1. Ko e hā ʻa e ngaahi feilaulau ʻoku fai ʻe he kakai tokolahi, pea ko e hā hono ʻuhingá?

 ʻOKU loto-lelei ʻa e kakaí ke fai ha ngaahi feilaulau maʻá e ngaahi meʻa ʻoku nau mahuʻingaʻia aí. ʻOku foaki ʻe he ngaahi mātuʻá honau taimí, paʻangá mo e iví ke maʻu ʻaonga ai ʻenau fānaú. Ko e toʻutupu ʻatelitá ʻoku nau loto ke feʻauhi ʻi he ʻOlimipikí ʻoku nau fakamoleki ha ngaahi houa lahi he ʻaho taki taha ʻi he fakamālohisino lahi ʻaupito lolotonga ia ko honau ngaahi kaungāmeʻá ʻoku nau vaʻinga mo fakafiefia. Naʻe toe fai ʻe Sīsū ha ngaahi feilaulau maʻá e ngaahi meʻa naʻá ne mahuʻingaʻia aí. Naʻe ʻikai ko ʻene taumuʻá ia ke maʻu ha moʻui tuʻumālie pe maʻu ha fānau. Ka, naʻá ne loto ke ngāueʻaki hono iví kotoa ke poupouʻi ʻa e Puleʻanga ʻo e ʻOtuá. (Māt. 4:17; Luke 9:58) Naʻe toe fai ʻe hono kau muimuí ha ngaahi feilaulau lahi. Ko e Puleʻanga ʻo e ʻOtuá ʻa e meʻa mahuʻinga taha ʻi heʻenau moʻuí, ko ia naʻa nau fai ha ngaahi feilaulau ki ai. (Māt. 4:18-22; 19:27) ʻOku totonu ke tau ʻeke hifo kia kitautolu, ‘Ko e hā ʻoku mahuʻinga ʻi heʻeku moʻuí?’

2. (a) Ko e hā ʻa e ngaahi feilaulau ʻoku fiemaʻu pau ke fai ʻe he kotoa ʻo e kau Kalisitiane moʻoní? (e) Ko e hā ʻa e ngaahi feilaulau lahi ange ʻoku fai ʻe he niʻihi?

² Ko e ngaahi feilaulau ʻe niʻihi ko ha fiemaʻu pau ia ki he kotoa ʻo e kau Kalisitiane moʻoní. ʻOku fiemaʻu iá kapau ʻoku tau loto ke tauhi maʻu ha vahaʻangatae vāofi mo e ʻOtuá. Ko hotau taimi fakafoʻituitui mo e ivi ʻoku tau ngāueʻaki ki he lotú, lau ʻa e Tohi Tapú, fai ʻa e lotu fakafāmilí, maʻu ʻa e ngaahi fakatahá, pea mo e malangá ko e ngaahi feilaulau ia kuo pau ke tau fai. a (Sios. 1:8; Māt. 28:19, 20; Hep. 10:24, 25) Ko e ola ʻetau ngaahi feingá mo e tāpuaki ʻa Sihová, ʻoku fakavaveʻi ange ai ʻa e ngāue fakamalangá, pea toe tokolahi ange ai mo e kakai ʻoku nau kamata ke lotu ki he ʻOtuá ʻaki ʻenau ʻalu ki he “moʻunga ʻo e fale ʻo Sihova.” (ʻAi. 2:2) Ke poupouʻi ʻa e  Puleʻangá, ʻoku fai ʻe he tokolahi ʻa e feilaulau ke ngāue ʻi he Pētelí, tokoni ʻi hono langa ʻo e ngaahi Fale Fakatahaʻangá mo e ngaahi Holo ʻAsemipilī, fokotuʻutuʻu ʻa e ngaahi fakataha-lahí, pe tokoniʻi ʻa e faʻahinga ʻoku nau faingataʻaʻia ʻi he ngaahi fakatamaki fakanatulá. Neongo ʻoku ʻikai fiemaʻu ʻe Sihova ke tau fai ʻa e ngaahi feilaulau lahi ange ko ení ke maʻu ai ʻa e moʻui taʻengatá, ʻoku fiemaʻu ia ke poupouʻiʻaki ʻa e Puleʻanga ʻo e ʻOtuá.

