1, 2. (a) Ko e hā ʻe hokó kapau ʻoku tau fakakaukau mo talanoa fekauʻaki mo ha tokotaha ʻoku tau ʻofa ai? (Sio ki he ʻuluaki fakatātā ʻi he kupú ni.) (e) Ko e hā ʻa e ngaahi fehuʻi te tau lāulea fekauʻaki mo iá?

 ʻI HE taimi ʻoku tau fakakaukau mo talanoa ai fekauʻaki mo ha tokotaha ʻoku tau ʻofa ai, ʻe hoko ʻo mālohi ange hotau vahaʻangatae mo e tokotaha ko iá. Ko e moʻoni ʻoku pehē pē mo hotau vahaʻangatae mo Sihova ko e ʻOtuá. ʻI he tuʻunga ko ha tauhi-sipí, naʻe fakamoleki ʻe Tēvita ʻa e ngaahi pō lahi ʻi he vakai ki he ngaahi fetuʻú mo fakalaulauloto ki he fakaofo ʻo e Tokotaha-Fakatupú. Naʻá ne tohi: “Kau ka vakai ho ngaahi langi na, ko e ngaue ʻa ho louhiʻinima, ʻa e mahina mo e ngaahi fetuʻu, ʻa ia kuo ke fokotuʻu; ko e ha ʻa e tangata ke ke manatu ai kiate ia?” (Saame 8:3, 4) Pea ʻi he taimi naʻe tohi ai ʻa e ʻapositolo ko Paulá fekauʻaki mo e founga fakaofo naʻe ʻai ai ʻe Sihova ke hoko moʻoni ʻEne taumuʻa ki he kau Kalisitiane paní, naʻá ne pehē: “ʻOi he loloto ē ko e ngaahi koloa, poto, pea mo e ʻilo ʻa e ʻOtuá!”—Loma 11:17-26, 33.

² ʻI he taimi ʻoku tau ʻalu ai ʻi he ngāue fakafaifekaú, ʻoku tau fakakaukau mo talanoa fekauʻaki mo Sihova. ʻOku fakaivimālohiʻi heni hotau vahaʻangatae mo iá. Kuo ongoʻi ʻe he kau tāimuʻa tokolahi ko ʻenau ʻofa ki he ʻOtuá kuo hoko ʻo toe loloto ange koeʻuhí ko ʻenau malava ʻo fakamoleki ʻa e taimi lahi ange ʻi he ngāue fakafaifekaú. Ko e kupu ko ení te ne tokoniʻi fakatouʻosi ʻa e kau tāimuʻá mo e faʻahinga ʻoku nau loto ke hoko ko e kau tāimuʻá ke fakakaukau fakalelei fekauʻaki mo e ngaahi fehuʻi ko ení: ʻE lava fēfē ke fakaivimālohiʻi ʻe he ngāue tāimuʻá ho vahaʻangatae mo Sihová? Kapau ʻokú ke ngāue tāimuʻa, ko e hā te ne tokoniʻi koe ke hokohoko atu ʻi he ngāue makehe ko ení? Kapau ʻoku teʻeki ke ke ngāue tāimuʻa, ko e hā ʻe lava ke ke kamata faí? Tau ʻuluaki lāulea angé fekauʻaki mo e ngaahi founga ʻe lava ai ʻe he ngāue tāimuʻá ke ne fakaivimālohiʻi hotau vahaʻangatae mo e ʻOtuá.

3. ʻOku anga-fēfē hono tokoniʻi kitautolu ʻe he talanoa fekauʻaki mo e ngaahi tāpuaki ʻo e Puleʻangá ʻi he kahaʻú?

³ ʻI heʻetau talanoa fekauʻaki mo e ngaahi tāpuaki ʻo e Puleʻangá ʻi he kahaʻú, ʻoku tau hoko ai ʻo ofi ange kia Sihova. Ko e hā ʻa e konga Tohi Tapu ʻokú ke saiʻia taha ke ngāueʻaki ʻi hoʻo ʻalu mei he fale ki he falé? Mahalo pē ko e Saame 37:10, 11; Taniela 2:44; Sione 5:28, 29; pe ko e Fakahā 21:3, 4. Ko e taimi taki taha ʻoku tau talanoa ai ki he niʻihi kehé fekauʻaki mo e ngaahi talaʻofa ko ení, ʻoku fakamanatu mai ai kia kitautolu ko e “meʻaʻofa lelei kotoa pē mo e foaki haohaoa kotoa pē” ʻoku haʻu ia mei hotau ʻOtua nima-homo ko Sihová. ʻOku tohoakiʻi ai heni kitautolu ke ofi ange kiate ia.—Sēm. 1:17.

