Ki he Kau Kalētia 4:1-32
4 Ko ia ai ko au, ko e pōpula+ ʻi he ʻEikí, ʻoku ou kōlenga atu kiate kimoutolu ke mou ʻaʻeva ʻo taau+ mo e ui ʻa ia naʻe ui ai kimoutolú,
2 ʻi he anga-fakatōkilalo*+ mo e anga-malū kakato, ʻi he kātaki,+ ʻo fekātakiʻaki ʻi he ʻofa,+
3 ʻo feinga tōtōivi ke tauhi maʻu ʻa e laumālie taha ʻi he haʻi fāʻūtaha ko e melinó.+
4 ʻOku taha ʻa e sinó,+ pea taha ʻa e laumālié,+ ʻo hangē tofu pē ko ia ko hono ui kimoutolu ki he ʻamanaki ʻe taha+ naʻe ui ai kimoutolú;
5 ʻoku taha ʻa e ʻEikí,+ taha ʻa e tuí, taha ʻa e papitaisó;
6 ʻoku taha ʻa e ʻOtua mo e Tamai ʻa e tokotaha kotoa pē, ʻa ia ʻokú ne pule ki he tokotaha kotoa mo ngāue fakafou ʻi he tokotaha kotoa pea ʻoku ngāue hono iví ʻi he tokotaha kotoa.
7 Ko ia ko e ʻofa maʻataʻataá naʻe foaki mai ia ki he tokotaha taki taha ʻo kitautolu ʻo fakatatau ki he anga hono vaheʻi mai ʻe he Kalaisí ʻa e meʻaʻofa taʻetotongí ni.+
8 He ʻokú ne folofola: “ʻI heʻene hāʻele hake ki ʻolungá naʻá ne ʻave ha kau pōpula; naʻá ne foaki ha ngaahi meʻaʻofa ko e kau tangata.”+
9 Ko ia ko e hā ʻoku ʻuhinga ki ai ʻa e kupuʻi lea ko e “ʻi heʻene hāʻele hake”? ʻOku ʻuhinga iá naʻá ne hāʻele hifo foki ki he ngaahi feituʻu maʻulalo angé, ʻa ia, ko e māmaní.
10 Ko e tokotaha tonu ko ia naʻe hāʻele hifó ko ia foki ʻa e tokotaha naʻe hāʻele hake+ ʻo māʻolunga mamaʻo ia ʻi he ngaahi langí kotoa,+ koeʻuhi ke ne fakahoko ʻa e ngaahi meʻa kotoa pē.
11 Pea naʻá ne foaki ʻa e niʻihi ko e kau ʻapositolo,+ niʻihi ko e kau palōfita,+ niʻihi ko e kau ʻevangeliō,*+ niʻihi ko e kau tauhi-sipi mo e kau faiako,+
12 ʻi he taumuʻa ko hono fakatonutonu* ʻa e kakai tapú, mo fai ha ngāue maʻá e niʻihi kehé, mo langa hake ʻa e sino ʻo e Kalaisí,+
13 kae ʻoua kuo tau hoko kotoa ʻo taha* ʻi he tuí pea maʻu ʻa e ʻilo totonu fekauʻaki mo e ʻAlo ʻo e ʻOtuá, koeʻuhi ke tau hoko ko ha tangata kuo kakato ʻene tupú,*+ pea hoko hotau ʻulungāngá ʻo kakato ko ha tokotaha lahi, hangē ko e Kalaisí.
14 Ko ia ʻoku totonu ke ʻoua te tau kei hoko ko e fānau, ʻo hangē ʻoku fepālekina holo ʻe he peaú mo feʻaveʻaki holo ʻe he matangi kotoa pē ʻo e akonaki+ ʻoku fakafou ʻi he olopoto ʻa e tangatá, ʻa ia ʻoku fakafou ʻi hono fai fakaoloolo ʻa e ngaahi faʻufaʻu kākaá.
15 Ka kuo pau ke tau leaʻaki ʻa e moʻoní pea fakahāhā ʻa e ʻofá, pea te tau malava ai ke hoko ʻo matuʻotuʻa ʻi he tafaʻaki kotoa pē ke tau moʻui ʻo fehoanaki mo Kalaisi, ko e ʻulú.+
16 ʻIate ia ʻoku fehokotaki lelei fakataha ai ʻa e kotoa ʻo e sinó+ pea ʻoku hoko ai ʻa e fengāueʻaki fakataha fakafou ʻi he hokoʻanga kotoa pē ʻa ē ʻokú ne ʻomai ʻa e meʻa ʻoku fiemaʻú. ʻI he taimi ʻoku ngāue totonu ai ʻa e ngaahi kupu taki taha ko iá, ʻoku tokoni ia ki he tupu ʻa e sinó ʻi heʻene langa hake ia ʻi he ʻofá.+
17 Ko ia ko e meʻa eni ʻoku ou lea mo fakamoʻoni ki ai ʻi he ʻEikí, ke ʻoua te mou kei ʻaʻeva ʻo hangē tofu pē ko e ʻaʻeva ʻa e ngaahi puleʻangá+ ʻi he muna* ʻo ʻenau ngaahi fakakaukaú.+
18 ʻOku nau ʻi he fakapoʻuli fakaefakakaukau pea mavahe mei he moʻui ʻoku fekauʻaki mo e ʻOtuá, koeʻuhi ko e ʻikai te nau fie ʻilo ki he ʻOtuá, tupu mei he ʻikai ke ongongofua* honau lotó.
