1, 2. Ko e hā ʻa e lāngilangi makehe ʻoku maʻu ʻe he Kau Fakamoʻoni ʻa Sihová? ʻOku anga-fēfē hoʻo ongoʻi fekauʻaki mo iá?

 ʻOKU ongoʻi lāngilangiʻia ʻa e kakaí ʻi he taimi ʻoku foaki ange ai kia kinautolu ha pale ʻi hono fai ha meʻa makehe. Ko e fakatātaá, ʻoku ʻoange ki he niʻihi ha lāngilangi ʻi he taimi ʻoku nau tokoniʻi ai ha ongo puleʻanga ke na femelinoʻaki. Ka ko ha lāngilangi lahi ange ia ʻa e hoko ʻo fekauʻi ʻe he ʻOtuá ke tokoniʻi ʻa e kakaí ke nau melino mo ia!

² ʻI he tuʻunga ko e Kau Fakamoʻoni ʻa Sihová, ko kitautolu pē ʻa e kakai ʻoku tau maʻu ʻa e lāngilangi makehe ko iá. ʻOku tataki ʻe he ʻOtuá mo Kalaisi ʻetau ngāue ke tokoniʻi ʻa e kakaí ke nau “hoko ʻo fakalelei ki he ʻOtuá,” ʻa ia, ke hoko ko hono ngaahi kaumeʻa. (2 Kol. 5:20) Ko ia ʻoku ngāueʻaki kitautolu ʻe Sihova ke tohoakiʻi mai ʻa e kakaí kiate ia. Ko hono olá, ko e laui miliona ʻi he ngaahi fonua laka hake he 235 kuo nau hoko ko e ngaahi kaumeʻa ʻo e ʻOtuá pea maʻu ʻa e ʻamanaki ʻo e moʻui taʻengatá. (Tai. 2:11) ʻOku tau fakahāhā ʻa e faivelenga ʻi heʻetau ngāue fakamalangá mo fakaafeʻi “ha taha pē ʻokú ne loto” ke ako ki he moʻoní. (Fkh. 22:17) ʻOku tau “faivelenga maʻá e ngaahi ngāue leleí,” ʻa ia, ko ʻetau ʻofa ʻi he meʻa ʻoku tau fai maʻa Sihová mo fai ʻa e lelei taha te tau malavá ke fakahōifuaʻi ia. (Tai. 2:14) Te tau ako leva ki he founga ʻe lava ke tokoniʻi ai ʻe heʻetau faivelengá ʻa e niʻihi kehé ke nau hoko ʻo ʻiloʻi ʻa Sihová. Ko e founga ʻe taha ko ʻetau ngāue fakamalangá.

3. Ko e hā ʻoku ʻomai ai kia kitautolu ʻe he ‘faivelenga ʻa Sihová’ ʻa e falala-paú?

³ ʻOku tala mai kia kitautolu ʻi he ʻAisea 9:7 (9:6, PM) ko e ʻAlo ʻo e ʻOtuá ʻe hoko ko e Tuʻi pea te ne fai ʻa e ngaahi meʻa lelei maʻá e faʻahinga ʻo e tangatá. ʻOku hoko kotoa ení koeʻuhí ko e “fuaʻa [pe faivelenga] ʻa Sihova Sapaoti.” Ko e faivelengá ko ha holi mālohi ia ke fai ha meʻa. Ko ia ʻoku ʻomai kia kitautolu ʻe he ngaahi lea ʻo e veesi ko iá ʻa e falala-pau ʻoku loto moʻoni ʻa Sihova ke fakahaofi ʻa e faʻahinga ʻo e tangatá. ʻOku  totonu ke tau loto-māfana mo faivelenga ʻi he ngāue fakamalangá koeʻuhí he ʻoku faivelenga ʻa Sihova ko e ʻOtuá. ʻI he tuʻunga ko e taha ʻo e kaungāngāue ʻo e ʻOtuá, ʻokú ke fai ʻa e meʻa kotoa te ke malavá ke malangaʻi ʻa e ongoongo leleí?—1 Kol. 3:9.

