Ua Kalonikali 34:1-33
34 Naʻe taʻu valu ʻa Siosaia+ ʻi heʻene hoko ko e tuʻí, pea naʻá ne pule ʻi he taʻu ʻe 31 ʻi Selusalema.+
2 Naʻá ne fai ʻa e meʻa naʻe totonu ʻi he vakai mai ʻa Sihová peá ne ʻaʻeva ʻi he ngaahi ʻalunga ʻo Tēvita ko ʻene kuí, pea naʻe ʻikai te ne afe ki he toʻomataʻú pe ki he toʻohemá.
3 ʻI he taʻu hono 8 ʻo ʻene pulé, lolotonga ʻene kei tamasiʻí, naʻe kamata ke ne kumi ki he ʻOtua ʻo ʻene kui ko Tēvitá;+ pea ʻi he taʻu hono 12 ʻo ʻene pulé, naʻe kamata ke ne fakamaʻa mei Siuta mo Selusalema+ ʻa e ngaahi potu māʻolungá+ mo e ngaahi pou ʻakau toputapú,* ko e ngaahi ʻīmisi kuo tongí,+ pea mo e ngaahi ʻīmisi mētalé.*
4 ʻIkai ko ia pē, naʻa nau holoki hifo ʻa e ngaahi ʻōlita ʻo e ngaahi Pēalí ʻi hono ʻaó, peá ne tā hifo ʻa e ngaahi ʻaiʻanga ʻinisēnisi naʻe ʻi ʻolunga ʻiate kinautolú. Naʻá ne haveki foki ʻa e ngaahi pou ʻakau toputapú,* ngaahi ʻīmisi kuo tongí, mo e ngaahi ʻīmisi mētalé* ʻo laiki ke efuefu pea afuhi ia ʻi he ngaahi faʻitoka ʻo e faʻahinga naʻa nau faʻa feilaulau ki aí.+
5 Pea naʻá ne tutu ʻa e ngaahi hui ʻo e kau taulaʻeikí ʻi honau ngaahi ʻōlitá,+ ʻo ne fakamaʻa ai ʻa Siuta mo Selusalema.
6 Pea ʻi he ngaahi kolo ʻo Manasé, ʻIfalemí,+ Simioné, ʻo aʻu ki Nafitalai, mo e ngaahi feituʻu maumau takatakai ʻiate kinautolú,
7 naʻá ne holoki hifo ʻa e ngaahi ʻōlitá peá ne laiki ke efuefu ʻa e ngaahi pou ʻakau toputapú* mo e ngaahi ʻīmisi kuo tongí;+ peá ne tā hifo ʻa e ngaahi ʻaiʻanga ʻinisēnisi kotoa naʻe ʻi he fonua kotoa ʻo ʻIsilelí,+ pea ʻi he hili iá naʻá ne foki ki Selusalema.
8 ʻI he taʻu hono 18 ʻo ʻene pulé, ʻi he hili ʻene fakamaʻa ʻa e fonuá mo e temipalé,* naʻá ne fekauʻi atu ʻa Sāfani+ ko e foha ʻo ʻAsaliá, mo Māseia ko e ʻeiki ʻo e koló, pea mo Sioa ko e foha ʻo Sioahasi ko e tokotaha hiki fakamatalá ke nau fakaleleiʻi ʻa e fale ʻo Sihova ko hono ʻOtuá.+
9 Naʻa nau ʻalu atu kia Hilikaia ko e taulaʻeiki lahí ʻo ʻoange kiate ia ʻa e paʻanga naʻe ʻomi ki he fale ʻo e ʻOtuá, ʻa ia naʻe tānaki ʻe he kau Līvai ko e kau leʻo matapaá meia Manase, ʻIfalemi, pea mo e toenga kotoa ʻo ʻIsilelí,+ pehē foki mei Siuta, Penisimani, pea mo e kakai ʻo Selusalemá.
10 Naʻa nau ʻoange leva ia ki he faʻahinga naʻe fakanofo ke nau tokangaʻi ʻa e ngāue ʻi he fale ʻo Sihová. Naʻe ngāueʻaki leva ia ʻe he kau ngāue ʻi he fale ʻo Sihová ke monomono mo fakaleleiʻiʻaki ʻa e falé.