3. (a) ʻOku anga-fēfē ʻetau maʻu ʻaonga ʻi he taimi ʻoku tau fai ai ha ngaahi feilaulau maʻá e Puleʻangá? (e) Ko e hā ʻa e ngaahi fehuʻi ʻoku totonu ke tau talí?

³ ʻOku mahuʻinga ange he ʻahó ni ʻi ha toe taimi ki muʻa ke tau fai ʻa e lahi taha te tau malavá maʻá e Puleʻangá. He fiefia ē ko kitautolu ʻi he loto-lelei ʻa e kakai tokolahi ʻaupito ke fai ha ngaahi feilaulau maʻa Sihova! (Lau ʻa e Saame 54:6.) Kapau te tau fai pehē foki, te tau fiefia lolotonga ʻetau tatali atu ki he hoko mai ʻa e Puleʻanga ʻo e ʻOtuá. (Teu. 16:15; Ngā. 20:35) ʻOku mahuʻinga kia kitautolu kotoa ke tau sivisiviʻi fakalelei kitautolu pea ʻeke ʻa e ngaahi fehuʻi ko ení: ʻOku ʻi ai ha ngaahi founga ʻe lava ke tau fai ai ha meʻa lahi ange maʻá e Puleʻangá? ʻOku anga-fēfē ʻetau ngāueʻaki hotau taimí, paʻangá, iví, mo e ngaahi malavá? Ko e hā ʻoku ʻikai totonu ke tau tukunoaʻí ʻi heʻetau fai ʻa e ngaahi feilaulaú? Tau lāulea angé ki he meʻa ʻe lava ke tau ako mei he ngaahi faʻifaʻitakiʻanga ʻe niʻihi ʻo e ngaahi feilaulau loto-leleí. ʻE tokoniʻi heni kitautolu ke tau fiefia lahi ange.

4. Naʻe maʻu ʻaonga fēfē ʻa e kau ʻIsilelí mei hono fai ʻa e ngaahi feilaulaú?

⁴ Naʻe pau ki he kakai ʻIsileli ʻo e kuonga muʻá ke nau fai ʻa e ngaahi feilaulau koeʻuhí ke fakamolemoleʻi ʻenau ngaahi angahalá. Naʻe fiemaʻu ʻa e ngaahi feilaulaú kae maʻu ʻa e hōifua ʻa Sihová. Ko e niʻihi ai naʻe fiemaʻu pau, pea ko e toengá naʻe fai loto-lelei. (Liv. 23:37, 38) Ko e ngaahi feilaulau tutú naʻe malava ke fai ia ko ha ngaahi feilaulau loto-lelei, pe meʻaʻofa kia Sihova. Ko e fakatātā ʻe taha ʻo hono fai ʻa e ngaahi feilaulau kia Sihová naʻe fai ʻi hono fakatapui ʻo e temipale ʻo Solomoné.—2 Kal. 7:4-6.

