Ki he Kau Loma 14:1-23
14 Talitali lelei ʻa e tangata ʻoku vaivai ʻa ʻene tuí,+ kae ʻoua ʻe fai hano fakamāuʻi ʻa e kehekehe ʻi he fakakaukaú.*
2 Ko e tangata ʻoku mālohi ʻene tuí ʻokú ne kai ʻa e meʻa kotoa pē, ka ko e tangata ʻoku vaivai ʻene tuí ʻoku kai vesitapolo pē ia.
3 Ko e tangata ʻokú ne kai ha faʻahinga meʻakai peé kuo pau ke ʻoua naʻá ne siolalo ki he tangata ʻoku kai vesitapolo peé, pea ko e tangata ʻoku kai vesitapolo peé kuo pau ke ʻoua naʻá ne fakamāuʻi ʻa e tokotaha ʻokú ne kai ha faʻahinga meʻakai peé,+ koeʻuhí he ʻoku hōifua kiate ia ʻa e ʻOtuá.
4 Ko hai koe ke ke fakamāuʻi ʻa e sevāniti ʻa ha taha kehe?+ ʻOku ʻi hono ʻeiki ʻoʻoná ʻa ʻene tuʻú pe ko ʻene toó.+ Ko e moʻoni, ʻe ʻai ia ke ne tuʻu, he ʻoku malava ʻe Sihova* ke ʻai ia ke ne tuʻu.
5 ʻOku lau ʻe he tangata ʻe taha ʻa e ʻaho ʻe taha ʻoku mahuʻinga ange ia ʻi he ʻaho ko ē;+ ʻoku lau ʻe ha tangata kehe ia ʻa e ʻaho ʻe taha ʻoku tatau pē ia mo e ngaahi ʻaho kotoa ko ē;+ tuku ki he tokotaha taki taha ke ne tuipau kakato ki he meʻa kuó ne fakapapauʻí.
6 Ko e tokotaha ʻokú ne lau ʻa e ʻaho ʻe taha ʻoku makehé ʻokú ne fai iá ke fakalāngilangiʻi ai ʻa Sihova.* Pehē foki, ko e tokotaha ʻokú ne kai ha faʻahinga meʻakai peé ʻokú ne fai iá ke fakalāngilangiʻi ai ʻa Sihova* koeʻuhi ʻokú ne fai ha fakamālō ki he ʻOtuá.+ Ko e tokotaha ʻokú ne kai vesitapolo peé ʻokú ne fai iá ke fakalāngilangiʻi ai ʻa Sihova* koeʻuhi ʻokú ne fakamālō foki ki he ʻOtuá.+
7 Ko hono moʻoní, ʻoku ʻikai ha taha ʻo kitautolu ʻe moʻui maʻana pē,+ pea ʻoku ʻikai ha taha ʻe mate maʻana pē.
8 He kapau ʻoku tau moʻui, ʻoku tau moʻui maʻa Sihova,*+ pea kapau ʻoku tau mate, ʻoku tau mate maʻa Sihova.* Ko ia pe ʻoku tau moʻui pe ʻoku tau mate, ʻoku ʻa Sihova* ʻa kitautolu.+
9 He ko e meʻa eni naʻe pekia ai ʻa Kalaisi pea toe moʻui maí, koeʻuhí ke ne hoko ko e ʻEiki fakatouʻosi ki he kau maté pea mo e kau moʻuí.+
10 Ka ko e hā ʻokú ke fakamāuʻi ai ho tokouá?+ Pe ko e hā ʻokú ke siolalo ai foki ki ho tokouá? He te tau tuʻu kotoa pē ʻi he ʻao ʻo e nofoʻanga fakamaau ʻo e ʻOtuá.+
11 He kuo tohi: “‘ʻOku ou fuakava ʻiate au,’*+ ko e folofola ia ʻa Sihová,* ‘ʻe tūʻulutui ʻa e tui kotoa pē kiate au, pea ko e ʻelelo kotoa pē te ne fakahaaʻi ko au ʻa e ʻOtuá.’”+
12 Pea ko ia, ko e tokotaha taki taha ʻo kitautolu te ne fai ha tali maʻana ki he ʻOtuá.+
13 Ko ia ai, ʻai ke ʻoua te tau kei fefakamaauʻaki+ ka ke mou fakapapauʻi ke ʻoua te mou ʻai ha tūkiaʻanga pe ko ha fakafaingataʻaʻiaʻanga ki ha tokoua.+
14 ʻOku ou ʻilo pea ʻoku ou tuipau ʻi he ʻEiki ko Sīsuú ʻoku ʻikai ha meʻa ʻe taʻemaʻa ʻiate ia pē;+ tuku kehe pē ha meʻa ʻoku lau ʻe ha tangata ʻoku taʻemaʻa, ʻoku taʻemaʻa leva ia kiate ia.
