ʻAisea 34:1-17
34 Mou haʻu ke ofi ʻo fanongo, ʻa kimoutolu ngaahi puleʻanga,Pea mou tokanga, ʻa kimoutolu ngaahi kakai.
Tuku ke fanongo ʻa e māmaní mo e meʻa ʻokú ne fakafonu iá,ʻA e fonuá mo e kotoa ʻo hono fuá.
2 He ko e tuputāmaki ʻa Sihová ʻoku tō ki he kotoa ʻo e ngaahi puleʻangá,+Pea ko ʻene houhaú ʻoku tō ki he kotoa ʻo ʻenau kau taú.+
Te ne tuku atu kinautolu ki he fakaʻauha;Te ne ʻoatu kinautolu ke tāmateʻi.+
3 Ko ʻenau kau maté ʻe laku ki tuʻa,Pea ʻe ʻalu hake ʻa e nanamu ʻo honau ngaahi ʻangaʻangá;+Ko e ngaahi moʻungá ʻe vaia koeʻuhí ko* honau totó.+
4 Ko e kotoa ʻo e kau tau ʻo e ngaahi langí te nau ʻauʻaunga,Pea ʻe takatakaiʻi ʻa e ngaahi langí hangē ha takainga tohí.
Ko e kotoa ʻo ʻenau kau taú te nau mae,Hangē ko e ngangana ʻa e lau ʻoku maé mei he fuʻu kālepíPea mo e ngangana ʻa ha foʻi fiki fuo-mate mei he fuʻu fikí.
5 “He ʻi he ngaahi langí ʻe ngaunu ai ʻa ʻeku heletaá ʻi he toto.+
ʻE ʻalu hifo ia ki ʻĪtomi ʻi he fakamāú,+Ki he kakai ʻa ia kuó u tuku atu ki he fakaʻauhá.
6 ʻOku ʻi ai ha heletā ʻa Sihova; ʻe ʻufiʻufi ia ʻe he totó.
ʻE ʻufiʻufi ia ʻe he ngakó,+ʻI he toto ʻo e fanga kiʻi sipi tangata mo e fanga kosi,ʻI he ngako ʻo e kofuua ʻo e fanga sipi tangatá.
He ʻoku ʻi ai ha feilaulau ʻa Sihova ʻi Pōsila,Ko ha tāmate lahi ʻi he fonua ko ʻĪtomí.+
7 ʻE ʻalu hifo fakataha mo kinautolu ʻa e fanga pulu kaivaó ke tāmateʻi,ʻA e fanga pulu mui mo e fanga pulu mālohi.
ʻE ngaunu honau fonuá ʻi he totó,Pea ʻe fonu ngako ʻa e efu ʻo honau fonuá.”
8 He ʻoku ʻi ai ha ʻaho ʻo e sāuni ʻa Sihova,+Ko ha taʻu ʻo hono fai ha tautea koeʻuhí ko Saione.+
9 Ko hono* ngaahi vaitafé ʻe liliu ʻo hoko ko e valitā,Pea ko hono efú ʻe hoko ko e sūlifa,Pea ko hono fonuá ʻe hoko ʻo hangē ha valitā velá.
10 ʻE ʻikai ke mate ia ʻi he poʻulí pe ʻi he ʻahó;ʻE ʻalu hake maʻu ai pē ʻa hono kohú ʻo taʻengata.
Te ne hoko ai pē ko e koto ʻauha mei he toʻutangata ki he toʻutangata;ʻE ʻikai ke fou ai ha taha ʻo taʻengata pea taʻengata.+
11 ʻE maʻu ia ʻe he pelikaní mo e pōkiupainé,Pea ko e fanga lulu telinga lōloá mo e fanga lēvení te nau nofo ai.
Te ne fua ʻa e fonuá ni ʻaki ha afo fua mo ha palamu* ke fakahaaʻi,ʻE hoko ia ʻo kaʻanga mo ʻauha.
12 Heʻikai ha taha ʻo ʻene kau māʻolungá ʻe ui ke hoko ko e tuʻi,Pea ko e kotoa ʻo ʻene kau houʻeikí ʻe ʻikai te nau toe ʻi ai.
13 ʻE tupu ʻa e ʻakau talatalá ʻi hono ngaahi taua fakakolotaú,Mo e talatalaʻāmoá mo e vao talatalá ʻi hono ngaahi feituʻu fakakolotaú.
Te ne hoko ko ha nofoʻanga ʻo e fanga siakalí,+Mo ha lotoʻā ki he fanga ʻositalesí.
14 ʻE toki fetaulaki ʻa e ngaahi meʻamoʻui ʻo e toafá mo e fanga manu ʻoku kāloú,Pea ʻe ui ʻa e kosi kaivaó* ki hono takangá.
ʻIo, ʻe nofo ai ʻa e manupuna ʻo e poʻulí* pea maʻu ai hano feituʻu mālōlōʻanga.
15 ʻE faʻu ai ʻe he ngatá ʻa hono nofoʻangá pea fakatō fua ai,Pea te ne fofoaʻi kinautolu ʻo tānaki fakataha mai ki hono malumalú.
ʻIo, ʻe fakatahataha ai ʻa e fanga lofá, ʻa e lofa taki taha mo hono hoa.
16 Kumi ʻi he tohi ʻa Sihová pea lau leʻo-lahi ia:
ʻE ʻikai tō hanau toko taha;ʻE ʻikai ha taha ʻo kinautolu ʻe taʻeʻiai hano hoa,He ko e fofonga ʻo Sihová kuo haʻu mei ai ʻa e tuʻutuʻuní,Pea ko hono laumālié kuó ne fakatahatahaʻi kinautolú.
17 Ko ia ʻa e Tokotaha kuó ne fai ʻa e lulu maʻanautolú,Pea ko hono nimá tonu kuó ne fua ʻa e feituʻu kuo vaheʻi kiate kinautolú.*
Te nau maʻu ia ʻo taʻengata;Te nau nofo ai ʻi he ngaahi toʻutangatá kotoa.
Fakamatala ‘i Lalo
^ Pe “ʻe tafe hifo ai ʻa.”
^ ʻOku hā mahino ko e ʻuhingá ki Pōsila, ko e kolomuʻa ʻo ʻĪtomí.
^ Fakafoʻilea, “ngaahi maka.”
^ Pe ngalingali, “ʻa e tēmeniō hangē ha kosí.”
^ Ko ha manupuna ʻoku meimei tatau mo e lulú.
^ Fakafoʻilea, “kuó ne vahevahe ia kiate kinautolu ʻaki ha afo fua.”
