Ua Kolinitō 13:1-14
13 Ko hono tuʻo tolu ʻaki eni ʻo ʻeku teu ʻalu atu kiate kimoutolú. “ʻI he fakamoʻoni ʻa e* toko ua pe toko tolú kuo pau ke fakapapauʻi ai ʻa e meʻa kotoa pē.”+
2 Neongo ʻoku ou mamaʻo he taimí ni, ʻoku hangē pē ia naʻá ku ʻi hena ko hono tuʻo uá ia, pea ʻoku ou fakatokanga tokamuʻa atu ki he faʻahinga ko ia naʻa nau faiangahala ki muʻá pea ki he toengá hono kotoa, ka faifai ange peá u toe ʻalu atu heʻikai te u mamae kiate kinautolu,
3 koeʻuhí ʻoku mou kumi fakamoʻoni pe ko Kalaisi ia ʻoku lea moʻoni fakafou ʻiate aú, ʻa ia ʻoku ʻikai te ne fakavaivai ʻi he fekauʻaki mo kimoutolú ka ʻokú ne mālohi ʻi homou lotolotongá.
4 He ko e moʻoni, naʻe tautau ia ʻi he ʻakaú ʻi ha tuʻunga vaivai, ka ʻokú ne moʻui koeʻuhí ko e mālohi ʻo e ʻOtuá.+ Ko e moʻoni, ʻoku mau ʻi ha tuʻunga vaivai foki fakataha mo ia, ka te mau moʻui fakataha mo ia+ koeʻuhí ko e mālohi ʻo e ʻOtuá ʻoku ʻoatu kiate kimoutolú.+
5 Hanganaki siviʻi pe ʻoku mou ʻi he tuí; hanganaki fakamoʻoniʻi ʻa e tuʻunga totonu ʻoku mou ʻi aí.+ Pe ʻoku ʻikai koā ke mou lāuʻilo ko Sīsū Kalaisí ʻoku fāʻūtaha mo kimoutolu? Tuku kehe pē kapau ʻoku ʻikai tali kimoutolu.
6 ʻOku ou ʻamanaki moʻoni pē te mou lāuʻilo ʻoku ʻikai ke taʻetali kimautolu.
7 Ko ia ʻoku mau lotu ki he ʻOtuá ke ʻoua naʻa mou fai ha meʻa ʻoku hala, ʻo ʻikai koeʻuhi ke mau hā ai ʻoku tali kimautolu, ka koeʻuhi ke mou fai ʻa e meʻa ʻoku leleí, neongo kapau ʻoku mau hā nai ai ʻoku ʻikai tali kimautolu.
8 Koeʻuhí heʻikai lava ke mau fai ha meʻa ʻoku fepaki mo e moʻoní, ka maʻá e moʻoní pē.
9 ʻOku mau fiefia moʻoni ʻi ha taimi pē ʻoku mau vaivai ai ka mou mālohí. Pea ko e meʻa ia ʻoku mau lotuá, ke fai hamou fakatonutonu.
10 Ko e ʻuhinga ia ʻoku ou tohi atu ai ʻa e ngaahi meʻá ni he lolotonga ʻeku mamaʻó, koeʻuhí ʻi he taimi te u ʻi hena aí, ʻe ʻikai fiemaʻu ke u anga-fefeka ʻi he ngāueʻaki ko ia ʻa e mafai naʻe ʻomai ʻe he ʻEikí kiate au,+ ke fai ʻaki ʻa e langa hake ʻo ʻikai ko e holoki hifo.
11 Fakaʻosí, fanga tokoua, mou hokohoko atu ke fiefia, ke fakatonutonu, ke maʻu ʻa e fakafiemālié,+ ke fakakaukau ʻi he loto-taha,+ ke mou nofo melino;+ pea ko e ʻOtua ʻo e ʻofá mo e melinó+ te ne ʻiate kimoutolu.
12 Mou fefaiʻaki hoʻomou feʻiloakí ʻaki ha ʻuma māʻoniʻoni.*
13 ʻOku ʻoatu ʻe he kotoa ʻo e kakai tapú honau ʻofa kiate kimoutolu.
14 Ko e ʻofa maʻataʻatā ʻa e ʻEiki ko Sīsū Kalaisí pea mo e ʻofa ʻa e ʻOtuá pea mo e kaungāʻinasi ʻi he laumālie māʻoniʻoní ke ʻiate kimoutolu ia hono kotoa.
