Ngāue ʻa e Kau ʻApositolo 19:1-41
19 ʻI he lolotonga ʻa e ʻi Kolinitō ʻa ʻApolosí,+ naʻe fou atu ʻa Paula ʻi he ngaahi vāhenga ʻi lotofonuá ʻo ne ʻalu hifo ai ki ʻEfesō.+ Naʻá ne maʻu ai ha kau ākonga
2 peá ne pehē kiate kinautolu: “Naʻa mou maʻu ʻa e laumālie māʻoniʻoní ʻi hoʻomou hoko ko e kau tuí?”+ Naʻa nau tali ange kiate ia: “Kuo teʻeki ai ʻaupito haʻamau fanongo ʻoku ʻi ai ha laumālie māʻoniʻoni.”
3 Ko ia naʻá ne pehē ange: “Ko e hā leva ʻa e faʻahinga papitaiso naʻa mou papitaiso aí?” Naʻa nau pehē: “ʻI he papitaiso naʻe fai ʻe Sioné.”+
4 Naʻe pehē ʻe Paula: “Naʻe faipapitaiso ʻa Sione ʻi he papitaiso ko e fakaʻilonga ʻo e fakatomalá,+ ʻo tala ki he kakaí ke nau tui ki he tokotaha ʻoku muimui mai ʻiate iá,+ ʻa ia, kia Sīsū.”
5 ʻI he fanongo ki he meʻá ni, naʻa nau papitaiso leva ʻi he huafa ʻo e ʻEiki ko Sīsuú.
6 Pea ʻi hono hilifaki ʻe Paula hono nimá kiate kinautolú, naʻe ʻalu hifo ʻa e laumālie māʻoniʻoní kiate kinautolu,+ pea kamata ke nau lea ʻi he ngaahi lea muli mo kikite.+
7 Ko e kau tangata fakakātoa nai ʻe toko 12.
8 ʻI heʻene hū ki he sinakoké,+ naʻá ne lea loto-toʻa ʻi he māhina ʻe tolu, ʻo fai ʻa e ngaahi malanga pea fakaʻuhinga fakatupu tuipau ʻo fekauʻaki mo e Puleʻanga ʻo e ʻOtuá.+
9 Ka ʻi he fakafisi loto-fefeka ʻa e niʻihi ke tuí,* ʻo laukovi fekauʻaki mo e ʻAlunga ʻo e ʻEikí+ ʻi he ʻao ʻo e fuʻu kakaí, naʻá ne mavahe meiate kinautolu+ peá ne fakamavaheʻi ʻa e kau ākongá meiate kinautolu, ʻo ne fai fakaʻaho ha ngaahi malanga ʻi he holo ʻo e ʻapiako ʻo Tilanusí.
10 Naʻe hoko ʻa e meʻá ni ʻi he taʻu ʻe ua, ko ia naʻe fanongo ai ʻa e faʻahinga kotoa pē naʻe nofo ʻi he vahefonua ʻo ʻĒsiá ki he folofola ʻa e ʻEikí, fakatouʻosi ʻa e kau Siu mo e kau Kalisi.
11 Pea naʻe hokohoko ai pē hono fai ʻe he ʻOtuá ha ngaahi ngāue fakaofo makehe atu fakafou ʻi he nima ʻo Paulá,+
12 ʻo aʻu ē ki he ngaahi konga tupenu mo e ngaahi ʻēpani naʻe pā ki hono sinó naʻe ʻave ia ki he faʻahinga naʻe puké,+ pea naʻe matafi atu ʻa e ngaahi alangamahakí meiate kinautolu, pea haʻu ki tuʻa ʻa e ngaahi laumālie fulikivanú.+
13 Ka ko ha niʻihi ʻo e kau Siu naʻe ʻalu holo ʻo nau fai ʻa e kapusi tēmenioó naʻa nau feinga mo kinautolu foki ke ngāueʻaki ʻa e huafa ʻo e ʻEiki ko Sīsuú ki he faʻahinga naʻa nau maʻu ʻa e ngaahi laumālie fulikivanú; naʻa nau pehē: “ʻOku ou tuʻutuʻuni atu kiate kimoutolu ʻia Sīsū ʻa ia ʻoku malangaʻaki ʻe Paulá ke mou hū ki tuʻa.”+
14 Pea naʻe ʻi ai ha foha ʻe toko fitu ʻo ha ʻeiki taulaʻeiki Siu ko hono hingoá ko Siva naʻa nau fai ʻa e meʻá ni.
15 Ka ʻi he tali ki aí naʻe pehē ʻe he laumālie fulikivanú kiate kinautolu: “ʻOku ou ʻiloʻi ʻa Sīsū+ pea ʻoku ou lāuʻilo kia Paula;+ ka ko hai kimoutolu ia?”
