Ngaahi Meʻa Mahuʻinga mei he Tohi ki he Kau Tesalonaiká mo e Tohi kia Tīmoté
ʻOku Moʻui ʻa e Folofola ʻa Sihová
Ngaahi Meʻa Mahuʻinga mei he Tohi ki he Kau Tesalonaiká mo e Tohi kia Tīmoté
KUO hokosia ʻe he fakatahaʻanga foʻou ʻi Tesalonaiká ʻa e fakafepaki talu mei hono fokotuʻú ʻi he taimi naʻe ʻaʻahi atu ai ʻa e ʻapositolo ko Paulá. Ko ia ʻi he foki mai mei ai ʻa Tīmote mo ha līpooti lelei—ʻi hono taʻu 20 tupú nai—ʻoku ueʻi ai ʻa Paula ke ne fai ha tohi ki he kau Tesalonaiká ʻo fakaongoongoleleiʻi mo fakalototoʻaʻi kinautolu. ʻI he hangehangē naʻe hiki ia ʻi he konga ki mui ʻo e 50 T.S., ko e ʻuluaki ia ʻo e ngaahi faitohi fakamānavaʻi naʻe fai ʻe Paulá. Taimi nounou mei ai, ʻokú ne toe faitohi ko hono tuʻo uá ia ki he kau Kalisitiane ʻi Tesalonaiká. ʻI he taimi ko ʻení, ʻokú ne fakatonutonu ha fakakaukau hala naʻe maʻu ʻe he niʻihi pea ekinaki ki he fanga tokouá ke nau tuʻumaʻu ʻi he tuí.
ʻI he taʻu nai ʻe hongofulu ki mui ai, ʻoku ʻi Masitōnia ai ʻa Paula kae ʻi ʻEfesō ʻa Tīmote. ʻOku faitohi ʻa Paula kia Tīmote, ʻo fakalototoʻaʻi ia ke ne nofo ʻi ʻEfesō ʻo fakahoko ha faitau fakalaumālie mo e kau faiako loi ʻi he loto fakatahaʻangá. ʻI he hoko mai ha peau ʻo e fakatangá ki he kau Kalisitiané hili ʻa e hoko ha fuʻu vela ʻi Loma ʻi he 64 T.S., ʻoku fai ai ʻe Paula ʻa ʻene faitohi hono ua kia Tīmoté. Ko e fakamuimui taha ia ʻo ʻene ngaahi tohi fakamānavaʻí. ʻOku lava ke tau maʻu ʻaonga foki mo kitautolu ʻi he ʻaho ní mei he fakalototoʻa mo e akonaki ʻoku ʻasi ʻi he ngaahi tohi ʻe fā ko ʻeni naʻe fai ʻe Paulá.—Hep. 4:12.
“ʻĀ PE”
ʻOku fakaongoongoleleiʻi ʻe Paula ʻa e kau Tesalonaiká ʻi heʻenau ‘ngaue ʻi he tuí, mo ʻenau fakafitefitaʻa ʻi he ʻofá, mo ʻenau kīkītakí.’ ʻOkú ne tala ange kiate kinautolu ʻoku nau hoko ko hono ‘ʻamanakiʻanga, mo e fiefiaʻanga mo e pale te ne polepole ai.’—1 Tes. 1:3; 2:19.
Hili hono fakalototoʻaʻi ʻa e kau Kalisitiane ʻi Tesalonaiká ke nau fefakafiemālieʻaki ʻi he ʻamanaki ʻo e toetuʻú, ʻoku pehē ʻe Paula: “Ko e hoko mai ʻa e ʻaho ʻo e ʻEiki ʻoku hange ko e haʻu ʻa e kaihaʻa ʻi he po.” ʻOkú ne ekinaki kia kinautolu ke nau “ʻā pe” pea fakakaukau lelei maʻu pē.—1 Tes. 4:16-18; 5:2, 6.
