Ua Sāmiuela 16:1-23
16 ʻI he fakalaka siʻi atu ʻa Tēvita mei he tumutumú,+ naʻe ʻi ai ʻa Sipa,+ ʻa e tamaioʻeiki ʻa Mefipōsetí,+ ke fakafetaulaki kiate ia fakataha mo ha ongo ʻasi kuo teuteu, pea naʻe fakaheka ai ha foʻi mā ʻe 200, mo e takaonga fuamelie* ʻe 100, mo e takaonga fuaʻiʻakau ʻo e faʻahitaʻu māfaná* ʻe 100, pea mo ha fuʻu siā uaine.+
2 Naʻe pehē ange leva ʻe he tuʻí kia Sipa: “Ko e hā kuó ke ʻomi ai ʻa e ngaahi meʻa ko ení?” Naʻe tali ange ʻe Sipa: “Ko e ongo ʻasí ke heka ai ʻa e fāmili ʻo e tuʻí, ko e maá mo e fuaʻiʻakau ʻo e faʻahitaʻu māfaná ke kai ʻe he kau talavoú, pea ko e uainé ke inu ʻe he faʻahinga kuo nau ongosia ʻi he toafá.”+
3 Naʻe pehē ange leva ʻe he tuʻí: “Pea ko fē ʻa e foha* ʻo ho ʻeikí?”+ ʻI he meʻá ni naʻe pehē ange ʻe Sipa ki he tuʻí: “ʻOkú ne nofo pē ʻi Selusalema, he naʻá ne pehē, ‘Ko e ʻahó ni ʻe fakafoki mai ai ʻe he fale ʻo ʻIsilelí ʻa e pule fakatuʻi ʻa ʻeku tamaí kiate au.’”+
4 Pea naʻe pehē ange ʻe he tuʻí kia Sipa: “Vakai! Ko e meʻa kotoa pē ʻa Mefipōsetí ʻoku ʻaʻau ia.”+ Naʻe tali ange ʻe Sipa: “ʻOku ou punou atu ʻi ho ʻaó. ʻOfa ke ke leleiʻia ʻiate au, ʻe hoku ʻeiki ko e tuʻí.”+
5 ʻI he aʻu ʻa Tuʻi Tēvita ki Pahulimí, naʻe hū mai ha tangata mei he fāmili ʻo e fale ʻo Saulá ko hono hingoá ko Simi,+ ko e foha ʻo Kela, ʻo ne kaikaila ʻaki ha ngaahi talatuki ʻi heʻene fakaofiofi maí.+
6 Naʻá ne tolomakaʻi ʻa Tēvita mo e kau sevāniti kotoa ʻa Tuʻi Tēvitá, pea pehē ki he kakai kotoa pea mo e kau toʻa naʻe ʻi hono toʻomataʻú mo hono toʻohemá.
7 Naʻe pehē ʻe Simi ʻi heʻene talatuki naʻe faí: “ʻAlu, ʻalu, ʻa koe ko e tangata halaia ʻi he toto! ʻA koe ko e koto taʻeʻaonga!
8 Kuo fakafoki ʻe Sihova kiate koe ʻa e halaia kotoa ʻi he toto ʻo e fale ʻo Saulá, ʻa ia ko hono tuʻungá ē kuó ke pule ai ko e tuʻí, ka ʻoku foaki ʻe Sihova ʻa e tuʻunga-tuʻí ki he nima ʻo ʻApisalome ko ho fohá. Pea kuo maʻu koe ʻe he malá koeʻuhi ko ha tangata halaia koe ʻi he toto!”+
9 Naʻe pehē ange leva ʻe ʻApisai ko e tama ʻa Seluvaiá+ ki he tuʻí: “Ko e hā ke talatukiʻi ai ʻe he kulī maté ni+ ʻa hoku ʻeiki ko e tuʻí?+ Tuku muʻa ke u laka atu ʻo tuʻusi hono ʻulú.”+
10 Ka naʻe pehē ʻe he tuʻí: “Ko e hā leva haʻamo kaunga ki ai, ʻa kimoua ongo tama ʻa Seluvaiá?+ Tuku pē ke ne talatukiʻi au,+ he kuo folofola ʻa Sihova kiate ia,+ ‘Talatukiʻi ʻa Tēvita!’ Ko ia ko hai ia te ne pehē, ‘Ko e hā ʻokú ke fai ai ʻa e meʻá ni?’”
11 Naʻe pehē ange leva ʻe Tēvita kia ʻApisai mo ʻene kau sevānití kotoa: “Ko eni ko hoku fohá tonu, ʻa ia naʻe ʻalu atu mei hoku sino ʻoʻokú, ʻokú ne kumi ki heʻeku moʻuí,+ pea huanoa ai eni ko ha tangata Penisimaní!+ Tuku ai pē ia ke ne talatukiʻi au, he kuo tala ʻe Sihova ke ne fai ia!