4. Naʻe anga-fēfē hono fokotuʻu ʻe Sīsū ha faʻifaʻitakiʻanga haohaoa ʻo e hanganaki faivelenga ʻi he ngāue fakafaifekaú?

⁴ Naʻe fokotuʻu ʻe Sīsū ha faʻifaʻitakiʻanga haohaoa ʻo e hanganaki faivelenga ʻi he ngāue fakafaifekaú. Neongo naʻe fakafepakiʻi ia ʻe he tokolahi pea nau loto ke tāmateʻi ia, naʻá ne faivelenga ʻo aʻu ki he ngataʻanga ʻo ʻene moʻui ʻi he māmaní. (Sione 18:36, 37) Koeʻuhi naʻá ne ʻilo ʻe vave ke ne faingataʻaʻia pea pekia, naʻá ne ngāue ʻo toe lahi ange ke tokoniʻi ʻa e kakaí ke nau hoko ʻo ʻiloʻi ʻa Sihova.

5. Naʻe anga-fēfē hangē ʻa Sīsū ko e tokotaha ngāue ʻi he talanoa fakatātā fekauʻaki mo e fuʻu fikí?

⁵ ʻI he taʻu 32, naʻe fai ai ʻe Sīsū ha talanoa fakatātā fekauʻaki mo ha tangata naʻe ʻi ai ʻene fuʻu fiki naʻe ʻikai ke fua. Hili ʻa e taʻu ʻe tolu, naʻe tala ange ʻe he tangatá ki heʻene tokotaha ngāué ke tā hifo ia, ka naʻe kole ange ʻe he tokotaha ngāué ke tuku ange ha taimi lahi ange ke ne ʻai ai ʻa e fuʻu ʻakaú ke fua. (Lau ʻa e Luke 13:6-9.) ʻI he taimi naʻe leaʻaki ai eni ʻe Sīsuú, ko ha kakai tokosiʻi pē naʻa nau hoko ko ʻene kau ākongá. Ka ko e talanoa fakatātā ʻa Sīsuú naʻe hā mei ai naʻá ne loto ke ne ngāue mālohi ange ʻi he vahaʻa taimi nounou ki muʻa ke ne pekiá. Ko ia naʻá ne malanga ʻi he faivelenga lahi ange ʻi Siutea mo Pēlea ʻi he māhina nai ʻe ono. ʻI ha ngaahi ʻaho siʻi ki muʻa peá ne pekiá, naʻe tangi ai ʻa Sīsū koeʻuhí ko e tokolahi tahá naʻe ʻikai ke nau tali ʻene pōpoakí.—Māt. 13:15; Luke 19:41.

6. Ko e hā ʻoku fiemaʻu ai ke tau feinga ke fai ʻa e meʻa lahi ange ʻi he ngāue fakafaifekaú?

⁶ ʻOku fiemaʻu ke tau feinga ke fai ʻa e meʻa lahi ange ʻi he ngāue fakafaifekaú koeʻuhí he ʻoku tau ofi ʻaupito ki he ngataʻangá. (Lau ʻa e Taniela 2:41-45.) Ko ha lāngilangi lahi ē ke hoko ko e Kau Fakamoʻoni ʻa Sihova! Ko kitautolu pē ʻa e kakai ʻi he māmaní ʻoku tau lava ʻo tala ki he niʻihi kehé ʻa e founga ʻe fakaleleiʻi ai ʻa e ngaahi palopalema ʻo e faʻahinga ʻo e tangatá. Naʻe pehē ʻe ha tokotaha fainusipepa ki muí ni ʻoku taʻemalava ke ʻiloʻi ʻa e ʻuhinga ʻoku hoko ai ʻa e ngaahi meʻa ʻoku koví ki he kakai leleí. Ka ʻoku tala mai kia kitautolu ʻe he Tohi Tapú ʻa e ʻuhingá, pea ko hotau fatongia mo e monū ia ʻi he tuʻunga ko e kau Kalisitiané ke tala ki he niʻihi kehé. ʻOku totonu ke tau hoko ʻo “loto-māfana ʻi he laumālié” ʻi heʻetau fai ʻa e ngāue ʻa Sihová. (Loma 12:11) ʻE tāpuakiʻi ʻe Sihova ʻetau ngāué, pea ʻe lava ke tau tokoniʻi ʻa e kakaí ke nau hoko ʻo ʻilo pea ʻofa kiate ia.

