ʻUhinga ʻOku Mahuʻinga ai Kiate Koe ʻa ʻĪtení

KO E taha ʻo e ngaahi fakakikihi fakaʻohovale taha naʻe langaʻi ʻe he kau mataotao ʻe niʻihi ki he talanoa fekauʻaki mo ʻĪtení ko e pehē ʻoku ʻikai poupouʻi ia ʻe he toenga ʻo e Tohi Tapú. Ko e fakatātaá, ʻoku tohi ʻe he Palōfesa ʻo e Ngaahi Ako Fakalotú ko Paul Morris: “ʻOku ʻikai ha lave fakatohitapu fakahangatonu ki mui ki he talanoa ki ʻĪtení.” Ko ʻene fakafuofuá ʻe loto-tatau nai mo ia ʻa e “kau mataotao” kehekehe, ka ʻoku fepaki fakahangatonu ia mo e ngaahi moʻoniʻi meʻá.

ʻOku fai ʻe he Tohi Tapú ʻa e fakamatala lahi ki he ngoue ʻo ʻĪtení, ʻĀtama, ʻIvi, pea mo e ngatá. * Ka ko e fehālaaki ʻa ha kau mataotao tokosiʻi ʻoku vaivai ia ʻi hono fakahoa atu ki he hala lalahi ange mo mafolalahia ange. ʻI hono fakataʻeʻaongaʻi ʻa e fakamatala ʻi he Senesí ki he ngoue ʻo ʻĪtení, ʻoku ʻohofi mālohi moʻoni ai ʻe he kau taki lotú mo e kau fakaanga Tohi Tapú ʻa e Tohi Tapú. ʻO anga-fēfē?

Ko hono mahinoʻi ʻa e meʻa naʻe hoko ʻi ʻĪtení ʻoku fiemaʻu pau ia ki hono mahinoʻi ʻa e toenga ʻo e Tohi Tapú. Ko e fakatātaá, ko e Folofola ʻa e ʻOtuá ʻoku faʻufaʻu ia ke ne tokoniʻi kitautolu ke tau maʻu ʻa e tali ki he ngaahi fehuʻi loloto taha mo mahuʻinga taha ʻoku fehangahangai mo e faʻahinga ʻo e tangatá. ʻOku tā tuʻo lahi ʻa e tali ʻe he Tohi Tapú ʻa e ngaahi fehuʻi ko ia ʻoku felāveʻi mo e meʻa naʻe hoko ʻi he ngoue ʻo ʻĪtení. Fakakaukau angé ki ha fakatātā ʻe niʻihi.

● Ko e hā ʻoku tau tupu ai ʻo motuʻa pea maté? Naʻe pau ke moʻui taʻengata ʻa ʻĀtama mo ʻIvi kapau naʻá na fakamoʻulaloa ai pē kia Sihova. Kapau pē naʻá na angatuʻu te na mate. ʻI he ʻaho naʻá na angatuʻu aí, naʻe kamata ai ke na mate. (Senesi 2:16, 17; 3:19) Naʻe mole meia kinaua ʻa e haohaoá pea naʻe lava ke na tuku atu pē ai ʻa e angahalá mo e taʻehaohaoá ki heʻena fānaú. Ko ia ʻoku fakamatala ʻa e Tohi Tapú: “[Ko e] hoko ʻa e angahala ki mamani, ʻi he tangata pe taha; mo e hoko ʻa e mate ʻi he angahala; mo ʻene aʻusia pehe ʻa e kakai kotoa pe ʻe he mate, koeʻuhi ne angahala kotoa pe.”—Loma 5:12.

● Ko e hā ʻoku fakaʻatā ai ʻe he ʻOtuá ʻa e fulikivanú? ʻI he ngoue ʻo ʻĪtení, naʻe ui ai ʻe Sētane ʻa e ʻOtuá ko ha tokotaha loi ʻa ia ʻokú ne taʻofi ʻa e lelei mei heʻene ngaahi meʻa fakatupú. (Senesi 3:3-5) Ko ia naʻá ne fehuʻia ai ʻa e totonu ʻo e founga pule ʻa Sihová. Naʻe fili ʻa ʻĀtama mo ʻIvi ke muimui ʻia Sētane; ko ia naʻá na talitekeʻi tatau ai ʻa e tuʻunga-hau ʻo Sihová pea ko hono olá, naʻá na fakamatematē ai ʻo pehē ʻe lava ke fili pē ʻe he tangatá ʻiate ia ʻa e meʻa ʻoku leleí mo ia ʻoku koví. ʻI heʻene fakamaau totonu haohaoá mo hono potó, naʻe ʻafioʻi ʻe Sihova naʻe taha pē ʻa e founga ke tali  totonu ai ʻa e polé—ko hono fakaʻatā ʻa e taimi ke matolo atu, ʻo ʻoange ai ki he tangatá ʻa e faingamālie ke nau pule pē kia kinautolu ʻo fakatatau ki he meʻa ʻoku nau filí. Ko e fulikivanu naʻe hoko aí ko e tupu ʻa hono konga mei he hokohoko atu ʻa e tākiekina ʻa Sētané pea kuo fakaeʻa māmālie ai ha moʻoni lahi: ʻOku taʻemalava ʻa e tangatá ke ne pule pē kiate ia ʻo taʻekau ai ʻa e ʻOtuá.—Selemaia 10:23.

