Ngāue ʻa e Kau ʻApositolo 18:1-28
18 ʻI he hili ʻa e meʻá ni naʻe mavahe ʻa Paula mei ʻAtenisi ʻo ne ʻalu ki Kolinitō.
2 Pea naʻá ne ʻilo ai ha Siu ko hono hingoá ko ʻAkuila,+ ko ha tupuʻi Ponitō ʻa ia naʻá ne toki haʻu mei ʻĪtali mo Pīsila ko hono uaifí, koeʻuhi naʻe tuʻutuʻuni ʻe Kalautiasi ki he kau Siu kotoa pē ke nau mavahe mei Loma. Ko ia naʻá ne ʻalu kiate kinaua,
3 pea koeʻuhi naʻá ne fai ʻa e ngāue tatau mo kinaua, naʻá ne nofo ai ʻi hona ʻapí ʻo nau ngāue,+ he ko kinautolú ko e kau ngaohi-tēniti.
4 Naʻá ne fai ha malanga* ʻi he sinakoké+ ʻi he Sāpate kotoa pē+ pea naʻá ne fakatuipauʻi ai ha kau Siu mo ha kau Kalisi.
5 Pea ʻi he ʻalu hifo ʻa Sailosi+ mo Tīmote+ mei Masitōniá, naʻe kamata ke nōfoʻi lahi ʻa Paula ki he folofolá, ʻi he faifakamoʻoni ki he kau Siú ke fakamoʻoniʻi ko Sīsuú ko e Kalaisí ia.+
6 Ka ʻi he hili ʻenau hanganaki fakafepakiʻi ia mo leakoviʻí, naʻá ne tupeʻi atu hono kofú+ ʻo ne pehē kiate kinautolu: “Tuku ke ʻeke pē homou totó ki homou tumuʻakí.+ ʻOku ou ʻataʻatā au.+ Mei he taimí ni ʻo faai atu te u ʻalu au ki he kakai ʻo e ngaahi puleʻangá.”+
7 Ko ia naʻá ne ʻalu mei ai* ʻo ne hū ki he fale ʻo ha tangata ko hono hingoá ko Titiasi Siusitasa, ko ha tangata lotu ki he ʻOtuá, ʻa ia ko hono falé naʻe hoko atu ki he sinakoké.
8 Ka ko Kalisipō,+ ko e ʻōfisa tauhi ʻo e sinakoké, naʻá ne hoko ko ha tokotaha tui ki he ʻEikí, fakataha mo e kotoa ʻo hono falé. Pea ko e tokolahi ʻo e kau Kolinitō ko ia naʻe fanongó naʻe kamata ke nau tui pea nau papitaiso.
9 ʻIkai ngata aí, naʻe pehē ʻe he ʻEikí kia Paula ʻi ha vīsone ʻi he poʻulí: “ʻOua ʻe manavahē, kae hokohoko atu hoʻo leá ʻo ʻoua te ke longo,
10 he ʻoku ou ʻiate koe+ pea ʻe ʻikai ha tangata te ne ʻohofi koe ke fai ha kovi kiate koe; he ʻoku tokolahi ʻeku kakai ʻi he koló ni.”
11 Ko ia naʻá ne nofo ai ʻi he taʻu ʻe taha mo e māhina ʻe ono, ʻo ne faiakoʻaki ʻa e folofola ʻa e ʻOtuá ʻi honau lotolotongá.
12 Lolotonga ʻa e kōvana* ʻa Kalio ʻi ʻĀkeiá, naʻe fakatahataha ʻa e kau Siú ʻo ʻohofi ʻa Paula pea taki atu ia ki he nofoʻanga fakamāú,
13 ʻo nau pehē: “Ko e tangatá ni ʻokú ne fakalotoʻi ʻa e kakaí ke nau lotu ki he ʻOtuá ʻi ha founga ʻoku kehe ia mei he laó.”
14 Ka ʻi he teu ke lea ʻa Paulá, naʻe pehē ʻe Kalio ki he kau Siú: “Ko hono moʻoní, kapau ko ha faʻahinga tōʻonga hala pe ko ha faihia mamafa ia, ʻe ʻuhinga lelei kiate au ke u anga-kātaki ʻo fanongo atu kiate kimoutolu.
15 Ka ʻo kapau ko ha fakakikihi pē ʻi he lea mo e ngaahi hingoa pea mo hoʻomou lao ʻamoutolú,+ ko kimoutolu ia kuo pau ke mou vakaiʻi iá. ʻOku ʻikai te u fie hoko au ko ha fakamaau ʻi he ngaahi meʻá ni.”
