Ngaahi Husepāniti, Faʻifaʻitaki ki he ʻOfa ʻa Kalaisí!

ʻI HE pō fakaʻosi ʻo ʻene moʻui ʻi he māmaní, naʻe tala ai ʻe Sīsū ki heʻene kau ʻapositolo faitōnungá: “Ko e tuʻutuʻuni foʻou ʻoku ou tuku kiate kimoutolu, Ke mou feʻofaʻaki: hange ā ko ʻeku ʻofaʻi kimoutolu, ke pehē foki hoʻomou feʻofaʻaki. Ko e meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.” (Sione 13:34, 35) Ko e moʻoni, ko e kau Kalisitiane moʻoní kuo pau ke nau feʻofaʻaki.

ʻI he lea hangatonu ki he ngaahi husepāniti ʻi he lotolotonga ʻo e kau muimui ʻo Kalaisí, naʻe tohi ʻe he ʻapositolo ko Paulá: “ʻA e kau tangata, mou ʻofa ki homou ngaahi uaifi, ʻo hange foki ko Kalaisi ne ne ofaʻi ʻa e Siasi, ʻo ne liʻoa ʻa ʻEne ʻAfio koeʻuhi ko ia.” (Ef. 5:25) ʻE lava fēfē ke ngāueʻaki ʻe ha husepāniti Kalisitiane ʻa e ekinaki Fakatohitapu ko ení ʻi heʻene nofo malí, tautefito kapau ko hono uaifí ko ha sevāniti fakatapui ʻa Sihova?

Tauhi ʻe Kalaisi ʻa e Fakatahaʻangá

“ʻOku totonu ke pehe foki ʻa e ʻofa ʻa e ngaahi husepaniti ki siʻonau ngaahi uaifi, he ko siʻonau sino kinautolu,” ko e fakamatala ia ʻa e Tohi Tapú. “Ko ia ʻoku ne ʻofa ki hono uaifi ʻoku ne ʻofa kiate ia. Seuke, ʻanefē ia ʻa e fehiʻa ʻa ha taha ki hono kakano oʻona; kaekehe ʻoku ne fafanga mo tauhi ia, ʻo hangē foki ko e fai ʻa Kalaisi ki he Siasi.” (Ef. 5:28, 29) Naʻe ongoʻi ʻofa ʻa Sīsū ki heʻene kau ākongá peá ne lehilehiʻi kinautolu. Naʻá ne tauhi kinautolu. Neongo naʻa nau taʻehaohaoa, naʻá ne anga-ʻofa mo anga-lelei kia kinautolu. ʻI he holi ke “ʻomi ʻe ia ʻa e Siasi kiate ia ʻoku fetapatapaki,” naʻá ne tokangataha ki he ngaahi ʻulungāanga lelei ʻo ʻene kau ākongá.—Ef. 5:27.

Hangē ko e fakahāhā ʻe Kalaisi ʻa e ʻofa ki he fakatahaʻangá, kuo pau ke fakahaaʻi ʻe ha husepāniti ʻa e ʻofa ki hono hoá fakatouʻosi ʻi he lea mo e ngāue. Ko ha uaifi ʻoku toutou fakahāhā kiate ia ʻa e ʻofa ʻa hono husepānití ʻokú ne ongoʻi ʻoku tauhia ia pea ʻokú ne fiefia. ʻI he tafaʻaki ʻe tahá, ko ha fefine ʻokú ne maʻu ʻa e fiemālie ʻo ha ʻapi lelei ʻe lava ke ʻikai moʻoni te ne fiefia ʻo kapau ʻoku liʻaki pe tukunoaʻi ia ʻe hono hoa malí.