● Ko e hā ʻa e taumuʻa ʻa e ʻOtuá ki he māmaní? ʻI he ngoue ʻo ʻĪtení, naʻe fokotuʻu ai ʻe Sihova ha tuʻunga fakaʻofoʻofa ki he māmaní. Naʻá ne fekauʻi ʻa ʻĀtama mo ʻIvi ke na fakafonu ʻa e māmaní ʻaki ʻena fānaú pea “bule ki ai,” koeʻuhi ke ʻomai ai ʻa e tuʻunga tatau ʻo e fakaʻofoʻofa mo e feongoongoi ki he palanité kotoa. (Senesi 1:28, PM) Ko ia ko e taumuʻa ʻa e ʻOtuá ki he māmaní ke hoko ia ko ha palataisi ʻoku nofoʻi ʻe ha fāmili haohaoa mo fāʻūtaha ʻo e fānau ʻa ʻĀtama mo ʻIví. Ko e konga lahi ʻo e Tohi Tapú ʻoku fekauʻaki ia mo e ngaahi founga ʻa e ʻOtuá ki hono fakahoko ʻa e muʻaki taumuʻa ko iá.

● Ko e hā naʻe haʻu ai ʻa Sīsū Kalaisi ki he māmaní? Ko e angatuʻu ʻi he ngoue ʻo ʻĪtení naʻe ʻomai ai ha tautea mate kia ʻĀtama mo ʻIvi mo e kotoa ʻo ʻena fānaú, ka naʻe ʻomai anga-ʻofa ʻe he ʻOtuá ha ʻamanaki. Naʻá ne fekauʻi mai ʻa hono ʻAló ki he māmaní ke ne tokonaki mai ʻa e meʻa ʻoku ui ʻe he Tohi Tapú ko ha huhuʻi. (Mātiu 20:28) ʻOku ʻuhinga ia ki he hā? Sai, ko Sīsuú ko e “Atama ki mui”; naʻá ne lavameʻa ʻi he tuʻunga naʻe tō ai ʻa ʻĀtamá. Naʻe tauhi maʻu ʻe Sīsū ʻa ʻene moʻui fakaetangata haohaoá ʻaki ʻene talangofua ai pē kia Sihova. Naʻá ne foaki tauʻatāina leva ʻene moʻuí ko ha feilaulau, pe huhuʻi, ʻo tokonaki mai ʻa e ngaahi founga ki he faʻahinga faitōnunga kotoa ʻo e tangatá ke nau maʻu ʻa e fakamolemole ki heʻenau angahalá pea faifai atu pē ʻo maʻu ʻa e faʻahinga moʻui ko ia naʻe maʻu ʻe ʻĀtama mo ʻIvi ʻi ʻĪteni ki muʻa ke na faiangahalá. (1 Kolinito 15:22, 45; Sione 3:16) Ko ia naʻe fakapapauʻi ʻe Sīsū ko e taumuʻa ʻa Sihova ke liliu ʻa e māmani ko ení ki ha palataisi hangē ko ʻĪtení ʻe hoko moʻoni. *

Ko e taumuʻa ʻa e ʻOtuá ʻoku ʻikai ke taʻemahino, pea ʻoku ʻikai ko ha fakakaukau fakateolosia ia ʻoku faingataʻa ke mahinoʻi. ʻOku moʻoni ia. Hangē pē ko ha feituʻu moʻoni ʻi he māmani ko ení ʻa e ngoue ʻo ʻĪtení fakataha mo e fanga manu moʻoni mo e kakai moʻoní, ʻoku pehē ʻa e talaʻofa ʻa e ʻOtuá ki he kahaʻú ko ha meʻa pau, ko ha meʻa moʻoni kuo vavé ni ke hoko. ʻE pehē ʻa ho kahaʻú, ʻa e meʻa moʻoni kiate koé? Ko e lahi ʻo e meʻa ko iá ʻe fakatuʻunga pē ʻiate koe. ʻOku fiemaʻu ʻe he ʻOtuá ʻa e kahaʻu ko iá ki he kakai tokolahi taha ʻe ala lavá, naʻa mo e faʻahinga naʻe ʻi he tuʻunga fehālaaki ʻa ʻenau moʻuí.—1 Timote 2:3, 4.