4. Ko e hā ʻoku tau houngaʻia lahi ange ai ʻi he lelei ʻo e ʻOtuá ʻi heʻetau malanga ki he niʻihi kehé?

⁴ ʻI heʻetau sio ki he kakai tokolahi tahá ʻoku ʻikai ke nau fiefia pea ʻikai tokoniʻí, ʻoku tau hoko ai ʻo houngaʻia lahi ange ki he moʻoní. ʻOku ʻikai maʻu ʻe he kakai ʻi he māmaní ʻa e tokoni ʻoku nau fiemaʻú ke maʻu ai ʻa e lavameʻa mo e fiefia moʻoní. ʻOku hohaʻa ʻa e tokolahi taha fekauʻaki mo e kahaʻú mo ʻikai maʻu ha ʻamanaki. ʻOku nau fekumi ki he ʻuhinga ʻo e moʻuí. Naʻa mo e tokolahi taha ʻo e kakai lotú ʻoku siʻi ʻaupito ʻenau ʻilo fekauʻaki mo e Tohi Tapú. ʻOku nau meimei hangē pē ko e kakai ʻo Ninivé. (Lau ʻa e Siona 4:11.) Ko e lahi ange ʻo e taimi ʻoku tau fakamoleki ʻi he talanoa ki he kakaí ʻi he ngāue fakafaifekaú, ko e lahi ange ia ʻetau ʻiloʻi lelei hono tokangaʻi kitautolu ʻe Sihová. (ʻAi. 65:13) Ka ʻoku fai ʻe Sihova ia ʻa e meʻa lahi ange ʻi he tokanga pē ki he ngaahi fiemaʻu ʻa hono kakaí. ʻOkú ne ʻoange ki he tokotaha kotoa ha faingamālie ke maʻu ʻa e fiemālie pea maʻu ha ʻamanaki moʻoni. ʻOku fakamanatu mai heni kia kitautolu ʻa e lelei moʻoni ʻo Sihová.—Fkh. 22:17.

5. ʻI hono akoʻi ki he niʻihi kehé ʻa e moʻoní, ʻoku tau ongoʻi fēfē ai fekauʻaki mo ʻetau ngaahi palopalemá tonu?

⁵ ʻI heʻetau akoʻi ki he niʻihi kehé ʻa e moʻoní, ʻoku tau ako ai ke ʻoua te tau hohaʻa tōtuʻa fekauʻaki mo ʻetau ngaahi palopalemá tonu. Ko Trisha, ʻa ia ko ha tāimuʻa tuʻumaʻu, ʻokú ne pehē naʻá ne mātuʻaki loto-mamahi ʻi he vete ʻene ongo mātuʻá. ʻI he ʻaho ʻe taha naʻá ne mātuʻaki loto-mamahi ʻo ʻikai ai te ne ongoʻi ʻokú ne fie ʻalu ʻi he ngāue fakafaifekaú. Ka naʻá ne kei ʻalu pē ke fai ha ako Tohi Tapu. Naʻá ne ako mo ha fānau ʻe toko tolu ʻa ia naʻa nau tupu hake ʻi ha fāmili naʻe palopalemaʻia. Naʻe liʻaki kinautolu heʻenau tamaí, pea naʻe ngaohikoviʻi kinautolu ʻe he foha lahí. ʻOku pehē ʻe Trisha: “Ko ha palopalema pē pe ko ha mamahi naʻá ku fekuki mo ia naʻe halaʻatā haʻane vāvātatau mo haʻanautolú. ʻI heʻemau akó, naʻe uloulo honau fanga kiʻi matá pea naʻa nau makiʻikiʻi ʻi he fiefia. Ko e fānau ko iá ko ha meʻaʻofa ia meia Sihova, tautefito ʻi he ʻaho ko iá.”

