ʻUluaki Kalonikali 12:1-40
-
Kau poupou ki he tuʻunga-tuʻi ʻo Tēvitá (1-40)
12 Ko e kau tangata eni naʻa nau haʻu kia Tēvita ki Sikilaki+ lolotonga ia naʻe ʻikai lava ke ne ʻalu tauʻatāina holo koeʻuhí ko Saula+ ko e foha ʻo Kisí, pea naʻa nau kau ʻi he kau tangata toʻa ʻi he taú ʻa ia naʻa nau poupou kiate ia ʻi he taú.+
2 Naʻa nau toʻo kaufana, pea naʻe lava ke nau makatā ʻaki+ honau nima toʻomataʻú mo honau nima toʻohemá+ fakatouʻosi pe fana ngahau ʻaki ʻa e kaufaná. Naʻa nau kau ki he fanga tokoua ʻo Saulá, mei he matakali ʻo Penisimaní.+
3 Ko ʻAhiesa naʻe ʻulu ʻiate kinautolú fakataha mo Sōasi, ko e ongo foha fakatouʻosi ia ʻo Simā ko e tangata Kīpea;+ ko Sisieli mo Pēleti ko e ongo foha ʻo ʻAsimaveti,+ mo Pelaka, mo Sehu ko e tangata ʻAnatoti,
4 ʻIsimaia ko e tangata Kipione,+ ko ha tangata toʻa ʻi he taú naʻe kau ʻi he toko tolungofulú+ pea naʻe pule ki he toko tolungofulú; pehē foki kia Selemaia, Sehesili, Siohānani, Siosapati ko e tangata Ketela,
5 ʻElusai, Selimoti, Pealia, Semalaia, Sefataia ko e tangata Halifi,
6 ʻElikena, ʻĪsia, ʻAsalili, Sioesa, pea mo Sasopiami ko e kau tangata mei he haʻa Kolá;+
7 mo Sioela pea mo Sepataia ko e ongo foha ʻo Seloami ʻo Ketoá.
8 Ko e niʻihi ʻo e haʻa Katá naʻa nau ʻalu ki he faʻahi ʻa Tēvitá ʻi he toitoiʻanga ʻi he toafá;+ ko e kau tangata toʻa kinautolu ʻi he taú, ko e kau sōtia kuo akoʻi ki he taú, naʻa nau tuʻu mateuteu mo e ngaahi fuʻu pā pea mo e tao, pea ko honau matá naʻe hangē ko e mata ʻo e fanga laioné pea naʻa nau veʻe-vave ʻo hangē ko e fanga kāseli ʻi he ngaahi moʻungá.
9 Ko ʻĒseli ʻa e ʻulú, ko ʻOpataia ʻa e fika uá, ko ʻEliapi ʻa e fika tolú,
10 ko Misimana ʻa e fika faá, ko Selemaia ʻa e fika nimá,
11 ko ʻĒtai ʻa e fika onó, ko ʻEliela ʻa e fika fitú,
12 ko Siohānani ʻa e fika valú, ko ʻElisapati ʻa e fika hivá,
13 ko Selemaia ʻa e fika hongofulú, ko Makapanai ʻa e fika hongofulu mā tahá.
14 Ko kinautolu eni naʻe kau ki he haʻa Katá,+ ko e ngaahi ʻulu ʻo e kau taú. Ko e tokotaha vaivai tahá naʻe tatau ia mo e toko 100, pea ko e tokotaha mālohi tahá naʻe tatau ia mo e toko 1,000.+
15 Ko e kau tangata eni naʻa nau kolosi ʻi Sioatani ʻi he ʻuluaki māhiná ʻi he taimi naʻe fonu hake ai ʻa e vaitafé, pea naʻa nau tuli ʻa e faʻahinga kotoa ko ia naʻe nofo ʻi he ngaahi talaló ki he hahaké pea ki he hihifó.