5. Naʻe anga-fēfē hono ʻai ʻe Sihova ke malava naʻa mo e kau masivá ke fai ha ngaahi feilaulaú?

⁵ Naʻe mahinoʻi anga-ʻofa ʻe Sihova heʻikai malava ke lahi tatau ʻa e foaki ʻa e tokotaha kotoa. Naʻá ne kole ki he kau ʻIsilelí ke foaki pē ʻa e meʻa te nau malavá. Naʻe fekauʻi ʻe he lao ʻa Sihová ke fai ʻa e ngaahi feilaulau monumanu pea ko e toto ʻo e fanga monumanú ke fakatafe. Ko e ngaahi feilaulau ko ení ko ha “ʻata ʻo e ngaahi meʻa lelei ka hoko maí” fakafou ʻia Sīsū. (Hep. 10:1-4) Kae kehe, naʻe ngāueʻaki ʻe Sihova ʻa e lao ko ení ʻi ha founga mātuʻaki fakaʻatuʻi. Ko e fakatātaá,  ʻe tali ʻe he ʻOtuá ha feilaulau ʻaki ʻa e kulukulú kapau heʻikai malava ha taha ke fai ha feilaulau lahi ange, hangē ko ha sipi pe ko ha kosi. Ko ia naʻa mo e kau masivá ʻe lava ke nau fai ha ngaahi feilaulau kia Sihova pea hoko ʻo fiefia. (Liv. 1:3, 10, 14; 5:7) Neongo ʻe tali ʻe Sihova ʻa e feilaulauʻaki ʻa e fanga monumanu kehekehé, naʻá ne fiemaʻu ʻa e meʻa ʻe ua mei he faʻahinga kotoa naʻa nau fai ʻa e ngaahi feilaulau loto-leleí.

6. Ko e hā ʻa e meʻa ʻe ua naʻe fiemaʻu ʻi hono fai ha feilaulau? Naʻe mahuʻinga fēfē ʻa e talangofua ki he ongo fiemaʻu ko ení?

⁶ ʻUluakí, ko ha tokotaha naʻá ne fai ha feilaulau naʻe pau ke ne foaki hono lelei tahá. Kapau naʻe puke ha monumanu pe ʻi ai hano mele, heʻikai tali ʻe Sihova ʻa e feilaulaú. (Liv. 22:18, 20) Uá, ko e tokotaha naʻá ne fai ʻa e feilaulaú naʻe pau ke ne maʻa hangē ko hono fakamatalaʻi ʻi he Laó. Kapau naʻe ʻikai ke ne maʻa, ʻe pau ke ne tomuʻa fai ha feilaulau angahala pe ko ha feilaulau halaia kae malava ke ne toe maʻu ʻa e hōifua ʻa Sihová. Ko hono toki tali ia ʻe Sihova ʻene feilaulau loto-leleí. (Liv. 5:5, 6, 15) Naʻe mafatukituki ʻaupito eni. Naʻe tuʻutuʻuni ʻe Sihova kapau naʻe kai ʻe ha taha pē ha feilaulau lolotonga ʻokú ne taʻemaʻa, naʻe pau ke tāmateʻi ia. (Liv. 7:20, 21) Kae kehe, kapau naʻe maʻa ha tokotaha pea ʻikai mele ʻene feilaulaú, ʻe maʻu ʻe he tokotaha-foakí ha konisēnisi lelei mo e fiefia lahi.—Lau ʻa e 1 Kalonikali 29:9.

7, 8. (a) Ko e hā ʻa e fiefia ʻe lava ke maʻu ʻe he faʻahinga ʻoku nau fai ʻa e ngaahi feilaulau maʻá e Puleʻangá? (e) Ko e hā ʻoku tau maʻu ʻe lava ke tau feilaulauʻaki kia Sihova?

⁷ ʻI he ʻahó ni, ʻoku tokolahi hotau fanga tokoua ʻoku nau loto-lelei ke ngāue mālohi ʻi he ngāue ʻa Sihová. ʻOku fakahōifua eni kia Sihova. Ko e ngāue mālohi ke tokoniʻi hotau fanga tokouá ʻoku toe ʻomai ai kia kitautolu ʻa e fiefia. ʻOku pehē ʻe ha tokoua ʻe taha ʻa ia ʻokú ne tokoni ʻi hono langa ʻa e ngaahi Fale Fakatahaʻangá pea kuó ne tokoni ki he faʻahinga naʻe uesia ʻe he ngaahi fakatamaki fakanatulá ʻoku ʻikai ala fakamatalaʻi ʻene fiefia ʻi heʻene tokoniʻi hono fanga tokouá. ʻOkú ne pehē, “Ko e sio ki he fiefia mo e houngaʻia ʻa e fanga tokoua mo e fanga tuofāfine fakalotofonuá hili ʻenau hū ki honau Fale Fakatahaʻanga foʻoú pe ʻi he taimi ʻoku nau maʻu ai ʻa e ngaahi tokoni hili ha fakatamaki fakanatulá ʻoku ʻai ai ʻa e ngāué mo e feingá kotoa ke ʻaonga moʻoni.”

