ʻUluaki Kalonikali 13:1-14
13 Naʻe talatalanoa ʻa Tēvita mo e ngaahi ʻeiki ʻo e ngaahi toko afé pea mo e ngaahi toko teaú pea mo e taki kotoa pē.+
2 Pea naʻe pehē leva ʻe Tēvita ki he fakatahaʻanga ʻo ʻIsilelí kotoa: “Kapau ʻe hā lelei kiate kimoutolu pea fakahōifua kia Sihova ko hotau ʻOtuá, tuku ke tau ʻoatu ha fekau ki he toenga ʻo hotau fanga tokoua ʻi he ngaahi vahefonua kotoa ʻo ʻIsilelí pea pehē ki he kau taulaʻeiki mo e kau Līvai ʻi honau ngaahi koló+ mo honau ngaahi kaikaiʻangá ke nau haʻu ʻo kau fakataha mo kitautolu.
3 Pea ke tau fakafoki mai ʻa e ʻAʻake+ ʻa hotau ʻOtuá.” He naʻe ʻikai te nau tokangaʻi ia ʻi he ngaahi ʻaho ʻo Saulá.+
4 Naʻe loto-taha ʻa e fakatahaʻangá kotoa ke fai ʻa e meʻa ko iá, he naʻe hā totonu ia ki he kakaí kotoa.
5 Ko ia naʻe fakatahatahaʻi mai ʻe Tēvita ʻa ʻIsileli kotoa, mei he vaitafe* ʻo ʻIsipité ʻo aʻu ki Lipo-hēmati,*+ ke ʻomai ʻa e ʻAʻake ʻa e ʻOtua moʻoní mei Kiliate-sialimi.+
6 Naʻe ʻalu hake ʻa Tēvita mo ʻIsileli kotoa ki Paʻala,+ ki Kiliate-sialimi, ʻa ia ʻoku kau ki Siutá, ke ʻohake mei ai ʻa e ʻAʻake ʻa e ʻOtua moʻoní, ʻa Sihova, ʻa e tokotaha ʻokú ne ʻafio ʻi he taloni ʻi ʻolunga ʻi he* ongo selupimí,+ ʻa ia ʻoku fai ai ʻa e ui ki hono huafá.
7 Kae kehe, naʻa nau fakaheka ʻa e ʻAʻake ʻa e ʻOtua moʻoní ki ha saliote foʻou+ pea ʻomi ia mei he fale ʻo ʻApinatapí, pea ko ʻUsa mo ʻAhio naʻá na takimuʻa mai ʻi he salioté.+
8 Ko Tēvita mo ʻIsileli kotoa naʻa nau fakafiefia ʻi he ʻao ʻo e ʻOtua moʻoní ʻaki honau mālohí kotoa, ʻo fai ʻaki ʻa e ngaahi hiva, mo e ngaahi haʻape, mo e ngaahi meʻalea filo kehe, mo e ngaahi nafa,+ mo e ngaahi simipale,+ pea mo e ngaahi talupite.+
9 Ka ʻi heʻenau aʻu ki he ʻauʻauʻanga uite ko Kitoní, naʻe ala atu ʻa e nima ʻo ʻUsá ʻo ne puke ʻa e ʻAʻaké, he naʻe meimei tō ia ʻi he ngāue ʻa e ongo pulú.
10 Ko ia naʻe hoko hifo ʻa e houhau kakaha ʻa Sihová kia ʻUsa, pea naʻá Ne taaʻi ia koeʻuhí ko ʻene ala atu ki he ʻAʻaké,+ pea naʻá ne mate ai ʻi he ʻao ʻo e ʻOtuá.+
11 Ka naʻe ʻita* ʻa Tēvita koeʻuhí ko e hoko hifo ʻa e houhau ʻa Sihová kia ʻUsá; pea kuo ui ʻa e feituʻu ko iá ko Pelesi-usa* ʻo aʻu mai ki he ʻahó ni.
12 Ko ia naʻe manavahē ʻa Tēvita ki he ʻOtua moʻoní ʻi he ʻaho ko iá peá ne pehē: “ʻE lava fēfē ke u ʻomai kiate au ʻa e ʻAʻake ʻa e ʻOtua moʻoní?”+
13 Naʻe ʻikai ke ʻomi ʻe Tēvita ʻa e ʻAʻaké ki he feituʻu naʻá ne ʻi aí ʻi he Kolo-ʻo-Tēvitá, ka naʻá ne ʻai ke ʻave ia ki he fale ʻo ʻŌpeti-ʻītomi ko e tangata Katí.
14 Ko e ʻAʻake ʻa e ʻOtua moʻoní naʻe ʻi he fāmili ia ʻo ʻŌpeti-ʻītomí, ʻo ʻi ai ʻi hono falé ʻi he māhina ʻe tolu, pea naʻe faitāpuekina ai pē ʻe Sihova ʻa e fāmili ʻo ʻŌpeti-ʻītomí mo e meʻa kotoa naʻá ne maʻú.+
Fakamatala ‘i Lalo
^ Pe “mei Sehoa.”
^ Pe “ki he hūʻanga ʻo Hēmatí.”
^ Pe ngalingali, “ʻi he vahaʻa ʻo e.”
^ Pe “mamahi.”
^ ʻOku ʻuhingá ko e “Pā Mai ʻa e Houhaú kia ʻUsa.”
