ʻUluaki Tuʻi 12:1-33
12 Naʻe ʻalu ʻa Lehopoame ki Sīkemi, he naʻe haʻu ʻa ʻIsileli kotoa ki Sīkemi+ ke fakanofo ia ko e tuʻi.+
2 ʻI he fanongo pē ai ʻa Selopoame ko e foha ʻo Nīpatí (naʻá ne kei ʻi ʻIsipite he naʻá ne hola koeʻuhí ko Tuʻi Solomone pea naʻá ne nofo ʻi ʻIsipite),+
3 naʻa nau fekau atu ke ne haʻu. ʻI he hili iá, naʻe haʻu ʻa Selopoame mo e fakatahaʻanga ʻo ʻIsilelí kotoa kia Lehopoame ʻo nau pehē:
4 “Ko hoʻo tamaí naʻá ne ʻai ke faingataʻa ʻemau ʻioké.+ Ka ʻo kapau te ke ʻai ke faingofua ange ʻa e ngāue faingataʻa ʻa hoʻo tamaí peá ke fakamaʻamaʻa ʻa e ʻioke mamafa* naʻá ne hilifaki kiate kimautolú, te mau tauhi kiate koe.”
5 ʻI he meʻá ni naʻá ne pehē ange ai kiate kinautolu: “Mou ō ʻi he ʻaho ʻe tolu; pea mou toki foki mai kiate au.” Ko ia naʻe ʻalu ai ʻa e kakaí.+
6 Naʻe kumi faleʻi leva ʻa Tuʻi Lehopoame ki he kau tangata taʻumotuʻa* ʻa ia naʻa nau ngāue ki heʻene tamai ko Solomoné lolotonga ʻene kei moʻuí, ʻo pehē: “Ko e hā ʻa e faleʻi te mou fai mai ki he founga ke fai ʻaki ha tali ki he kakai ko ení?”
7 Naʻa nau tali ange kiate ia: “Kapau te ke hoko he ʻahó ni ko ha sevāniti ki he kakaí ni pea fakamoʻulaloa ki heʻenau kolé pea ʻoange kiate kinautolu ha tali ʻoku leleí, te nau hoko maʻu pē ko hoʻo kau sevāniti.”
8 Kae kehe, naʻá ne siʻaki ʻa e faleʻi naʻe ʻoange kiate ia ʻe he kau tangata taʻumotuʻá,* pea naʻá ne kumi faleʻi ki he kau talavou naʻa nau tupu hake mo iá pea ko kinautolu ia ʻa ʻene kau tamaioʻeiki+ ʻi he taimi ko ení.
9 Naʻá ne ʻeke ange kiate kinautolu: “Ko e hā ha faleʻi te mou ʻomai ki he founga ke fai ʻaki haʻatau tali ki he kakai ko eni kuo nau pehē mai kiate au, ‘ʻAi ke maʻamaʻa ange ʻa e ʻioke naʻe hilifaki ʻe hoʻo tamaí kiate kimautolú’?”
10 Ko e kau talavou naʻa nau tupu hake mo iá naʻa nau pehē ange kiate ia: “Ko e meʻa eni te ke leaʻaki ki he kakai ko eni kuo nau pehē atu kiate koe, ‘Ko hoʻo tamaí naʻá ne ʻai ke mamafa ʻemau ʻioké, ka ʻoku totonu ke ke ʻai ia ke maʻamaʻa ange kiate kimautolu’; ko e meʻa eni te ke tala kiate kinautolú, ‘Te u toe anga-fefeka ange au ʻi heʻeku tamaí.*
11 Naʻe hilifaki ʻe heʻeku tamaí ha ʻioke mamafa kiate kimoutolu, ka te u fakalahi atu ʻa hoʻomou ʻioké. Naʻe tautea kimoutolu ʻe heʻeku tamaí ʻaki ʻa e ngaahi uipi, ka te u tautea kimoutolu ʻaki ʻa e ngaahi uipi mata māsila.’”