Tali ki he Ngaahi Fehuʻi Fakatohitapú:
4:15-17—Ko hai ʻoku ‘punakaki ʻi he ngaahi ʻaó ki he ʻataá, ke fakafetaulaki ki he ʻEikí,’ pea ʻoku anga-fēfē ʻa e hoko ʻa e meʻá ni? Ko e kau Kalisitiane pani ʻeni ʻoku nau moʻui lolotonga ʻa e ʻi ai ʻa Kalaisi ʻi he mafai ʻo e Puleʻangá. ʻOku nau “fakafetaulaki ki he ʻEiki” ko Sīsuú ʻi he nofoʻanga fakahēvani taʻehāmaí. Ka ke aʻusia ʻení, ʻoku ʻuluaki fiemaʻu ia ke nau mate pea toetuʻu hake ko e ngaahi meʻamoʻui laumālie. (Loma 6:3-5; 1 Kol. 15:35, 44) Kuo ʻosi kamata ʻa e ʻi ai ʻa Kalaisí, ko ia ko e kau Kalisitiane pani ʻoku nau mate ʻi he ʻaho ní ʻe ʻikai ke nau kei ʻi he maté ai pē. ʻOku nau “punakaki,” pe toetuʻu hake ʻi he taimi pē ko iá.—1 Kol. 15:51, 52.
5:23—Ko e hā naʻe ʻuhinga ki ai ʻa Paulá ʻi heʻene lotu ke “haofaki” ʻa e “laumalie, mo e loto, mo e sino” ʻo e fanga tokouá? Naʻe ʻuhinga ʻa Paulá ki he laumālie, loto mo e sino ʻo e fakatahaʻanga Kalisitiane ʻa ia ʻoku faʻuʻaki ʻa e ngaahi mēmipa tokolahi, ʻo kau ki ai ʻa e kau Kalisitiane ʻi Tesalonaika kuo pani ʻe he laumālié. ʻI he ʻikai ke lotu pē ke haofaki ʻa e fakatahaʻangá, naʻá ne lotu ke haofaki ʻa e “laumalie” pe hehema fakaefakakaukau ʻa e fakatahaʻangá. Naʻá ne toe lotu foki maʻá e “loto” ʻo e fakatahaʻangá, ʻa ʻene moʻuí, pe ko ʻene ʻi aí, pea mo hono “sino”—ʻa e sino ʻoku faʻuʻaki ʻa e ngaahi mēmipa ʻo e kau Kalisitiane paní. (1 Kol. 12:12, 13) ʻOku fakamamafaʻi ai ʻe he lotu ko iá ʻa e tokanga lahi ʻa Paula ki he fakatahaʻangá.
Ngaahi Lēsoni kia Kitautolu:
1:3, 7; 2:13; 4:1-12; 5:15. Ko ha founga ola lelei ke fai ai ha akonaki ko hono fai ha fakaongoongolelei loto-moʻoni fakataha mo e fakalototoʻaʻi ke fai lelei ange.
4:1, 9, 10. ʻOku totonu ki he kau lotu ʻa Sihová ke nau hokohoko atu ʻa e fakalakalaka fakalaumālié.
5:1-3, 8, 20, 21. ʻI he fakaofiofi mai ʻa e ʻaho ʻo Sihová, ʻoku totonu ke tau fakakaukau lelei pea “ʻai ʻa e kofutau ko e tui mo e ʻofa, pea mo e ʻamanaki moʻui moʻota [tatātau].” ʻIkai ko ia pē, ʻoku totonu ke tau tokanga fakamātoato ki he Folofola fakaekikite ʻa e ʻOtuá, ʻa e Tohi Tapú.
“TUU MAU”
ʻI hono fakaʻuhingahalaʻi ʻa e meʻa naʻe leaʻaki ʻe Paula ʻi heʻene ʻuluaki tohi kia kinautolú, ʻoku taukaveʻi nai ʻe he niʻihi ʻi he fakatahaʻangá ko e ‘hoko mai [pe ʻi ai] ʻa e ʻEikí’ ʻoku ofi ʻaupito. Ke fakatonutonu ʻa e fakakaukau ko iá, ʻoku fakamatala ʻa Paula ki he meʻa ʻe “tomua hoko.”—2 Tes. 2:1-3, PM.
ʻOku enginaki ʻa Paula: “Tuu mau, o kuku mau ae gaahi akonaki aia nae akonekina ai akimoutolu.” ʻOkú ne ʻoange ʻa e tuʻutuʻuni ke ‘nau fakaʻehiʻehi mei ha kainga ʻe laka hala.’—2 Tes. 2:15, PM; 3:6.
