Naʻá Ke ʻIloʻi?

Koeʻuhi ko ʻIsilelí ʻoku ʻi ai ha faʻahitaʻu laʻalaʻā fuoloa, ko e hā e ngaahi founga naʻe fai ʻe hono kakai ʻi he kuonga muʻá ke fakapapauʻi ʻe maʻu maʻu pē haʻanau vai feʻunga?

▪ ʻI he vahaʻa ʻo ʻOkatopa mo ʻEpelelí, ʻoku tō ai ʻa e ʻuhá ʻi ʻIsileli pea ʻi he taimi ʻe niʻihi ʻoku tafe mālohi hifo ai ʻi he ngaahi teleʻá. Kae kehe ʻi he faʻahitaʻu māfaná, ko e lahi taha ʻo e “ngaahi vaitafe” ko ení ʻoku nau mōmoa, pea ʻoku ʻikai nai ha ʻuha ʻi ha ngaahi māhina. Naʻe anga-fēfē hono tauhi maʻu ʻe he kakai ʻi he taimi ʻo e Tohi Tapú ha maʻuʻanga vai feʻunga?

Naʻa nau fakaleleiʻi ʻa e palopalemá ni ʻaki hono keli ha fakatafenga vai ʻi he ngaahi veʻe moʻungá pea taki ai ʻa e ʻuha he taimi momokó ki he ngaahi luo, pe ngaahi lepa ʻi lolofonua. Naʻe fakahekeheke feʻunga ʻa e ngaahi ʻató ke tafe hifo ai ʻa e vai ʻuhá ki he ngaahi lepa ko ení. Ko e ngaahi fāmili lahi naʻe ʻi ai pē honau lepa, ʻa ia naʻe lava ke nau ʻutu vai mei ai ke fakahauhau ʻaki ʻenau fieinuá.—2 Tuʻi 18:31; Selemaia 6:7.

Naʻe toe ngāueʻaongaʻaki ʻe he kau ʻIsilelí ʻa e ngaahi vaitupu fakanatula. ʻI he ngaahi feituʻu māʻolungá, ʻoku hūhū ai ʻa e ʻuha he taimi momokó ki he kelekelé ʻo aʻu hifo ai ki he ngaahi lauʻimaka ʻo lele ai ʻo toki ʻasi hake ʻi he ngaahi vaitupú. Ko hono faʻa langa ʻa e ngaahi koló ofi ki ha vaitupú (faka-Hepelū, en) ʻoku fakahaaʻi ia ʻi he hingoa ʻo e ngaahi feituʻu hangē ko ʻEni-semesi, ʻEni-lokeli, mo ʻEni-ketí. (Siosiua 15:7, 62) ʻI Selusalema, naʻe keli ai ha takinga-vai ʻi he maka fefeká ke ʻomai ai ʻa e vaitupú ki he koló.—2 Tuʻi 20:20.

ʻI he feituʻu naʻe ʻikai ʻi ai ha vaitupu fakanatulá, ko ha vaikeli (faka-Hepelū, beʼerʹ), hangē ko ia ʻi Peasipá, naʻe keli ia ke maʻu mei ai ha vai ʻi lolofonua. (Senesi 26:32, 33) Ko e faʻu-tohi ko André Chouraqui ʻokú ne fakahaaʻi ko e “fakaleleiʻanga fakatekinikale naʻe maʻu ʻe he [kau ʻIsilelí] ʻoku fakaueʻiloto ia ʻo aʻu mai ki he ʻahó ni.”

Ko e hā nai ʻa e faʻahinga fale naʻe nofo ai ʻa ʻEpalamé (ʻĒpalahamé)?

▪ Ko ʻEpalame mo hono uaifí naʻá na nofo ʻi he kolo Kalitia tuʻumālie ko ʻUá. Ka ʻi he fakahinohino ʻa e ʻOtuá, naʻá na mavahe ai mei he kolo ko iá ʻo kamata nofo tēniti. (Senesi 11:31; 13:12) Fakakaukau angé ki he feilaulau naʻe kau nai ʻi he liliu ko ení kia kinauá.

Ko ʻUa, ʻi ʻIulaki ʻi onopōní, naʻe keli hake ia ʻe Leonard Woolley ʻi he vahaʻa ʻo e 1922 mo e 1934. Naʻe kau ʻi he lotolotonga ʻo e ngaahi fale naʻá ne maʻú ʻa e fale nai ʻe 73 naʻe langaʻaki ʻa e pilikí. Ko e loki ʻi he ngaahi fale lahi ko ení naʻe fokotuʻutuʻu ia takatakai ʻi ha lotoʻā ʻi loto mālie naʻe faliki maka. Naʻe kiʻi tahifo ʻa e lotoʻaá ki loto mālie, ʻa ia naʻe fakatafe ai ki tuʻa ʻa e vai kuo ʻosi ngāueʻakí. ʻI he ngaahi fale lalahi angé, ko e ngaahi loki talitalí naʻe ʻi ai pē honau ngaahi fale kaukau mo e falemālōlō. Ko e ngaahi loki kehe ʻi laló naʻe kau ai ʻa e ngaahi peito mo e ngaahi tafuʻanga afi mo e ngaahi loki mohe ʻo e kau sevānití. Naʻe nofo ʻa e fāmilí ʻi he fungavaka ʻi ʻolungá, ʻa ia naʻe kaka ki ai ʻi ha sitepu. Ko e ngaahi sitepú naʻe lele ia ki ha fakafaletolo papa ʻa ia ʻoku takatakai ʻi he lotoʻaá pea ʻoku malava ai ʻo hū ki he ngaahi matapā ʻo e ngaahi loki ʻi ʻolungá.

“Ko ha fale . . . , fakataha mo hono lotoʻā faliki maká mo hono holisi maʻa naʻe vali lahe, naʻe ʻi ai hono fakatafenga vai, . . . ʻo ha ngaahi loki ʻe tahaua pe lahi ange ai, ʻoku fakahuʻunga ai ha tuʻunga moʻui māʻolunga moʻoni,” ko e tohi ia ʻa Woolley. “Pea ko e ngaahi fale eni . . . ʻo e kalasi lotolotó, kau fakalele falekoloá, kau mēsianiti iiki, kau sikalaipe, mo e hā fua.”

[Fakatātā ʻi he peesi 19]

Lepa, Horvot Mezada, ʻIsileli

[Credit Line]

© Masada National Park, Israel Nature and Parks Authority

[Fakatātā ʻi he peesi 19]

Fakatātā ʻo ha fale mei he taimi ʻo ʻēpalahamé

[Credit Line]

© Drawing: A. S. Whitburn