ʻIkai te ke loto-tatau ko Sīsū ʻa e Faiako lahi taha kuo ʻaʻeva ʻi he māmaní? Kuó ke feinga nai ke faʻifaʻitaki ki he niʻihi ʻo ʻene ngaahi founga faiakó, hangē ko ʻene ngāueʻaki ʻo e ngaahi fehuʻí mo e talanoa fakatātaá. Ka, kuo faifai ange ʻo ke fakakaukau, naʻá ne faʻa ngāueʻaki ʻa e fakahoá ʻi heʻene faiakó?

ʻOku ngāueʻaki ʻe he kakai tokolahi ʻa e fakahoá ʻi he taimi ʻoku nau lea aí. Te ke faʻa fai foki ia, ʻo ʻikai nai tomuʻa fakakaukau ki ai. Te ke leaʻaki nai ha meʻa hangē ko e, “Naʻa nau pehē ʻoku momoho kotoa ʻa e fuaʻi ʻakaú; kae kehe, ko eni ia ʻoku kei mata.” Pe, “Ko ha kiʻi taʻahine anga-mā ia ki muʻa, ka ʻi he taimi ní ʻokú ne anga-fakakaumeʻa.”

ʻI he ngaahi tuʻunga hangē ko ení, ʻokú ke tomuʻa fakahaaʻi ha moʻoniʻi meʻa pe ko ha foʻi fakakaukau; peá ke ʻoatu leva ha fakahoa ʻaki hono ngāueʻaki ʻa e ngaahi kupuʻi lea hangē ko e ka, kae kehe, ʻi hono kehé pe ʻi he tafaʻaki ʻe tahá. Pe te ke ngāueʻaki nai ʻa e fakahoá ʻaki hano tānaki atu ha fakamatala pe ʻaki hano fakamamafaʻi ʻa e foʻi fakakaukaú. ʻI he taimi ʻokú ke lea pehē aí, ʻe ongo fakanatula pē ia pea lava ke tokoniʻi ai ʻa e niʻihi kehé ke mahinoʻi ʻa e meʻa ʻokú ke leaʻakí.

Neongo kapau ʻoku ʻikai ke angamaheniʻaki ʻa e fakahoá ʻi he ngaahi lea pe anga fakafonua ʻe niʻihi, ʻoku lelei ke tau ʻiloʻi honau mahuʻingá. Ko e hā hono ʻuhinga? Koeʻuhí ʻoku tau maʻu ʻa e lahi ʻo kinautolu ʻi he Folofola fakamānavaʻi ʻa e ʻOtuá. Naʻe faʻa ngāueʻaki ʻe Sīsū ʻa e fakahoá. Manatuʻi eni: “ʻOku tutu ʻe he kakaí ʻa e māmá pea fokotuʻu, ʻo ʻikai fakapūlouʻi ʻaki ha kato fuaʻanga-meʻa, ka ʻoku tuku ia ʻi he tuʻuʻanga māmá.” ‘Naʻá ku haʻú, ʻo ʻikai ke fakataʻeʻaongaʻi ʻa e Laó, ka ke fakahoko ke kakato.’ “Naʻa mou fanongo naʻe leaʻaki: ‘Kuo pau ke ʻoua naʻá ke tono.’ Ka ʻoku ou tala atu kiate kimoutolu, ko e tokotaha kotoa ʻoku hanganaki fakasio ki ha fefine . . . ” “Naʻe leaʻaki: ‘Mata ki he mata mo e nifo ki he nifo.’ Kae kehe, ʻoku ou tala atu kiate kimoutolu: ʻOua ʻe talitekeʻi ʻa ia ʻoku fulikivanú, ka ʻilonga ʻa ia ʻokú ne sipiʻi ho kouʻahe toʻomataʻú, fulihi atu foki ki ai mo ho toʻohemá.”—Māt. 5:15, 17, 27, 28, 38, 39.

ʻOku ʻi ai ʻa e ngaahi fakahoa meimei tatau ʻi he ngaahi tohi kehe ʻi he Tohi Tapú. ʻE lava ke nau tokoniʻi koe ke mahinoʻi ʻa e poiní pe fakamamafaʻi ha founga lelei ange ʻo hono fai ha meʻa. Kapau ko ha mātuʻa koe, fakakaukau ki he fakahoa ko ení: “Ko e ngaahi tamaí, ʻoua ʻe fakaʻitaʻi hoʻomou fānaú, kae hokohoko atu hono ʻohake kinautolú ʻi he akonaki mo e enginaki ʻa Sihová.” (ʻEf. 6:4) Naʻe tohi pē ʻe he ʻapositolo ko Paulá ko ha tamai (pe faʻē) ʻoku totonu ke ne ʻohake ha kiʻi tama ʻi he akonaki ʻa e ʻOtuá, ʻa ia ʻe hoko ʻo fakapotopoto mo moʻoni. Ka, ʻoku mahino ange ʻa e foʻi fakakaukaú ʻi hono ngāueʻaki ʻa e fakahoá ‘ʻoua ʻe fakaʻitaʻi kinautolu, kae ʻohake kinautolu ʻi he enginaki ʻa Sihová.’

