Ua Kolinitō 5:1-21
5 He ʻoku tau ʻilo kapau ʻe holoki*+ ʻa hotau fale fakaemāmaní, ʻa e tēnití ni, te tau maʻu ha fale mei he ʻOtuá, ko ha fale ʻoku ʻikai ngaohi ʻe he nimá,+ ʻa ia ʻoku taʻengata ʻi hēvani.
2 He ko hono moʻoní ʻoku tau toʻe ʻi he fale* ko ení, ʻo holi tōtōivi ke tau kofuʻaki hotau fale mei* hēvaní,*+
3 koeʻuhí ʻi heʻetau kofuʻaki iá, ʻe ʻikai ke tau telefua.
4 Ko hono moʻoní, ko kitautolu ʻa ia ʻoku tau ʻi he tēnití ni ʻoku tau toʻe, mo mafasia, koeʻuhi ʻoku ʻikai te tau loto ke huʻi atu ʻa e tēnití ni, ka ʻoku tau loto ke tau kofuʻaki ʻa e fale ʻe tahá,+ koeʻuhi ke hoko ʻa e meʻa ʻoku matengofuá ʻo fetongi ʻaki ʻa e moʻui.+
5 Pea ko e tokotaha kuó ne teuteu kitautolu ki he meʻa tofu pē ko ení ko e ʻOtuá,+ ʻa ia naʻá ne foaki mai kiate kitautolu ʻa e laumālié ko ha fakapapauʻiʻanga ʻo e meʻa ka hoko maí.*+
6 Ko ia ʻoku tau mātuʻaki loto-lahi maʻu pē mo ʻiloʻi lolotonga ko ia ʻetau maʻu hotau ʻapi ʻa ia ko e sinó, ʻoku tau mamaʻo ai mei he ʻEikí,+
7 he ʻoku tau ʻaʻeva ʻaki ʻa e tuí, ʻo ʻikai ʻaki ʻa e mamatá.
8 Ka ʻoku tau mātuʻaki loto-lahi pea ʻoku tau saiʻia ange kitautolu ke tau ʻai hotau ʻapi mo e ʻEikí kae ʻikai ke ʻi he sino ko ení.+
9 Ko ia tatau ai pē pe ʻoku tau ʻi ʻapi mo ia pe ʻoku tau mamaʻo meiate ia, ʻoku tau ʻai ko ʻetau taumuʻá ia ke hoko ʻo fakahōifua kiate ia.
10 He kuo pau ke tau hā* kotoa pē ʻi muʻa ʻi he nofoʻanga fakamaau ʻo e Kalaisí, koeʻuhi ke totongi fakafoki ai ki he tokotaha taki taha ʻo fakatatau ki he ngaahi meʻa kuó ne tōʻongaʻaki lolotonga ʻa e ʻi he sinó, pe naʻe lelei pe kovi.*+
11 Ko ia ai, koeʻuhi ʻoku mau ʻilo ʻa e manavahē ki he ʻEikí, ʻoku mau hanganaki fakatuipauʻi ai ʻa e kakaí, ka kuo ʻiloʻi lelei kimautolu ʻe he* ʻOtuá. Kae kehe, ʻoku ou ʻamanaki ʻoku toe ʻiloʻi lelei foki ʻe* homou konisēnisí ʻa kimautolu.
12 ʻOku ʻikai ko haʻamau toe fakaongoongoleleiʻi atu kimautolu kiate kimoutolu ka ʻoku mau ʻoatu kiate kimoutolu ha ʻuhinga ke ueʻi ai kimoutolu ke mou pōlepole ai fekauʻaki mo kimautolu, koeʻuhi ke malava ke mou fai ha tali ki he faʻahinga ko ia ʻoku nau pōlepole ʻi he fōtunga hā maí+ kae ʻikai ʻi he meʻa ʻoku ʻi he lotó.