Tali ki he Ngaahi Fehuʻi Fakatohitapú:
2:3, 8—Ko hai ʻa e “tangata ko Malakilao,” pea ʻe anga-fēfē hono fakaʻauhá? Ko e “tangata” ko ʻeni ʻoku faʻuʻaki ha ngaahi mēmipa ʻa ia ko e kalasi haʻa faifekau ʻo e Puleʻanga-Haʻa-Kalisitiané. Ko e tokotaha kuo fakamafeia ke ne talaki ʻa hono fakamāuʻi ʻe he ʻOtuá ʻa e kau fulikivanú pea tuʻutuʻuniʻi ʻa hono fakaʻauha kinautolú ko “Folofola”—ko e Tangata-Lea Tefito ʻa e ʻOtuá, ʻa Sīsū Kalaisi. (Sione 1:1) Ko ia ai, ʻoku lava ke pehē ʻe fakaʻauha ʻe Sīsū ʻa e tangata ko Malakilaó “ʻaki ʻa e manava [ivi ngāue] ʻo hono fofonga.”
2:13, 14—Kuo anga-fēfē ʻa e hoko ʻa e kau Kalisitiane paní ʻo ‘fili mei he kamataʻangá ke nau maʻu ʻa e fakamoʻuí’? Ko e kau paní ʻi he tuʻunga ko ha kalasí naʻe tomuʻa fakapapauʻi kinautolu ʻi hono fakataumuʻa ʻe Sihova ʻa e hako ʻo e fefiné ke ne fakavolu ʻa e ʻulu ʻo Sētané. (Sen. 3:15) Naʻe toe fakahaaʻi ʻe Sihova ʻa e ngaahi fiemaʻu kuo pau ke nau lavaʻí, ko e ngāue te nau faí, pea mo e ʻahiʻahi te nau fou aí. Ko ia naʻá ne ui leva ai kinautolu ki he ʻamanaki ko ʻení.
Ngaahi Lēsoni kia Kitautolu:
1:6-9. Ko e fakamaau ʻa Sihová ʻoku filifili ai ʻa e faʻahinga ʻe tauteaʻí.
3:8-12. Ko e ofi ʻa e ʻaho ʻo Sihová ʻoku ʻikai totonu ke hoko ia ko ha kalofanga ke ʻikai ngāue ai ke tokonaki mai ʻetau ngaahi fiemaʻú pea ke tokoniʻi kitautolu ʻi he ngāue fakafaifekaú. Ko e nofo noaʻiá ʻe lava ke ne ʻai kitautolu ke tau fakapikopiko pea fakataueleʻi ai kitautolu ke tau hoko ʻo “kaunoa ʻi ha meʻa” ʻa e kakai kehé.—1 Pita 4:15.
“LEʻOHI ʻA E MEʻA KUO TUKU KIATE KOE”
ʻOku fakahinohinoʻi ʻe Paula ʻa Tīmote ke ne “fai ʻa e tau lelei” ʻo “puke maʻu ʻa e tui, kaeʻumaʻā ʻa e konisenisi ʻataʻatā.” ʻOku hiki fakahokohoko ʻe he ʻapositoló ʻa e ngaahi tuʻunga taau ke aʻusia ʻe he kau tangata kuo fakanofo ʻi he fakatahaʻangá. ʻOku toe fakahinohinoʻi foki ʻe Paula ʻa Tīmote ke ‘fakafisi mei he ngaahi talatupuʻa’ ʻa ia ʻokú ne maumauʻi ʻa e meʻa ʻoku māʻoniʻoní.—1 Tim. 1:18, 19; 3:1-10, 12, 13; 4:7.
“ʻOua naʻa haʻaki valokiʻi ha motuʻa,” ko e tohi ia ʻe Paulá. ʻOkú ne ekinaki kia Tīmote: “Ke ke leʻohi ʻa e meʻa kuo tuku kiate koe, ʻo ke fulituʻa ki he ngaahi koto lau fakaetangata pe, mo e ngaahi fakakikihi ʻa e meʻa na ʻoku lau ko e ʻIlo-loloto, ka ko e lauhala.”—1 Tim. 5:1; 6:20.
