ʻAisea 13:1-22
13 Ko ha fanongonongo ki Pāpilone+ naʻe mamata ki ai ʻa ʻAisea+ ko e foha ʻo ʻĀmosí ʻi ha vīsone:
2 “Fokotuʻu hake ha fakaʻilonga*+ ʻi ha moʻunga ʻoku tekelei.
Ui kiate kinautolu, taʻalo atu homou nimá,Koeʻuhí ke nau omi ki he ngaahi matapā hūʻanga ʻo e kau houʻeikí.
3 Kuó u ʻoatu ʻa e fekau ki he faʻahinga ʻa ia kuó u fakanofó.*+
Kuó u ui ʻa ʻeku kau taú ke fakahaaʻi atu ai ʻa ʻeku houhaú,ʻA ʻeku faʻahinga ʻoku nau fiefia loto-pōlepolé.
4 Fanongo! Ko ha fuʻu kakai ʻoku ʻi he ngaahi moʻungá;ʻOku ongo mai ʻo hangē ha fuʻu kakai tokolahí!
Fanongo! Ko e uatau ʻa e ngaahi puleʻangá,ʻA e ngaahi puleʻanga ʻoku fakatahatahá!+
Ko Sihova ʻo e ngaahi kau taú ʻokú ne fakatahatahaʻi ʻa e kau taú ki he tau.+
5 ʻOku nau omi mei ha fonua mamaʻo,+Mei he ngatangataʻanga ʻo e langí,ʻA Sihova mo e meʻatau ʻo ʻene houhaú,Ke fakaʻauha ʻa e māmaní kotoa.+
6 Mou fākafoa, he ʻoku ofi ʻa e ʻaho ʻo Sihová!
ʻE hoko mai ia ko ha fakaʻauha mei he Māfimafi-Aoniú.+
7 Ko e ʻuhinga ia ʻe vaivai ai ʻa e nima kotoa pē,Pea ʻe vai ʻa e loto ʻo e tangata kotoa pē ʻi he ilifiá.+
8 ʻOku tailiili lahi ʻa e kakaí.+
ʻOku maʻu kinautolu ʻe he hamú mo e langá,ʻO hangē ha fefine ʻoku langaá.
ʻOku nau fesiofaki ʻi he manavahē lahi,Pea ʻoku kula honau matá ʻi he mamahí.
9 Vakai! ʻOku haʻu ʻa e ʻaho ʻo Sihová,ʻA e fakamamahi mo e ʻita mo e houhau kakaha,Ke ʻai ʻa e fonuá ke hoko ko e meʻa ke fai ai ha fakalilifuʻia,+Pea ke fakaʻauha ʻosi mei ai ʻa e kau faiangahala ʻo e fonuá.
10 He ko e ngaahi fetuʻu ʻo e ngaahi langí mo honau ngaahi pupunga fetuʻú*+ʻE ʻikai te nau toe ulo mai;ʻE fakapoʻuli ʻa e laʻaá ʻi heʻene hopo haké,Pea ko e māhiná ʻe ʻikai huhulu mai ʻa hono māmá.
11 Te u ui ʻa e māmani kuo nofoʻí ke ne fai ha fakamatala ki heʻene koví,+Mo e kau fulikivanú ki heʻenau faihalá.
Te u fakangata ʻa e pōlepole ʻa e kau ʻafungí,Pea te u fakavaivaiʻi ʻa e hīkisia ʻa e kau pule kakahá.+
12 Te u ʻai ʻa e tangata ko e meʻa noa peé ke faingataʻa ange hono maʻú ʻi he koula kuo siví,+Mo e faʻahinga ʻo e tangatá ke faingataʻa ange hono maʻú ʻi he koula ʻo ʻŌfelí.+
13 Ko e ʻuhinga ia te u ʻai ai ke ngalulu ʻa e langí,Pea ko e māmaní ʻe tupeʻi mei hono tuʻuʻangá+ʻI he tuputāmaki ʻa Sihova ʻo e ngaahi kau taú ʻi he ʻaho ʻo ʻene houhau kakahá.
14 ʻI he hangē ha kāseli ʻoku tuli ke tāmateʻí pea hangē ha tākanga ʻoku ʻikai ha taha ke ne fakatahatahaʻi kinautolú,ʻE taki taha foki ki hono kakai;ʻE taki taha hola ki hono fonua.+
15 ʻIlonga ʻa ia ʻe maʻú ʻe hokaʻi ia,Pea ʻilonga ʻa ia ʻe puke maí ʻe tō ʻi he heletaá.+
16 Ko ʻenau fānaú ʻe haveki ke lailai ʻi honau ʻaó,+ʻE kaihaʻasi ʻa e koloa ʻo honau falé,Pea ko honau ngaahi uaifí ʻe tohotohoʻi.
17 Vakai, ʻoku ou fokotuʻu ʻa e kau Mītiá ke nau tauʻi kinautolu,+ʻA ia ʻoku ʻikai te nau tokanga ki he siliváPea ʻoku ʻikai te nau manako ki he koulá.
18 Ko ʻenau kaufaná te ne laiki ʻa e kau talavoú;+ʻE ʻikai te nau fakaʻofaʻia ʻi he fua ʻo e manaváPe meesi ki he fānaú.
19 Pea ko Pāpilone, ʻa e lāngilangiʻia taha* ʻo e ngaahi puleʻangá,+ʻA e fakaʻofoʻofa mo e pōlepoleʻanga ʻo e kau Kalitiá,+ʻE hangē ia ko Sōtoma mo Komolá ʻi he taimi naʻe ikunaʻi ai kinautolu ʻe he ʻOtuá.+
20 ʻE ʻikai ʻaupito ke toe nofoʻi ia,Pea ʻe ʻikai te ne hoko ko ha feituʻu ke fai ai ha nofo ʻi he ngaahi toʻutangatá kotoa.+
Heʻikai ha ʻAlepea te ne fokotuʻu ai hono tēnití,Pea ʻe ʻikai ha kau tauhi-sipi te nau tuku ke mālōlō ai ʻa ʻenau tākangá.
21 Ko e ngaahi meʻamoʻui ʻo e toafá te nau tākoto ai;Ko honau ngaahi falé ʻe fonu ai ʻa e fanga lulú.
Ko e fanga ʻositalesí te nau nofo ai,+Pea ko e fanga kosi kaivaó* te nau hopohopo holo ai.
22 Ko e ngaahi meʻamoʻui ʻoku nau fetāngihí te nau tangi ʻi hono ngaahi tauá,Mo e fanga siakalí ʻi hono ngaahi palasi fakaʻofoʻofá.
ʻOku ofi ʻa hono taimí, pea ʻe ʻikai ke fakalōloa ʻa hono ngaahi ʻahó.”+
Fakamatala ‘i Lalo
^ Pe “fuʻu pou fakaʻilonga.”
^ Fakafoʻilea, “ki he faʻahinga kuó u fakatoputapuʻí.”
^ Fakafoʻilea, “mo honau ngaahi Kēsilí,” ʻo ʻuhinga nai ki ʻOlioni mo e ngaahi pupunga fetuʻu takatakaí.
^ Pe “ʻa e teunga.”
^ Pe ngalingali, “Pea ko e fanga tēmeniō hangē ha kosí.”