13 He kapau naʻa mau sesele, naʻe hoko iá maʻá e ʻOtuá;+ kapau ʻoku mau fakakaukau lelei, ʻoku hoko iá maʻamoutolu.
14 He ko e ʻofa ʻoku maʻu ʻe he Kalaisí ʻokú ne ueʻi kimautolu, koeʻuhi ko e meʻa eni kuo mau fakamulituku ki aí, naʻe pekia ʻa e tangata ʻe taha maʻá e faʻahinga kotoa pē;+ ko ia ai, tā naʻe mate ʻa e faʻahinga kotoa pē.
15 Pea naʻá ne pekia maʻá e faʻahinga kotoa pē koeʻuhi ko e faʻahinga ko ia ʻoku moʻuí ke ʻoua te nau kei moʻui maʻanautolu,+ ka maʻá e tokotaha naʻe pekia maʻanautolu pea fokotuʻu haké.
16 Ko ia mei he taimí ni ʻo faai atu ʻoku ʻikai te mau vakai ki he tangatá ʻo fakatatau ki he meʻa ʻoku mau sio ki aí.+ Neongo kapau naʻe vakai ha niʻihi ʻo kimautolu ki muʻa kia Kalaisi ʻo fakatatau ki he meʻa naʻa mau sio ki aí, ʻoku ʻikai te mau kei malava he taimí ni ke fai ia.+
17 Ko ia ai, kapau ʻoku fāʻūtaha ha taha mo Kalaisi, ko ha fakatupu foʻou ia;+ kuo mole atu ʻa e ngaahi meʻa motuʻá; vakai, kuo hoko ʻo ʻi ai ʻa e ngaahi meʻa foʻou.
18 Ka ko e ngaahi meʻa kotoa pē ʻoku mei he ʻOtuá, ʻa ia naʻá ne fakalelei kimautolu kiate ia fakafou ʻia Kalaisi+ pea foaki mai kiate kimautolu ʻa e ngāue ko hono tokoniʻi ʻa e niʻihi kehé ke nau fakalelei mo ia,+
19 ʻa ia, naʻe fakalelei ʻe he ʻOtuá fakafou ʻia Kalaisi ha māmani kiate ia,+ ʻo ʻikai lau ʻenau ngaahi faihalá kiate kinautolu,+ pea naʻá ne tuku mai kiate kimautolu ʻa e pōpoaki ʻo e fakaleleí.+
20 Ko ia ai, ko e kau fakafofonga kimautolu+ ʻo fetongi ʻa Kalaisi,+ ʻo hangē ia ne fai ʻe he ʻOtuá ha tautapa fakafou ʻiate kimautolú. ʻI he tuʻunga ko e kau fetongi ʻo Kalaisí, ʻoku mau kole atu: “Mou fai ha fakalelei ki he ʻOtuá.”
21 Ko e tokotaha ko ia naʻe ʻikai te ne ʻilo ʻa e angahalá,+ naʻe ngaohi ia ʻe he ʻOtuá ke hoko ko e angahala* koeʻuhi ko kitautolu, koeʻuhiā ke tau hoko ai fakafou ʻiate ia ko e koto māʻoniʻoni ʻi he vakai mai ʻa e ʻOtuá.+
Fakamatala ‘i Lalo
^ Pe “movete.”
^ Pe “nofoʻanga.”
^ Pe “kofuʻaki hotau nofoʻanga ʻa ia ʻoku ʻi.”
^ Pe “hotau nofoʻanga fakahēvaní.”
^ Pe “ʻa e paʻanga maluʻi (tipōsiti); ko e fakapapauʻiʻanga (meʻa maluʻi) ʻo e meʻa ka hoko maí.”
^ Pe “ke tau eʻa.”
^ Pe “fulikivanu.”
^ Pe “ka kuo mau eʻa ki he.”
^ Pe “toe eʻa foki ki.”
^ Pe “ko e feilaulau angahala.”