15 He kapau ʻoku mamahi ho tokouá koeʻuhí ko e meʻakaí, ʻoku ʻikai te ke kei ʻaʻeva koe ʻo fakatatau ki he ʻofá.+ ʻOua te ke fai ʻaki hoʻo meʻakaí ha maumau* ki he tui ʻa e tokotaha ko ia naʻe pekia ʻa Kalaisi maʻaná.+
16 Ko ia ai, ʻoua ʻe tuku ke fai ha laukovi ki he lelei ʻoku mou faí.
17 He ko e Puleʻanga ʻo e ʻOtuá ʻoku ʻikai fekauʻaki ia mo ha kai mo e inu,+ ka ʻoku fekauʻaki ia mo e māʻoniʻoni mo e melino mo e fiefia ʻi he laumālie māʻoniʻoní.
18 He ʻilonga ʻa ia ʻoku ngāue fakatamaioʻeiki maʻa Kalaisi ʻi he foungá ni ʻoku fakahōifua ia ki he ʻOtuá pea leleiʻia ai ʻa e tangatá.
19 Pea ko ia, tuku ke tau tuli ki he ngaahi meʻa ʻoku fakatupu melinó+ pea mo e ngaahi meʻa ʻoku fai ai ʻa e felangahakeʻakí.+
20 Tuku hono holoki ʻa e ngāue ʻa e ʻOtuá koeʻuhí pē ko e meʻakaí.+ Ko e moʻoni, ko e ngaahi meʻa kotoa pē ʻoku maʻa, ka ʻoku fakatupu maumau* ki ha tangata ke ne kai ʻi he taimi ʻe hoko ai ia ʻo fakatupu tūkiá.+
21 ʻOku lelei tahá ke ʻoua ʻe kai kakanoʻi-manu pe inu uaine pe fai ha faʻahinga meʻa ʻe tūkia ai ho tokouá.+
22 Ko e tui ʻokú ke maʻú, tauhi pē ia ʻiate koe ʻi he ʻao ʻo e ʻOtuá. Fiefia ē ka ko e tangata ʻoku ʻikai te ne fakamāuʻi ʻa ia tonu ʻaki ʻa e meʻa ʻokú ne tali loto-leleí.
23 Ka ʻo kapau ʻoku ʻi ai haʻane veiveiua, kuo ʻosi fakahalaiaʻi ia ʻo kapau ʻokú ne kai, koeʻuhi ʻoku ʻikai te ne kai ʻo makatuʻunga ʻi he tuí. Ko e moʻoni, ko e meʻa kotoa pē ʻoku ʻikai makatuʻunga ʻi he tuí ko e angahala ia.
Fakamatala ‘i Lalo
^ Pe ngalingali, “ʻa ʻene fakafehuʻia fakafoʻituituí.”
^ Sio ki he Fakamatala Fakalahi A5.
^ Sio ki he Fakamatala Fakalahi A5.
^ Sio ki he Fakamatala Fakalahi A5.
^ Sio ki he Fakamatala Fakalahi A5.
^ Sio ki he Fakamatala Fakalahi A5.
^ Sio ki he Fakamatala Fakalahi A5.
^ Sio ki he Fakamatala Fakalahi A5.
^ Fakafoʻilea, “Hangē pē ko ʻeku moʻuí.”
^ Sio ki he Fakamatala Fakalahi A5.
^ Pe “fakaʻauha.”
^ Pe “ʻoku hala.”