6, 7. (a) ʻOku fakaivimālohiʻi fēfē ʻetau tuí ʻi he taimi ʻoku tau akoʻi ai ʻa e ngaahi moʻoni Fakatohitapú? (e) ʻOku tau ongoʻi fēfē ʻi heʻetau sio ʻoku tokoniʻi ʻe he ngaahi tefitoʻi moʻoni Fakatohitapú ʻetau kau akó ke fakaleleiʻi ʻenau moʻuí?

⁶ ʻI heʻetau akoʻi ʻa e ngaahi moʻoni Fakatohitapú ki he niʻihi kehé, ʻoku hoko ʻo mālohi ange ai ʻetau tui ki he ngaahi moʻoni ko ení. Naʻe tohi ʻe he ʻapositolo ko Paulá ki he kau Siu ʻe niʻihi ʻi hono ʻahó ʻa ia naʻe ʻikai te nau fai ki he meʻa naʻa nau akoʻi ki he niʻihi kehé: “ʻOku ʻikai koā te ke akoʻi ʻe koe ʻa koe, ʻa koe ko ia ʻokú ke akoʻi ʻa e taha kehé?” (Loma 2:21) ʻOku faʻa maʻu ʻe he kau tāimuʻá ʻa e ngaahi faingamālie lahi ke akoʻi ʻa e moʻoní ki he niʻihi kehé mo fai ʻa e ngaahi ako Tohi Tapu. Ke fakahoko lelei ení, kuo pau ke nau ʻuluaki akoʻi kinautolu. Kuo pau ke nau teuteu ki he ako taki taha pea fai nai ʻa e fekumi ke tali ha ngaahi fehuʻi. ʻOku fakamatala ha tāimuʻa ko Janeen ko e taimi taki taha ʻokú ne akoʻi ai ʻa e moʻoní ki he niʻihi kehé, ʻoku hoko ʻo mālohi ange ai ʻene tuí ki he ngaahi moʻoni ko ení.

⁷ ʻI heʻetau sio ʻoku tokoniʻi ʻe he ngaahi tefitoʻi moʻoni Fakatohitapú ʻetau kau akó ke fakaleleiʻi ʻenau moʻuí, ʻoku tau fakamahuʻingaʻi lahi ange ai ʻa e poto ʻo e ʻOtuá. (ʻAi. 48: 17, 18) ʻOku ʻai ai heni ke tau loto ke hokohoko atu ke ngāueʻaki ʻa e ngaahi tefitoʻi moʻoni ko ení ʻi heʻetau moʻuí tonu. Ko Adrianna, ko ha tāimuʻa ʻe taha, ʻokú ne pehē:  “Ko e moʻui ʻa e kakaí ʻe lava ke hoko ʻo palopalemaʻia ʻi he taimi ʻoku nau falala ai ki honau poto pē ʻo kinautolú. Ka ʻi he taimi ʻoku nau kamata ai ke falala ki he poto ʻo Sihová, ʻe kamata leva ke nau maʻu ʻa e ngaahi ʻaongá.” ʻOku pehē ʻe ha tāimuʻa ko Phil ʻokú ne ofo ʻi he sio ki he malava ʻa e kakaí ke liliu ʻenau moʻuí ʻi he tokoni ʻa Sihová.

8. ʻOku tokoniʻi fēfē kitautolu ʻe he ngāue fakataha mo hotau fanga tokouá mo e fanga tuofāfiné ʻi he ngāue fakafaifekaú?

