ʻAisea 58:1-14
58 “Kaila leʻo-lahi; ʻoua ʻe taʻofi!
Hiki hake ho leʻó ʻo hangē ha meʻaifí.
Talaki ki hoku kakaí ʻenau angatuʻú,+Ki he fale ʻo Sēkopé ʻa ʻenau angahalá.
2 ʻOku nau kumi kiate au ʻi he ʻaho ki he ʻaho,Pea ʻoku nau fakahaaʻi ʻa e fiefia ʻi he ʻilo ki heʻeku ngaahi foungá,ʻO nau hangē ha puleʻanga naʻa nau tōʻongaʻaki ʻa e māʻoniʻoníPea naʻe ʻikai te nau siʻaki ʻa e fakamaau totonu ʻa honau ʻOtuá.+
ʻOku nau kole kiate au ha fakamaau māʻoniʻoni,ʻO nau fiefia ke ʻunuʻunu ofi ki he ʻOtuá:+
3 ‘Ko e hā ʻoku ʻikai te ke ʻafio mai ai ʻi he taimi ʻoku mau ʻaukai aí?+
Pea ko e hā ʻoku ʻikai te ke fakatokangaʻi ai ʻa e taimi ʻoku mau fakamamahi aí?’+
Koeʻuhí ʻi he ʻaho ʻoku mou ʻaukai aí, ʻoku mou tuli ai ki he ngaahi meʻa* pē ʻamoutolú,Pea mou ngaohikoviʻi ʻa e faʻahinga ʻoku ngāue kiate kimoutolú.+
4 ʻOku iku ʻa hoʻomou ngaahi ʻaukaí ki he ngaahi felāuaki mo e kē,Pea ʻoku mou tuki anga-fulikivanu ʻaki homou tuké.
Heʻikai lava ke mou ʻaukai ʻo hangē ko ia ʻoku mou fai he ʻaho ní pea ongona ai homou leʻó ʻi hēvani.
5 ʻE peheni koā ʻa e ʻaukai ʻoku ou filí,Ko ha ʻaho ke fakamamahi ai ha taha,Ke mapelu hono ʻulú hangē ha kutá,Ke ne mohenga ʻaki ʻa e tauangaʻa mo e efuefu?
Ko e meʻa eni ʻokú ke ui ko e ʻaukai mo ha ʻaho ʻoku fakahōifua kia Sihová?
6 ʻIkai, ko e ʻaukai eni ia ʻoku ou filí:
Ke toʻo ʻa e meʻa-kiiʻi ʻo e fakamaau taʻetotonú,Ke vete ʻa e ngaahi haʻi ʻo e vaʻakau ʻo e ʻioké,+Ke tuku ange ʻa e lōmekiná ke ne tauʻatāina,+Pea ke fesi-ua ʻa e vaʻakau ʻo e ʻioke kotoa pē;
7 Ke ke vahevahe hoʻo maá mo e tokotaha fiekaiá,+Ke ʻomai ʻa e masivá mo e tukuhāusiá ki ho falé,Ke fakakofu ha taha ʻoku telefua ʻi hoʻo sio kiate iá,+Pea ʻoua te ke sītuʻa mei ho kakanó tonu.
8 ʻE ulo atu leva hoʻo māmá ʻo hangē ko e mafoa ʻa e atá,+Pea ʻe vave ʻa e ʻasi mai kuó ke moʻui leleí.
ʻE ʻalu muʻomuʻa ʻiate koe ʻa hoʻo māʻoniʻoní,Pea ko e lāngilangi ʻo Sihová ʻe hoko ko ha maluʻi mei ho tuʻá.+
9 Pea te ke toki ui, pea ʻe tali mai ʻe Sihova;Te ke tangi ki ha tokoni, pea te ne folofola mai, ‘Ko au eni!’
Kapau te ke toʻo mei ho lotolotongá ʻa e vaʻakau ʻo e ʻiokéPea tuku hoʻo tuhu takai holo mo lea fakatupu koví,+
10 Kapau te ke ʻoange ki he tokotaha ʻoku fiekaiá ʻa e meʻa ʻokú ke manako aí+Pea fakafiemālieʻi ʻa e faʻahinga ʻoku faingataʻaʻiá,ʻE ulo atu leva hoʻo māmá ʻo aʻu ki he fakapoʻulí,Pea ko hoʻo poʻuli lōloó ʻe hangē ha hoʻatā mālié.+
11 ʻE taki maʻu pē koe ʻe SihovaMo fakafiemālieʻi koe naʻa mo e ʻi ha fonua pakukā;+Te ne fakaivimālohiʻi ho ngaahi huí,Pea te ke hoko ʻo hangē ha ngoue mohu vaí,+Hangē ha matavai ʻoku ʻikai ʻaupito maha ʻa hono vaí.
12 Te nau toe langa ʻa e ngaahi maumau he kuohilí koeʻuhí ko koe,+Pea te ke fakafoʻou ʻa e ngaahi fakavaʻe ʻa ia kuo maumau ʻi he laui toʻutangata he kuohilí.+
ʻE ui koe ko e tokotaha monomono ʻo e ngaahi ʻā kuo maumaú,*+Ko e tokotaha fakafoʻou ʻo e ngaahi hala ke fai ai ʻa e nofó.
13 Kapau ʻokú ke fakaʻehiʻehi* koeʻuhi ko e Sāpaté mei hoʻo tuli ki hoʻo ngaahi meʻa* pē ʻaʻaú ʻi hoku ʻaho tapú+Peá ke ui ʻa e Sāpaté ko ha ʻaho fakafiefia lahi, ko ha ʻaho tapu ʻa Sihova, ko ha ʻaho ke fakalāngilangiʻi,+Peá ke fakalāngilangiʻi ia kae ʻikai ke ke tuli ki hoʻo ngaahi meʻa pē ʻaʻaú mo leaʻaki ʻa e ngaahi lea launoa,
14 Te ke toki maʻu ai ʻa e fiefia lahi ʻia Sihova,Pea te u ʻai koe ke ke pule ʻi he ngaahi feituʻu māʻolunga ʻo e māmaní.+
Te u ʻai koe ke ke kai mei he* tofiʻa ʻo Sēkope ko hoʻo kuí,+He kuo folofolaʻaki ia mei he fofonga ʻo Sihová.”
Fakamatala ‘i Lalo
^ Pe “manako.”
^ Fakafoʻilea, “ngaahi avá.”
^ Fakafoʻilea, “ʻoku foki ho vaʻé.”
^ Pe “manako.”
^ Pe “fiefia ʻi he.”
