ʻUluaki Tuʻi 16:1-34
16 Pea naʻe hoko mai ʻa e folofola ʻa Sihová kia Sehu+ ko e foha ʻo Hēnaní+ ʻo fekauʻaki mo Paasa, ʻo pehē:
2 “Naʻá ku fokotuʻu hake koe mei he efú pea ʻai koe ko e taki ki hoku kakai ko ʻIsilelí,+ ka naʻá ke hokohoko atu ke ʻaʻeva ʻi he ʻalunga ʻo Selopoamé, peá ke fakatupunga ai ʻa hoku kakai ko ʻIsilelí ke nau faiangahala, ko ia kuo nau fakalotomamahiʻi au ʻi heʻenau ngaahi angahalá.+
3 Ko ia ai, te u tafiʻi ke maʻa ʻa Paasa mo hono falé, pea te u ʻai ʻa hono falé ke hangē ko e fale ʻo Selopoame+ ko e foha ʻo Nīpatí.
4 Ko ha taha pē ʻoku kau kia Paasa ʻe mate ʻi he koló ʻe kai ia ʻe he fanga kulií; pea ko ha taha pē ʻoku kau mo ia ʻe mate ʻi he vaó ʻe keina ia ʻe he fanga manupuna ʻo e langí.”
5 Ko e meʻa ki he toenga ʻo e hisitōlia ʻo Pāsá, ʻa e meʻa naʻá ne faí mo hono fuʻu mālohí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí?
6 Pea naʻe toka ʻa Paasa ʻo mālōlō fakataha mo ʻene fanga kuí, pea naʻe tanu ia ʻi Tilisa;+ pea naʻe hoko ʻa hono foha ko ʻElá ko e tuʻi ʻo fetongi ia.
7 Pehē foki, fakafou ʻi he palōfita ko Sehu ko e foha ʻo Hēnaní, naʻe hoko mai ai ʻa e folofola ʻa Sihova ʻo kau kia Paasa mo hono falé, koeʻuhi ko e ngaahi kovi kotoa naʻá ne fai ʻi he vakai ʻa Sihová ʻi heʻene fakalotomamahiʻi ia ʻaki ʻa e ngaahi ngāue ʻa hono nimá, peá ne hoko ai ʻo hangē ko e fale ʻo Selopoamé, pea pehē foki koeʻuhi ko ʻene taaʻi iá.*+
8 ʻI he taʻu hono 26 ʻo e pule ʻa Tuʻi ʻAsa ʻo Siutá, naʻe hoko ʻa ʻEla ko e foha ʻo Pāsá ko e tuʻi ki ʻIsileli ʻi Tilisa, pea naʻá ne pule ʻi he taʻu ʻe ua.
9 Ko ʻene sevāniti ko Similaí, ko e pule ia ki he vaeua ʻo ʻene kau tau salioté, naʻá ne faʻufaʻu ha kovi kiate ia lolotonga ʻene ʻi Tilisa ʻi heʻene inu ʻo konā ʻi he fale ʻo ʻĀlesá, ʻa ia naʻe pule ʻi he fale ʻi Tilisá.
10 Naʻe hū atu ʻa Similai ʻo taaʻi ia+ pea tāmateʻi ia ʻi he taʻu hono 27 ʻo e pule ʻa Tuʻi ʻAsa ʻo Siutá, pea naʻá ne hoko ko e tuʻi ʻo fetongi ia.
11 ʻI heʻene hoko ko e tuʻí, ʻi he taimi pē ko ia naʻá ne nofo hifo ai ki hono taloní, naʻá ne taaʻi ʻa e fale kotoa ʻo Pāsá. Naʻe ʻikai te ne fakahaofi ha momoʻi tangata ʻe toko taha,* tatau ai pē pe ko hano kāinga* pe ko hano ngaahi kaumeʻa.
12 Ko ia naʻe fakaʻauha ʻosi ai ʻe Similai ʻa e fale kotoa ʻo Pāsá, ʻo fakatatau ki he folofola ʻa Sihova naʻe fai ʻo kau kia Paasa fakafou ʻia Sehu ko e palōfitá.+
13 Naʻe hoko eni koeʻuhi ko e ngaahi angahala kotoa naʻe fai ʻe Paasa mo hono foha ko ʻElá pea mo e ngaahi angahala naʻá na fakatupunga ke fai ʻe ʻIsileli ʻi hono fakalotomamahiʻi ʻa Sihova ko e ʻOtua ʻo ʻIsilelí ʻaki ʻenau ngaahi ʻaitoli taʻeʻaongá.+
14 Ko e meʻa ki he toenga ʻo e hisitōlia ʻo ʻElá, mo e meʻa kotoa naʻá ne faí, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí?
