Ki he Kau Kalētia 3:1-21
3 ʻI he ʻuhinga ko ení, ko au Paula, ko e pōpula+ ʻa Kalaisi Sīsū maʻa kimoutolu, ʻa e kakai ʻo e ngaahi puleʻangá—
2 kapau kuo mou fanongo moʻoni kuó u maʻu ʻa e fatongia+ ke tokoniʻi kimoutolu ke mou maʻu ʻa e ʻaonga mei he ʻofa maʻataʻatā ʻa e ʻOtuá,
3 ʻa ia fakafou ʻi ha meʻa fakahā naʻe fakaʻilo mai ai kiate au ʻa e fakalilolilo toputapú, ʻo hangē tofu pē ko ia naʻá ku tohi nounou atu ai ki muʻá.
4 Ko ia ʻi hoʻomou lau ení, ʻe lava ke mou ʻiloʻi ai ʻoku ou mahinoʻi ʻa e fakalilolilo toputapu+ ʻo fekauʻaki mo e Kalaisí.
5 ʻI he ngaahi toʻutangata kehé, naʻe ʻikai ke fakaʻilo ai ʻa e fakalilolilo ko ení ki he ngaahi foha ʻo e tangatá, ʻo hangē ko ia kuo fakahā he taimí ni ki heʻene kau ʻapositolo māʻoniʻoní mo e kau palōfitá fakafou ʻi he laumālié,+
6 ʻa ia, ko e pehē ke hoko ʻa e kakai ʻo e ngaahi puleʻangá, ʻi he fāʻūtaha mo Kalaisi Sīsuú pea fakafou ʻi he ongoongo leleí, ko e ngaahi kaungāʻea mo e ngaahi kaungā-mēmipa ʻo e sinó+ pea mo e kau kaungāʻinasi mo kimautolu ʻi he talaʻofá.
7 Naʻá ku hoko ko ha faifekau* ʻo e meʻá ni ʻo fakatatau ki he meʻaʻofa taʻetotongi ko e ʻofa maʻataʻatā ʻa e ʻOtuá ʻa ia naʻe foaki mai kiate au fakafou ʻi he ngāue ʻa hono mālohí.+
8 Ko au, ko ha tangata ʻoku ou siʻisiʻi ange ʻi he siʻisiʻi taha ʻi he kotoa ʻo e kakai tapú,+ naʻe foaki mai ki ai ʻa e ʻofa maʻataʻatā ko ení,+ koeʻuhi ke u talaki ai ki he ngaahi puleʻangá ʻa e ongoongo lelei ʻo fekauʻaki mo e ngaahi koloa taʻemafakatotoloa ʻa e Kalaisí
9 pea ke u ʻai ʻa e tokotaha kotoa pē ke nau sio ki he fakahoko ʻo e fakalilolilo toputapú+ ʻa ia kuo fufū ʻi he faai mai ʻa e ngaahi kuongá ʻe he ʻOtuá, ʻa ia naʻá ne fakatupu ʻa e ngaahi meʻa kotoa pē.
10 Naʻe hoko eni koeʻuhi ke lava ʻi he taimí ni, fakafou ʻi he fakatahaʻangá,+ ʻo fakaʻilo atu ki he ngaahi founga-pule mo e ngaahi mafai ʻi he ngaahi potu fakahēvaní ʻa e ngaahi tafaʻaki lahi ʻo e poto ʻo e ʻOtuá.+
11 ʻOku fakatatau eni ki he taumuʻa taʻengata naʻá ne fokotuʻu ʻi he fekauʻaki mo e Kalaisí,+ ʻa Sīsū ko hotau ʻEikí,
12 ʻa ia fakafou ʻiate ia ʻoku lava ai ke tau lea loto-toʻa mo fakaofiofi ki he ʻOtuá+ ʻi he falala pau, he ʻoku tau tui kia Kalaisi.
13 Ko ia ʻoku ou kole atu kiate kimoutolu ke ʻoua te mou foʻi ko e meʻa ʻi hoku ngaahi mamahi koeʻuhi ko kimoutolú, he ʻoku hoko ʻa e ngaahi meʻá ni ko ha lāngilangi maʻamoutolu.+
14 ʻI he ʻuhingá ni ʻoku ou tūʻulutui hifo ai ki he Tamaí,
15 ʻa ia ʻoku tupu mei ai ʻa e hingoa ʻo e fāmili kotoa pē ʻi langi mo māmani.
16 ʻOku ou lotu ke ne ʻai kimoutolu fakafou ʻi he lahi fau ʻo hono lāngilangí, ke mou hoko ʻo kaukaua ʻi homou tangata ʻi lotó,+ fakafou ʻi he mālohi ʻo hono laumālié,
17 pea ke hoko fakafou ʻi hoʻomou tuí ʻo nofo ʻa e Kalaisí ʻi homou lotó fakataha mo e ʻofá.+ Fakatauange ke mou hoko ʻo faiaka+ mo tuʻu maʻu ʻi he makatuʻungá,+
18 koeʻuhi ke mou mātuʻaki malava fakataha mo e kotoa ʻo e kakai tapú ʻo mahinoʻi kakato ʻa e fālahi mo e lōloa mo e māʻolunga mo e loloto ʻo e moʻoní,
19 pea ke mou ʻilo ʻa e ʻofa ʻa e Kalaisí,+ ʻa ia ʻoku mahulu atu ia ʻi he ʻiló, koeʻuhi ke fakafonu ʻaki ai kimoutolu ʻa e ngaahi ʻulungaanga ʻo e ʻOtuá ʻokú ne foaki maí.
20 Pea ki he tokotaha ʻa ia ʻokú ne lava, fakatatau ki hono mālohi ʻoku ngāue ʻiate kitautolú,+ ʻo fai ʻa e meʻa ʻoku mahulu lahi atu ia ʻi he ngaahi meʻa kotoa pē ʻoku tau kole pe fakakaukau ki aí,+
21 ke ʻaʻana ʻa e lāngilangí fakafou ʻi he fakatahaʻangá pea fakafou ʻia Kalaisi Sīsū ki he ngaahi toʻutangata kotoa pē ʻo taʻengata pea taʻengata. ʻĒmeni.
Fakamatala ‘i Lalo
^ Pe “sevāniti.”