⁸ Kuo kumi maʻu pē ʻa e kautaha ʻa Sihova ʻi onopōní ki ha ngaahi founga ke poupouʻi ai ʻa e Puleʻangá. ʻI he 1904, naʻe pehē ʻe Tokoua C. T. Russell ko kitautolu kotoa ʻoku totonu ke tau fai hotau lelei tahá ke ngāueʻaki hotau taimí, mālohí, paʻangá mo e hā fua, ke fakalāngilangiʻi ʻa Sihova. Neongo ʻoku ʻi ai ʻa e ngaahi fakamole ʻi hono fai ʻa e ngaahi feilaulau kia Sihová, ʻoku  ʻomai ai ʻa e ngaahi tāpuaki lahi. (2 Sām. 24:21-24) ʻE lava ke tau ngāueleleiʻaki ʻa e ngaahi meʻa ʻoku tau feilaulauʻaki kia Sihová?

9. Ko e hā ʻoku tau ako mei he Luke 10:2-4 fekauʻaki mo e founga ʻoku totonu ke tau ngāueʻaki ai hotau taimí?

⁹ Hotau taimí. ʻOku fiemaʻu ʻa e taimi mo e feinga lahi ke liliu mo pulusi ʻetau ʻū tohí, langa ʻa e ngaahi Fale Fakatahaʻangá mo e ngaahi Holo ʻAsemipilií, fokotuʻutuʻu ʻa e ngaahi fakataha-lahí, tokoni ki ha fakatamaki, pea mo hono fai ha ngaahi ngāue pau. ʻOku tau maʻu ʻa e houa pē ʻe 24 he ʻaho taki taha, ka naʻe ʻomai ʻe Sīsū ha tefitoʻi moʻoni ʻe lava ke ne tokoniʻi kitautolu ke ngāue fakapotopotoʻaki hotau taimí. ʻI he taimi naʻá ne fekauʻi atu ai ʻene kau ākongá ke malangá, naʻe tala ʻe Sīsū kia kinautolu ke ʻoua te nau “fāʻofua ʻi he fakafeʻiloaki ki ha taha ʻi he halá.” (Luke 10:2-4) Ko e hā naʻe ʻoange ai ʻe Sīsū ʻa e ngaahi fakahinohino ko iá? ʻI he ʻaho ʻo Sīsuú ʻi he taimi naʻe fetaulaki ai ʻa e kakaí, naʻe ʻikai te nau punou pe lulululu pē. Ka, naʻa nau toutou fefāʻofuaʻaki pea aʻu ʻo nau fakatōmapeʻe ki he kelekelé. ʻE fiemaʻu ki he meʻá ni kotoa ha taimi lahi. Naʻe ʻikai ke tala ange ʻe Sīsū ki hono kau muimuí ke nau anga-kovi. Naʻá ne tokoniʻi kinautolu ke nau mahinoʻi naʻe ʻikai ke nau maʻu ha taimi lahi, ko ia naʻe fiemaʻu ke nau ngāue lelei taha ʻaki honau taimí pea fai ʻa e meʻa naʻe mahuʻinga tahá. (ʻEf. 5:16) ʻE lava ke tau ngāueʻaki ʻa e tefitoʻi moʻoni ko ení koeʻuhí ke tau maʻu ai ha taimi lahi ange ke poupouʻi ʻa e ngāue ʻo e Puleʻangá?