⁸ ʻOku tau loto-toʻa ʻi he ngāue fakataha mo hotau fanga tokouá mo e fanga tuofāfiné ʻi he ngāue fakafaifekaú. (Pal. 13:20) ʻOku fakamoleki ʻe he kau tāimuʻá ʻa e taimi lahi ʻi he ngāue fakafaifekaú fakataha mo honau fanga tokouá mo e fanga tuofāfiné. ʻOku ʻoange ai heni kia kinautolu ʻa e faingamālie lahi ange ki ha “fefakalototoʻaʻaki.” (Loma 1:12; lau ʻa e Palōveepi 27:17.) ʻOku fakamatala ha tāimuʻa ko Lisa fekauʻaki mo e feituʻu ʻoku ngāue aí, ko e kakaí ʻoku nau femehekaʻaki pea te nau fai ha meʻa pē ke nau laka ai ʻi he niʻihi kehé. ʻI he ʻaho kotoa pē ʻokú ne fanongo ai ki he lau mo e kapekape ʻa e kakaí. ʻOkú ne tānaki mai: “ʻI he taimi ʻe niʻihi, ʻoku lumaʻi pe manukiʻi koe koeʻuhí ko ho ʻulungaanga faka-Kalisitiané. Kae kehe, ko e ngāue ʻi he ngāue fakafaifekaú mo e kaungā-Kalisitiané ʻoku fakatupu langa hake moʻoni. ʻI he fakaʻosinga ʻo e ʻahó, ʻoku ou foki fakaivifoʻou mai ki ʻapi, ʻo tatau ai pē pe ʻoku ou helaʻia fēfē.”

9. ʻI he taimi ʻoku tāimuʻa fakataha ai ʻa e husepānití mo e uaifí, ʻoku tokoni fēfē eni ki heʻena nofo malí?

⁹ ʻI he taimi ʻoku tau tāimuʻa ai mo hotau hoa malí, ʻoku hoko ʻo toe mālohi ange ʻetau nofo malí. (Koh. 4:12) Ko Madeline, ʻa ia ʻoku tāimuʻa fakataha mo hono husepānití, ʻokú ne pehē: “ʻOku ou malava mo hoku husepānití ke fakamoleki ʻa e taimi ʻi he talanoa fekauʻaki mo homa ʻaho ngāue fakafaifekaú pe ko ha meʻa ʻi heʻema lau Tohi Tapú ʻa ia ʻe lava ke ma ngāueʻaki ʻi he ngāue fakafaifekaú. ʻI he taʻu taki taha ʻokú ma tāimuʻa fakataha aí, ʻokú ma toe vāofi ange.” ʻOku pehē ʻe ha tāimuʻa  ko Trisha ko ia mo hono husepānití ʻokú na loto-tatau ke ʻoua ʻe fakatau mai ha ngaahi meʻa heʻikai te na malava ke totongi. Ko hono olá, ʻoku ʻikai ai te na kē ʻi he paʻangá. ʻOkú na toe ʻalu ki heʻena ngaahi toe ʻaʻahí pea fakahoko fakataha ʻena ngaahi ako Tohi Tapú. Naʻe tokoniʻi heni ʻena nofo malí ke hoko ʻo toe mālohi ange.

10. ʻI heʻetau fakamuʻomuʻa ʻa e Puleʻangá pea hokosia ʻa e poupou ʻa e ʻOtuá, ko e hā ʻoku hoko ki heʻetau falala kia Sihová?

¹⁰ ʻOku tupulaki ʻetau falala kia Sihová ʻi heʻetau fakamuʻomuʻa ʻa e Puleʻangá, hokosia ʻa e poupou ʻa Sihová, pea sio ki heʻene tali ʻetau ngaahi lotú. Ko e moʻoni ʻoku falala ʻa e kau Kalisitiane mateaki kotoa pē kia Sihova. Ka ʻoku ʻiloʻi ʻe he kau tāimuʻá ko e falala pē kia Sihová ʻe lava ai ke nau hokohoko atu ʻi he ngāue tāimuʻá. (Lau ʻa e Mātiu 6:30-34.) Ko Curt, ʻa ia ko ha tāimuʻa pea ngāue ko ha ʻovasia sēketi tokoni, naʻá ne loto ke ʻaʻahi ki ha fakatahaʻanga ʻoku houa ʻe ua mo e konga mei hono ʻapí. Ko ia mo hono uaifí, ʻa ia ko ha tāimuʻa foki mo ia, naʻá na maʻu ha penisini feʻunga ʻi heʻena kaá ke aʻu ai ki he fakatahaʻangá kae ʻikai feʻunga ke foki ki ʻapi, pea ko hono ʻaho vahé ʻe toki fai ia ʻi ha uike mei ai. ʻOku pehē ʻe Curt naʻe ʻikai te na fakapapauʻi pe naʻá na fai ʻa e fili totonú. Ka naʻá na lotu pea fakapapauʻi ʻoku totonu ke na ʻalu. Naʻá na falala ʻe tokangaʻi ʻe he ʻOtuá ʻena ngaahi fiemaʻú. Ki muʻa pē ke na mavahé, naʻe tā mai ha tuofefine ʻo ne pehē naʻá ne maʻu ha meʻaʻofa maʻanaua. Ko e lahi tofu pē ia ʻo e paʻanga naʻá na fiemaʻu ki he fonongá. ʻOku pehē ʻe Curt ʻi he taimi ʻoku toutou hoko ai ʻa e ngaahi meʻa peheé, ʻoku faingofua ke sio ko Sihova ʻokú ne ʻomai kia kitautolu ʻa e meʻa ʻoku tau fiemaʻú.

