa ʻeku ongo taʻahine. Ko e hā ke mo ō ai mo aú? ʻE kei lava koā ke u fanauʻi ha ongo tama ʻa ia ʻe lava ke na hoko ko hamo husepāniti?+
12 Mo foki, ʻa ʻeku ongo taʻahine. Mo ō, he kuó u fuʻu motuʻa ke toe mali. Naʻa mo haʻaku ʻamanaki ke maʻu ha husepāniti he poó ni pea lava foki ke fanauʻi ha ongo tama,
13 te mo hanganaki tatali koā kiate kinaua kae ʻoua kuó na fuʻu lahi? Te mo fakaʻehiʻehi koā ke toe mali koeʻuhí ko kinaua? ʻIkai, ʻa ʻeku ongo taʻahine, ʻoku ou ongoʻi mamahi ʻaupito koeʻuhi ko kimoua, he kuo tafoki ʻa Sihova meiate au.”+
14 Naʻa nau toe fetāngihi leʻo-lahi, ʻi he hili iá naʻe ʻuma ʻa ʻOpa ki heʻene faʻē-ʻi-he-fonó peá ne mavahe. Ka naʻe pīkitai ʻa Lute ʻiate ia.
15 Ko ia naʻe pehē ange ʻe Nāomi: “Vakai! Ko e uitou ʻo e tokoua ho malí kuó ne foki ki hono kakaí mo hono ngaahi ʻotuá. Foki mo e uaifi ʻo e tokoua ho malí.”
16 Ka naʻe pehē ʻe Lute: “ʻOua te ke fakakolekole au ke u liʻaki koe, ke u foki mei he ʻalu mo koé; he ko e feituʻu ʻokú ke ʻalu ki aí te u ʻalu ki ai, pea ko e feituʻu te ke mohe aí, te u mohe ai. Ko ho kakaí te nau hoko ko hoku kakai, pea ko ho ʻOtuá ko hoku ʻOtua.+
17 Ko e feituʻu te ke mate aí te u mate ai, pea ko e feituʻu ia ʻe tanu ai aú. ʻOfa ke fai pehē ʻa Sihova kiate au pea hulu atu ai ka naʻa mo e maté ʻe ʻikai te ne fakamāvaeʻi au meiate koe.”
18 ʻI he vakai ʻa Nāomi ki he vilitaki ange ʻa Lute ke na oó, naʻe tuku ai ʻene feinga ke fakalotoʻi iá.
19 Pea naʻe hokohoko atu ʻena fonongá ʻo na aʻu ki Pētelihema.+ ʻI heʻena aʻu pē ki Pētelihemá, naʻe ngaʻuta ʻa e koló kotoa koeʻuhi ko kinaua, pea naʻe fepehēʻaki ʻa e kau fefiné: “Ko Nāomi nai eni?”
20 Naʻá ne pehē ange ki he kau fefiné: “ʻOua ʻe ui au ko Nāomi.* Ui au ko Mala,* he kuo ʻai ʻe he Māfimafi-Aoniú ʻa ʻeku moʻuí ke kona-ʻīʻī.+
21 Naʻá ku ʻalu fonu atu, ka kuo fakafoki ngeʻesi mai au ʻe Sihova. Ko e hā ke mou ui ai au ko Nāomí, lolotonga ia ko Sihova naʻá ne fakafepakiʻi aú pea ko e Māfimafi-Aoniú naʻá ne fakatupunga ʻeku mamahí?”+
22 Ko e anga eni ʻo e foki ʻa Nāomi mei he feituʻu ʻuta ʻo Mōapé,+ fakataha mo Lute ko e uaifi Mōape ʻo ʻene tamá. Naʻá na aʻu ki Pētelihema ʻi he kamataʻanga ʻo e utu-taʻu paʻalé.+
Fakamatala ‘i Lalo
^ ʻOku ʻuhingá “Ko Hoku ʻOtuá ʻOku Tuʻí.”
^ ʻOku ʻuhingá “Ko Hoku Manakó.”
^ Ngalingali ʻoku mei ha foʻi lea faka-Hepelū ʻoku ʻuhingá ko e “hoko ʻo vaivai; puke.”
^ ʻOku ʻuhingá ko e “Tokotaha Taʻelavameʻa; Tokotaha ʻOku Fakaʻau ke Ngata.”
^ Fakafoʻilea, “mā.”
^ Pe “foaki ha meʻaʻofa.”
^ Fakafoʻilea, “ha mālōlōʻanga.”
^ ʻOku ʻuhingá “Ko Hoku Manakó.”
^ ʻOku ʻuhingá ko e “Kona.”
