ʻUluaki Kalonikali 21:1-30
21 Pea naʻe fili ʻa Sētane* ke fai ha meʻa ki ʻIsileli peá ne fakaʻaiʻai ʻa Tēvita ke ne lau ʻa ʻIsileli.+
2 Ko ia naʻe pehē ʻe Tēvita kia Sioape+ mo e ngaahi ʻeiki ʻo e kakaí: “ʻAlu atu ʻo lau ʻa ʻIsileli, mei Pea-sipa ki Tani;+ pea fakahā mai kiate au koeʻuhí ke u ʻilo ʻa honau tokolahí.”
3 Ka naʻe pehē ange ʻe Sioape: “ʻOfa ke fakatokolahi ʻe Sihova ʻa hono kakaí ʻo liunga 100! ʻE hoku ʻeiki ko e tuʻí, ʻikai ko kinautolu kotoa kuo nau ʻosi hoko ko e kau sevāniti ʻa hoku ʻeikí? Ko e hā ʻoku loto ai ʻa hoku ʻeikí ke fai ʻa e meʻá ni? Ko e hā ke ne hoko ai ʻo fakatupunga ha halaia ki ʻIsilelí?”
4 Ka naʻe mālohi ʻa e lea ʻa e tuʻí kia Sioape. Ko ia naʻe ʻalu atu ai ʻa Sioape ʻo ne fāifononga ʻi ʻIsileli kotoa, ʻi he hili iá naʻá ne haʻu ki Selusalema.+
5 Naʻe ʻoange leva ʻe Sioape kia Tēvita ʻa e tokolahi ʻo e kakai naʻe lēsisitá. Ko ʻIsileli kotoa naʻe feʻunga mo e kau tangata toʻo heletā ʻe toko 1,100,000, pea ko Siuta, ko e kau tangata toʻo heletā+ ʻe toko 470,000.
6 Ka ko Līvai mo Penisimani naʻe ʻikai ke lēsisita kinaua ʻi honau lotolotongá,+ koeʻuhi he naʻe kovi ʻaupito kia Sioape+ ʻa e lea ʻa e tuʻí.
7 Pea naʻe mātuʻaki taʻefakahōifua eni ki he ʻOtua moʻoní, ko ia naʻá ne taaʻi ai ʻa ʻIsileli.
8 Naʻe pehē leva ʻe Tēvita ki he ʻOtua moʻoní: “Kuó u faiangahala+ lahi ʻi heʻeku fai ʻa e meʻá ni. Pea ko eni, ke ke fakamolemoleʻi muʻa ʻa e faihala ʻa hoʻo sevānití,+ he kuó u mātuʻaki fai vale.”+
9 Naʻe folofola leva ʻa Sihova kia Kata,+ ko e tokotaha-vīsone ʻa Tēvitá, ʻo pehē:
10 “ʻAlu ʻo tala kia Tēvita, ‘Ko e folofola eni ʻa Sihová: “ʻOku ou ʻoatu kiate koe ʻa e meʻa ʻe tolu ke ke fili mei ai. Fili ʻa e taha ko ia te u fakahoko atu kiate koé.”’”
11 Ko ia naʻe hū atu ʻa Kata kia Tēvita ʻo ne pehē kiate ia: “Ko e folofola eni ʻa Sihová, ‘Fai hoʻo filí
12 pe ko e honge+ ʻe hoko ʻi ha taʻu ʻe tolu, pe ko e māhina ʻe tolu ʻo hano ikuʻi koe ʻe ho ngaahi filí lolotonga ia hono maʻu koe ʻe he heletā ʻo ho ngaahi filí,+ pe ko e hoko mai ʻa e heletā ʻa Sihová ʻi he ʻaho ʻe tolu—ko ha mahaki fakaʻauha ʻi he fonuá+—ʻi hono ʻomi ʻe he ʻāngelo ʻa Sihová ʻa e fakaʻauha+ ki he feituʻu kotoa ʻo ʻIsilelí.’ Ko ia fakakaukau pe ko e hā te u tali ʻaki ki he Tokotaha naʻá ne fekau mai aú.”
13 Ko ia naʻe pehē ʻe Tēvita kia Kata: “ʻOku mātuʻaki fakamamahi kiate au. Tuku muʻa ke u tō ki he nima ʻo Sihová, he ʻoku lahi ʻaupito ʻa ʻene mēsí;+ kae ʻoua naʻa tuku ke u tō ki he nima ʻo e tangatá.”+
14 Pea naʻe tuku mai ʻe Sihova ha mahaki fakaʻauha+ ki ʻIsileli, ko ia naʻe tō ai+ mei ʻIsileli ʻa e kakai ʻe toko 70,000.