11. Ko e hā ʻa e niʻihi ʻo e ngaahi tāpuaki ʻoku maʻu ʻe he kau tāimuʻá?

¹¹ Kuo faʻa pehē ʻe he kau tāimuʻá ko ʻenau ofi ange ki he ʻOtuá mo e lahi ange ʻo e meʻa ʻoku nau fai ʻi heʻene ngāué, ko e lahi ange ia ʻa e ngaahi tāpuaki ʻoku nau maʻú. (Teu. 28:2) Ka ko e ngāue tāimuʻá ʻoku ʻikai ke faingofua maʻu pē. ʻOku tau faingataʻaʻia kotoa koeʻuhí ko e taʻehaohaoá pea koeʻuhí ko e māmani fulikivanu ko ení. ʻOku ʻai nai ʻe he ngaahi palopalemá he taimi ʻe niʻihi ʻa e kau tāimuʻá ke taʻofi ʻenau ngāué ʻi ha vahaʻa taimi. Ka ʻoku faʻa malava ke fakaleleiʻi pe naʻa mo e fakaʻehiʻehi mei he ngaahi palopalema ko ení. Ko e hā ʻe lava ke ne tokoniʻi ʻa e kau tāimuʻá ke hokohoko atu ʻi heʻenau ngāue makehé?

12, 13. (a) Ko e hā ʻoku totonu ke fai ʻe ha tāimuʻa kapau ʻoku faingataʻa ke ne aʻusia ʻa e houa ʻoku fiemaʻú? (e) Ko e hā ʻoku mātuʻaki mahuʻinga ai ke vaheʻi ha taimi ke lau fakaʻaho ʻa e Tohi Tapú, fai ʻa e ako fakafoʻituituí, mo fakalaulaulotó?

¹² Ko e tokolahi taha ʻo e kau tāimuʻá ʻoku nau femoʻuekina ʻaupito. ʻE lava ke faingataʻa ke fai ʻa e meʻa kotoa pē, ko ia ʻoku mahuʻinga ke fokotuʻutuʻu lelei. (1 Kol. 14:33, 40) Kapau ʻoku faingataʻa ki ha tāimuʻa ke aʻusia ʻa e houa ʻoku fiemaʻú, ʻoku totonu ke ne fakakaukau fakalelei fekauʻaki mo e anga ʻene ngāueʻaki hono taimí. (ʻEf. 5:15, 16) Te ne ʻeke nai: ‘ʻOku ou fakamoleki ha fuʻu taimi lahi ʻi he fakafiefiá? ʻE lava ke liliu ʻeku taimi-tēpile ngāué? ʻOku ou fakamoleki ha taimi lahi ʻi hono fai ha ngaahi meʻa ʻoku ʻikai fiemaʻu?’ ʻOku fiemaʻu ki he kau tāimuʻá ke nau ʻeke maʻu pē kia kinautolu ʻa e ngaahi fehuʻi ko ení pea fai ʻa e ngaahi liliú ʻo ka fiemaʻu.