7, 8. ʻOku anga-fēfē hono fakalāngilangiʻi ʻa Sihova ʻe heʻetau ngaahi feilaulaú?

⁷ Naʻe kātekina ʻe Paula ʻa e ngaahi palopalema lahi ʻi heʻene malangá, hangē ko e “ngaahi pō ʻo e taʻemamohe” mo e “ʻikai ha meʻakai.” (2 Kol. 6:5) ʻOku fai ʻe hotau fanga tokouá mo e fanga tuofāfiné ʻa e ngaahi feilaulau meimei tatau ʻi he ngāue fakafaifekaú. ʻOku vakai ʻa e kau tāimuʻá ki he ngāue fakafaifekaú ko ʻenau ngāue mahuʻinga tahá ia, ka ko e tokolahi ʻo kinautolu kuo pau foki ke nau toe maʻu ha ngāue. Fakakaukau foki fekauʻaki mo e kau misinale ʻoku nau ngāue mālohi ke tokoniʻi ʻa e kakai ʻi he ngaahi fonua mulí. (Fil. 2:17) Ko e kau mātuʻá ʻi he taimi ʻe niʻihi kuo pau ke nau liʻaki ha houa kai pe ʻikai lava ʻo mohe kae fai ha tokanga ki he kau mēmipa ʻo e fakatahaʻangá. Ko e kau taʻumotuʻa mo e kau mahamahaki ʻi he fakatahaʻangá ʻoku nau fai honau lelei tahá ke maʻu ʻa e ngaahi fakatahá mo ʻalu ʻi he ngāue fakamalangá. ʻOku fakalototoʻa ke sio ki he loto-lelei ʻa e kau sevāniti ko eni ʻa e ʻOtuá ke fai ha ngaahi feilaulau ʻi heʻenau ngāue fakafaifekaú. Ka naʻa mo e kakai ʻi tuʻa mei he fakatahaʻangá ʻoku nau fakatokangaʻi ʻa e mahuʻinga kia kitautolu ʻetau ngāue fakafaifekaú.

⁸ ʻI ha tohi ki ha nusipepa ʻi Pilitānia, naʻe pehē ai ʻe ha tokotaha lautohi ʻikai ko ha Fakamoʻoni: ‘ʻOku mole ʻa e tui ʻa e kakaí ki he ngaahi lotú. ʻOku ʻikai te u ʻilo ʻa e meʻa ʻoku fai ʻe he kau taki lotú. ʻOku ʻikai moʻoni ke nau ʻalu atu ʻo hangē ko ia naʻe fai ʻe Kalaisí pea feʻiloaki mo e kakaí. Ko e lotu pē taha ʻoku hā mai ʻoku nau tokangá  ko e Kau Fakamoʻoni ʻa Sihová, ʻa ia ʻoku nau ʻalu atu pea feʻiloaki mo e kakaí mo malangaʻi ʻa e moʻoní.’ Ko e tokolahi taha ʻo e kakai ʻi he māmaní ʻoku ʻikai te nau loto-lelei ke fai ha ngaahi feilaulau maʻá e niʻihi kehé. Ka koeʻuhí ʻoku tau loto-lelei ke fai ha ngaahi feilaulau ke malanga, ʻoku tau fakalāngilangiʻi ai ʻa Sihova ko e ʻOtuá.—Loma 12:1.

9. Ko e hā ʻe lava ke ne tokoniʻi kitautolu ke tau faivelenga maʻá e ngaahi ngāue leleí ʻi heʻetau ngāue fakafaifekaú?

⁹ Ko e hā ʻoku totonu ke tau faí kapau ʻoku ʻikai ke tau maʻu ʻa e faivelenga ki he ngāue fakafaifekaú ʻa ia naʻa tau anga ki aí? ʻOku totonu ke tau fakakaukau ki he kotoa ʻo e lelei ʻoku maʻu mei he ngāue ʻoku ʻomai ʻe Sihova ke tau faí. (Lau ʻa e Loma 10:13-15.) Koeʻuhi ke fakahaofi ʻa e kakaí, kuo pau ke nau tui kia Sihova pea ui ki hono huafá. Ka heʻikai lava ke nau fai ia kapau ʻoku ʻikai ke tau malanga kia kinautolu. Ko hono ʻiloʻi ení ʻoku totonu ke ne ʻai kitautolu ke tau loto ke tau faivelenga maʻá e ngaahi ngāue leleí pea fai ʻa e lahi taha te tau malavá ʻi hono malangaʻi ʻa e ongoongo lelei ʻo e Puleʻangá.