16 ʻI he meʻa ko iá naʻe puna atu ʻa e tangata naʻe ʻi ai ʻa e laumālie fulikivanú kiate kinautolu, ʻo ne ikuʻi kinautolu, ko ia naʻa nau hola telefua* mo lavelavea mei he fale ko iá.
17 Naʻe hoko ʻa e meʻá ni ʻo ʻilo ki ai ʻa e faʻahinga kotoa, fakatouʻosi ʻa e kau Siu mo e kau Kalisi naʻa nau nofo ʻi ʻEfesoó; pea naʻe tō ha manavahē kiate kinautolu kotoa, pea ko e huafa ʻo e ʻEiki ko Sīsuú naʻe hoko ʻo fakahīkihikiʻi ai pē.
18 Pea ko e tokolahi ʻo e faʻahinga ko ia naʻe hoko ko e kau tuí naʻa nau haʻu ai pē ʻo vete mo fakamatala fakahāhā ʻenau ngaahi tōʻongá.
19 Ko e moʻoni, ko ha tokolahi ʻo e faʻahinga naʻa nau fai ʻa e ngaahi tōʻonga fakafaimaná naʻa nau ʻomai ʻenau ʻū tohí ʻo tutu kinautolu ʻi he ʻao ʻo e tokotaha kotoa.+ Pea naʻa nau fikaʻi ʻa honau mahuʻingá ʻo ʻilo ʻoku feʻunga mo e konga siliva ʻe 50,000.
20 Ko ia naʻe tupu mo kaukaua ai pē ʻa e folofola ʻa Sihová* ʻi ha tuʻunga mālohi.+
21 ʻI he hili ʻa e hoko ʻa e ngaahi meʻá ni, naʻe fakapapauʻi ʻe Paula,* ko e hili ko ia ʻene fou atu ʻi Masitōnia+ mo ʻĀkeiá, te ne fononga ki Selusalema.+ Naʻá ne pehē: “ʻI he hili ʻeku ʻalu ki aí, kuo pau ke u aʻu ki Loma.”+
22 Ko ia naʻá ne fekau atu leva ki Masitōnia ha toko ua ʻo e faʻahinga naʻe tokoni kiate iá, ko Tīmote+ mo ʻElasito,+ ka naʻá ne nofo atu pē ia ʻi ha vahaʻa taimi ʻi he vahefonua ʻo ʻĒsiá.
23 ʻI he taimi ko iá naʻe malanga hake ha fuʻu felāuaki+ ʻo fekauʻaki mo e ʻAlunga ʻo e ʻEikí.+
24 He ko ha tangata ko hono hingoá ko Temetelio, ko ha tufunga siliva ʻa ia naʻá ne ngaohi ʻa e ngaahi fale toputapu siliva ʻo ʻĀtemisí, naʻá ne ʻomi ki he kau tangata nima-meaʻá ha tupu lahi.+
25 Naʻá ne fakatahatahaʻi mai kinautolu mo e faʻahinga kehe naʻa nau ngāue ʻi he ngaahi meʻa peheé ʻo ne pehē: “Kau tangata, ʻoku mou ʻilo lelei ʻoku tau lakalakaimonuú mei he pisinisi ko ení.
26 Pea ʻoku mou sio mo fanongo, ʻo ʻikai ngata pē ʻi ʻEfesō+ ka ʻi he meimei kotoa ʻo e vahefonua ʻo ʻĒsiá ki hono fakalotoʻi ʻe Paula ko ení ha fuʻu kakai tokolahi pea mo fakatafokiʻi kinautolu ki ha toe fakakaukau ʻe taha, ʻo pehē ko e ngaahi ʻotua ʻoku ngaohi ʻe he nimá ʻoku ʻikai moʻoni ko ha ngaahi ʻotua ia.+
27 ʻIkai ngata aí, ʻoku ʻi ai ʻa e fakatuʻutāmaki ʻo ʻikai ngata pē ʻi he hoko ʻo lauʻikoviʻi ai ʻetau pisinisí ni ka ʻe toe hoko ai ʻa e temipale ʻo e fuʻu ʻotua fefine ko ʻĀtemisí ʻo vakai ki ai ko e meʻa noa pē, pea ko ia foki ʻa e tokotaha ʻoku lotu ki ai ʻa e vahefonua kotoa ʻo ʻĒsiá pea mo e māmani kuo nofoʻí, ʻe ʻikai ke toe ʻi ai hano lāngilangi.”
28 ʻI he fanongo ki he meʻá ni pea hoko ʻo tōlili aí, naʻe kamata ke kalanga atu ʻa e kau tangatá: “ʻOku lahi ʻa ʻĀtemisi ʻo e kau ʻEfesoó!”
