ʻIsikeli 19:1-14
-
Taʻanga tangi ki he ngaahi ʻeiki ʻo ʻIsilelí (1-14)
19 “Kuo pau ke ke hivaʻi ha taʻanga tangi* ʻo fekauʻaki mo e ngaahi ʻeiki ʻo ʻIsilelí
2 ʻo pehē,‘Ko e hā ʻa hoʻo faʻeé? Ko ha laione fefine ʻi he lotolotonga ʻo e fanga laioné.
Naʻá ne tokoto ʻi he lotolotonga ʻo ha fanga laione mui ʻoku mālohi peá ne tauhi ʻa hono ʻuhikí.
3 Naʻá ne tauhi hake ha taha ʻo hono ʻuhikí, ʻo ne hoko ko ha laione mui ʻoku mālohi.+
Naʻe kamata ke ne poto ʻi he tulimanú,Naʻe aʻu ʻo ne kai ʻa e tangatá.
4 Naʻe fanongo ʻa e ngaahi puleʻangá ʻo fekauʻaki mo ia pea nau pō ia ʻi heʻenau luó,Pea nau ʻomi ia ki he fonua ko ʻIsipité ʻaki ha mātaʻu.+
5 Naʻe tatali ʻa ʻene faʻeé pea faifai atu pē ʻo ne sio naʻe ʻikai ha toe ʻamanaki ki haʻane foki mai.
Ko ia naʻá ne toʻo hano toe ʻuhiki ʻe taha ʻo ne tuku atu ia ko ha laione mui ʻoku mālohi.
6 Naʻá ne toe ʻalu holo foki ʻi he lotolotonga ʻo e fanga laioné ʻo ne hoko ko ha laione mui ʻoku mālohi.
Naʻe kamata ke ne poto ʻi he tulimanú, pea naʻe aʻu ʻo ne kai ʻa e tangatá.+
7 Naʻá ne totolo holo ʻi he ngaahi taua fakakolotau ʻo e kakaí peá ne haveki ʻa honau ngaahi koló,Ko ia naʻe tofuhia ʻa e fonua kuo lalá ʻi he ongo mai ʻa ʻene ngungulú.+
8 Ko e ngaahi puleʻanga mei he ngaahi vahefonua takatakaí naʻa nau ʻalu atu kiate ia ke lafoʻi ia ʻaki ʻenau kupengá,Pea naʻe maʻu ia ʻi heʻenau luó.
9 Naʻa nau taki ia ʻaki ha mātaʻu ʻo fakahū ki ha kiʻi ʻā pea nau ʻave ia ki he tuʻi ʻo Pāpiloné.
Naʻa nau tuku pōpula ia ʻi ai, ko ia naʻe ʻikai ke toe ongona ʻa hono leʻó ʻi he ngaahi moʻunga ʻo ʻIsilelí.
10 Ko hoʻo faʻeé naʻe hangē ha fuʻu kālepi*+ naʻe tō ʻi ha veʻe vai.
Naʻe laku fua mai pea lahi ʻa hono ngaahi vaʻá koeʻuhí ko e lahi ʻa e vaí.
11 Naʻe tupu mai hano ngaahi vaʻa mālohi,* ʻo feʻunga ke hoko ko ha ngaahi sēpita ʻa e kau pulé.
Naʻe tupu ia ʻo māʻolunga ʻi he ʻuluʻakau kehé,Pea naʻe hoko ʻo maeʻeeʻa koeʻuhi ko hono māʻolungá pea koeʻuhi ko e lahi ʻa hono ngaahi vaʻa mohu laú.
12 Ka naʻe taʻaki hake+ ia ʻi he ʻita ʻo lī ki he kelekelé,Pea naʻe hanga ʻe he matangi hahaké ʻo ʻai ke mōmoa ʻa hono fuá.
Ko hono ngaahi vaʻa mālohí naʻe mafesi pea hoko ʻo mōmoa,+ pea naʻe keina ia ʻe he afí.+
13 Pea ko eni kuo tō ia ʻi he toafá,ʻI ha fonua pakukā mo ʻikai ʻi ai ha vai.+
14 Naʻe mafola mai ʻa e afí mei hono ngaahi vaʻá* ʻo ne keina ʻa hono ngaahi hulí mo hono fuá,Pea naʻe ʻikai ʻi ai ha vaʻa mālohi ʻe toe, pea ʻikai ha sēpita ki he pulé.+
“‘Ko e taʻanga tangí ia, pea ʻe hoko ai pē ia ko ha taʻanga tangi.’”
Fakamatala ‘i Lalo
^ Fakafoʻilea, “mou ʻai kiate kimoutolu.”
^ Pe “hiva ʻo e tengihia.”
^ Fakafoʻilea, “ha fuʻu kālepi ʻi ho totó ʻa ia.”
^ Pe “ngaahi tokotoko.”