Tali ki he Ngaahi Fehuʻi Fakatohitapú:
1:18; 4:14—Ko e hā ʻa e ngaahi “palofisai” naʻe talaki fekauʻaki mo Tīmoté? Ko e ngaahi kikite nai ia ʻo fekauʻaki mo e ngafa ʻo Tīmote ki he kahaʻú ʻi he fakatahaʻanga Kalisitiané, naʻe talaki ʻi hono fakamānavaʻi ʻa Paula ʻi heʻene ʻaʻahi ki Līsita lolotonga ʻa ʻene fononga fakamisinale hono uá. (Ng. 16:1, 2) Makatuʻunga ʻi he ngaahi “palofisai” ko ʻení, naʻe fai ʻa e “hilifaki nima” ki he talavou ko Tīmoté ʻe he kau tangata matuʻotuʻa ʻi he fakatahaʻangá, ʻo fakanofo ia ki he ngāue makehe.
2:15—ʻOku anga-fēfē hono maʻu ʻe ha fefine ʻa e “hala ki he moʻui” ʻo fakafou ʻi he maʻu “fānau”? Ko e maʻu fānaú, tokangaʻi ʻo e fānaú mo hono tokangaʻi ʻo ha fāmili ʻe lava ke ne ʻoange ki ha fefine ʻa e “moʻui” ʻo hao ai mei he hoko ko ha tokotaha ʻoku moʻumoʻua ʻi he “faʻa lau, mo kaunoa” ʻi he ngaahi meʻa ʻa e kakai kehé.—1 Tim. 5:11-15.
3:16—Ko e hā ʻa e fakapulipuli toputapu ʻo e anga-līʻoa fakaʻotuá? Pe ʻoku malava ʻe he faʻahinga ʻo e tangatá ʻa e talangofua haohaoa ki he tuʻunga-hau ʻo Sihová pe ʻikai, naʻe misiteli ia ʻi he laui taʻu. Naʻe ʻomi ʻe Sīsū ʻa e talí ʻaki ʻene tauhi maʻu ʻa e anga-tonu haohaoa ki he ʻOtuá ʻo aʻu ki heʻene mate.
6:15, 16—ʻOku ʻuhinga ʻa e ngaahi lea ko ʻení kia Sihova ko e ʻOtuá pe kia Sīsū Kalaisi? Ko e ngaahi lea ko ʻení ʻoku ʻuhinga ia ki he tokotaha ʻoku fakamatalaʻi ʻe fakahā maí, ʻa ia, ko Sīsū Kalaisi. (1 Tim. 6:14) ʻI hono fakahoa ki he faʻahinga ʻo e tangatá ʻa ia ʻoku nau pule ko e ngaahi tuʻi pe ko e ngaahi ʻeikí, ko Sīsū pē ʻa e “Pule,” pea ko ia tokotaha pē ʻokú ne maʻu ʻa e taʻefaʻamaté. (Tan. 7:14; Loma 6:9) Talu mei heʻene hāʻele hake ki he langi taʻehāmaí, ʻoku ʻikai ha tangata ʻi he māmaní ʻe “lava ke sio” kiate ia ʻaki ʻa e mata fakamatelié.
Ngaahi Lēsoni kia Kitautolu:
4:15. Tatau ai pē pe kuo tau hoko ko ha Kalisitiane ki muí ni mai pe ʻi ha taimi fuoloa, ʻoku totonu ke tau feinga ke fakalakalaka pea hokohoko atu ʻa e laka ki muʻa fakalaumālié.
6:2. Kapau ʻoku tau ngāue ki ha pule ngāue ko ha kaungātui, ʻi he ʻikai ke ngāuehalaʻaki ia ʻi ha faʻahinga foungá, ʻoku totonu ke tau toe ngāue vēkeveke ange kiate ia ʻi haʻatau mei ngāue ki ha tokotaha ʻi tuʻa ʻi he fakatahaʻangá.
“MALANGAʻAKI ʻA E FOLOFOLA” PEA FAI FAKAVAVEVAVE
Ke teuʻi ʻa Tīmote ki he ngaahi taimi faingataʻa ʻoku tuʻu mei muʻá, ʻoku tohi ʻa Paula: “Ko e Laumalie naʻe foaki ʻe he ʻOtua kiate kitaua, naʻe ʻikai ko e Laumalie angafoʻi, ka ko e angamalohi, mo ʻofa, mo valoki.” ʻOku faleʻi ʻa Tīmote: “Ko e tamaioʻeiki ʻa e ʻEiki ʻoku ʻikai tāu ke ne fakakikihi, kaekehe ke ne angalelei ki he kakai kotoa pe, ke ne poto ʻi he faiako.”—2 Tim. 1:7; 2:24.