15 ʻIkai ngata aí, naʻe fekauʻi mai ʻe he ʻOtua moʻoní ha ʻāngelo ki Selusalema ke fakaʻauha ia; ka ʻi he teu ke ne fai iá, naʻe vakai ki ai ʻa Sihova peá ne ongoʻi fakaʻiseʻisa* ʻi he fakatamakí,+ pea naʻá ne folofola ki he ʻāngelo naʻá ne ʻomai ʻa e fakaʻauhá: “Kuo feʻunga!+ Tuku hifo ā ho nimá.” Naʻe tuʻu ʻa e ʻāngelo ʻa Sihová ʻo ofi ki he ʻauʻauʻanga uite ʻa ʻOlanani+ ko e Siepusí.+
16 ʻI he hanga hake ʻa Tēvitá, naʻá ne sio ki he ʻāngelo ʻa Sihová ʻokú ne tuʻu ʻi he vahaʻa ʻo e māmaní mo e langí mo ha heletā kuo unuhi+ ʻi hono nimá ʻo mafao atu ki Selusalema. Ko Tēvita mo e kau mātuʻá, kuo nau ʻai tauangaʻa,+ naʻa nau fakatōmapeʻe he taimi pē ko iá ʻo hanga ki he kelekelé.+
17 Naʻe pehē ʻe Tēvita ki he ʻOtua moʻoní: “ʻIkai ko au ia naʻá ku pehē ke lau ʻa e kakaí? Ko au ʻa e tokotaha naʻe faiangahalá, pea ko au ʻa e tokotaha naʻe faihalá;+ ka ko e fanga sipí ni—ko e hā ʻa e meʻa kuo nau faí? ʻE Sihova ko hoku ʻOtuá, tuku muʻa ke hoko mai ho nimá kiate au pea mo e fale ʻo ʻeku tamaí; kae ʻoua naʻa ʻomi ʻa e malá ni ki ho kakaí.”+
18 Naʻe tala ange leva ʻe he ʻāngelo ʻa Sihová kia Kata+ ke ne tala kia Tēvita ke ne ʻalu hake ʻo fokotuʻu ha ʻōlita kia Sihova ʻi he ʻauʻauʻanga uite ʻa ʻOlanani ko e Siepusí.+
19 Ko ia naʻe ʻalu hake ʻa Tēvita ʻo fakatatau ki he lea ʻa Kata ʻa ia naʻá ne leaʻaki ʻi he huafa ʻo Sihová.
20 Lolotonga ení, naʻe hanga hake ʻa ʻOlanani ʻo ne mamata ki he ʻāngeló, pea ko hono foha ʻe toko fā naʻe ʻiate iá naʻa nau toitoi. ʻI he taimi ko ení naʻe fai ʻa e ʻauʻau uite ʻa ʻOlanani.
21 ʻI he ʻalu atu ʻa Tēvita kiate iá, naʻe vakai mai ʻa ʻOlanani ʻo ne sio kia Tēvita, pea naʻá ne hū atu ʻi he taimi pē ko iá mei he ʻauʻauʻanga uité ʻo ne punou kia Tēvita ʻo hanga ki he kelekelé.
22 Naʻe pehē ange ʻe Tēvita kia ʻOlanani: “Fakatau mai* kiate au ʻa e tuʻuʻanga ʻo e ʻauʻauʻanga uité, koeʻuhi ke u fokotuʻu ai ha ʻōlita kia Sihova. Fakatau mai ia kiate au ʻi hono totongi kakató, kae ngata ai ʻa e mala kuo hoko ki he kakaí.”+
23 Ka naʻe pehē ʻe ʻOlanani kia Tēvita: “Maʻu ia ʻe koe, pea tuku ki hoku ʻeiki ko e tuʻí ke ne fai ha meʻa pē ʻoku hā lelei kiate iá.* Ko eni ʻoku ou ʻoatu ʻa e fanga pulu ki he ngaahi feilaulau tutú pea mo e papa ʻauʻau uité+ ke fefieʻaki pea mo e uite ki he feilaulau meʻakaí.* ʻOku ou foaki kotoa atu ia.”
24 Kae kehe, naʻe pehē ʻe Tuʻi Tēvita kia ʻOlanani: “ʻIkai, kuo pau ke u fakatau ia ʻi hono totongi kakató, koeʻuhi ʻe ʻikai te u toʻo ʻa e meʻa ʻoku ʻaʻaú ʻo foaki ia kia Sihova pe ʻoatu ha ngaahi feilaulau tutu ʻo taʻeʻiai haʻaku fakamole.”+
25 Ko ia naʻe ʻoange ʻe Tēvita kia ʻOlanani ha sikeli* koula ʻe 600 ʻi hono fua mamafá, ki he tuʻuʻangá.
26 Pea naʻe fokotuʻu ai ʻe Tēvita ha ʻōlita+ kia Sihova peá ne ʻohake ʻa e ngaahi feilaulau tutu mo e ngaahi feilaulau feʻinasiʻaki, pea naʻá ne tautapa kia Sihova, ʻa ia naʻá ne fai mai leva ha tali ʻaki hono ʻomai ha afi+ mei langi ki he ʻōlita ʻo e feilaulau tutú.
27 Naʻe fekau leva ʻe Sihova ʻa e ʻāngeló+ ke fakafoki ʻene heletaá ki hono ʻaiʻangá.
28 ʻI he taimi ko iá, ʻi he vakai ʻa Tēvita kuo fai mai ʻe Sihova ha tali kiate ia ʻi he ʻauʻauʻanga uite ʻa ʻOlanani ko e Siepusí, naʻe hokohoko atu ʻene faifeilaulau ʻi aí.
29 Kae kehe, ko e tāpanekale ʻa Sihova naʻe ngaohi ʻe Mōsese ʻi he toafá pea mo e ʻōlita ʻo e feilaulau tutú, naʻe ʻi he taimi ko iá ʻi he potu māʻolunga ʻi Kipioné.+
30 Ka naʻe ʻikai ke lava ʻa Tēvita ke ʻalu atu ki ai ʻo tautapa ai ki he ʻOtuá, he naʻá ne ilifia koeʻuhi ko e heletā ʻa e ʻāngelo ʻa Sihová.
Fakamatala ‘i Lalo
^ Pe ngalingali, “ha tokotaha fakafepaki.”
^ Pe “mamahi.”
^ Fakafoʻilea, “Foaki mai.”
^ Fakafoʻilea, “meʻa ʻoku lelei ʻi heʻene vakaí.”
^ Ko ha sikeli naʻe tatau ia mo e kalami ʻe 11.4 (ʻaunise ʻe 0.367). Sio ki he Fakamatala Fakalahi E14.
