Palōveepi 27:1-27
27 ʻOua te ke pōlepole ʻi he fekauʻaki mo e ʻapongipongí,He ʻoku ʻikai te ke ʻilo ko e hā ʻa e meʻa ʻe ʻomi* ʻe he ʻaho ko iá.+
2 Tuku ki ha tokotaha kehe* ke ne fakahīkihikiʻi koe, kae ʻikai ko ho ngutu ʻoʻoú;Pea ki ha niʻihi kehe,* kae ʻikai ko ho loungutu ʻoʻoú.+
3 Ko e maká ʻoku mamafa pea ʻoku mamafa ʻa e ʻoneʻoné,Ka ko e fakatupu ʻita ʻa e valé ʻoku mamafa ange ia ʻiate kinaua.+
4 Ko e ʻita kakahá ʻoku anga-fakamamahi pea ko e ʻitá ʻoku hangē ia ha tāfeá,Ka ko hai ʻe lava ke ne matuʻuaki ʻa e fuaʻá?+
5 ʻOku lelei ange ʻa e valoki fakahāhaá ʻi hono maʻu ʻa e ʻofá kae ʻikai fakahāhā iá.+
6 Ko e ngaahi lavea ʻoku fakatupunga ʻe ha kaumeʻá ko e faitōnunga ia,+Ka ko e ngaahi ʻuma ʻa e filí ʻoku lahi fau.*
7 Ko e tokotaha ʻoku mākoná ʻoku ʻikai ke ne tali* ʻa e hone mei he taunga honé,Ka ki he tokotaha fiekaiá, naʻa mo e meʻa ʻoku koná ʻoku ifo melie ia kiate ia.
8 Hangē ko e manupuna ʻoku hē* mei hono punungáʻOku pehē ʻa e tangata ʻoku hē mei hono ʻapí.
9 Ko e loló mo e ʻinisēnisí ʻokú na fakafiefiaʻi ʻa e lotó;ʻOku hangē ia ha kaumeʻa ʻokú ne ʻoatu kiate koe ʻa e akonaki loto-moʻoní.+
10 ʻOua naʻá ke fakasītuʻaʻi ho kaumeʻá pe ko e kaumeʻa ʻa hoʻo tamaí,Pea ʻoua naʻá ke tuʻu ki he fale ʻo ho tokouá tonu ʻi he ʻaho te ke tuʻutāmaki aí;ʻOku lelei ange ha kaungāʻapi ʻoku ofi mai ʻi ha tokoua ʻoku nofo mamaʻo.+
11 ʻE hoku foha, ke ke hoko ʻo poto, peá ke ʻai ke fiefia hoku lotó,+Koeʻuhí ke u lava ʻo fai ha tali kiate ia ʻokú ne luma mai kiate aú.+
12 Ko e tokotaha fakapotopotó ʻokú ne sio ki he fakatuʻutāmakí peá ne toi,+Ka ko e tokotaha taʻetaukeí ʻokú ne hanganaki laka atu pē ʻo ne fuesia ʻa e ngaahi nunuʻá.*
13 Toʻo ha kofu ʻo ha tangata kapau kuó ne maluʻi ha sola;Puke ʻa e meʻa maluʻí meiate ia kapau naʻá ne fai ia ki ha fefine muli.*+
14 ʻI he taimi ʻoku tāpuakiʻi leʻo-lahi pongipongia ai ʻe ha taha ha tokotaha kehe,ʻE lau pē ia ko ha mala meiate ia.
15 Ko ha uaifi fakatupu kē* ʻoku hangē ia ha ʻato ʻoku tutulu maʻu pē ʻi ha ʻaho ʻuhá.+
16 ʻIlonga ʻa ia ʻe lava ke ne mapuleʻi ha uaifi pehē ʻe lava ke ne taʻofi ʻa e matangí,Pea ʻe lava ke ne puke ʻa e loló ʻaki hono nima toʻomataʻú.
17 Hangē ko hono fakamāsila ʻe he ukameá ʻa e ukameá,ʻOku pehē hono fakamāsila ʻe ha tangata ʻa hono kaungāmeʻá.*+
18 Ko e tokotaha ʻokú ne tauhi ha fuʻu fiki te ne kai ʻa hono fuá,+Pea ko e tokotaha ʻokú ne tokangaʻi ʻa hono ʻeikí ʻe fakaʻapaʻapaʻi ia.+
19 Hangē ko e ʻata mai ʻa e mata ʻo ha taha ʻi he vaí,ʻOku pehē ʻa e hā mai ʻa e loto ʻo ha tangata ʻi he tangata ʻe tahá.
20 Ko Faʻitoka mo e feituʻu ʻo e ʻauhá* heʻikai pē ke na mākona kinaua,+ʻOku pehē ʻa e mata ʻo ha tangata heʻikai pē ke fiemālie ia.
21 Hangē pē ko e kulo siviʻanga meʻá ki he silivá mo e fōnisé ki he koulá,+ʻOku pehē hono siviʻi ha taha ʻi he fakahīkihiki ʻoku fai kiate iá.*
22 Naʻa mo haʻo momosi ha vale ʻaki ha foʻi maka momosiʻO hangē ha uite kuo momosi ʻi ha maka tukiʻanga meʻá,Heʻikai pē mavahe ʻa ʻene valé meiate ia.
23 ʻOku totonu ke ke ʻilo lelei ʻa e fōtunga ʻo hoʻo tākangá.
Tokangaʻi lelei ʻa* hoʻo fanga sipí,+
24 He ko e koloá heʻikai tolonga ʻo taʻengata,+Pehē ki he ʻikai tolonga ha kalauni ʻo aʻu ki he ngaahi toʻutangata kotoa pē.
25 ʻOku puli atu ʻa e musie lanu matá, pea tupu mai ʻa e musie foʻoú,Pea ʻoku tānaki mai ʻa e mohuku ʻo e ngaahi moʻungá.
26 Ko e fanga kiʻi sipi tangatá ʻoku maʻu mei ai ho kofú,Pea ko e fanga kosi tangatá ʻoku maʻu mei ai ʻa e totongi ʻo ha ngoue.
27 Pea ʻe lahi feʻunga ʻa e huʻakau kosí ke fafanga ʻaki koe,Mo fafanga ʻaki ho fāmilí, pea moʻui ai hoʻo kau kaunangá.
Fakamatala ‘i Lalo
^ Fakafoʻilea, “ʻe fanauʻi.”
^ Fakafoʻilea, “ki ha sola.”
^ Fakafoʻilea, “Pea ki ha muli.”
^ Pe ngalingali, “ʻoku ʻikai ʻi he loto-moʻoni; ʻoku faifakamālohi.”
^ Fakafoʻilea, “ʻokú ne tāmalaki.”
^ Pe “ʻoku hola.”
^ Pe “tauteá.”
^ Pe “ki ha muli.”
^ Pe “faʻa hanu.”
^ Fakafoʻilea, “ʻa e mata ʻo hono kaungāmeʻá.”
^ Pe “Seoli mo ʻApatoní.”
^ Pe “ʻOku pehē ʻa e tangatá ʻo fakatatau ki hono fakahīkihikí.”
^ Pe “Tuku ho lotó ki; Tokanga ki.”