15 ʻI he taʻu hono 27 ʻo e pule ʻa Tuʻi ʻAsa ʻo Siutá, naʻe hoko ai ʻa Similai ko e tuʻi ʻi he ʻaho ʻe fitu ʻi Tilisa lolotonga ia ʻa e ʻapitanga ʻa e kau taú ke tauʻi ʻa Kipetoni,+ ʻa ia naʻe maʻu ʻe he kau Filisitiá.
16 Naʻe faifai ʻo fanongo ʻa e kau tau naʻe ʻapitangá ʻi he pehē: “Kuo faʻufaʻu ʻe Similai ha kovi pea kuó ne taaʻi foki ʻa e tuʻí.” Ko ia naʻe fokotuʻu ai ʻe ʻIsileli kotoa ʻa ʻOmilai,+ ʻa e ʻeikitaú, ke ne hoko ko e tuʻi ki ʻIsileli ʻi he ʻaho ko iá ʻi he ʻapitangá.
17 Naʻe ʻalu hake ʻa ʻOmilai mo e kotoa ʻo ʻIsileli naʻe ʻiate iá mei Kipetoni ʻo fai hono ʻākoloʻi ʻo Tilisa.
18 ʻI he sio ʻa Similai kuo hamu ʻa e koló, naʻá ne hū ki he taua fakakolotau ʻo e fale* ʻo e tuʻí ʻo ne tutu ʻa e falé lolotonga ʻokú ne ʻi ai, peá ne mate ai.+
19 Naʻe hoko eni koeʻuhí ko e ngaahi angahala naʻá ne fakahoko ʻi heʻene fai ʻa e meʻa naʻe kovi ʻi he vakai ʻa Sihová ʻaki ʻene ʻaʻeva ʻi he ʻalunga ʻo Selopoamé pea koeʻuhi ko e angahala naʻá ne fakatupunga ke fai ʻe ʻIsilelí.+
20 Ko e meʻa ki he toenga ʻo e hisitōlia ʻo Similaí pea mo ʻene faʻufaʻu ha koví, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí?
21 Ko e taimi ko iá naʻe vahevahe ai ʻa e kakai ʻo ʻIsilelí ki he faʻahi ʻe ua. Ko e konga ʻe taha ʻo e kakaí naʻa nau muimui ʻia Tipinai ko e foha ʻo Kinatí, ʻo nau loto ke fokotuʻu ia ke tuʻi, pea ko e konga ʻe tahá naʻa nau muimui ʻia ʻOmilai.
22 Ka naʻe ikunaʻi ʻe he kakai naʻe muimui ʻia ʻOmilaí ʻa e kakai naʻe muimui kia Tipinai ko e foha ʻo Kinatí. Ko ia naʻe mate ʻa Tipinai, pea naʻe hoko ai ʻa ʻOmilai ʻo tuʻi.
23 ʻI he taʻu hono 31 ʻo e pule ʻa Tuʻi ʻAsa ʻo Siutá, naʻe hoko ai ʻa ʻOmilai ko e tuʻi ki ʻIsileli, pea naʻá ne pule ʻi he taʻu ʻe 12. Naʻá ne pule ʻi Tilisa ʻi he taʻu ʻe ono.
24 Naʻá ne fakatau ʻa e moʻunga ko Samēliá meia Semeli ki he talēniti* siliva ʻe ua, pea naʻá ne langa ha kolo ʻi he moʻungá. Naʻá ne fakahingoa ʻa e kolo naʻá ne langá ko Samēlia,*+ ʻo tauhingoa kia Semeli ʻa ia naʻe ʻaʻana ʻa e* moʻungá.