11 Naʻa nau ʻoange ia ki he kau tangata nima-meaʻá mo e kau langá ke fakatauʻaki ʻa e ngaahi maka kuo tā mo e papa ke poupou mo pimi ʻaki ʻa e ngaahi fale kuo tuku ʻe he ngaahi tuʻi ʻo Siutá ke popo mo ʻauhá.+
12 Pea naʻe faitōnunga ʻa e kau tangatá ʻi hono fai ʻa e ngāué.+ Naʻe fakanofo ʻa e kau Līvai ko Seati mo ʻOpataia ʻo e haʻa Mēlalí,+ mo Sākalaia mo Mēsuilame ʻo e haʻa Kōhaté,+ ke pule kiate kinautolu. Pea ko e kau Līvaí, ʻa ia ko e kau pōtoʻi tā meʻalea kotoa kinautolu,+
13 naʻa nau tokangaʻi ʻa e kau fetuku meʻá* pea nau pule ki he faʻahinga kotoa naʻa nau fai ʻa e ngaahi ngāue kehekehé; pea ko e kau Līvai ʻe niʻihi ko e kau sekelitali, kau ʻōfisa, mo e kau leʻo matapā.+
14 Pea ʻi heʻenau toʻo ki tuʻa ʻa e paʻanga naʻe ʻomi ki he fale ʻo Sihová,+ naʻe maʻu ai ʻe Hilikaia ko e taulaʻeikí ʻa e tohi Lao ʻa Sihova+ naʻe fakafou mai ʻia* Mōsesé.+
15 Ko ia naʻe pehē ange ʻe Hilikaia kia Sāfani ko e sekelitalí: “Kuó u maʻu ʻa e tohi Laó ʻi he fale ʻo Sihová.” Ko ia naʻe ʻoange ʻe Hilikaia ʻa e tohí kia Sāfani.
16 Naʻe ʻave leva ʻe Sāfani ʻa e tohí ki he tuʻí peá ne tala ange kiate ia: “ʻOku fai ʻe hoʻo kau sevānití ʻa e meʻa kotoa pē naʻe vaheʻi ange kiate kinautolú.
17 Kuo nau huhua atu ʻa e paʻanga ko ia naʻe maʻu ʻi he fale ʻo Sihová, pea kuo nau ʻoange ia ki he kau tangata kuo fakanofó mo e faʻahinga ʻoku nau fai ʻa e ngāué.”
18 Naʻe tala ange foki ʻe Sāfani ko e sekelitalí ki he tuʻí: “ʻOku ʻi ai ha tohi naʻe ʻomai kiate au+ ʻe Hilikaia ko e taulaʻeikí.” Pea naʻe kamata ke lau ia ʻe Sāfani ʻi he ʻao ʻo e tuʻí.+
19 ʻI he fanongo pē ʻa e tuʻí ki he ngaahi lea ʻo e Laó, naʻá ne hae ʻa hono ngaahi kofú.+
20 Naʻe fai leva ʻe he tuʻí ʻa e tuʻutuʻuni ko ení kia Hilikaia, ʻAhikami+ ko e foha ʻo Sāfaní, ʻApitoni ko e foha ʻo Maiká, Sāfani ko e sekelitalí, pea mo ʻAsaia ko e sevāniti ʻa e tuʻí, ʻo pehē:
21 “Mou ō ʻo fehuʻi kia Sihova koeʻuhi ko au, pea koeʻuhi ko e faʻahinga ʻoku toe ʻi ʻIsileli pea ʻi Siutá ʻo fekauʻaki mo e ngaahi lea ʻo e tohi kuo maʻú; he ko e houhau ʻa Sihova ʻe hoko kiate kitautolú ʻoku lahi, koeʻuhí naʻe ʻikai ke fakahoko ʻe heʻetau fanga kuí ʻa e folofola ʻa Sihová ʻaki hono tauhi ʻa e meʻa kotoa kuo hiki ʻi he tohi ko ení.”+
22 Ko ia naʻe ʻalu atu ʻa Hilikaia mo e faʻahinga naʻe fekauʻi ʻe he tuʻí kia Hūlita ko e palōfita fefiné.+ Ko e uaifi ia ʻo Salumi ko e foha ʻo Tikiva ko e foha ʻo Hāhasi, ko e tokotaha tauhi ʻo e tukuʻanga valá, pea naʻá ne nofo ʻi he Vahefonua Hono Ua ʻo Selusalemá; pea naʻa nau lea ʻi ai kiate ia.+
23 Naʻá ne pehē ange kiate kinautolu: “Ko e meʻa eni ʻoku folofolaʻaki ʻe Sihova ko e ʻOtua ʻo ʻIsilelí, ‘Tala ki he tangata ʻa ia naʻá ne fekauʻi mai kimoutolu kiate aú:
24 “Ko eni ʻa e folofola ʻa Sihová, ‘Te u ʻomi ʻa e mala ki he feituʻú ni mo hono kakaí,+ ʻa e mala kotoa ʻoku hiki ʻi he tohi+ ʻa ia naʻa nau lau ʻi he ʻao ʻo e tuʻi ʻo Siutá.