10, 11. (a) Ko e hā ʻa e ngaahi founga ʻe niʻihi ʻoku ngāueʻaki ki ai ʻetau ngaahi tokoni ki he ngāue ʻi māmani lahí? (e) Ko e hā ʻa e tefitoʻi moʻoni ʻoku ʻi he 1 Kolinitō 16:1, 2 ʻe lava ke ne tokoniʻi kitautolu?

¹⁰ ʻEtau paʻangá. ʻOku fiemaʻu ʻa e paʻanga lahi ke poupouʻiʻaki ʻa e ngāue ʻi māmani lahí. ʻI he taʻu taki taha, ʻoku fakamoleki ai ʻa e paʻanga ʻe laui hongofulu miliona ke poupouʻi ʻa e ngāue ʻa e kau ʻovasia fefonongaʻakí, kau tāimuʻa makehé mo e kau misinalé. Talu mei he 1999, laka hake ʻi he ngaahi Fale Fakatahaʻanga ʻe 24,500 kuo langa ʻi he ngaahi fonua ʻa ia ʻoku ʻikai maʻu ʻe hotau fanga tokoua ʻi aí ha ngaahi meʻa fakamatelie lahi. Kae kehe, ʻoku ofi ki he ngaahi Fale Fakatahaʻanga ʻe 6,400 ʻoku kei fiemaʻú. ʻI he māhina kotoa, ʻoku pulusi ai ʻa e ngaahi tatau ʻe 100 miliona ʻo e makasini Taua Leʻo mo e ʻĀ Hake! Ko e kotoa ʻo e ngāué ni ʻoku poupouʻi ia ʻaki hoʻo ngaahi tokoni loto-fiefoakí.

¹¹ Naʻe fakamānavaʻi ʻe Sihova ʻa e ʻapositolo ko Paulá ke ne hiki ha tefitoʻi moʻoni ʻe lava ke tau ngāueʻaki ʻi he taimi ʻoku tau fai ai ʻa e ngaahi tokoní. (Lau ʻa e 1 Kolinitō 16:1, 2.) Naʻá ne fakalototoʻaʻi hono fanga tokoua ʻi Kolinitoó, ke ʻoua te nau tatali ke aʻu ki he fakaʻosinga ʻo e uiké ke sio pe ko e hā naʻe toé, ka ke nau fakapapauʻi ʻi he kamataʻanga ʻo e uiké pe ko e hā e lahi ʻo e paʻanga te nau foakí. Hangē pē ko ia ʻi he ʻuluaki senitulí, ko e fanga tokoua mo e fanga tuofāfine he ʻaho ní ʻoku nau palani tokamuʻa pea foaki nima-homo ʻa e meʻa te nau malavá. (Luke 21:1-4; Ngā. 4:32-35) ʻOku koloaʻaki ʻe Sihova ʻa e laumālie fiefoaki ʻene kakaí.

12, 13. Ko e hā ʻokú ne fakatupunga nai ha niʻihi ke ʻoua te nau foaki kia Sihova honau lelei tahá, ka ʻe tokoniʻi fēfē kinautolu ʻe Sihova?

¹² Hotau iví mo e ngaahi malavá. ʻOku poupouʻi ʻe Sihova ʻetau ngaahi feinga ke ngāueʻaki hotau taimí mo e ngaahi malavá maʻá e Puleʻangá. ʻOkú ne talaʻofa ke tokoniʻi kitautolu ʻi he taimi ʻoku tau ongoʻi ai kuo ʻosi hotau iví. (ʻAi. 40:29-31) ʻOku tau fakakaukau ʻoku ʻikai ke tau maʻu ʻa e ngaahi pōtoʻi ʻoku fiemaʻu ke poupouʻiʻaki ʻa e ngāue ʻo e Puleʻangá pe ʻoku lelei ange ʻa e ngāue ia ʻa e niʻihi kehé? Manatuʻi, ʻe lava ke fakaleleiʻi ʻe Sihova ʻetau ngaahi malavá, hangē ko ʻene fai pehē kia Pesalili mo ʻAholiapí.—ʻEki. 31:1-6; sio ki he ʻuluaki fakatātā ʻi he kupú ni.