12 Naʻe haʻu ʻa Selopoame mo e kakaí kotoa kia Lehopoame ʻi he ʻaho hono tolú, ʻo hangē pē ko ia naʻe tala ange ʻe he tuʻí: “Foki mai kiate au ʻi he ʻaho hono tolú.”+
13 Ka naʻe tali fefeka ange ʻa e tuʻí ki he kakaí, ʻo ne siʻaki ʻa e faleʻi naʻe fai ange kiate ia ʻe he kau tangata taʻumotuʻá.*
14 Naʻá ne lea kiate kinautolu ʻo fakatatau ki he faleʻi ʻa e kau talavoú, ʻo pehē: “Naʻe ʻai ʻe heʻeku tamaí ke mamafa ʻa hoʻomou ʻioké, ka te u fakalahi atu ʻa hoʻomou ʻioké. Naʻe tautea kimoutolu ʻe heʻeku tamaí ʻaki ʻa e ngaahi uipi, ka te u tautea kimoutolu ʻaki ʻa e ngaahi uipi mata māsila.”
15 Ko ia naʻe ʻikai ke fanongo ʻa e tuʻí ki he kakaí, he ko e ngaahi meʻa ko eni naʻe hokó naʻe fakatupunga ia ʻe Sihova,+ koeʻuhí ke fakahoko ai ʻa e lea naʻe folofolaʻaki ʻe Sihova fakafou ʻia ʻĀhisa+ ko e tangata Sailó kia Selopoame ko e foha ʻo Nīpatí.
16 ʻI he mamata ʻa ʻIsileli kotoa naʻe fakafisi ʻa e tuʻí ke fanongo kiate kinautolú, naʻe tali ange ʻe he kakaí ki he tuʻí: “Ko e hā haʻamau kaunga kia Tēvita? ʻOku ʻikai hamau tofiʻa ʻi he foha ʻo Sesé. Mou ō ki homou ngaahi ʻotuá, ʻe ʻIsileli. Ko eni ke ke tokangaʻi ʻa ho fale ʻoʻoú, ʻe Tēvita!” Ko ia naʻe foki ai ʻa ʻIsileli ki honau ngaahi ʻapí.*+
17 Ka ko Lehopoame naʻe hokohoko atu ʻene pule ki he kau ʻIsileli naʻe nofo ʻi he ngaahi kolo ʻo Siutá.+
18 Naʻe fekauʻi atu leva ʻe Tuʻi Lehopoame ʻa ʻAtolami,+ ʻa ia naʻe pule ki he faʻahinga naʻe kounaʻi ke nau ngāue ki he tuʻí, ka naʻe tolomakaʻi ia ʻe ʻIsileli kotoa ʻo ne mate. Naʻe malava ʻa Tuʻi Lehopoame ke heka ʻi heʻene salioté ʻo hola ki Selusalema.+
19 Pea kuo angatuʻu+ ʻa e kau ʻIsilelí ki he fale ʻo Tēvitá ʻo aʻu mai ki he ʻahó ni.
20 ʻI he fanongo pē ʻa ʻIsileli kotoa kuo foki mai ʻa Selopoamé, naʻa nau ui mai ia ki he fuʻu fakatahá ʻo fakanofo ia ke ne tuʻi ki ʻIsileli kotoa.+ Naʻe ʻikai ha taha ʻi he kakaí ʻe muimui ki he fale ʻo Tēvitá tuku kehe pē ʻa e matakali ʻo Siutá.+
21 ʻI he aʻu ʻa Lehopoame ki Selusalemá, naʻá ne fakatahatahaʻi mai leva ʻa e fale kotoa ʻo Siutá pea mo e matakali ʻo Penisimaní, ko e kau tangata tau kuo ʻosi akoʻi* ʻe toko 180,000, ke nau tauʻi ʻa e fale ʻo ʻIsilelí koeʻuhí ke toe fakafoki mai ʻa e tuʻunga-tuʻí kia Lehopoame ko e foha ʻo Solomoné.+
22 Pea naʻe hoko mai ʻa e folofola ʻa e ʻOtua moʻoní kia Semaia+ ko e tangata ʻa e ʻOtua moʻoní, ʻo pehē:
23 “Lea kia Lehopoame ko e foha ʻo Solomone ko e tuʻi ʻo Siutá pea ki he fale kotoa ʻo Siuta mo Penisimaní pea mo e toenga ʻo e kakaí,
24 ‘Ko e meʻa eni ʻoku folofolaʻaki ʻe Sihová: “Kuo pau ke ʻoua naʻa mou ʻalu hake ʻo tauʻi homou fanga tokoua ʻIsilelí. Kuo pau ke mou taki taha foki ki hono fale, he kuó u fakatupunga ʻa e meʻá ni ke hoko.”’”+ Ko ia naʻa nau talangofua ki he folofola ʻa Sihová ʻo nau foki ki ʻapi, ʻo hangē pē ko e meʻa naʻe tala ange ʻe Sihova kiate kinautolú.
