ʻUluaki Sāmiuela 2:1-36
2 Pea naʻe lotu ʻa ʻAna ʻo pehē:
“ʻOku fiefia hoku lotó ʻia Sihova;+Naʻe foaki mai ha mālohi kiate au ʻe Sihova.*
ʻOku ou lea loto-toʻa ki hoku ngaahi filí,He ʻoku ou fiefia ʻi hoʻo ngaahi faifakamoʻuí.
2 ʻOku ʻikai ha tokotaha ʻe māʻoniʻoni ʻo hangē ko Sihová,ʻOku ʻikai ha taha ka ko koe pē,+Pea ʻoku ʻikai ha makatuʻu ʻe hangē ko homau ʻOtuá.+
3 ʻOua ʻe hanganaki lea ʻi he pōlepole;Tuku ke ʻoua ʻe haʻu ha lea hīkisia mei homou ngutú,He ko Sihová ko ha ʻOtua ʻo e ʻilo,+Pea ʻiate iá ʻoku fakafuofuaʻi totonu ai ʻa e ngaahi ngāué.
4 Ko e ngaahi kaufana ʻa e kau tangata toʻá ʻoku haveʻi,Ka ko kinautolu ʻoku humú ʻoku ʻoange ki ai ʻa e mālohi.+
5 Ko e kau mākoná kuo pau ke nau ngāue totongi ke maʻu ha mā,Ka ko e kau fiekaiá ʻoku ʻikai te nau kei fiekaia.+
Ko e paʻá kuó ne fāʻeleʻi ha toko fitu,+Ka ko e fefine naʻe tokolahi ʻene fānau tangatá kuó ne hoko ʻo halaʻatā.*
6 ʻOku tāmateʻi ʻe Sihova, pea ʻokú ne fakahaofi moʻui;*ʻOkú ne ʻohifo ki he Faʻitoká,* pea ʻokú ne fokotuʻu hake.+
7 ʻOku fakamasivaʻi ʻe Sihova, pea ʻokú ne fakakoloa;+ʻOkú ne tuku hifo, pea ʻokú ne hakeakiʻi.+
8 ʻOkú ne ʻohake ʻa e māʻulaló mei he efú;ʻOkú ne hiki hake ʻa e masivá mei he fokotuʻunga efú,*+Ke ʻai kinautolu ke nau nofo mo e houʻeikí,ʻO ʻoange kiate kinautolu ha nofoʻanga lāngilangiʻia.
Ko Sihova ʻoku ʻoʻona ʻa e ngaahi pou ʻo e māmaní,+Pea ʻokú ne tuku ʻa e fonua mahú ki ai.
9 ʻOkú ne maluʻi ʻa e laka ʻa ʻene kau mateakí,+Ka ko e fulikivanú ʻe fakasīlongoʻi ʻi he fakapoʻulí,+He ʻoku ʻikai ikuna+ ha tangata ʻi hono mālohi pē ʻoʻoná.
10 ʻE haveʻi ʻe Sihova ʻa kinautolu ʻoku faitau kiate iá;*+Te ne ʻomi mana mei he langí+ kiate kinautolu.
ʻE faifakamaau ʻa Sihova ʻo aʻu ki he ngaahi ngataʻanga ʻo e māmaní,+Te ne ʻoange ʻa e mālohi ki heʻene tuʻí+Pea hakeakiʻi ʻa e mālohi* ʻo ʻene tokotaha paní.”+
11 Pea naʻe hū ʻa ʻElikena ki hono falé ʻi Lama, ka ko e tamasiʻí naʻe hoko ko ha sevāniti* ʻa Sihova+ ʻi he ʻao ʻo ʻĪlai ko e taulaʻeikí.
12 Pea ko e ongo foha ʻo ʻĪlaí ko e ongo tangata fulikivanu;+ naʻe ʻikai haʻana tokaʻi ʻa Sihova.
13 Ko e meʻa eni naʻe fai ki he ngaahi ʻinasi naʻe totonu ke maʻu ʻe he kau taulaʻeikí mei he kakaí:+ ʻI ha taimi pē naʻe fai ai ʻe ha tangata ha feilaulau, naʻe haʻu ha tangata ngāue ʻa e taulaʻeikí mo ha huhu mata-tolu ʻi hono nimá ʻi he taimi naʻe haka ai ʻa e kakanoʻi-manú,
14 pea naʻá ne mono ki loto ki he hakaʻanga meʻá, ki he kulo feimeʻakai kau-uá, kulo ukamea fuopotopotó, pe ko e kulo feimeʻakai kau-tahá. ʻIlonga ha meʻa naʻe ʻohake ʻe he huhú, naʻe toʻo ia ʻe he taulaʻeikí maʻana. Ko e meʻa ia naʻa nau fai ʻi Sailo ki he kau ʻIsileli kotoa naʻe omi ki aí.