29 Ko ia naʻe hoko ha fuʻu vālautuʻu ʻi he koló, pea naʻa nau fakavave kotoa atu ki he faiʻanga faivá, ʻo nau fusi atu ʻa Keio mo ʻAlisitako,+ ko e ongo Masitōnia, ko e kaungā-fononga ʻo Paula.
30 Pea naʻe loto-lelei ʻa Paula ke ne hū atu ki loto ki he kakaí, ka naʻe ʻikai pē ke fakaʻatā ia ʻe he kau ākongá.
31 Naʻa mo e niʻihi ʻo e kau pule ʻo e ngaahi kātoangá mo e ngaahi feʻauhí ʻa ia naʻa nau anga-fakakaumeʻa kiate iá naʻa nau ʻoatu ha pōpoaki ʻo kōlenga ange ke ʻoua te ne tuku ʻene moʻuí ki ha tuʻunga fakatuʻutāmaki ʻi haʻane ʻalu ki he faiʻanga faivá.
32 Ko hono moʻoní, naʻe kalanga ʻaki ʻe he fuʻu kakaí ʻa e ngaahi meʻa kehekehe; he naʻa nau vālautuʻu pea ko e tokolahi taha ʻo kinautolu naʻe ʻikai te nau ʻilo ʻa e ʻuhinga kuo nau fakataha mai aí.
33 Ko ia naʻa nau ʻomai ʻa ʻĀlekisānita mei he fuʻu kakaí pea naʻe teke atu ia ʻe he kau Siú ki muʻa, pea naʻe fakaʻilonga atu ʻaki ʻe ʻĀlekisānita hono nimá ʻo ne loto ke ne fai haʻane taukapo ki he kakaí.
34 Ka ʻi heʻenau fakatokangaʻi ko ha Siu iá, naʻe kamata ke nau kaikaila fakataha kotoa he houa nai ʻe ua: “ʻOku lahi ʻa ʻĀtemisi ʻo e kau ʻEfesoó!”
35 Pea ʻi he faifai pea fakanonga hifo ʻe he pule ʻo e koló ʻa e longoaʻa ʻa e fuʻu kakaí, naʻá ne pehē: “Kau tangata ʻo ʻEfesō, ko hai moʻoni ia ʻi he lotolotonga ʻo e faʻahinga ʻo e tangatá ʻoku ʻikai te ne ʻiloʻi ko ʻEfesoó ko e kolo ia ʻokú ne tauhi ʻa e temipale ʻo fuʻu ʻĀtemisí pea mo e ʻīmisi naʻe tō mei he langí?
36 Koeʻuhi ko e ngaahi meʻá ni ʻoku ʻikai ala fakakikihiʻi, ʻoku totonu ke mou nonga hifo pea ʻoua ʻe loto-ʻoho.
37 He kuo mou ʻomi ki heni ʻa e ongo tangatá ni ʻa ia ʻoku ʻikai ko ha ongo kaihaʻa mei he ngaahi temipalé pe ko ha ongo laukovi ki hotau ʻotua fefiné.
38 Ko ia kapau ʻoku maʻu ʻe Temetelio+ pea mo e kau tangata nima-meaʻa ʻoku ʻiate iá ha meʻa ke tukuakiʻi ai ha taha, ʻoku ʻi ai ʻa e ngaahi ʻaho hopo pea ʻoku ʻi ai mo e kau kōvana;* tuku kinautolu ke nau tauʻaki fakaʻilo.
39 Ka ʻo kapau ʻoku mou kumi ki ha meʻa ʻoku mahulu atu ia mei ai, kuo pau ke fakatonutonu ia ʻi ha fakataha fakalao.
40 He ʻoku tau ʻi he tuʻunga fakatuʻutāmaki moʻoni ʻi hano tukuakiʻi ki he fakatupu angatuʻu ʻi he fekauʻaki mo e meʻa ʻoku hoko ʻi he ʻaho ní, he ʻoku ʻikai ʻi ai ha ngaahi makatuʻunga ʻe lava ke tau ʻoatu ko ha ʻuhinga ia ki he hoko ko ia ʻa e fuʻu kakaí ni ʻo fakamoveuveú.”
41 Pea ʻi he hili ʻene leaʻaki ʻa e meʻá ni, naʻá ne tuku ange atu ʻa e fuʻu kakaí.
Fakamatala ‘i Lalo
^ Pe “ʻi he fakafefeka ʻa e niʻihi ʻo ʻikai tuí.”
^ Ko e foʻi lea faka-Kalisí ʻoku lava ke ʻuhinga ki he “vala maʻamaʻa; ʻo vala loto pē”; ʻikai ko e mātuʻaki telefua pe taʻevala.
^ Sio ki he Fakamatala Fakalahi A5.
^ Fakafoʻilea, “ʻe Paula ʻi hono laumālié.”
^ Ko e kōvana Loma ʻo ha vahefonua. Sio ki he Lea mo Hono ʻUhinga.