¹³ Kuo pau ki ha tāimuʻa ke ne vaheʻi ha taimi ʻi heʻene taimi-tēpilé ke lau fakaʻaho ʻa e Tohi Tapú, fai ʻa e ako fakafoʻituituí, mo fakalaulauloto. ʻOku fiemaʻu ke fakapapauʻi ʻe ha tāimuʻa ʻoku ʻikai hanga ʻe he ngaahi meʻa ʻikai loko mahuʻingá ʻo toʻo ʻa e taimí mei he ngaahi meʻa ko ia ʻoku mahuʻingá. (Fil. 1:10) Ko e fakatātaá, sioloto atu ki ha tāimuʻa ʻoku foki mai ki ʻapi hili ha ʻaho lōloa ʻi he ngāue fakafaifekaú. ʻOkú ne fokotuʻutuʻu ke ngāueʻaki ʻa e efiafi ko iá ke teuteu ai ki he fakataha hoko maí. Ka ʻokú ne ʻuluaki lau ʻene meilí. ʻOkú ne fakamoʻui leva ʻa e komipiutá pea lau mo tali ʻa e ʻīmeilí. Lolotonga ʻene ʻi he ʻinitanetí, ʻokú ne vakaiʻi ʻa e mahuʻinga ʻo ha meʻa ʻokú ne loto ke fakatau. Ki muʻa ke ne fakatokangaʻí, kuo ʻosi atu ʻa e meimei houa ʻe  ua kuo teʻeki ai ke ne kamata teuteu ki he fakatahá. Ko e hā ko ha palopalema ai ení? Sai, kapau ʻoku loto ha tokotaha ʻatelita ke maʻu ha taumuʻa lōloa, kuo pau ke ne kai maʻu pē ʻa e meʻakai fakatupu moʻui leleí. ʻI he founga tatau, ʻoku fiemaʻu ki ha tāimuʻa ke ne ako fakafoʻituitui tuʻu maʻu kae nofo ai pē ʻi he ngāue tāimuʻá.—1 Tīm. 4:16.

14, 15. (a) Ko e hā ʻoku totonu ai ke tauhi ʻe he kau tāimuʻá ʻenau moʻuí ke faingofuá? (e) Kapau ʻoku hokosia ʻe ha tāimuʻa ha ngaahi faingataʻa, ko e hā ʻoku totonu ke ne faí?

¹⁴ Ko e kau tāimuʻa lavameʻá ʻoku nau fai honau lelei tahá ke tauhi ʻenau moʻuí ke faingofua. Ko e meʻa eni naʻe fakalototoʻaʻi ʻe Sīsū ʻene kau ākongá ke faí. (Māt. 6:22) Naʻá ne tauhi ʻene moʻuí tonu ke faingofua koeʻuhí kae lava ke ne tuku kotoa ʻene tokangá ki he ngāue fakafaifekaú. Naʻe tuʻo taha ʻene pehē ko e fanga fōkisí mo e fanga manupuná ʻoku ʻi ai honau ngaahi nofoʻanga, “ka ko e Foha ʻo e tangatá ʻoku ʻikai ha potu ke ʻolunga ki ai hono ʻulú.” (Māt. 8:20) Ko e kau tāimuʻa ʻoku nau ako mei he faʻifaʻitakiʻanga ʻa Sīsuú ʻoku nau manatuʻi ko e lahi ange ʻo e ngaahi meʻa ʻoku nau maʻú, ko e lahi ange ia ʻo e meʻa te nau tokangaʻí, monomonó, pe fetongí.

¹⁵ ʻOku ʻiloʻi ʻe he kau tāimuʻá ʻoku makehe ʻenau ngāué, ka ʻoku ʻikai te nau fakakaukau ʻoku nau lelei ange ʻi he niʻihi kehé. Ka, ʻoku nau ʻiloʻi ko e ngāue tāimuʻá ko ha meʻaʻofa ia meia Sihova. Ko ia ke hokohoko atu ʻi he ngāue ko ení, kuo pau ki he tāimuʻa taki taha ke falala kia Sihova. (Fil. 4:13) ʻE ʻi ai ʻa e ngaahi faingataʻa. (Saame 34:19) ʻI he hoko iá, ʻoku totonu ki he kau tāimuʻá ke nau kole ʻa e tataki ʻa Sihová pea ʻoange kiate ia ʻa e faingamālie ke tokoni, kae ʻoua ʻe vave hono tukuange ʻenau ngāue tāimuʻá. (Lau ʻa e Saame 37:5.) ʻI heʻenau sio ki he anga hono tokangaʻi anga-ʻofa kinautolu ʻe Sihová, ʻe hoko ai ʻo mālohi ange honau vahaʻangatae mo iá.—ʻAi. 41:10.