10. ʻOku anga-fēfē hono ʻai ʻe heʻetau ʻulungaanga leleí ʻa e kakaí ke nau loto ke ʻilo ki he ʻOtuá?

¹⁰ Ko ʻetau faivelenga ki he ngāue fakafaifekaú ʻoku ʻikai feʻunga ia ke ʻai ai ʻa e kakaí ke nau loto ke ʻilo ki he ʻOtuá. Ko e meʻa hono ua ʻoku tokoniʻi ai kinautolú ko hotau ʻulungaanga lelei faka-Kalisitiané. Naʻe fakamatalaʻi ʻe Paula ʻa e ʻuhinga ʻoku mahuʻinga ai hotau ʻulungāngá ʻaki ʻene pehē: “ʻOku ʻikai ʻaupito te mau ʻoatu ha tūkiaʻanga ʻe taha, koeʻuhí ke ʻoua naʻa fakaangaʻi ai ʻemau ngāué.” (2 Kol. 6:3) Ko e maʻa ʻetau leá mo e ʻulungaanga leleí ʻe ʻai nai ai ʻa e kakai kehé ke nau loto ke lotu kia Sihova. (Tai. 2:10) Ko hono moʻoní, ʻoku tau faʻa fanongo ʻoku tali ʻe he kakaí ʻa e moʻoní ʻi he taimi ʻoku nau sio ai ki he anga ʻo ʻetau faʻifaʻitaki kia Kalaisí.

11. Ko e hā ʻoku totonu ai ke tau fakakaukau mo lotu fekauʻaki mo e anga ʻo e kaunga ʻa hotau ʻulungāngá ki he niʻihi kehé?

¹¹ Hangē pē ko e malava ʻe hotau ʻulungaanga leleí ke ʻai ʻa e kakaí ke nau loto ke ako ʻa e moʻoní,  ʻe lava ʻe he ʻulungaanga koví ke ʻai ʻa e kakaí ke ʻoua ʻaupito te nau loto ke ʻilo kia Sihova. Ko ia tatau ai pē pe ʻoku tau ʻi he ngāueʻangá, ʻi ʻapi, pe ʻi he ʻapiakó, ʻoku totonu ke tau fakapapauʻi ke ʻoua naʻa tau fai ha meʻa ʻe fakatafokiʻi ai ha taha meia Sihova. Kapau ʻoku tau “tōʻonga loto-lelei ʻaki ʻa e angahalá,” ʻe mole ai hotau vahaʻangatae mo Sihová ʻo taʻengata. (Hep. 10:26, 27) ʻOku totonu ke ʻai ʻe he meʻá ni kitautolu ke tau fakakaukau fakalelei pea lotu fekauʻaki mo hotau ʻulungāngá pea mo e anga ʻene kaunga ki he niʻihi kehé. ʻI he fakaʻaʻau ke kovi ange ʻa e ʻulungaanga ʻo e māmaní, ʻoku totonu ke faingofua ange ai ʻa e sio ʻa e kakaí ki he faikehekehe “ʻa e taha ʻoku ngaue ki he ʻOtua mo ia ʻoku ʻikai ke ngaue ki ai.” (Mal. 3:18) ʻIo, ko hotau ʻulungaanga lelei faka-Kalisitiané ko ha founga mahuʻinga ia ke tokoniʻi ai ʻa e kakaí ke nau loto ke hoko ko e ngaahi kaumeʻa ʻo e ʻOtuá.

