Kikite 6. Ngāue Fakamalanga ‘i he Fo‘i Kolopé

“Koe ogoogolelei ni oe buleaga e malaga aki i mamani kotoabe.”—MĀTIU 24:14, PM.

● Ko Vaiatea ‘oku nofo ia ‘i ha motu mama‘o he Pasifikí ‘i he Pupunga Motu Tuamotu. Neongo ko Tuamotu ‘oku kau ki ai ‘a e meimei motu feo ‘e 80 ‘oku mafola ‘i ha ‘ēlia laka hake he sikuea maile ‘e 310,000 (sikuea kilomita ‘e 802,900), ko e tokolahi ‘o hono kakaí ‘oku toko 16,000 pē nai. Neongo ia, ko Vaiatea mo hono ngaahi kaungā‘apí kuo a‘u ki ai ‘a e Kau Fakamo‘oni ‘a Sihová. Ko e hā hono ‘uhingá? Koe‘uhí ‘oku faka‘amu ‘a e Kau Fakamo‘oní ke vahevahe atu ‘a e ongoongo lelei fekau‘aki mo e Pule‘anga ‘o e ‘Otuá ki he kakai kotoa pē—‘o tatau ai pē pe ko fē ‘oku nau nofo aí.

KO E HĀ ‘OKU FAKAHAA‘I ‘I HE NGAAHI MO‘ONI‘I ME‘Á? Ko e pōpoaki ‘o e Pule‘angá ‘oku a‘u ia ki he tuliki kotoa pē ‘o e fo‘i kolopé. ‘I he ta‘u 2010 pē, na‘e fakamoleki ai ‘e he Kau Fakamo‘oni ‘a Sihová ‘a e houa laka hake he 1.6 piliona ‘i hono fanongonongo ‘a e ongoongo lelei ko ení ‘i he fonua ‘e 236. Ko ha faka‘avalisi ia ‘o e miniti ‘e 30 ‘i he ngāue fakamalangá na‘e fai ‘e he tokotaha Fakamo‘oni kotoa pē ‘i he ‘aho taki taha. ‘I he hongofulu‘i ta‘u kuohilí, kuo nau fa‘u ai mo tufaki ‘a e ‘ū tohi ako Tohi Tapu ‘e 20 piliona tupu.

KO E HĀ HA FAKAFEPAKI ANGA-MAHENI? Ko e pōpoaki ‘o e Tohi Tapú kuo malanga‘i ia ‘i he ta‘u ‘e laui afe.

‘OKU ‘UHINGA LELEI ‘A E FAKAFEPAKI KO IÁ? Ko e mo‘oni, kuo malanga‘i ‘e he tokolahi ha me‘a fekau‘aki mo e pōpoaki ‘a e Tohi Tapú. Kae kehe, kuo fai ia ‘e he tokolahi tahá ‘i ha taimi nounou pē pea ‘i ha feitu‘u fakangatangata. ‘I hono kehé, ko e Kau Fakamo‘oni ‘a Sihová ‘oku nau lava‘i ha feingangāue fakamalanga fokotu‘utu‘u maau ‘i he fo‘i kolopé ‘a ia ‘oku a‘u ki he kakai ‘e laui teau miliona. Kuo kītaki ‘a e Kau Fakamo‘oní ‘i he‘enau ngāue fakamalangá neongo ‘a e fakafepaki kakaha mei he ni‘ihi ‘o e ngaahi kautaha mālohi mo anga-fakamamahi taha ‘i he hisitōlia ‘o e tangatá. * (Maake 13:13) ‘Ikai ngata aí, ‘oku ‘ikai totongi‘i ‘a e Kau Fakamo‘oni ‘a Sihová ke nau malanga. ‘I hono kehé, ‘oku nau foaki loto-lelei honau taimí, pea ‘oku nau tu‘uaki ta‘etotongi ‘enau ‘ū tohí. Ko ‘enau ngāué ‘oku poupou‘i kotoa ia ‘e he ngaahi tokoni loto-fiefoaki.

KO E HĀ HO‘O FAKAKAUKAÚ? ‘Oku malanga‘i ‘i māmani lahi ‘a e ‘ogoogolelei oe buleagá’? Ko e fakahoko ‘o e kikite ko ení ‘e lava ke ‘uhinga iá ‘oku toka mei mu‘a pē ha me‘a lelei ange?

[Fakamatala ‘i lalo]

[Fakamatala ‘i he peesi 9]

“Lolotonga hono faka‘atā ‘e Sihová, te tau hokohoko atu hono malanga‘i ‘a e ongoongo lelei ‘o e Pule‘angá ‘aki ‘a e faivelenga, ‘o ngāue‘aki ‘a e founga kotoa pē ‘oku ala lavá ke a‘u ai ki he kakaí.”​—2010 YEARBOOK OF JEHOVAH’S WITNESSES.