12 ʻE ʻafio nai ʻa Sihova ki heʻeku faingataʻaʻiá,+ pea ʻe toe ʻomai ʻe Sihova ha lelei kiate au kae ʻikai ko e ngaahi talatuki kuo kaila ʻaki kiate au ʻi he ʻaho ní.”+
13 Ko ia naʻe ʻalu hifo ai pē ʻa Tēvita mo ʻene kau tangatá ʻi he halá lolotonga ia ʻa e lue fakamatatatau atu ʻa Simi kiate ia ʻi he veʻe moʻungá, ʻo ne kaikaila ʻaki ʻa e ngaahi talatukí+ mo tolo atu ʻa e maká pea mo laku atu ʻa e efu lahi ʻaupito.
14 Pea naʻe faifai ʻo aʻu ʻa e tuʻí mo e kakai kotoa naʻe ʻiate iá ki he feituʻu naʻa nau fononga ki aí kuo nau ongosia, pea naʻa nau maʻu ha mālōlō.
15 Lolotonga ia, naʻe aʻu ʻa ʻApisalome mo e kau tangata kotoa ʻo ʻIsilelí ki Selusalema, pea naʻe ʻiate ia ʻa ʻAhitofeli.+
16 ʻI he aʻu atu ʻa Hūsai+ ko e tangata mei he haʻa ʻĀlekí,+ ʻa e kaungāmeʻa* ʻo Tēvitá, kia ʻApisalomé, naʻe pehē ʻe Hūsai kia ʻApisalome: “Ke lākoifie ʻa e ʻAfioná!+ Ke lākoifie ʻa e ʻAfioná!”
17 ʻI he meʻá ni, naʻe pehē ʻe ʻApisalome kia Hūsai: “Ko hoʻo ʻofa mateaki eni ki ho kaungāmeʻá? Ko e hā naʻe ʻikai te ke ʻalu ai mo ho kaungāmeʻá?”
18 Ko ia naʻe pehē ʻe Hūsai kia ʻApisalome: “ʻIkai, ʻoku ou kau ki he faʻahi ʻa e tokotaha kuo fili ʻe Sihová, ʻa e kakaí ni, pea mo e kotoa ʻo e kau tangata ʻo ʻIsilelí. Te u nofo mo ia.
19 Pea ʻoku ou toe pehē, Ko hai te u tauhi ki aí? ʻIkai ko hono fohá? Hangē pē ko ʻeku tauhi ki hoʻo tamaí, ʻe pehē pē ʻa ʻeku tauhi kiate koé.”+
20 Naʻe pehē ange leva ʻe ʻApisalome kia ʻAhitofeli: “Fai mai haʻamou faleʻi kiate au.+ Ko e hā te tau faí?”
21 Ko ia naʻe pehē ʻe ʻAhitofeli kia ʻApisalome: “Ke ke mohe* mo e kau sinifu ʻa hoʻo tamaí,+ ʻa kinautolu naʻá ne tuku ke nau tokangaʻi ʻa e falé.*+ Pea ʻe fanongo leva ʻa ʻIsileli kotoa kuó ke ʻai koe ke ke hoko ʻo namukū ki hoʻo tamaí, pea ko e faʻahinga ʻoku nau poupou kiate koé te nau loto-toʻa ai.”
22 Ko ia naʻa nau fokotuʻu ha tēniti moʻo ʻApisalome ʻi he funga falé,+ pea naʻe mohe ʻa ʻApisalome mo e kau sinifu ʻa ʻene tamaí+ ʻo mamata ki ai ʻa ʻIsileli kotoa.+
23 ʻI he ngaahi ʻaho ko iá ko e faleʻi naʻe fai ʻe ʻAhitofelí+ naʻe fai ʻa e vakai ki ai ko e* folofola ʻa e ʻOtua moʻoní. Ko e anga ia ʻo e vakai ʻa Tēvita pea mo ʻApisalome fakatouʻosi ki he faleʻi kotoa ʻa ʻAhitofelí.
Fakamatala ‘i Lalo
^ Tautautefito ki he fikí pea mo e teití nai.
^ ʻOku ʻuhinga eni ki he kālepi tauaki kuo fakafuo ʻo hangē ha keké.
^ Pe “mokopuna tangata.”
^ Pe “kaungāmeʻa falalaʻanga.”
^ Pe “fehokotaki fakasino.”
^ Pe “palasí.”
^ Pe “ʻo hangē ia ko e kumi faleʻi ʻa ha taha ki he.”