16 Ko e niʻihi ʻo e kau tangata ʻo Penisimani mo Siutá naʻa nau haʻu foki kia Tēvita ki hono toitoiʻangá.+
17 Naʻe hū mai leva ki tuʻa ʻa Tēvita ki honau ʻaó ʻo ne pehē kiate kinautolu: “Kapau kuo mou haʻu kiate au ʻi he melino ke tokoniʻi au, ʻe taha hoku lotó mo kimoutolu. Ka ʻo kapau ko hoʻomou haʻú ke lavakiʻi au ki hoku ngaahi filí lolotonga ia kuo ʻikai fai ʻe hoku ongo nimá ha hala, tuku ke vakai ki ai ʻa e ʻOtua ʻo ʻetau fanga kuí peá ne fakamāuʻi.”+
18 Pea naʻe hoko mai ʻa e laumālié kia* ʻAmasai,+ ko e ʻulu ʻo e toko tolungofulú pea naʻá ne pehē:
“ʻOku ʻaʻau ʻa kimautolu, ʻe Tēvita, pea ʻoku mau kau mo koe, ʻa e foha ʻo Sesé.+
Ko e melinó, ʻa e melinó ke ʻaʻau ia pea ko e melinó ke ʻi he tokotaha ʻokú ne tokoniʻi koé,He ko ho ʻOtuá ʻokú ne tokoniʻi koé.”+
Ko ia naʻe tali ai kinautolu ʻe Tēvita peá ne fakanofo kinautolu ke nau kau ʻi he ngaahi ʻulu ʻo e ngaahi kongakaú.
19 Naʻe toe mavahe foki ʻa e niʻihi mei he matakali ʻo Manasé ʻo kau mo Tēvita ʻi he taimi naʻá ne haʻu ai mo e kau Filisitiá ke tauʻi ʻa Saulá; ka naʻe ʻikai te ne tokoniʻi ʻa e kau Filisitiá, he ʻi he hili ʻene kumi faleʻí, naʻe fekauʻi ia ʻe he ngaahi ʻeiki ʻo e kau Filisitiá+ ke ne mavahe, ʻi heʻenau pehē: “Te ne mavahe ki hono ʻeiki ko Saulá, pea ʻe fakatuʻutāmaki ia ki heʻetau moʻuí.”+
20 ʻI heʻene ʻalu ki Sikilakí,+ ko e faʻahinga eni naʻe mavahe mai kiate ia mei he matakali ʻo Manasé: Ko ʻAtenā, Siosapati, Sitieli, Maikeli, Siosapati, ʻIlaiū, pea mo Silitai, ko e ngaahi ʻulu ʻo e ngaahi toko afe ʻo e matakali ʻo Manasé.+
21 Naʻa nau tokoniʻi ʻa Tēvita ke tauʻi ʻa e kau kaihaʻa fakamālohí, koeʻuhí ko kinautolú kotoa ko e kau tangata toʻa mo loto-lahi,+ pea naʻa nau hoko ko e ngaahi ʻeikitau.
22 ʻI he ʻaho ki he ʻaho naʻe hanganaki haʻu ai ʻa e kakaí kia Tēvita+ ke tokoniʻi ia kae ʻoua kuo nau hoko ko ha ʻapitanga naʻe hangē honau tokolahí ko e ʻapitanga ʻa e ʻOtuá.+
23 Ko e tokolahi eni ʻo e ngaahi ʻulu ʻo e faʻahinga naʻe toʻo meʻatau ʻa ia naʻa nau haʻu kia Tēvita ki Hepeloni+ ke foaki kiate ia ʻa e tuʻunga-tuʻi ʻo Saulá ʻo fakatatau ki he tuʻutuʻuni ʻa Sihová.+
24 Ko e kau tangata Siuta naʻa nau toʻo ʻa e ngaahi fuʻu pā pea mo e taó ko e toko 6,800, naʻa nau mateuteu ki he taú.
25 Mei he kau Simioné, ko e kau tangata toʻa mo loto-lahi ʻi he kau taú naʻe toko 7,100.
26 Mei he kau Līvaí, ko e toko 4,600.
27 Ko Sihoiata+ naʻe taki ʻi he ngaahi foha ʻo ʻĒloné,+ pea naʻe ʻiate ia ʻa e toko 3,700,
28 pea pehē kia Sātoki,+ ko ha talavou toʻa mo loto-lahi, fakataha mo e ngaahi ʻeiki ʻe toko 22 mei he fale ʻo ʻene ngaahi tamaí.
