Faʻifaʻitaki kia Sīsū​—Fai ʻa e Lotu ʻOku Fakahōifua ki he ʻOtuá

ʻOku fakaafeʻi anga-ʻofa ʻe he ʻOtuá ʻa e kakai “mei he puleʻanga kotoa pē, mo e ngaahi matakali, mo e ngaahi faʻahinga, mo e ngaahi lea” ke lotu ange kiate ia. (Fkh. 7:9, 10; 15:3, 4) Ko e faʻahinga ʻoku nau tali ʻa e fakaafe ko ení ʻoku malava ke nau “siofi ʻa e fakaʻofoʻofa ʻo e ʻEiki.” (Sāme 27:4; 90:17) ʻI he hangē ko e tokotaha-tohi-sāmé, ʻoku nau hiki hake honau leʻó ʻi he fakahīkihiki ki he ʻOtuá, ʻo pehē: “Ke tau hu mo punou; tau tuʻulutui ʻi he ʻao ʻo Sihova ne ne ngaohi kitautolu.”—Sāme 95:6.

Lotu Ne Mahuʻinga Lahi

Koeʻuhi ko Sīsū ko e ʻAlo tofu-pē-taha-ne-fakatupu ia ʻo e ʻOtuá, naʻá ne maʻu ʻa e faingamālie feʻunga ke ako ai ʻa e fakakaukau, ngaahi tefitoʻi moʻoni mo e ngaahi tuʻunga ʻa ʻene Tamaí. Ko ia, naʻe malava ai ʻe Sīsū ʻi he tuipau ke ne fakahinohino ʻa e founga ki he lotu moʻoní. Naʻá ne pehē: “Ko au pe ko e Hala, pea mo e Moʻoni mo e Moʻui: ʻoku ʻikai haʻu ha taha ki he Tamai ka ʻi heʻene fou ʻiate au.”—Sione 1:14; 14:6.

Naʻe fokotuʻu ʻe Sīsū ʻa e faʻifaʻitakiʻanga haohaoa ʻo e moʻulaloa anga-fakatōkilalo ki heʻene Tamaí. Naʻá ne pehē: “[ʻOku] ʻikai te u momoʻi fai ha meʻa ʻiate au; kae hange tofu pē hoku ako ʻe he Tamai, ʻoku pehē ʻeku tala ʻa e ngaahi meʻa ko eni.” Naʻá ne tānaki mai ai: “ʻOku ou fai maʻuaipē ʻa e ngaahi meʻa ʻoku ne hōhōʻia ai.” (Sione 8:28, 29) Ko e hā ʻa e ngaahi founga naʻe fakahōhōʻiaʻi ai ʻe Sīsū ʻa ʻene Tamaí?

Ko e founga ʻe taha, naʻe līʻoa kakato ʻa Sīsū ki heʻene Tamaí, pea ko e uho ia ʻo e lotu ki he ʻOtuá.  Naʻe hā ʻia Sīsū ʻa ʻene pīkitai ki heʻene Tamaí ʻi heʻene talangofua kiate Ia, fai ʻa Hono finangaló, ʻo aʻu ki he taimi naʻá ne hokosia ai ha faingataʻaʻia lahi fakafoʻituitui. (Fili. 2:7, 8) Ko ha konga mahuʻinga ʻo e lotu ʻa Sīsuú ko ʻene kau maʻu pē ʻi he ngāue ngaohi ākongá, ʻo aʻu ki he tuʻunga naʻe ui ai ia ko e Faiako fakatouʻosi ʻe he kau tui mo e kau taʻetui. (Mt. 22:23, 24; Sione 3:2) ʻIkai ngata aí, naʻe ngāue ʻa Sīsū ki hono tokoniʻi ʻa e niʻihi kehé. Ko e laumālie feilaulauʻi-kita naʻá ne maʻú, naʻe siʻi ai ʻa e taimi ne toe fakafoʻituitui maʻaná, ka naʻá ne fiefia ke ngāue fakasevāniti maʻá e niʻihi kehé. (Mt. 14:13, 14; 20:28) Neongo ʻene moʻuá, naʻe ʻai maʻu pē ʻe Sīsū ke ʻi ai ʻa e taimi ke ne lea ai ʻi he lotu ki heʻene Tamai fakahēvaní. (Luke 6:12) Hono mahuʻinga moʻoni ki he ʻOtuá ʻa e lotu ʻa Sīsuú!