12-14. ʻOku anga-fēfē kaunga ʻa e anga ʻo ʻetau kātekina ʻa e fakafepakí ki he vakai ʻa e niʻihi kehé ki he moʻoní? ʻOmai ha fakatātā.

¹² ʻI heʻene tohi hono ua ki he kau Kolinitoó, naʻe fakamatala ai ʻa Paula ʻo pehē naʻe fakatangaʻi, haha, mo fakahū pilīsone ia koeʻuhí naʻe fakafepakiʻi ʻe he kakaí ʻene ngāue fakafaifekaú. (Lau ʻa e 2 Kolinitō 6:4, 5.) ʻI he taimi ʻoku tau kātekina ai ʻa e fakafepakí, ʻoku ueʻi nai ai ʻa e niʻihi kehé ke nau tali ʻa e moʻoní. ʻI he ngaahi taʻu kuo maliu atú, naʻe loto ai ʻa e niʻihi ʻi ʻEngikola ke toʻo kotoa atu ʻa e Kau Fakamoʻoni ʻa Sihova ʻi honau feituʻú. Naʻa nau uipi ha ongo Fakamoʻoni ʻosi papitaiso ʻe toko 2 mo e faʻahinga mahuʻingaʻia ʻe toko 30 kae ʻoua kuo lavelavea mo fetotoʻi honau kakanó. Naʻe aʻu ʻo nau uipi mo e kakai fefiné mo e fānaú. Naʻa nau loto ke ʻai ʻa e niʻihi kehé ke nau ilifia ke fanongo ki he Kau Fakamoʻoni ʻa Sihová, ko ia naʻa nau fakamālohiʻi ʻa e kakai ʻi he feituʻú ke nau sio ai. Ka ki mui ai ko e tokolahi ʻo kakai ko ení naʻa nau kole ki he Kau Fakamoʻoní ki ha ako Tohi Tapu ʻi ʻapi! Ko hono olá, naʻe hokohoko atu ʻa e ngāue fakamalangá, naʻe haʻu ʻa e kakai tokolahi ange ki he moʻoní, pea faitāpuekina ʻa e fanga tokouá.

¹³ ʻOku hā mei he faʻifaʻitakiʻanga ko ení ʻi he taimi ʻoku sio ai ʻa e kakaí ʻoku tau loto-toʻa he lolotonga ʻo ha ʻahiʻahí, te nau fili nai ai ke nau tali ʻa e moʻoní. Ko e loto-toʻa ʻa Pita mo e kau ʻapositolo kehé naʻe fakalototoʻaʻi nai ai ʻa e niʻihi kehé ke nau hoko ko e ngaahi kaumeʻa ʻo e ʻOtuá. (Ngā. 5:17-29) Ko hotau kaungāakó, kaungāngāué, pe ngaahi mēmipa ʻo e fāmilí te nau tali nai ʻa e moʻoní koeʻuhí ko ʻenau sio ʻoku tau loto-toʻa ʻi he taimi ʻoku tau hokosia ai ha fakafepaki.

¹⁴ ʻOku ʻi ai maʻu pē ha niʻihi hotau fanga tokouá ʻoku fakatangaʻi. Ko e fakatātaá, ʻi he taimí ni, ko e fanga tokoua nai ʻe toko 40 ʻi ʻAmīnia ʻoku tuku pilīsone koeʻuhí ko ʻenau tuʻu-ʻataá. Pea ʻoku ʻi ai mo e tokolahi ange ʻi he fonua ko iá ʻoku ngalingali ʻe tuku mo kinautolu ki ai ʻi he kahaʻu vave maí. ʻI ʻElitilia, ʻoku tuku pilīsone ai ʻa e Kau Fakamoʻoni ʻe toko 55, pea ko e niʻihi ʻo kinautolu ʻoku nau taʻu 60 tupu. ʻI Kōlea Tonga, ʻoku tuku pilīsone ai ʻa e Kau Fakamoʻoni ʻe toko 700 nai koeʻuhí ko ʻenau tuʻu-ʻataá. Kuo feʻunga mo e taʻu ʻe 60 ʻa hono ʻave ki pilīsone ʻa hotau fanga tokoua ʻi aí. ʻOku totonu ke tau hanganaki lotu ke hoko ʻo fakalāngilangiʻi ʻa e ʻOtuá ʻe he faitōnunga ʻa e fanga tokoua ko eni ʻoku fakatangaʻí pea tokoniʻi ai ʻa e niʻihi kehé ke nau tali ʻa e moʻoní.—Saame 76:8-10.