29 Mei he haʻa Penisimaní, ʻa e fanga tokoua ʻo Saulá,+ naʻe ʻi ai ʻa e toko 3,000, ʻa ia ko e tokolahi taha ʻo kinautolú naʻa nau leʻohi ki muʻa ʻa e ngaahi meʻa ʻi he fale ʻo Saulá.
30 Mei he haʻa ʻIfalemí, naʻe ʻi ai ʻa e kau tangata toʻa, loto-lahi pea mo ongoongoa ʻe toko 20,800 naʻe kau ki he ngaahi fale ʻo ʻenau ngaahi tamaí.
31 Mei he vaeua ʻo e matakali ʻo Manasé, naʻe ʻi ai ʻa e toko 18,000 ʻa ia kuo fakahaaʻi honau hingoá ke nau haʻu ʻo fakanofo ʻa Tēvita ko e tuʻi.
32 Mei he matakali ʻo ʻĪsaká, ʻa ia naʻa nau mahinoʻi ʻa e taimí pea nau ʻiloʻi ʻa e meʻa ʻoku totonu ke fai ʻe ʻIsilelí, ko honau kau tangata takí naʻe toko 200, pea ko honau fanga tokouá kotoa naʻa nau ʻi he malumalu ʻo ʻenau tuʻutuʻuní.
33 Meia Sepuloní, ko e toko 50,000 ʻa ia naʻe lava ke nau kau ʻi he kau taú, ʻo nau fakatē tau fakataha mo e meʻataú kotoa, naʻa nau kau kotoa mo Tēvita fakataha mo e mateaki kakato.*
34 Meia Nafitalaí, ko e ʻeiki ʻe toko 1,000, pea naʻe kau mo kinautolu ha toko 37,000 naʻa nau toʻo ʻa e fuʻu pā pea mo e tao.
35 Mei he haʻa Taní, ko kinautolu naʻe fakatē taú ko e toko 28,600.
36 Pea meia ʻĀselí, ko e faʻahinga naʻe lava ke nau kau ʻi he kau taú ʻo fakatē taú ko e toko 40,000.
37 Mei he tafaʻaki ʻe taha ʻo Sioataní,+ mei he haʻa Lūpení, haʻa Katá, pea mo e vaeua ʻo e matakali ʻo Manasé, ko ʻenau kau sōtia ʻe toko 120,000 naʻa nau toʻo ʻa e meʻatau kehekehe kotoa pē.
38 Ko e faʻahingá ni kotoa ko e kau tangata tau, naʻa nau kau fakataha ʻi he kau taú; naʻa nau haʻu mo e loto kakato ki Hepeloni ke fakanofo ke tuʻi ʻa Tēvita ki he kotoa ʻo ʻIsilelí, pea naʻe pehē foki mo e toenga kotoa ʻo ʻIsilelí naʻa nau fāʻūtaha ʻi he loto* ke fakanofo ʻa Tēvita ko e tuʻí.+
39 Pea naʻa nau nofo ai mo Tēvita ʻi he ʻaho ʻe tolu, ʻo kai mo inu, he kuo fai ha teuteu ʻe honau fanga tokouá maʻa kinautolu.
40 Pehē foki ki he faʻahinga naʻe ofi maí, pea naʻa mo e faʻahinga naʻe mamaʻo ʻo aʻu ki ʻĪsaka, Sepuloni, pea mo Nafitalaí, naʻa nau ʻomai ha meʻakai ʻi he fanga ʻasi, fanga kāmeli, fanga miuli, pea mo e fanga pulu—ko e tokonaki mahoaʻa, ngaahi takaonga fiki,* mo e takaonga fuamelie,* uaine, lolo, pea mo e fanga pulu mo e sipi lahi ʻaupito, he naʻe ʻi ai ha fiefia ʻi ʻIsileli.
Fakamatala ‘i Lalo
^ Fakafoʻilea, “kofuʻaki ʻa e laumālié ʻa.”
^ Pe “ko e faʻahinga kotoa naʻe kau mo Tēvitá naʻe ʻikai te nau lotolotoua.”
^ Fakafoʻilea, “naʻa nau loto-taha.”
^ ʻOku ʻuhinga eni ki he fiki tauaki kuo fakafuo ʻo hangē ha keké.
^ ʻOku ʻuhinga eni ki he kālepi tauaki kuo fakafuo ʻo hangē ha keké.