Ko e Fāinga ke Fakahōifuaʻi ʻa e ʻOtuá

Naʻe ʻafioʻi ʻe Sihova ʻa e tōʻonga ʻa hono ʻAló peá ne fakahaaʻi ʻa ʻEne hōifuá. (Mt. 17:5) Kae kehe, naʻe toe fakatokangaʻi foki ʻe Sētane ko e Tēvoló ʻa e moʻui faitōnunga ʻa Sīsuú. Ko ia, naʻe hoko ai ʻa Sīsū ko e tāketi makehe ʻa Sētane. Ko e hā hono ʻuhingá? Koeʻuhi he naʻe teʻeki ai ha tangata kuó ne tauhi maʻu ʻene talangofua kakato ki he ʻOtuá, ʻo lotu fakaʻaufuli kiate ia. Pea naʻe loto ʻa e Tēvoló ke taʻofi ʻa Sīsū mei hono fai ʻa e lotu naʻe tuha totonu mo Sihová.—Fkh. 4:11.

ʻI he feinga ke fakameleʻi ʻa Sīsuú, naʻe fakaofiofi atu ʻa Sētane kiate ia mo ha tuʻuaki fakatauele. Naʻá ne ʻave ʻa Sīsū ki ha “moʻunga naʻe maʻolunga ʻaupito, ʻo ne fakaʻaliʻali ki ai ʻa e ngāhi puleʻanga kotoa pe ʻo mamani mo honau nāunau.” Naʻá ne pehē ange leva: “Koe ngāhi meʻa ni kotoa pe te u ʻatu moʻou, ʻo kapau te ke fakatomapeʻe ʻo lotu kiate au.” Naʻe fēfē ʻa e fakafeangai ʻa Sīsuú? Naʻá ne pehē: “Setane, fei mo ʻalu! he kuo tohi, Ko e ʻEiki ko ho ʻOtua te ke lotu ki ai, pea ko ia pe toko taha te ke ʻotuaʻaki.” (Mt. 4:8-10) ʻIo, naʻe ʻiloʻi ʻe Sīsū ko ha tōʻonga tauhi ʻaitoli ia ke punou kia Sētane neongo pe ko e hā ha lelei ʻe ngali maʻu ai. Naʻe ʻikai te ne loto ke fai naʻa mo ha tōʻonga lotu pē ʻe taha ki ha toe tokotaha kehe meia Sihova.

ʻI hotau tuʻungá, ʻe ʻikai nai ke tuʻuaki mai ʻe Sētane ia ʻa e ngaahi puleʻanga kotoa ʻo e māmaní mo honau nāunaú ke fakafetongiʻaki ʻa ʻetau lotú. Ka ʻokú ne kei feinga pē ke veuki ʻa e lotu ʻoku fai ʻe he kau Kalisitiane loto-moʻoní ki he ʻOtuá. ʻOku fiemaʻu ʻe he Tēvoló ke tau lotu ki ha tokotaha kehe pe ki ha toe faʻahinga meʻa kehe.—2 Kol. 4:4.

Naʻe faitōnunga ʻa Kalaisi Sīsū ʻo aʻu ki heʻene pekia. ʻI he tauhi maʻu ʻe Sīsū ʻa ʻene anga-tonu ki he ʻOtuá, naʻá ne fakalāngilangiʻi ai ʻa Sihova ʻi ha founga naʻe ʻikai lava ʻe ha tangata kehe. ʻI he tuʻunga ko e kau Kalisitiane moʻoni ʻi he ʻaho ní, ʻoku tau feinga ke muimui ʻi he ʻalunga ʻo e moʻui faitōnunga ʻa Sīsuú ʻaki ʻetau ʻai ke muʻomuʻa ʻa ʻetau lotu ki he Tokotaha-Fakatupú ʻi ha toe meʻa. Ko e moʻoni, ko ha vahaʻangatae lelei mo e ʻOtuá ʻa ʻetau koloa mahuʻinga tahá.

Ngaahi Tāpuaki mei Hono Fai ʻa e Lotu ʻOku Fakahōifuá

Ko hono pouaki “ʻa e toʻonga lotu ʻoku maʻa mo taʻe hano ʻuli” ʻi he ʻafio ʻa e ʻOtuá ʻokú ne  ʻomai ʻa e ngaahi tāpuaki lahi. (Sem. 1:27) Ko e fakatātaá, ʻoku tau moʻui ʻi ha taimi ʻa ia ʻoku fakautuutu ai ʻa e kakai ʻoku nau ‘ʻofa kiate kinautolu pe, ʻofa ki he paʻangá, fielahi,’ mo “taeʻofa ki he lelei.” (2 Tim. 3:1-5) Kae kehe ʻi he fale ʻo e ʻOtuá, ʻoku tau maʻu ai ʻa e monū ʻo e feohi mo e kakai lelei mo maʻa ʻa ia ʻoku nau feinga ke pouaki ʻa e ngaahi tuʻunga ʻa e ʻOtuá ki he lotu kiate iá. ʻIkai nai ko ha maʻuʻanga fakaivifoʻou ia?