25 Koeʻuhi kuo nau liʻaki au+ pea ʻoku nau fai ʻa e ngaahi feilaulau ke kohu ki he ngaahi ʻotua kehé koeʻuhi ke fakalotomamahiʻi ai au+ ʻaki ʻa e ngāue kotoa ʻa honau nimá, ʻe kakaha ʻa ʻeku houhaú ki he feituʻú ni pea ʻe ʻikai ke ʻosi ia.’”+
26 Ka ki he tuʻi ʻo Siutá ʻa ia naʻá ne fekauʻi mai kimoutolu ke fehuʻi kia Sihová, ko e meʻa eni te mou leaʻaki kiate iá, “Ko e meʻa eni ʻoku folofolaʻaki ʻe Sihova ko e ʻOtua ʻo ʻIsilelí: ‘ʻI he fekauʻaki mo e ngaahi lea kuó ke fanongoá,+
27 koeʻuhí naʻe ongongofua* ho lotó pea naʻá ke fakavaivaiʻi koe ʻi he ʻao ʻo e ʻOtuá ʻi hoʻo fanongo ki heʻene folofola ʻo fekauʻaki mo e feituʻú ni mo hono kakaí peá ke fakavaivaiʻi koe ʻi hoku ʻaó ʻo ke hae ho ngaahi kofú pea tangi ʻi hoku ʻaó, kuó u fanongo foki kiate koe,+ ko e fakahaaʻi ia ʻe Sihová.
28 Ko e ʻuhinga ia te u fakatahaʻi ai koe ki hoʻo fanga kuí,* pea te ke toka ʻo mālōlō ʻi ho faʻitoká ʻi he melino, pea ʻe ʻikai ke sio ho matá ki he mala kotoa te u ʻomi ki he feituʻú ni mo hono kakaí.’”’”+
Pea naʻa nau ʻalu mo e talí ki he tuʻí.
29 Ko ia naʻe ʻoatu ʻe he tuʻí ha fekau pea ui mai ʻa e kau mātuʻa kotoa ʻo Siuta mo Selusalemá.+
30 ʻI he hili iá, naʻe ʻalu hake ʻa e tuʻí ki he fale ʻo Sihová mo e kau tangata kotoa ʻo Siutá, mo e kakai ʻo Selusalemá, mo e kau taulaʻeikí, pea mo e kau Līvaí—ʻa e kakaí kotoa, ʻa e lalahi mo e iiki. Naʻá ne lau ʻo nau fanongo ki he ngaahi lea kotoa ʻo e tohi ʻo e fuakava ʻa ia naʻe maʻu ʻi he fale ʻo Sihová.+
31 Naʻe tuʻu ʻa e tuʻí ʻi hono tuʻuʻangá ʻo ne fai ha fuakava*+ ʻi he ʻao ʻo Sihová, te ne muimui kia Sihova pea tauhi ki heʻene ngaahi fekaú, ko ʻene ngaahi fakamanatú, mo ʻene ngaahi tuʻutuʻuní ʻaki ʻa hono lotó kotoa pea mo ʻene moʻuí kotoa+ ʻi heʻene fai ki he ngaahi lea ʻo e fuakava naʻe hiki ʻi he tohí ni.+
32 ʻIkai ko ia pē, naʻá ne ʻai ʻa e faʻahinga kotoa naʻe ʻi Selusalema mo Penisimaní ke nau loto-taha ki ai. Pea naʻe ngāue ʻa e kakai ʻo Selusalemá ʻo fakatatau ki he fuakava ʻa e ʻOtuá, ʻa e ʻOtua ʻo ʻenau fanga kuí.+
33 Pea naʻe toʻo leva ʻe Siosaia ʻa e ngaahi meʻa fakalielia* kotoa mei he ngaahi fonua kotoa ʻo e kau ʻIsilelí,+ peá ne ʻai ʻa e tokotaha kotoa ʻi ʻIsileli ke tauhi kia Sihova ko honau ʻOtuá. Lolotonga ʻene moʻuí* naʻe ʻikai te nau afe mei he muimui kia Sihova ko e ʻOtua ʻo ʻenau fanga kuí.
Fakamatala ‘i Lalo
^ Sio ki he Lea mo Hono ʻUhinga.
^ Pe “ngaahi ʻīmisi mētale kuo haká.”
^ Sio ki he Lea mo Hono ʻUhinga.
^ Pe “ngaahi ʻīmisi mētale kuo haká.”
^ Sio ki he Lea mo Hono ʻUhinga.
^ Fakafoʻilea, “falé.”
^ Pe “kau ngāue leipá.”
^ Fakafoʻilea, “fakafou ʻi he nima ʻo.”
^ Fakafoʻilea, “molū.”
^ Ko ha kupuʻi lea fakaemaau eni ki he maté.
^ Pe “fakafoʻou ʻa e fuakava.”
^ Pe “ngaahi ʻaitolí.”
^ Fakafoʻilea, “ʻI he kotoa ʻa hono ngaahi ʻahó.”