16 ʻI he meʻa ko iá naʻá ne kapusi kinautolu mei he nofoʻanga fakamāú.
17 Ko ia naʻa nau hanga kotoa ʻo puke ʻa Sositene+ ko e ʻōfisa tauhi ʻo e sinakoké, pea kamata ke nau haha ia ʻi muʻa ʻi he nofoʻanga fakamāú. Ka naʻe ʻikai ʻaupito ke kau ʻa Kalio ia ʻi he ngaahi meʻá ni.
18 Kae kehe, ʻi he hili ha nofo atu ai ʻa Paula ʻi ha toe ngaahi ʻaho, naʻá ne lea māvae ki he fanga tokouá peá ne tukufolau atu ki Sīlia, ʻo ne ʻalu fakataha mo Pīsila mo ʻAkuila. Naʻe kosi nonou ʻa hono ʻulú ʻi Senikelea,+ he naʻá ne fai ha fuakava.
19 Ko ia naʻa nau aʻu ki ʻEfesō, pea naʻá ne tuku kinaua ai; ka naʻá ne hū ki he sinakoké ʻo ne fakaʻuhinga mo e kau Siú.+
20 Neongo naʻa nau toutou kole kiate ia ke ne nofo fuoloa atu ai, naʻe ʻikai te ne loto ki ai
21 ka naʻá ne lea māvae peá ne tala ange kiate kinautolu: “Te u toe foki mai kiate kimoutolu, kapau ʻe finangalo ki ai ʻa Sihova.”* Pea naʻá ne tukufolau atu mei ʻEfesō
22 ʻo ne aʻu ki Sesalia. Pea naʻá ne ʻalu hake* ʻo feʻiloaki mo e fakatahaʻangá peá ne ʻalu hifo leva ki ʻAniteoke.+
23 ʻI he hili ʻene nofo ai ʻi ha vahaʻa taimi, naʻá ne mavahe ʻo ne ʻalu mei he feituʻu ki he feituʻu ʻi he fonua ko Kalētia mo Filisiá,+ ʻo ne fakaivimālohiʻi ʻa e kau ākongá kotoa.+
24 Pea ko ha Siu ko hono hingoá ko ʻApolosi,+ ko ha tupuʻi ʻAlekisanitulia, naʻá ne aʻu hifo ki ʻEfesō; ko ha tangata pōtoʻi lea ia ʻa ia naʻá ne ʻilo lahi ki he Folofolá.
25 Ko e tangatá ni naʻe fakahinohinoʻi* ia ʻi he ʻalunga ʻo Sihová,* pea ʻi he ‘mafana hono lotó ʻi he laumālié,’ naʻá ne lea mo faiako totonu ʻaki ʻa e ngaahi meʻa fekauʻaki mo Sīsuú, ka ko e papitaiso pē naʻe fai ʻe Sioné naʻá ne maheni mo iá.
26 Naʻe kamata ke ne lea loto-toʻa ʻi he sinakoké pea ʻi he fanongo ʻa Pīsila mo ʻAkuila+ kiate iá, naʻá na ʻave ia ʻo nau ō peá na fakamatalaʻi ʻo toe totonu ange ʻa e ʻalunga ʻo e ʻOtuá kiate ia.
27 ʻIkai ko ia pē, koeʻuhi naʻá ne loto ke ʻalu ki ʻĀkeia, naʻe tohi ai ʻa e fanga tokouá ki he kau ākongá, ʻo enginaki kiate kinautolu ke nau tali lelei ia. Ko ia ʻi heʻene aʻu atu ki aí, naʻá ne tokoniʻi lahi ʻa e faʻahinga naʻa nau hoko ko e kau tui fakafou ʻi he ʻofa maʻataʻatā ʻa e ʻOtuá;
28 he ʻi he ʻao ʻo e kakaí pea ʻaki ʻa e mālohi lahi naʻá ne fakamoʻoniʻi fakaʻāuliliki naʻe hala ʻa e kau Siú, ʻo fakahaaʻi kiate kinautolu mei he Folofolá ko Sīsū ʻa e Kalaisí.+
Fakamatala ‘i Lalo
^ Pe “Naʻá ne fakaʻuhinga mo kinautolu.”
^ ʻA ia, ko e sinakoké.
^ Ko e kōvana Loma ʻo ha vahefonua. Sio ki he Lea mo Hono ʻUhinga.
^ Sio ki he Fakamatala Fakalahi A5.
^ Ngalingali ki Selusalema.
^ Pe “fakahinohinoʻi tala ngutu.”
^ Sio ki he Fakamatala Fakalahi A5.