ʻI he ʻikai ʻuliʻi ʻe he māmani ko ení, ʻoku tau toe maʻu ʻa e tāpuaki ʻo ha konisēnisi maʻa. ʻOku tau loto ke tauhi maʻu ha konisēnisi maʻa ʻaki ʻa e fakamoʻulaloa ki he ngaahi tefitoʻi moʻoni māʻoniʻoni ʻa e ʻOtuá pea ʻi he talangofua ki he ngaahi lao ʻa Sisa ʻa ia ʻoku ʻikai ke fepaki mo e ngaahi lao ʻa e ʻOtuá.—Mk. 12:17; Ng. 5:27-29.

Ko e lotu ʻaufuatoó ʻokú ne ʻomai ʻa e toe faʻahinga tāpuaki kehe. ʻI heʻetau tokangataha ki hono fai ʻa e finangalo ʻo e ʻOtuá kae ʻikai ko ʻetau fiemaʻú, ʻoku hoko ai ʻetau moʻuí ʻo mohu taumuʻa mo fakafiemālie. ʻI he ʻikai ke pehē: “Tau kai mo inu e, he ʻoku apongipongi ʻetau mate,” ʻoku tau maʻu ʻa e ʻamanaki falalaʻanga ʻo e moʻui taʻengata ʻi ha palataisi ʻi he māmaní.—1 Kol. 15:32.

Ko e tohi Fakahaá ʻoku tuhu ai ki ha taimi ʻa ia ko e faʻahinga ʻoku nau tauhi maʻu ha tuʻunga maʻa ʻi he ʻao ʻo Sihová te nau “haʻu mei he mamahi lahi.” ʻOku pehē ʻe he fakamatalá “ko Ia ʻoku ne ʻafio ʻi he taloni te ne folahi ʻa e tapanekale ʻo hono Sikaina ʻiate kinautolu.” (Fkh. 7:13-15) Ko e tokotaha ko ia ʻoku ʻafio ʻi he taloní ʻoku ʻikai ko ha toe tokotaha kehe ka ko Sihova ko e ʻOtuá, ʻa e Tokotaha lāngilangiʻia taha ʻi he ʻunivēsí. Feinga ke sioloto atu ki he tuʻunga fakafiefia ʻe hokó ʻi heʻene talitali lelei koe ko ha tokotaha ʻaʻahi ki hono tēnití, ʻo ne tokangaʻi koe ʻaki ʻene maluʻí ke ʻoua naʻa hoko ha fakatuʻutāmaki kiate koe! Pea ʻoku malava naʻa mo e taimí ni ke tau maʻu ʻi ha tuʻunga ʻa ʻene maluʻí mo e tokangá.

ʻIkai ngata aí, ʻoku fakamatalaʻi ʻa e faʻahinga kotoa ʻoku nau fai ʻa e lotu fakahōifua ki he ʻOtuá ʻoku tataki kinautolu ki he “gaahi matavai moui.” ʻOku fakafofongaʻi ʻe he ngaahi matavai fakaivifoʻou ko ení ʻa e ngaahi tokonaki kotoa ʻoku fai ʻe Sihova ke tau maʻu ai ʻa e moʻui taʻengatá. ʻIo, fakafou ʻi he huhuʻi ʻa Kalaisí, “e holoholo e he Otua ae loimata kotoabe mei ho nau mata.” (Fkh. 7:17, PM) ʻE ʻohake ʻa e faʻahinga ʻo e tangatá ki he haohaoa, ʻo ne ʻomai ʻa e fiefia taʻehanotatau ki he faʻahinga ʻoku nau maʻu ʻa e ʻamanaki ʻo e moʻui taʻengata ʻi he māmaní. Naʻa mo e lolotongá ni, ʻoku hiki mavava ʻa e kau lotu fiefia ʻa e ʻOtuá, ʻo fakahaaʻi ʻa ʻenau houngaʻia loto-moʻoni kia Sihová pea mo ʻenau lotu kiate ia fakataha mo e faʻahinga ʻi hēvani ʻoku nau hiva: “ʻOku lahi mo fakaofo hoʻo ngāue, ʻa e ʻAfiona ko e ʻOtua Aoniu; ʻoku totonu mo moʻoni ho ngaahi ʻalunga, ʻa koe ko e Tuʻi ʻo e ngaahi Kuonga. Ko hai ʻe ʻikai ʻapasia ki he ʻAfiona, mo fakahikihikiʻi ho huafa? He ko koe toko taha ʻoku maʻoniʻoni: Pea ʻe haʻu kotoa pē ʻa e ngaahi kakai, ʻo punou ʻi ho ʻao; koeʻuhi kuo fakaeʻa hoʻo maʻoniʻoni.”—Fkh. 15:3, 4.

[Fakatātā ʻi he peesi 27]

Ko e hā ʻoku tuʻuaki mai ʻe Sētane ke fakafetongiʻaki ʻetau lotú?