15. ʻOmai ha hokosia ʻoku hā ai ʻa e anga hono ʻai ʻe heʻetau faitotonú ʻa e niʻihi kehé ke nau loto ke ʻiloʻi ʻa e moʻoní.

¹⁵ Ko e moʻoniʻi meʻa ko ia ʻoku tau faitotonú ʻoku toe ʻai nai ai ʻa e kakaí ke nau loto ke ako ʻa e moʻoní. (Lau ʻa e 2 Kolinitō 6:4, 7.) Ko e fakatātaá, naʻe faʻo ʻe ha tuofefine ha paʻanga ʻi ha mīsini tikite ʻi ha pasi ka naʻe tala ange ʻe hano kaungāmeʻa ʻoku ʻikai totonu ke ne totongi ʻa e tikité koeʻuhí he ko ʻene heka nounou pē. Naʻe tala ange ʻe he tuofefiné ko e meʻa totonu ia ke totongi ʻa e tikité, naʻa mo ha kiʻi heka nounou pē. ʻI he hili iá, naʻe hifo hono kaungāmeʻá mei he pasí. Naʻe ʻeke ange leva ʻe he fakaʻuli pasí ki he tuofefiné, ‘Ko e taha koe ʻo e Kau Fakamoʻoni ʻa Sihová?’ Naʻá ne pehē ‘ʻIo. Ko e hā naʻá ne ʻai koe ke ke ʻeké?’ ‘Naʻá ku fanongo atu ki hoʻomo fetalanoaʻaki fekauʻaki mo e totongi ʻo e tikite ki he pasí, pea ʻoku ou ʻilo ko e Kau Fakamoʻoni ʻa Sihová ʻoku nau ʻi he lotolotonga ʻo e kiʻi kakai tokosiʻi ʻaupito ʻoku nau totongi ʻa e ngaahi tikité pea ʻoku nau faitotonu ʻi he meʻa kotoa pē.’ ʻI ha ngaahi māhina  siʻi mei ai, naʻe fakaofiofi atu ha tangata ki he tuofefiné ʻi ha fakataha ʻo ne pehē, ‘ʻOkú ke ʻiloʻi au? Ko e fakaʻuli pasi au naʻá ku talanoa atu kiate koe fekauʻaki mo e totongi ʻo e tikité. Hili ʻeku sio ki he anga hoʻo faitotonú, naʻá ku fili ke u kamata ako ʻa e Tohi Tapú mo e Kau Fakamoʻoni ʻa Sihová.’ ʻI he sio ʻa e kakaí ki heʻetau faitotonú, ʻoku nau falala ai ki he ongoongo lelei ʻoku tau malangaʻí.

16. Ko e hā ʻe lava ke hokó ʻi he taimi ʻoku tau kātaki-fuoloa ai, ʻofa mo anga-leleí? ʻOmai ha fakatātā ʻo e meʻa ʻoku fai ʻe he kau taki lotu loí.

¹⁶ ʻI he taimi ʻoku tau kātaki-fuoloa ai, ʻofa mo anga-leleí, ʻoku tau ʻai nai ai ʻa e kakai kehé ke nau loto ke ako fekauʻaki mo Sihova, ko ʻene ngaahi taumuʻá, mo ʻene kakaí. Ko e tōʻonga mo e ʻulungaanga ʻo e kau Kalisitiane moʻoní ʻoku fakalāngilangiʻi ai ʻa e ʻOtuá. ʻOku fakangalingali ʻa e kau taki lotu ʻe niʻihi ʻoku nau maʻu ha tōʻonga lelei mo ha ʻulungaanga lelei. Ka ʻoku nau loi ki honau kau muimuí mo ʻave ʻenau paʻangá. Kuo aʻu ʻo ngāueʻaki ʻe he niʻihi ʻa e paʻanga ko iá ke fakatau mai ʻaki maʻanautolu ha ngaahi ʻapi mo ha ngaahi meʻalele totongi mamafa. Naʻe aʻu ʻo langa ʻe ha tokotaha ha fale-kulī naʻe ʻi ai ha mīsini ʻea fakamokomoko! ʻOku ʻikai te nau muimui ki he fekau ʻa Sīsū ke “foaki taʻetotongi.” (Māt. 10:8) ʻI hono kehé, ʻoku nau hangē ko e kau taulaʻeiki ʻIsileli koví. ʻOku nau faiako “ko e sio vahenga pe” pea faiakoʻaki ʻa e ngaahi fakakaukau hala fekauʻaki mo e ʻOtuá. (Mai. 3:11) ʻI he taimi ʻoku nau tōʻonga pehē aí, ʻoku ʻikai te nau tokoniʻi ai ha taha ke hoko ko e kaumeʻa ʻo e ʻOtuá.