16. Kapau te ke saiʻia ke tāimuʻa, ko e hā ʻoku totonu ke ke faí?

¹⁶ Kapau te ke saiʻia ke tāimuʻa mo maʻu ʻa e ngaahi tāpuaki tatau ʻoku maʻu ʻe he kau tāimuʻá, lotu kia Sihova fekauʻaki mo ia. (1 Sio. 5:14, 15) Talanoa ki he faʻahinga ʻoku nau ngāue tāimuʻá. Fokotuʻu ha ngaahi taumuʻa ʻe tokoni kiate koe ke hoko ai ko ha tāimuʻá. Ko e meʻa ia naʻe fai ʻe Keith mo Erika. Hangē ko e ngaahi hoa mali tokolahi ʻi hona toʻú, naʻá na ngāue fakamāmani taimi-kakato pea fakatau ha fale mo ha meʻalele foʻou ʻi he hili pē ʻena malí. ʻOkú na pehē, “Naʻá ma fakakaukau ko e ngaahi meʻa ko iá ʻe ʻomai ai kia kimaua ha fiemālie—ka naʻe halaʻatā.” Hili e mole ʻa e ngāue ʻa Keith, naʻe kamata ke ne ngāue ko ha tāimuʻa tokoni. ʻOkú ne pehē: “Ko e ngāue tāimuʻá naʻe fakamanatu mai ai kiate au ʻa e fiefia lahi ʻoku maʻu mei he ngāue fakafaifekaú.” Naʻá na hoko ʻo kaungāmeʻa mo ha ongo meʻa mali tāimuʻa ʻa ia naʻá na tokoniʻi kinaua ke na ʻiloʻi ko e ngāue tāimuʻá mo hono maʻu ha moʻui faingofuá ʻe iku ia ki ha fiefia lahi. Ko e hā naʻe fai ʻe Keith mo Erika? Naʻá na ʻai ha lisi ʻo ʻena ngaahi taumuʻá, fakapipiki ia ʻi heʻena ʻaisí, pea fakaʻilongaʻi ʻa e taumuʻa taki taha ʻi heʻena aʻusia iá. Hili atu ha taimi, naʻe malava ke na tāimuʻa.

17. Ko e hā ʻe fakapotopoto ai ke fakakaukau fakalelei pe ʻe malava ke ke tāimuʻá?

¹⁷ ʻE lava ke ke hoko ko ha tāimuʻa? Kapau ʻokú ke ongoʻi heʻikai malava ke ke tāimuʻa he taimí ni, fai ʻa e meʻa kotoa te ke malavá ke ofi ange ai kia Sihova ʻaki hono fai ho lelei tahá ʻi he ngāue fakafaifekaú. Kapau ʻokú ke lotu kia Sihova pea fakakaukau fakalelei fekauʻaki mo ho tuʻungá, te ke ʻiloʻi nai ko hono fai ha ngaahi liliu ʻe niʻihi ʻi hoʻo moʻuí ʻe fakaʻatā ai koe ke tāimuʻa. ʻI hoʻo kamata ngāue tāimuʻá, ko hoʻo fiefiá ʻe laka mamaʻo ange ia ʻi ha faʻahinga feilaulau pē te ke fai. Te ke hoko ai ʻo fiefia koeʻuhí he ʻokú ke fakamuʻomuʻa ʻa e Puleʻanga ʻo e ʻOtuá pea koeʻuhí ʻokú ke ʻoatu ai ʻa e meʻa lahi ange ki he niʻihi kehé. (Māt. 6:33) Te ke maʻu ai ʻa e ngaahi faingamālie lahi ange ke fakakaukau mo talanoa fekauʻaki mo Sihova, pea ʻe fakalolotoʻi heni hoʻo ʻofa kiate iá mo ʻai ia ke ne fiefia.