Ko ha “Kiʻi Taʻahine ʻIsileli” ʻi Onopooni

ʻI HE uike ʻe ua ki muʻa ʻi he Fakamanatu ʻo e pekia ʻa Sīsuú, naʻe ʻai ai ʻe he mēmipa taki taha ʻo e fāmili Sales ʻi Praia Grande, Pelēsila, ha lisi ʻo e faʻahinga te nau fakaafeʻí. Naʻe ʻoange ha tohi fakaafe ki he taʻu ono ko Abigayl pea ʻeke kiate ia pe ko hai ʻokú ne loto ke ʻave ki aí.

“Ko e tangata ko ia ʻoku malimali mai maʻu pē kiate aú,” ko ʻene talí ia.

“Ko hai ia?” ko e ʻeke ange ia ʻe heʻene ongo mātuʻá.

“Ko e tangata ko ia ʻoku heka salioté,” ko ʻene talí ia.

ʻI he ʻaho ʻe fā ki mui aí, naʻe tuhuʻi ange ai ʻe Abigayl ʻa e tangatá ki heʻene ongo mātuʻá. Ko e tangatá, ko Walter, naʻá ne nofo ʻi ha poloka pē ʻe taha mei he Fale Fakatahaʻangá. Laka hake he taʻu ʻe 15 kuohilí, ʻi heʻene taʻu 28, naʻe hoko ai ʻo ne mamatea mei hono kongalotó ki lalo ʻi ha fakatuʻutāmaki he meʻalelé. Naʻe ʻi ai ʻene ongo fakafeʻao ʻe toko ua, koeʻuhí naʻá ne tuʻumālie. Hili hono fakangofua ke talanoa ʻa Abigayl mo Walter, naʻe fakamatalaʻi ange ʻe he ongo mātuʻá kiate ia ʻoku loto ʻa hona ʻofefiné ke ʻoange haʻane tohi fakaafe.

ʻI he ʻosi ʻa ʻene tuʻuakí, naʻe pehē ʻe Abigayl: “Ko e niʻihi kehe kotoa ʻi homau Fale Fakatahaʻangá ʻoku lahi ʻenau ngaahi tohi fakaafé, ka ʻoku taha mātē pē ʻeku tohi fakaafé. Ko ia ai ko koe pē ʻa e tokotaha ʻoku ou fakaafeʻí. Kapau heʻikai te ke haʻu, heʻikai haʻaku fakaafe. Ka ʻo kapau te ke haʻu, te u fiefia lahi ʻaupito, pea ʻe toe fiefia lahi ange ai ʻa Sihova.”

ʻI he ʻaho ʻo e Fakamanatú, ko e Kau Fakamoʻoní, ʻo kau ai ʻa Abigayl, naʻa nau fakamaʻa ʻa e Fale Fakatahaʻangá ʻi he teuteu ki he polokalama Fakamanatu ʻi he efiafí. Naʻe ʻalu hake ai he hoʻatā ko iá ʻa Walter, pea ʻi heʻene sio kia Abigayl, naʻá ne tala ange ki heʻene fakaʻulí ke tuʻu ʻa e kaá. Naʻe tuku hifo e sioʻatá, peá ne ʻeke kia Abigayl pe ko e hā ʻene meʻa ʻoku faí. Naʻá ne tala ange ko ʻenau fakamaʻa ʻa e holó ke fakaʻofoʻofa kiate ia.

ʻI he efiafi ko iá naʻe loto-hohaʻa ʻaupito ʻa Abigayl. Naʻe kamata ʻa e malangá, pea naʻá ne hanganaki fakasio takai holo pe kuo aʻu mai ʻa Walter. Fakafokifā pē, naʻá ne aʻu mai mo ʻene ongo fakafeʻaó. Naʻá ne malimali fiefia. Hili ʻa e malangá, naʻe fakahaaʻi ange ʻe Walter naʻá ne kamata fononga ki ha kolo ʻe taha ka naʻe liliu ʻene fakakaukaú ʻo ne haʻu ki he Fakamanatú, koeʻuhi pē ko ia. Pea naʻá ne toe tala ange: “Ko e malangá ʻa e meʻa tofu pē naʻe fiemaʻu ke u fanongo ki aí.” Naʻá ne kole ha Tohi Tapu pea kamata ke ako mo maʻu ʻa e ngaahi fakatahá.

ʻI he taimi ko ení, naʻe pehē ai ʻe he tuofefine ʻo Walter naʻá ne loto ke feʻiloaki mo Abigayl, ʻa ia naʻe faʻa talanoa ki ai ʻa hono tuongaʻané. ʻI heʻene feʻiloaki mo iá, naʻá ne fiefia he ʻiloʻi ʻa e kiʻi taʻahine anga-lelei ko Abigayl. ‘“Oku ou ʻiloʻi he taimí ni ʻa e ʻuhinga ʻoku fiefia lahi ai hoku tuongaʻané,” ko ʻene leá ia.

ʻOku hokohoko atu ʻa e ako ʻa Walter mo hono maʻu ʻa e ngaahi fakatahá. ʻOkú ne fai foki ʻa e ngaahi tali pea vahevahe ki he niʻihi kehé ʻa e ngaahi meʻa kuó ne akó. Ko e moʻoni ʻoku fakamanatu mai ʻe Abigayl ʻa e kiʻi taʻahine ʻIsileli naʻá ne tokoniʻi ʻa Neamani ke ne hoko ʻo ʻiloʻi ʻa e ʻOtua moʻoni ko Sihová.—2 Tuʻi 5:2-14.