25 Naʻe langa* leva ʻe Selopoame ʻa Sīkemi+ ʻi he feituʻu moʻungaʻia ʻo ʻIfalemí pea nofo ai. Naʻá ne ʻalu atu mei ai ʻo langa* ʻa Penueli.+
26 Naʻe pehē loto pē ʻe Selopoame: “Ko eni ʻe toe foki ʻa e puleʻangá ki he fale ʻo Tēvitá.+
27 Kapau ʻe hokohoko atu ʻa e ʻalu ʻa e kakaí ni ke fai ʻa e ngaahi feilaulau ʻi he fale ʻo Sihová ʻi Selusalema,+ ʻe toe foki ʻa e loto ia ʻo e kakaí ni ki honau ʻeikí, ʻa Tuʻi Lehopoame ʻo Siutá. ʻIo, te nau tāmateʻi au pea foki kia Tuʻi Lehopoame ʻo Siutá.”
28 Hili ha kumi faleʻi, naʻe ngaohi ʻe he tuʻí ʻa e ongo kiʻi pulu koula+ peá ne pehē ki he kakaí: “ʻOku fuʻu faingataʻa kiate kimoutolu ke ʻalu hake ki Selusalema. Ko ena homou ʻOtuá, ʻe ʻIsileli, ʻa ia naʻá ne ʻomi kimoutolu mei he fonua ko ʻIsipité.”+
29 Naʻá ne fokotuʻu leva ʻa e taha ʻi Pēteli,+ pea ko e pulu ʻe tahá naʻá ne fokotuʻu ia ʻi Tani.+
30 Pea naʻe fakatupunga ʻe he meʻá ni kinautolu ke nau faiangahala,+ pea naʻe ʻalu ʻa e kakaí ʻo aʻu ki Tani ke lotu ki he pulu naʻe ʻi aí.
31 Pea naʻá ne ngaohi ʻa e ngaahi fale faiʻanga lotu ʻi he ngaahi potu māʻolungá pea fakanofo ʻa e kau taulaʻeiki mei he kakaí fakalūkufua, ʻa e faʻahinga naʻe ʻikai ko e kau Līvaí.+
32 Naʻe toe fokotuʻu ʻe Selopoame ha kātoanga ʻi he māhina hono valú, ʻi he ʻaho hono 15 ʻo e māhiná, ʻo hangē ko e kātoanga ʻi Siutá.+ ʻI he ʻōlita naʻá ne ngaohi ʻi Pētelí,+ naʻá ne faifeilaulau ai ki he ongo kiʻi pulu naʻá ne ngaohí, pea naʻá ne fakanofo ʻi Pēteli ʻa e kau taulaʻeiki ki he ngaahi potu māʻolunga naʻá ne ngaohí.
33 Pea naʻe kamata ke ne fai ʻa e ngaahi feilaulau ʻi he ʻōlita naʻá ne ngaohi ʻi Pētelí ʻi he ʻaho hono 15 ʻo e māhina hono valú, ʻi he māhina naʻá ne fili pē ʻe ia; pea naʻá ne fokotuʻu ha kātoanga maʻá e kakai ʻo ʻIsilelí, pea naʻá ne ʻalu hake ki he ʻōlitá ke fai ʻa e ngaahi feilaulau mo e feilaulau fakakohu.
Fakamatala ‘i Lalo
^ Pe “fakafeʻātungia.”
^ Pe “ki he kau mātuʻa.”
^ Pe “ʻe he kau mātuʻá.”
^ Fakafoʻilea, “Ko hoku kiʻi foʻi tuhu fōsiʻí ʻe matolu ange ia ʻi he kongaloto ʻo ʻeku tamaí.”
^ Pe “ʻe he kau mātuʻá.”
^ Fakafoʻilea, “ngaahi tēnití.”
^ Fakafoʻilea, “kuo fili.”
^ Pe “fakakolotauʻi.”
^ Pe “fakakolotauʻi.”