25 Naʻe hanganaki fai ʻe ʻOmilai ʻa e meʻa naʻe kovi ʻi he vakai ʻa Sihová, pea naʻá ne kovi ange ʻi he kotoa ʻo e faʻahinga naʻe ʻi muʻa ʻiate iá.+
26 Naʻá ne ʻaʻeva ʻi he ngaahi ʻalunga kotoa ʻo Selopoame ko e foha ʻo Nīpatí pea mo e angahala naʻá ne fakatupunga ke fai ʻe ʻIsilelí, ʻi heʻenau fakalotomamahiʻi ʻa Sihova ko e ʻOtua ʻo ʻIsilelí ʻaki ʻenau ngaahi ʻaitoli taʻeʻaongá.+
27 Ko e meʻa ki he toenga ʻo e hisitōlia ʻo ʻOmilaí, ʻa e meʻa naʻá ne faí mo ʻene ngaahi ngāue kāfakafá, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí?
28 Pea naʻe toka ʻa ʻOmilai ʻo mālōlō fakataha mo ʻene fanga kuí pea naʻe tanu ia ʻi Samēlia; pea naʻe hoko ʻa hono foha ko ʻĒhapí+ ko e tuʻi ʻo fetongi ia.
29 Ko ʻĒhapi ko e foha ʻo ʻOmilaí naʻá ne hoko ko e tuʻi ki ʻIsileli ʻi he taʻu hono 38 ʻo e pule ʻa Tuʻi ʻAsa ʻo Siutá, pea ko ʻĒhapi ko e foha ʻo ʻOmilaí naʻá ne pule ki ʻIsileli ʻi Samēlia+ ʻi he taʻu ʻe 22.
30 Ko ʻĒhapi ko e foha ʻo ʻOmilaí naʻá ne kovi ange ʻi he vakai ʻa Sihová ʻi he kotoa ʻo e faʻahinga naʻe ʻi muʻa ʻiate iá.+
31 ʻI he hangē ko ha meʻa siʻi pē kiate ia ʻa ʻene ʻaʻeva ʻi he ngaahi angahala ʻa Selopoame+ ko e foha ʻo Nīpatí, naʻá ne toe maʻu foki ke hoko ko hono uaifi ʻa Sisipeli+ ko e ʻofefine ʻo ʻEtipeali, ko e tuʻi ʻo e kau Saitoní,+ pea naʻe kamata ke ne tauhi kia Pēali+ mo punou hifo kiate ia.
32 ʻIkai ko ia pē, naʻá ne fokotuʻu ha ʻōlita kia Pēali ʻi he fale* ʻo Pēali+ naʻá ne langa ʻi Samēliá.
33 Naʻe ngaohi foki ʻe ʻĒhapi ʻa e pou ʻakau toputapu.*+ Naʻe fai ʻe ʻĒhapi ʻa e meʻa lahi ange ke fakalotomamahiʻi ʻa Sihova ko e ʻOtua ʻo ʻIsilelí ʻi he kotoa ʻo e ngaahi tuʻi ʻo ʻIsileli naʻe ʻi muʻa ʻiate iá.
34 ʻI he ngaahi ʻaho ʻo ʻĒhapí, naʻe toe langa ai ʻe Hieli ko e tangata Pētelí ʻa Sielikō. ʻI heʻene fakatoka ʻa hono fakavaʻé naʻe mate ʻa ʻApilami ko hono ʻuluaki fohá, pea ʻi heʻene fokotuʻu hono ngaahi matapaá naʻe mate ʻa Sekupi ko hono foha siʻisiʻi tahá, ʻo fakatatau ki he folofola ʻa Sihova naʻá ne folofolaʻaki fakafou ʻia Siosiua ko e foha ʻo Nuní.+
Fakamatala ‘i Lalo
^ ʻA ia, ko Nātapi, ko e foha ʻo Selopoamé.
^ Fakafoʻilea, “ha taha pē ʻoku tuʻuofi ʻi ha holisi.” Ko ha kupuʻi lea faka-Hepelū ʻo e manuki ʻoku fai ki he kakai tangatá.
^ Pe “kau faisāuni ʻo hono totó.”
^ Pe “palasi.”
^ Ko ha talēniti naʻe tatau ia mo e kilokalami ʻe 34.2 (ʻaunise ʻe 1,101). Sio ki he Fakamatala Fakalahi E14.
^ ʻOku ʻuhingá “ʻOku Maʻu ʻe he Haʻa Semelí.”
^ Fakafoʻilea, “ko e ʻeiki ʻo e.”
^ Pe “temipale.”
^ Sio ki he Lea mo Hono ʻUhinga.