¹³ ʻOku fakalototoʻaʻi kitautolu ʻe Sihova ke ʻoua te tau fakaʻatā ha meʻa ke ne taʻofi kitautolu mei hono foaki hotau lelei tahá kiate ia. (Pal. 3:27) ʻI he taimi naʻe toe langa ai ʻa e temipalé, naʻe tala ʻe Sihova ki he kau Siu ʻi Selusalemá ke nau fakakaukau fakamātoato fekauʻaki mo e meʻa naʻa nau fai ke poupouʻiʻaki ʻa e ngāué. (Hāk. 1:2-5) Naʻe hoko ʻo fakaleluʻi kinautolu pea ʻikai fakamuʻomuʻa ai ʻa e ngāue ʻa Sihová ʻi heʻenau moʻuí.  ʻOku totonu ke tau ʻeke hifo kia kitautolu: ʻOku mahuʻinga ange kia kitautolu ʻa hono fai ʻo e finangalo ʻo Sihová ʻi ha toe meʻa? ʻE lava ke tau fakakaukau fakamātoato fekauʻaki mo ʻetau moʻuí pea palani pe ʻe lava fēfē ke tau fai ha meʻa lahi ange ke poupouʻi ʻa e Puleʻanga ʻo e ʻOtuá ʻi he ngaahi ʻaho fakaʻosi ko ení?

14, 15. (a) ʻOku anga-fēfē hono fakalototoʻaʻi koe ʻe hotau fanga tokoua ʻoku ʻikai ke nau maʻu ha ngaahi meʻa fakamatelie lahí? (e) Ko e hā ʻoku totonu ke tau loto ke faí?

¹⁴ ʻOku nofo ʻa e kakai tokolahi ʻi he ngaahi feituʻu ʻoku mātuʻaki faingataʻa ai ʻa e moʻuí pea hokolahia ai mo e ngaahi palopalema hangē ko e masivá. ʻOku ngāue ʻetau kautahá ke tokoniʻi ʻa e fanga tokoua ʻi he ngaahi fonua ko ení. (2 Kol. 8:14) Kae kehe, naʻa mo hotau fanga tokoua ʻoku ʻikai ke nau maʻu ha ngaahi meʻa fakamatelie lahí ʻoku nau fakamahuʻingaʻi ʻa e monū ʻo e foakí. ʻOku fakahōifua kia Sihova ʻi heʻene vakai ki heʻenau foaki fiefia ʻa e meʻa ʻoku nau malavá.—2 Kol. 9:7.

¹⁵ ʻI ha fonua mātuʻaki masiva ʻe taha ʻi ʻAfilika, naʻe vaheʻi ai ʻe he fanga tokoua ʻe niʻihi ha konga ʻenau ngoueʻangá ke tō ai ha ngoue ke fakatau atu, pea nau foaki ha paʻanga pē ʻe maʻu mei ai ki he ngāue ʻo e Puleʻangá. ʻI he fonua tatau, naʻe loto ai ʻa e fanga tokouá mo e fanga tuofāfiné ke tokoni ʻi ha ngāue langa Fale Fakatahaʻanga. Ka ko e lolotonga ia ʻenau faʻahitaʻu tō taʻu femoʻuekiná. ʻI he kei fakapapauʻi ke tokoní, naʻa nau ngāue ʻi he Fale Fakatahaʻangá lolotonga ʻa e ʻahó, pea ʻi he efiafí naʻa nau ngāue ke tō fakaʻosi kotoa ʻenau ngoué. He laumālie fiefoaki ē! ʻOku fakamanatu mai heni ʻa e fanga tokoua ʻi Masitōnia ʻo e kuonga muʻá. Naʻa nau ‘masiva ʻangoʻango,’ ka naʻa nau kei kōlenga kia Paula ke tuku ke nau foaki ha paʻanga ki honau fanga tokouá. (2 Kol. 8:1-4) Tuku ke tau foaki foki ʻa e meʻa te tau malavá ke fakahaaʻi ai ʻoku tau houngaʻia ʻi he ngaahi tāpuaki kuo foaki mai ʻe Sihova kia kitautolú.—Lau ʻa e Teutalōnome 16:17.

