Nōmipa 30:1-16
30 Naʻe lea leva ʻa Mōsese ki he ngaahi ʻulumotuʻa+ ʻo e ngaahi matakali ʻo ʻIsilelí, ʻo pehē: “Ko e folofola eni kuo tuʻutuʻuni mai ʻe Sihová:
2 Kapau ʻe fai ʻe ha tangata ha fuakava+ kia Sihova pe fai ha fakapapau+ ke hilifaki kiate ia ha fuakava ʻo e fakaʻehiʻehí, kuo pau ke ʻoua naʻá ne taʻefai ki heʻene leá.+ ʻOku totonu ke ne fai ʻa e meʻa kotoa pē naʻá ne fuakava te ne faí.+
3 “Pea kapau ʻe fai ʻe ha fefine ha fuakava kia Sihova pe ʻokú ne hilifaki kiate ia ha fuakava ʻo e fakaʻehiʻehí lolotonga ia ʻokú ne kei siʻi pea ʻokú ne nofo ʻi he fale ʻo ʻene tamaí
4 pea ʻoku fanongo ʻa ʻene tamaí ki heʻene fuakavá pe ko ʻene fuakava ʻo e fakaʻehiʻehi ʻa ia kuó ne hilifaki kiate iá pea ʻoku ʻikai ke fai ʻe heʻene tamaí ha fakafepaki ki ai, ko ʻene ngaahi fuakavá kotoa ʻe fakahoko, pea ko e fuakava ʻo e fakaʻehiʻehi kotoa ʻa ia kuó ne hilifaki kiate iá ʻe fakahoko.
5 Ka ʻo kapau ʻe taʻofi ia ʻe heʻene tamaí ʻi heʻene fanongo kuó ne hilifaki kiate ia ʻa e ngaahi fuakavá pe ko e ngaahi fuakava ʻo e fakaʻehiʻehí, ʻe ʻikai ke fakahoko ia. ʻE fakamolemoleʻi ia ʻe Sihova koeʻuhí he naʻe taʻofi ia ʻe heʻene tamaí.+
6 “Kae kehe, kapau te ne mali mo ha husepāniti lolotonga ia ʻene ʻi he malumalu ʻo ʻene fuakavá pe ko e palōmesi fakavave kuó ne hilifaki kiate iá
7 pea ʻoku fanongo ki ai ʻa hono husepānití pea ʻikai te ne fai ha fakafepaki ʻi he ʻaho ʻo ʻene fanongo ki aí, ko ʻene ngaahi fuakava pe ko ʻene ngaahi fuakava ʻo e fakaʻehiʻehi ʻa ia kuó ne hilifaki kiate iá ʻe fakahoko.
8 Ka ʻo kapau ʻe taʻofi ia ʻe hono husepānití ʻi he ʻaho ʻo ʻene fanongo ki aí, te ne fakataʻeʻaongaʻi ai ʻa e fuakava pe ko e palōmesi fakavave naʻe hilifaki ʻe he fefiné kiate iá,+ pea ʻe fakamolemoleʻi ia ʻe Sihova.
9 “Ka ʻo kapau ʻe fai ʻe ha uitou pe ko ha fefine kuo vete ha fuakava, ko e meʻa kotoa pē kuó ne hilifaki kiate iá ʻe haʻisia ia ki ai.
10 “Kae kehe, kapau naʻe hilifaki ʻe ha fefine kiate ia ʻa e fuakavá pe ko e fuakava ʻo e fakaʻehiʻehí lolotonga ia ʻene ʻi he fale ʻo hono husepānití
11 pea kuo fanongo ki ai ʻa hono husepānití pea ʻikai te ne fakafepaki pe taʻeloto ki ai, ko e kotoa ʻene ngaahi fuakavá pe ko ha fuakava pē ʻo e fakaʻehiʻehi ʻa ia kuó ne hilifaki kiate iá ʻe fakahoko.
12 Ka ʻo kapau kuo hanga ʻe hono husepānití ʻi he ʻaho ʻo ʻene fanongo ki aí ʻo fakataʻeʻaongaʻi fakaʻaufuli ha ngaahi fuakava pe ko ha fuakava pē ʻo e fakaʻehiʻehí kuó ne fai ha fakapapau ki ai, ʻe ʻikai ke fakahoko ia.+ Naʻe fakataʻeʻaongaʻi ia ʻe hono husepānití, pea ʻe fakamolemoleʻi ia ʻe Sihova.
13 ʻI he fekauʻaki mo ha fuakava pē pe ko ha fakapapau pē ʻoku kau ki ai ha fuakava ʻo e fakaʻehiʻehí ke fai hano fakaʻikaiʻi-kita, ko hono husepānití ʻoku totonu ke ne fakaʻatā iá pe ko hono husepānití ʻoku totonu ke ne fakataʻeʻaongaʻi iá.
14 Ka ʻo kapau ʻoku ʻikai fai ʻe hono husepānití ha fakafepaki ʻe taha ki ai ʻi he ʻaho ki he ʻaho, ʻokú ne toe fakaʻatā ai foki ʻa e kotoa ʻo ʻene ngaahi fuakavá pe ko e kotoa ʻo ʻene ngaahi fuakava ʻo e fakaʻehiʻehi ʻoku ʻiate iá. ʻOkú ne fakaʻatā ia koeʻuhí he naʻe ʻikai te ne fai ha fakafepaki ʻi he ʻaho naʻá ne fanongo ai ki heʻene fai iá.
15 Ka ʻo kapau te ne fakataʻeʻaongaʻi ia ki mui, ʻi ha taimi hili ʻa e ʻaho ʻo ʻene fanongo ki aí, te ne fua ʻa e ngaahi nunuʻa ʻo e halaia ʻa e fefiné.+
16 “Ko e ngaahi lao eni naʻe tuʻutuʻuni ʻe Sihova kia Mōsese ʻi he fekauʻaki mo ha husepāniti mo hono uaifí, pea ʻi he fekauʻaki mo ha tamai mo hono ʻofefine kei siʻi ʻoku nofo ʻi hono falé.”