15 Pehē foki, naʻa mo e ki muʻa ke tutu ʻe he tangata faifeilaulaú ke kohu ʻa e ngakó,+ naʻe haʻu ha tangata ngāue ʻa e taulaʻeikí ʻo ne pehē kiate ia: “ʻOmi ki he taulaʻeikí ha kakanoʻi-manu ke ne tunu. ʻE ʻikai te ne toʻo meiate koe ha kakanoʻi-manu kuo haka, ko e kakanoʻi-manu mata pē.”
16 ʻI he pehē ange ʻe he tangatá kiate ia: “Tuku ke ʻuluaki tutu ke kohu ʻa e ngakó,+ peá ke toki toʻo leva maʻau ha meʻa pē ʻokú ke loto ki aí,”* naʻá ne pehē ange: “ʻIkai, ʻomi ia he taimí ni kiate au; ka ʻikai, te u toʻo fakamālohi ia!”
17 Ko ia ko e angahala ʻa e kau tangata ngāué naʻe hoko ʻo lahi ʻaupito ʻi he ʻao ʻo Sihová,+ he naʻe taʻetokaʻi ʻe he kau tangatá ni ʻa e feilaulau kia Sihová.
18 Pea ko Sāmiuela leva naʻá ne fakahoko fatongia+ ʻi he ʻao ʻo Sihová, pea naʻá ne tui* ha ʻēfoti līneni,+ neongo naʻá ne kei tamasiʻi pē.
19 Pehē foki, naʻe ngaohi ʻe heʻene faʻeé moʻona ha kiʻi kofu taʻenima, pea naʻá ne ʻomi ia kiate ia ʻi he taʻu ki he taʻu ʻi he taimi naʻá ne ʻalu atu ai mo hono husepānití ke foaki ʻa e feilaulau fakataʻú.+
20 Pea naʻe tāpuakiʻi ʻe ʻĪlai ʻa ʻElikena mo hono uaifí peá ne pehē: “ʻOfa ke foaki atu ʻe Sihova kiate koe ha tama ʻi he uaifi ko ení ke fetongiʻaki ʻa e taha naʻe foaki kia Sihová.”+ Pea naʻá na foki ki ʻapi.
21 Naʻe fakahanga ʻe Sihova ʻene tokangá kia ʻAna, ʻo malava ai ke ne feitama;+ pea naʻá ne fāʻeleʻi ha toe tama ʻe toko tolu mo ha ongo tamaiki fefine. Pea ko e tamasiʻi ko Sāmiuelá naʻe hokohoko atu ʻene tupu ʻi he ʻao ʻo Sihová.+
22 Pea kuo motuʻa ʻaupito ʻa ʻĪlai, ka naʻá ne fanongo ʻo fekauʻaki mo e meʻa kotoa pē naʻe fai ʻe hono ongo fohá+ ki he kotoa ʻo ʻIsilelí pea mo ʻena mohe* mo e kakai fefine naʻe ngāue ʻi he hūʻanga ʻo e tēniti feʻiloakiʻangá.+
23 Naʻá ne faʻa pehē ange kiate kinaua: “Ko e hā ʻokú mo hanganaki fai ai ʻa e ngaahi meʻa pehení? He ko e ngaahi meʻa ʻoku ou fanongo ai fekauʻaki mo kimoua mei he kotoa ʻo e kakaí ʻoku kovi.
24 Tuku ia ʻe hoku ongo foha, koeʻuhí ko e fakamatala ʻoku ou fanongo ʻoku ʻalu holo ʻi he lotolotonga ʻo e kakai ʻa Sihová ʻoku ʻikai lelei.
25 Kapau ʻe faiangahala ha tangata ki ha tangata ʻe taha, ʻe lava ke fai ʻe ha taha ha hū kia Sihova maʻana;* ka ʻo kapau ʻe faiangahala ha tangata kia Sihova,+ ko hai ia ʻe lava ke ne fai ha lotu maʻana?” Ka naʻá na fakafisi ke fanongo ki heʻena tamaí, he naʻe fakapapauʻi ʻe Sihova ke tāmateʻi kinaua.+
26 Lolotonga ia, ko e tamasiʻi ko Sāmiuelá naʻe tupu ai pē ʻa hono lahí pea naʻe ʻofeina fakatouʻosi ʻe Sihova mo e kakaí.+
27 Naʻe haʻu ha tangata ʻa e ʻOtuá kia ʻĪlai ʻo ne pehē kiate ia: “Ko e folofola eni ʻa Sihová: ‘ʻIkai naʻá ku fakahā mahino au ki he fale ʻa hoʻo tamaí lolotonga ʻenau ʻi ʻIsipite ko e kau pōpula ki he fale ʻo Feló?+
28 Pea naʻe fili ia mei he ngaahi matakali kotoa pē ʻo ʻIsilelí+ ke hoko ko ʻeku taulaʻeiki pea ke ne ʻalu hake ki hoku ʻōlitá+ ke fai ha ngaahi feilaulau, ke tutu ʻinisēnisi,* pea ke ne tui ha ʻēfoti ʻi hoku ʻaó; pea naʻá ku foaki ki he fale ʻo hoʻo kuí ʻa e ngaahi feilaulau kotoa pē ʻa e kau ʻIsilelí*+ ʻoku fai ʻaki ʻa e afí.