16. ʻE lava fēfē ke tau fakapapauʻi ʻoku fakahōifua kia Sihova ʻetau ngaahi feilaulaú?

¹⁶ ʻI he taimi ʻoku tau fai ai ʻa e ngaahi feilaulaú, ʻoku fiemaʻu ke tau tokanga ke ʻoua te tau tukunoaʻi ʻa e meʻa ʻoku mahuʻinga tahá, hangē ko hotau ngaahi fāmilí. Hangē pē ko ia naʻe fai ʻe he kau ʻIsileli ʻo e kuonga muʻá, kuo pau ke tau fakapapauʻi ʻoku fakahōifua ki he ʻOtuá ʻetau ngaahi feilaulau loto-leleí. ʻOku fiemaʻu ke tau manatuʻi ko hotau fāmilí mo ʻetau lotu fakafoʻituitui kia Sihová ʻa hotau ongo fatongia mahuʻinga tahá. ʻI he taimi ʻoku tau foaki ai hotau taimí mo e koloá maʻá e niʻihi kehé kuo pau ke tau fakapapauʻi ʻoku ʻikai ke tau tukunoaʻi ʻa e lotu hotau fāmilí kia Sihová pe tukunoaʻi ʻenau ngaahi fiemaʻu fakamatelié. ʻOku ʻikai malava ke tau feilaulauʻaki kia Sihova ʻa e taimi, ivi, mo e koloa ʻoku ʻikai ke tau maʻú. (Lau ʻa e 2 Kolinitō 8:12.) Pehē foki, ʻoku fiemaʻu ke tau hanganaki fakaivimālohiʻi hotau vahaʻangatae tonu mo Sihová. (1 Kol. 9:26, 27) ʻOku lava ke tau fakapapauʻi kapau te tau moʻui ʻo fakatatau ki he ngaahi tuʻunga Fakatohitapú, ʻe ʻai kitautolu ʻe heʻetau ngaahi feilaulaú ke tau fiefia pea ʻe “tautefito ʻene fakahōifuá” kia Sihova.

17, 18. ʻOku anga-fēfē ʻetau ongoʻi fekauʻaki mo e faʻahinga ʻoku nau fai ʻa e ngaahi feilaulau maʻá e Puleʻangá, pea ko e hā ʻoku totonu ke tau fakakaukau kotoa ki aí?

¹⁷ Ko e tokolahi hotau fanga tokouá mo e fanga tuofāfiné ʻoku nau foaki taʻesiokita atu honau taimí, iví mo e paʻangá ke poupouʻiʻaki ʻa e ngāue ʻo e Puleʻangá. (Fil. 2:17) ʻOku tau houngaʻia loloto ʻi he faʻahinga ʻoku nau fakahāhā ha laumālie fiefoakí. ʻOku tau toe fakaongoongoleleiʻi ʻa e ngaahi uaifi mo e fānau ʻa e fanga tokoua ʻoku nau takimuʻa ʻi he ngāue ʻo e Puleʻangá koeʻuhí ko ʻenau ngaahi feilaulau nima-homó.

¹⁸ ʻOku fiemaʻu ʻa e feinga lahi ʻaupito ke poupouʻi ʻa e ngāue ʻo e Puleʻangá. Tau lotu pea fakakaukau fakamātoato fekauʻaki mo e founga ʻe lava ke tau foaki atu ai ʻa e lahi taha te tau malavá kia Sihova. Kapau te tau fai pehē, te tau maʻu ʻa e ngaahi tāpuaki lahi he taimí ni pea lahi ange “ʻi he fokotuʻutuʻu ka hoko maí.”—Mk. 10:28-30.