19 Kuo ʻikai ke nau toe maʻu ʻa e ongoʻi fakaeʻulungaanga totonu kotoa pē, kuo nau tuku atu kinautolu ki he faikovi taʻemīngao,*+ ke tōʻongaʻaki ʻa e faʻahinga kotoa pē ʻo e taʻemaʻá ʻi he havala.
20 Ka naʻa mou ako ʻo ʻilo ko e Kalaisí ʻoku ʻikai peheni,
21 he, ko hono moʻoní, naʻa mou fanongo kiate ia mo akoʻi fakafou ʻiate ia, ʻo hangē tofu pē ko e moʻoni ʻoku ʻia Sīsuú.
22 Naʻe akoʻi kimoutolu ke mou huʻi atu ʻa e angaʻitangata motuʻá+ ʻa ia ʻoku fakatatau ki homou ʻalunga fakaeʻulungaanga ki muʻá pea kuo fakameleʻi ia ʻo fakatatau ki heʻene ngaahi holi kākaá.+
23 Pea ʻoku totonu ke hokohoko atu hono fakafoʻou ʻa homou tūkunga fakaefakakaukau ʻa ia ʻokú ne tākiekina kimoutolú,*+
24 pea ʻoku totonu ke mou kofuʻaki ʻa e angaʻitangata foʻou+ ʻa ia naʻe fakatupu ʻo fakatatau ki he finangalo ʻo e ʻOtuá ʻi he māʻoniʻoni moʻoni mo e mateaki moʻoni.
25 Ko ia ai, ko eni kuo mou huʻi atu ʻa e kākaá, ko e tokotaha taki taha ʻo kimoutolu ke ne lea moʻoni ki hono kaungāʻapí,+ koeʻuhi ko e ngaahi kupu kitautolu ʻoku tau fekauʻaki.+
26 ʻIta pē, kae ʻoua ʻe faiangahala ai;+ ʻoua ʻe tuku ke tō ʻa e laʻaá ʻoku mou kei ʻita;+
27 ʻoua ʻe ʻoange ha faingamālie ki he Tēvoló.*+
28 Tuku ki he tokotaha ʻoku kaihaʻá ke ʻoua te ne toe kaihaʻa; ʻi hono kehé, tuku ke ne ngāue mālohi, ʻo fai ha ngāue lelei ʻaki hono ongo nimá,+ koeʻuhi ke ne maʻu ha meʻa ke vahevahe atu ki ha taha ʻoku masiva.+
29 Tuku ke ʻoua ʻe haʻu mei homou ngutú ha lea palakū,+ ka ko e meʻa pē ʻoku lelei ki he langa haké ʻo fakatatau ki he fiemaʻú, ke ʻoatu ai ʻa e meʻa ʻoku ʻaongá ki he kau fanongó.+
30 Pehē foki, ʻoua ʻe fakamamahiʻi* ʻa e laumālie māʻoniʻoni ʻo e ʻOtuá,+ ʻa ia kuo silaʻiʻaki kimoutolu+ ki he ʻaho ʻo hono fakatauʻatāinaʻi ʻe he huhuʻí.+
31 Huʻi atu meiate kimoutolu ʻa e faʻahinga kotoa pē ʻo e loto-kona fakalotokoví,+ ʻitá, lilí, fekailangakí, mo e laukoví,+ pea pehē foki ki he meʻa fakatupu maumau kotoa pē.+
32 Kae hoko ʻo feangaleleiʻaki, manavaʻofa kaungāongoʻi,+ ʻo fefakamolemoleʻaki mātuʻaki loto-lelei ʻo hangē tofu pē foki ko hono fakamolemoleʻi mātuʻaki loto-lelei kimoutolu ʻe he ʻOtuá ʻia Kalaisí.+
Fakamatala ‘i Lalo
^ Pe “fakakaukau fakatōkilalo.”
^ Pe “kau fanongonongo ʻo e ongoongo leleí.”
^ Pe “akoʻi.”
^ Pe “fāʻūtaha.”
^ Pe “kuo matuʻotuʻa.”
^ Pe “koto ngeʻesi.”
^ Fakafoʻilea, “mei he ongonoa.”
^ Pe “tōʻonga taʻenā.” Faka-Kalisí, a·selʹgei·a. Sio ki he Lea mo Hono ʻUhinga.
^ Pe “ʻa e mālohi ʻokú ne ueʻi homou ʻatamaí.” Fakafoʻilea, “ʻa e laumālie ʻo homou ʻatamaí.”
^ Pe “ʻoua naʻa tuku ha ava ki he Tēvoló.”
^ Pe “ʻai ke mamahi.”