17, 18. (a) ʻE lava fēfē ke tau fakalāngilangiʻi ʻa Sihova ʻaki hotau ʻulungāngá? (e) Ko e hā ʻokú ke loto ai ke ke hanganaki faivelenga maʻá e ngaahi ngāue leleí?

¹⁷ Ka ʻoku loto ʻa e kakaí ke hoko ko e ngaahi kaumeʻa ʻo e ʻOtuá ʻi he taimi ʻoku nau ʻiloʻi ai ʻoku tau faiakoʻaki ʻa e moʻoní pea sio ʻoku tau tōʻonga lelei ki hotau ngaahi kaungāʻapí. Ko e fakatātaá, naʻe lea ha tāimuʻa ʻe taha ki ha uitou taʻumotuʻa ʻi ha matapā, ka naʻe tala fakavave ange ʻe he fefiné ki he tokouá ʻoku ʻikai te ne mahuʻingaʻia. Naʻá ne pehē ʻi he taimi naʻá ne tā ai ʻa e kiʻi fafangu ʻi he matapaá, naʻá ne tuʻu ʻi ha tuʻunga ʻi he peitó, ʻo feinga ke fetongi ha foʻi ʻuhila. Naʻe pehē ange ʻe he tokouá, “ʻoku fakatuʻutāmaki ke ke fai ia toko taha pē.” Naʻe fetongi leva ʻe he tokouá ʻa e foʻi ʻuhilá peá ne ʻalu ki he matapā hono hokó. ʻI he taimi naʻe ʻilo ai ʻa e tamasiʻi ʻa e fefiné ʻo fekauʻaki mo e meʻa naʻe hokó, naʻe mātuʻaki maongo kiate ia ʻo ne feinga ai ke kumi ki he tokouá ke fakamālō kiate ia. Faifai atu pē, naʻe tali ʻe he tamasiʻí ha ako Tohi Tapu.

¹⁸ Ko e hā ʻokú ke loto ai ke ke hanganaki faivelenga maʻá e ngaahi ngāue leleí? Mahalo pē koeʻuhí ʻokú ke ʻiloʻi kapau ʻokú ke faivelenga ʻi he ngāue fakafaifekaú mo maʻu ha ʻulungaanga lelei, te ke fakalāngilangiʻi ai ʻa Sihova pea tokoniʻi ʻa e niʻihi kehé ke nau hao. (Lau ʻa e 1 Kolinitō 10:31-33.) Ko e toe ʻuhinga ʻe taha ki heʻetau faivelenga ʻi he malangá pea mo hotau ʻulungaanga leleí ko ʻetau loto moʻoni ke fakahaaʻi ʻetau ʻofa ki he ʻOtuá pea ki he niʻihi kehé. (Māt. 22:37-39) Kapau ʻoku tau faivelenga maʻá e ngaahi ngāue leleí, te tau maʻu ai ʻa e fiefia mo e fiemālie moʻoni he taimí ni. Pea ʻe lava ai ke tau fakatuʻotuʻa atu ki he taimi ʻe hoko ai ʻa e kotoa ʻo e faʻahinga ʻo e tangatá ʻo fiefia ke lotu pea fakalāngilangiʻi hotau Tokotaha-Fakatupú, ʻa Sihova.