ʻOku anga-fēfē hono fakahaaʻi ʻe ha husepāniti ʻokú ne tauhi ʻa hono uaifí? ʻI he feituʻu kakaí, ʻokú ne fakafeʻiloaki ia ki he niʻihi kehé ʻi ha founga fakangeingeia pea fakahīkihikiʻi fakahāhā ia ʻi heʻene poupoú. Kapau naʻe fakahoko ʻe he uaifí ha ngafa tefito ʻi he lavameʻa naʻe hokosia ʻe he fāmilí, ʻoku ʻikai te ne toumoua ke ʻai ke ʻiloʻi ia ʻe he niʻihi kehé. ʻI heʻena toko uá, ʻoku ongoʻi ʻe he uaifí ʻa ʻene ʻofá. Ko ha kiʻi ala, ko ha malimali, ko ha fāʻofua, mo ha lea ʻofa ko e fanga kiʻi meʻa iiki nai, ka ʻoku maongo tuʻuloa ia ki he loto ʻo ha fefine.

“ʻIkai Te Ne Ma ke Lau Kinautolu ko e Ngaahi Tokoua”

Ko Kalaisi Sīsuú naʻe ‘ʻikai te ne ma ke lau [hono kau muimui paní] ko e ngaahi tokoua.’ (Hep. 2:11, 12, 17) Kapau ko ha husepāniti Kalisitiane koe, manatuʻi ko ho uaifí ko ho tuofefine Kalisitiane foki ia. Ko ʻene fakatapui kia Sihová ʻoku muʻomuʻa ia ʻi heʻene fuakava malí, tatau ai pē pe naʻe papitaiso ia ki muʻa pe ʻi he hili ʻene mali mo koé. ʻI hono fiemaʻu ho uaifí ke ne fai ha talí, ko e tokoua ʻokú ne tokangaʻi ha fakataha ʻa e fakatahaʻangá ʻoku feʻungamālie ʻene lave kiate ia ko hono “Tuofefine.” Ko ho tuofefine foki ia, ʻo ʻikai ʻi he Fale Fakatahaʻangá pē kae toe pehē foki ʻi ʻapi. ʻOku mahuʻinga tatau ke anga-lelei mo anga-fakaʻapaʻapa kiate ia ʻi ʻapi ʻo tatau pē mo ia ʻi he Fale Fakatahaʻangá.

Kapau ʻokú ke maʻu ha toe ngaahi fatongia ʻi he fakatahaʻangá, te ke ʻiloʻi nai ʻi he taimi ʻe niʻihi ʻoku faingataʻa ke ʻai ke mafamafatatau ʻa e ngaahi fatongia ʻi he fakatahaʻangá mo e fāmilí. Ko e  fāitaha lelei ʻi he lotolotonga ʻo e kau mātuʻá mo e kau sevāniti fakafaifekaú mo hono vaheʻi lelei ʻo e ngaahi fatongiá ʻe lava ke tokoniʻi ai koe ke ke maʻu ʻa e taimi lahi ange ki he tuofefine ʻokú ne fiemaʻu lahi taha koé—ko ho uaifí. Manatuʻi, ʻoku ʻi ai e fanga tokoua ʻe lava taʻetoeveiveiua ke nau fakahoko ʻa e ngaahi ngāue ʻi he fakatahaʻangá kuo vaheʻi kiate koé, ka ko e tokoua pē koe ʻe taha kuo fakafāʻūtahaʻi ki ho uaifí ʻi he nofo malí.

ʻIkai ngata aí, ko e ʻulu koe ʻo ho uaifí. ʻOku fakamatala ʻa e Tohi Tapú: “Ko e ʻulu ʻo e tangata kotoa pe ko Kalaisi; pea ko e ʻulu ʻo e fefine ko e tangata.” (1 Kol. 11:3) ʻOku totonu ke fēfē hoʻo ngāueʻi ʻa e tuʻunga-ʻulu ko ení? ʻI ha founga ʻofa, ʻo ʻikai ʻi he toutou lave ki he veesi naʻe fakahaaʻi ki muʻá mo kounaʻi ʻa e fakaʻapaʻapá. Ko e kī ki hono ngāueʻi totonu ʻa e tuʻunga-ʻulú ko e faʻifaʻitaki kia Sīsū Kalaisi ʻi he anga ʻo hoʻo tōʻongafai ki ho uaifí.—1 Pita 2:21.