Ki mui ʻi he vahe ko iá naʻe tohi ʻe Paula: “ʻOku tau fai ha fetakai, ʻo ʻikai mo e toto mo e kakano, ka . . . mo e ngaahi kongakau laumālie fulikivanu ʻi he ngaahi potu fakahēvaní.” (ʻEf. 6:12) Ko e fakahoa ko iá ʻoku ngalingali te ne tokoniʻi koe ke mahinoʻi ʻokú ke fai ha faitau mātuʻaki mālohi. ʻOku ʻikai mo ha tangata pē; ka, mo ha ngaahi kongakau laumālie fulikivanu.

ʻI he tohi Fakatohitapu tatau ko ení, ʻa e ʻEfesoó, ʻe lava ke ke maʻu ai mo e ngaahi veesi kehe ʻoku ngāueʻaki ai ʻe Paula ʻa e fakahoá. Ko e fakakaukau fekauʻaki mo ení ʻe lava ke ne tokoniʻi kitautolu ke mahinoʻi ʻa e ʻuhinga ʻa Paulá pea ngalingali ke mahinoʻi māʻalaʻala ange ʻa e meʻa ʻoku totonu ke tau faí.

Te ke ʻiloʻi nai ʻoku fakatou fakafiefia mo ʻuhinga lelei ke lāulea ki he saati ʻi hení ʻa ia ʻoku fakahaaʻi ai ha ngaahi fakahoa ʻe niʻihi te ke maʻu ʻi he ʻEfesō vahe 4 mo e 5. ʻI hoʻo lau ʻa e fakahoa taki taha, fakakaukau fekauʻaki mo hoʻo moʻuí tonu. ʻEke hifo kiate koe: ‘ʻOku fēfē moʻoni ʻeku tōʻongá? ʻOku anga-fēfē ʻeku fakafeangai ki heni pe ʻi ha tuʻunga meimei tatau? Ko fē ʻa e tafaʻaki ʻo e fakahoá ʻe fakakaukau ʻa e niʻihi kehé ʻokú ne fakafofongaʻi aú?’ Kapau ʻokú ke ʻiloʻi ha fakahoa pau ʻoku kaunga tonu ki ha meʻa ʻoku fiemaʻu ke ke ngāue ki ai, feinga ke fai ia. Tuku ke tokoniʻi koe ʻe he fakahoá.

Pe te ke ngāueʻaki ʻa e sātí ko ha konga hoʻo lotu fakafāmilí. ʻUluakí, ʻe lava ke lau ʻe he mēmipa kotoa ho fāmilí ʻa e ngaahi fakahoá. Pea ʻe lava leva ke lave ha taha ʻo kimoutolu ki he konga ʻuluaki ʻo ha fakahoa, pea fakaʻatā ʻa e niʻihi kehe ʻi he fāmilí ke feinga ke manatuʻi ʻa e poini ʻoku fakamamafaʻi ʻi he konga hono uá. ʻE lava ke taki atu ai ki ha fetalanoaʻaki fakafāmili fiefia ki he founga te mou malava ke ngāuekakatoʻaki ai ʻa e konga hono uá. ʻIo, ko hono sivisiviʻi peheʻi ʻa e fakahoá ʻe lava ke ne tokoniʻi nai ai ʻa e kei siʻi mo e taʻumotuʻa ke nau feinga ke maʻu ʻa e ʻulungaanga faka-Kalisitiane ʻi he fāmilí mo ha feituʻu pē.

ʻI hoʻo ʻilo lahi ange ki he mahuʻinga ʻo e fakahoá, te ke hoko nai ai ʻo pōtoʻi ange ʻi hono ʻiloʻi kinautolu ʻi he Tohi Tapú, pea ʻiloʻi ʻoku ʻaonga lahi nai ia ʻi hoʻo ngāue fakafaifekau faka-Kalisitiané. Ko e fakatātaá, ʻe lava ke ke pehē ki ha tokotaha-ʻapi: “ʻOku pehē ʻe he kakai tokolahi ʻoku maʻu ʻe he tokotaha kotoa ha laumālie taʻefaʻamate, kae fakatokangaʻi ʻa e meʻa ʻoku leaʻaki heni ʻe he Folofola ʻa e ʻOtuá.” Pe ʻi ha ako Tohi Tapu, te ke ʻeke ange nai: “Ko e kakai tokolahi ʻi he feituʻú ni ʻoku nau tui ko e ʻOtuá mo Sīsū ʻokú na taha pē; kae kehe, ko e hā kuo tau ʻilo ʻoku tala mai ʻe he Tohi Tapú? Pea ko e hā ʻokú ke tui ki aí?”

ʻIo, ʻoku ʻomai kia kitautolu ʻe he Folofolá ʻa e ngaahi fakahoa ʻaonga lahi, ʻa ʻia ʻe lava ke tokoniʻi ai kitautolu ke ʻaʻeva ʻi he founga ʻa e ʻOtuá. Pea ʻe lava ke tau ngāueʻaki ʻa e fakahoá ke tokoniʻi ʻa e niʻihi kehé ke nau hoko ʻo ʻiloʻi ʻa e moʻoni Fakatohitapú.