“Ke ke nofo ʻi he ngaahi meʻa naʻa ke ako ai, ʻa ia naʻe fakamahino atu,” ko e ekinaki ia ʻa Paula kia Tīmoté. Naʻe mafola holo ʻa e ngaahi akonaki ʻo e tafoki mei he moʻoní, ko ia ʻoku akonaki ai ʻa e ʻapositoló ki he ʻovasia kei talavoú: “Malangaʻaki ʻa e folofola [“pea fai fakavavevave,” NW] . . . , fakaʻilo hala, valoki, enginaki.”—2 Tim. 3:14; 4:2.
Tali ki he Ngaahi Fehuʻi Fakatohitapú:
1:13—Ko e hā ʻa e ‘anga ʻo e ngaahi lea moʻuí’? Ko e “ngaahi lea moʻui” ʻa e ngaahi folofola “ʻa hotau ʻEiki ko Sisu Kalaisi”—ʻa e ngaahi akonaki faka-Kalisitiane moʻoní. (1 Tim. 6:3) Ko e meʻa naʻe akoʻaki mo fai ʻe Sīsuú naʻe fehoanaki ia mo e Folofola ʻa e ʻOtuá, ko ia ko e kupuʻi lea “ngaahi lea moʻui” ʻe toe lava pē ʻi heʻene tuʻu fakalūkufuá ke ʻuhinga ki he ngaahi akonaki kotoa ʻi he Tohi Tapú. Ko e ngaahi akonakí ni ʻoku lava ke tokoniʻi ai kitautolu ke tau sio ki he meʻa ʻoku fiemaʻu ʻe Sihova meiate kitautolú. ʻOku tau hanganaki piki ki he anga ko ʻení ʻaki hono fai ʻa e meʻa kuo tau ako mei he Tohi Tapú.
4:13—Ko e hā ʻa e “ngaahi tohi kiliʻimanu”? Ko e kupuʻi lea “ngaahi tohi kiliʻimanu” ʻoku ʻuhinga iá ki ha tohi naʻe ngaohiʻaki ʻa e letá. ʻE lava pē ke pehē naʻe kole ʻa Paula ki ha ngaahi takainga tohi ʻo e Ngaahi Konga Tohi Tapu Faka-Hepeluú koeʻuhi ke ne lava ʻo ako ia lolotonga hono tuku pilīsone ia ʻi Lomá. Mahalo pē ko e niʻihi ʻo e ngaahi takainga tohí naʻe ngaohi mei he pepailó pea ko e ngaahi takainga kehé naʻe ngaohi mei he kiliʻimanú.
Ngaahi Lēsoni kia Kitautolu:
1:5; 3:15. Ko e ʻuhinga tefito naʻe tui ai ʻa Tīmote kia Kalaisi Sīsuú, ʻa ia, ko e tui ia naʻá ne tākiekina ʻa e meʻa kotoa naʻe fai ʻe Tīmoté, ko e akonekina Fakatohitapu naʻá ne maʻu ʻi ʻapi talu mei heʻene kei valevalé. He mātuʻaki mahuʻinga ē ki he ngaahi mēmipa ʻi he fāmilí ke fakakaukau fakamātoato fekauʻaki mo e founga ʻoku nau fakakakato ai ʻa e fatongia ko ʻeni ki he ʻOtuá pea ki heʻenau fānaú!
1:16-18. ʻI he taimi ʻoku tofanga ai hotau kaungātuí ʻi ha ngaahi ʻahiʻahí, fehangahangai mo e fakatangá, pe tuku pilīsone kinautolú, tau lotu muʻa maʻanautolu pea fai ʻa e meʻa kotoa te tau malavá ke tokoniʻi kinautolu.—Pal. 3:27; 1 Tes. 5:25.
2:22. Ko e kau Kalisitiané, tautefito ki he fānaú, ʻoku totonu ke ʻoua te nau femoʻuekina pē ʻi he fakamālohisino hikihikí, sipotí, tā fasí, fakafiefiá, ngaahi meʻa ʻoku nau manako hono faí, folaú, ngaahi talanoa noaʻiá pea mo e ngaahi alā meʻa peheé, ʻo siʻi ai honau taimi ki he ngaahi meʻa fakalaumālié.
[Fakatātā ʻi he peesi 31]
Ko fē ʻi he ngaahi faitohi fakamānavaʻí naʻe fai fakamuimui taha ʻe he ʻapositolo ko Paulá?