“Ko Hoku Ngaahi Kaumeʻa ʻAkimoutolu”

Naʻe ui ʻe Sīsū ʻene kau ākongá ko hono ngaahi kaumeʻa. Naʻá ne tala ange: “Kuo u ui kimoutolu ko hoku ngaahi kaumeʻa; koeʻuhi ʻilonga ha meʻa ne u fanongo mei heʻeku Tamai kuo u fakaʻilo kiate kimoutolu.” (Sione 15:14, 15) Ko Sīsū mo ʻene kau ākongá naʻa nau fetuʻutaki lelei. Naʻa nau fai fakataha ʻa e ngaahi meʻá. Ko “Jisu, bea mo ene kau akoga” naʻe fakaafeʻi ki he kātoanga kai ʻo ha mali ʻi Kena. (Sione 2:2, PM) Naʻe ʻi ai honau ngaahi feituʻu manakoa, hangē ko e ngoue ko Ketisemaní. ʻOku pehē ʻe he Tohi Tapú “naʻe faʻa fakataha ki ai ʻa Sisu mo ʻene kau ako.”—Sione 18:2.

ʻOku fiemaʻu moʻoni ki ha uaifi ke ne ongoʻi ko e kaumeʻa ofi taha ia ʻo hono husepānití. He mahuʻinga moʻoni ē kia kimoutolu ngaahi husepānití mo e ngaahi uaifí ke mou fiefia fakataha ʻi he moʻuí! Tauhi fakataha ki he ʻOtuá. Fiefia ʻi hono ako fakataha ʻa e Tohi Tapú. Fakamoleki fakataha ʻa e taimí—ʻi he luelue, talanoa mo e kai fakataha. ʻAi ke mahulu atu ʻi he hoko pē ko ha ongo meʻa malí; hoko ko e ongo kaumeʻa ʻofeina.

Naʻá Ne “Ofa Be Ia ki Ai o Aʻu ki he Gataaga”

Ko Sīsuú naʻá ne ‘ofa ki he ene kau akogá o aʻu ki he gataagá.’ (Sione 13:1, PM) ʻOku ʻikai lava ke faʻifaʻitaki ʻa e ngaahi husepāniti ʻe niʻihi kia Kalaisi ʻi he tafaʻaki ko ení. ʻOku aʻu nai ʻo nau liʻaki ʻa e ‘uaifi ʻo ʻenau talavoú,’ koeʻuhi nai ko ha taha kei siʻi ange.—Mal. 2:14, 15.

Ko e niʻihi kehe, hangē ko Willi, ʻoku nau faʻifaʻitaki kia Kalaisi. Koeʻuhi ko e hōloa ʻa hono tuʻunga moʻui leleí, ko e uaifi ʻo Willi naʻe fiemaʻu ke tokangaʻi maʻu pē ia ʻi he ngaahi taʻu lahi. Naʻe fēfē ʻa e ongoʻi ʻa Willi fekauʻaki mo e meʻa ko ení? Naʻá ne pehē: “Kuó u vakai maʻu pē ki hoku uaifí ko ha meʻaʻofa ia mei he ʻOtuá pea kuó u houngaʻia ʻiate ia ʻi he tuʻunga ko iá. Ko e taha, ʻi he taʻu ʻe 60 kuohilí naʻá ku palōmesi ai ke tokangaʻi ia fakatouʻosi ʻi he taimi lelei mo e kovi. Heʻikai ʻaupito ngalo ʻiate au ʻa e palōmesi ko iá.”

Ngaahi husepāniti Kalisitiane, faʻifaʻitaki ki he ʻofa ʻa Kalaisí. Tauhi ʻa ho uaifi manavahē-ʻOtuá—ʻa ho tuofefiné mo e kaumeʻá.

[Fakatātā ʻi he peesi 20]

Ko ho uaifí ʻa ho kaumeʻa ofi tahá?

[Fakatātā ʻi he peesi 20]

‘Mou ʻofa ki homou uaifí’