29 Ko e hā ʻoku mou taʻetokaʻi* ai, kau tangata, ʻa ʻeku feilaulaú mo ʻeku foaki naʻá ku tuʻutuʻuni ʻi hoku nofoʻangá?+ Ko e hā ʻokú ke hanganaki fakalāngilangiʻi ai ho ongo fohá ʻo lahi ange ia ʻiate au ʻaki hoʻomou kai ke mou sisino mei he ngaahi ʻinasi lelei taha ʻo e foaki kotoa pē ʻa ʻIsileli ko hoku kakaí?+
30 “‘Ko e ʻuhinga ia ʻoku pehē ai ʻe he folofola ʻa Sihova ko e ʻOtua ʻo ʻIsilelí: “Naʻá ku mātuʻaki pehē ko ho falé mo e fale ʻo hoʻo kuí ʻe ʻaʻeva maʻu ai pē ʻi hoku ʻaó.”+ Ka ko eni ʻoku talaki ʻe Sihova: “Mole ke mamaʻo haʻaku toe fakakaukau pehē, koeʻuhí ko e faʻahinga ʻoku nau fakalāngilangiʻi aú te u fakalāngilangiʻi,+ ka ko e faʻahinga ʻoku nau taʻetokaʻi aú ʻe ʻikai fai hano fakaʻapaʻapaʻi.”
31 Vakai! ʻOku hoko mai ʻa e ngaahi ʻaho ʻa ia te u tuʻusi ai ho mālohí* pea mo e mālohi ko ia ʻo e fale ʻo hoʻo tamaí, ke ʻoua naʻa ʻi ai ha tangata ʻi ho falé ʻe aʻu ʻo taʻumotuʻa.+
32 Pea te ke sio ki ha fili ʻi hoku nofoʻangá neongo ʻa e ngaahi lelei kotoa ʻoku fai ʻi ʻIsilelí,+ pea ʻe ʻikai ʻaupito ke toe ʻi ai ha tangata taʻumotuʻa ʻi ho falé.
33 Ko hoʻo tangata ʻa ia ʻoku ʻikai te u toʻo mei heʻene ngāue ʻi hoku ʻōlitá te ne ʻai ke kovi hoʻo sió pea te ne ʻomi ʻa e mamahi kiate koe, ka ko e fuʻu tokolahi ange ʻo ho falé te nau mate ʻi he heletā ʻa e kau tangatá.+
34 Pea ko e meʻa ʻe hoko ki ho ongo fohá, ʻa Hofinai mo Fineasi, ʻe hoko ia ko ha fakaʻilonga kiate koe: Te na fakatou mate+ ʻi he ʻaho pē ʻe taha.
35 Te u fokotuʻu leva maʻaku ha taulaʻeiki faitōnunga.+ Te ne ngāue ʻo fehoanaki mo e meʻa ʻoku holi ki ai ʻa hoku lotó; pea te u langa moʻona ha fale taʻengata, pea te ne ʻaʻeva maʻu ai pē ʻi he ʻao ʻo ʻeku tokotaha paní.
36 Ko ha taha pē ʻe toe ʻi ho falé te ne haʻu ʻo punou kiate ia ki ha totongi ko e paʻanga mo ha foʻi mā, pea te ne pehē: “Vaheʻi muʻa au ki he taha ʻo e ngaahi lakanga fakataulaʻeikí ke u kai ai ha konga mā.”’”+
Fakamatala ‘i Lalo
^ Fakafoʻilea, “Ko ʻeku meʻatuí ʻoku hakeakiʻi ʻe Sihova.”
^ Fakafoʻilea, “kuo mae.”
^ Pe “fakamoʻui.”
^ Pe “ki Seoli,” ʻa ia, ko e faʻitoka anga-maheni ʻo e faʻahinga ʻo e tangatá. Sio ki he Lea mo Hono ʻUhinga.
^ Pe ngalingali, “lingiʻanga vevé.”
^ Pe ngalingali, “Ko e faʻahinga ʻoku fefaʻuhi mo Sihová te nau manavahē.”
^ Fakafoʻilea, “meʻatui.”
^ Pe “naʻá ne tauhi.”
^ Pe “ʻokú ke ʻuakai ki aí.”
^ Fakafoʻilea, “noʻoʻaki.”
^ Pe “fehokotaki fakasino.”
^ Pe ngalingali, “ko e ʻOtuá ʻe faifakamaau maʻaná.”
^ Fakafoʻilea, “ngaahi foha ʻo ʻIsilelí.”
^ Pe ngalingali, “ke ʻai ke ʻalu hake ʻa e kohu ʻo e feilaulaú.”
^ Fakafoʻilea, “ʻaka.”
^ Fakafoʻilea, “nimá.”