ʻI he tauʻaki ke pekia ʻa Sīsuú, naʻá ne lea ai ki ha tangata ʻa ia naʻe ʻi ha tuʻunga kovi fakaʻulia ʻa ʻene moʻuí. Ko e tangatá ko ha tokotaha faihia; naʻá ne ʻiloʻi naʻá ne tuha ke tautea mate ia. Ka naʻá ne hanga kia Sīsū ki ha fakafiemālie, ki ha ʻamanaki. Ko e hā e tali ʻa Sīsuú? “Te ke ʻi Palataisi mo au.” (Luke 23:43) Kapau naʻe loto ʻa Sīsū ke sio ai ki he tokotaha faihia ki muʻá—kuo toetuʻu mo tāpuakiʻi ʻaki ha faingamālie ke moʻui taʻengata ʻi ha palataisi hangē ko ʻĪtení—ʻikai ʻokú ne fiemaʻu ʻa e tāpuaki tatau maʻau? ʻOkú ne pehē. ʻOku pehē ʻa ʻene Tamaí! Kapau ʻokú ke fiemaʻu maʻau ʻa e kahaʻu ko iá, fai ʻa e meʻa kotoa ʻokú ke malavá ke ako ai fekauʻaki mo e ʻOtua ʻa ia naʻá ne ngaohi ʻa e ngoue ʻo ʻĪtení.

[Fakamatala ʻi lalo]

 [Puha/Fakatātā ʻi he peesi 10]

Ko Ha Kikite ʻOkú Ne Haʻihaʻi Fakataha ʻA e Tohi Tapú

“Te u ʻai ke mo fetāufehiʻa ʻaki, ʻa koe mo e fefine, pea ko ho hako mo hono hako; ʻe laiki ʻe ia ho ʻulu, pea te ke laiki ʻe koe ʻa hono muivaʻe.”—Senesi 3:15.

Ko e ʻuluaki kikite ia ʻa e Tohi Tapú, naʻe folofolaʻaki ʻe he ʻOtuá ʻi ʻĪteni. Ko hai ʻa e toko faá: ʻa e fefiné, ko hono hakó, ko e ngatá, pea mo hono hakó? ʻOku anga-fēfē hoko ʻa e “fetāufehiʻa ʻaki” naʻe tomuʻa talá?

KO E NGATÁ

Ko Sētane ko e Tēvoló.​—Fakahā 12:9.

KO E FEFINÉ

Ko e kautaha ʻo e ngaahi meʻamoʻui fakahēvani ʻa Sihová. (Kaletia 4:26, 27) Naʻe lea ʻa ʻAisea fekauʻaki mo e “fefine,” ʻi hono tomuʻa tala te ne fanauʻi ha puleʻanga fakalaumālie ʻi he kahaʻú.—Aisea 54:1; 66:8.

KO E HAKO ʻO E NGATÁ

Ko kinautolu ko ia ʻoku nau fili ke fai ʻa e loto ʻo Sētané.—Sione 8:44.

KO E HAKO ʻO E FEFINÉ

Ko e hako tefitó ko Sīsū Kalaisi, ʻa ia naʻe haʻu mei he konga fakahēvani ʻo e kautaha ʻa Sihová. ʻOku toe kau foki ʻi he “hako” ʻa e fanga tokoua fakalaumālie ʻo Kalaisí, ʻa ia ʻoku nau pule fakataha mo ia ʻi hēvaní. Ko e kau Kalisitiane pani ko iá ʻoku faʻuʻaki kinautolu ha puleʻanga fakalaumālie, ko e “Isileli oe Otua.”—Kaletia 3:16, 29; 6:16, PM; Senesi 22:18.

KO E LAVEA ʻA E MUIʻIVAʻÉ

Ko ha tā ne fakamamahi ki he Mīsaiá ka naʻe ʻikai tuʻuloa ʻa hono ngaahi nunuʻá. Naʻe lavameʻa ʻa Sētane ʻi hono ʻai ke pekia ʻa Sīsū ʻi he māmaní. Naʻe toe fokotuʻu hake ʻa Sīsū.

KO E LAVEA ʻA E ʻULÚ

Ko ha tā fakatupu mate kia Sētane. ʻE fakaʻauha ʻosi ʻe Sīsū ʻa Sētane ʻo taʻengata. Naʻa mo e ki muʻa iá, ʻe fakangata ʻe Sīsū ʻa e kovi naʻe kamataʻi ʻe Sētane ʻi ʻĪtení.—1 Sione 3:8; Fakahā 20:10.

Ki ha vakai nounou fakalūkufua ki he kaveinga tefito ʻo e Tohi Tapú, sio ki he polosiua The Bible—What Is Its Message? ko e pulusi ʻe he Kau Fakamoʻoni ʻa Sihová.

[Fakatātā ʻi he peesi 11]

Naʻe faingataʻaʻia ʻa ʻĀtama mo ʻIvi ʻi he ola fakatupu ʻauha ʻo e angahalá