ʻOku Moʻui ʻa e Folofola ʻa Sihová

Ngaahi Meʻa Mahuʻinga mei he Tohi ʻe Ua ki he Kau Kolinitoó

ʻOKU tokanga lahi ʻa Paula fekauʻaki mo e lelei fakalaumālie ʻa e fakatahaʻanga ʻi Kolinitoó. Kuó ne fanongo ʻoku ʻi ai ʻa e ngaahi felotokehekeheʻaki ʻi he lotolotonga ʻo e fanga tokoua ʻi aí. ʻOku fakamolemoleʻi pē ai ʻa e ʻulungāanga taʻetāú. Kuo toe tohi foki mo e fakatahaʻangá kia Paula, ʻo ʻeke kiate ia ha ngaahi meʻa. Ko ia ʻi he 55 T.S. nai, ʻi heʻene ʻi ʻEfesō lolotonga ʻa ʻene fononga fakamisinale hono tolú, ʻoku hiki ai ʻe Paula ʻa e ʻuluaki tohi ʻo ʻene tohi ʻe ua ki he kau Kolinitoó.

Ko e tohi hono uá, ʻoku ngalingali naʻe hiki ia ʻi ha ngaahi māhina siʻi pē mei he ʻuluaki tohí, ʻa ia ko e hoko atu pē ia ʻo e tohi ko iá. Koeʻuhi ko e meimei tatau ʻi he ngaahi tafaʻaki lahi ʻa e ngaahi tuʻunga ʻi loto mo tuʻa ʻi he fakatahaʻanga ʻi Kolinitō ʻo e ʻuluaki senitulí pea mo hotau taimí, ko e pōpoaki ʻo e tohi ʻe ua ʻa Paula ki he kau Kolinitoó ʻoku mahuʻinga lahi ia kiate kitautolu.—Hep. 4:12.

‘MOU LEO, TUU MAU, MOU MALOHI’

(1 Kol. 1:1–16:24)

“Ke mou lea taha [pe uouangataha] pe kotoa,” ko e ekinaki ia ʻa Paulá. (1 Kol. 1:10) ʻOku ʻikai ha toe ‘tuʻunga kehe, ka ko Sisu Kalaisi,’ ʻa ia ʻoku langa ai ʻa e ngaahi ʻulungāanga faka-Kalisitiané. (1 Kol. 3:11-13) ʻI he fekauʻaki mo ha tokotaha feʻauaki ʻi he fakatahaʻangá, ʻoku pehē ʻe Paula: “Kapusi ʻa e tangata fai kovi meiate kimoutolu.” (1 Kol. 5:13) “Ko e sino ʻoku ʻikai maʻa e feʻauaki,” ko ʻene leá ia, “ka ʻoku maʻa e ʻEiki.”—1 Kol. 6:13.

ʻI he tali ki he “ngaahi meʻa naʻa [nau] tohi,” ʻoku ʻoange ʻe Paula ʻa e akonaki ʻaonga fekauʻaki mo e nofo malí mo e nofo taʻemalí. (1 Kol. 7:1) Hili ʻene fakamatala ki he tuʻunga-ʻulu faka-Kalisitiané, ki he fokotuʻutuʻu maau ʻi he ngaahi fakataha faka-Kalisitiané mo e papau ko ia ʻa e toetuʻú, ʻoku ʻoange ʻe Paula ʻa e ekinaki: “Mou leo, tuu mau i he tui, fai o gali moe tagata, mou malohi.”—1 Kol. 16:13, PM.

Tali ki he Ngaahi Fehuʻi Fakatohitapú:

1:21—ʻOku ngāueʻaki moʻoni ʻe Sihova ʻa e “vale” ke fakahaofi ʻaki ʻa e faʻahinga ʻoku tuí? ʻIkai, ʻoku ʻikai te ne ngāueʻaki ia. Kae kehe, koeʻuhi “naʻe ʻikai laveʻi ʻa e ʻOtua ʻe mamani ʻaki ʻenau poto,” ko e meʻa ʻokú ne ngāueʻaki ke fakahaofi ʻaki ʻa e kakaí ʻoku hā ia ki he māmaní ko e vale.—Sione 17:25.

5:5—ʻOku ʻuhinga ki he hā ʻa e “tukuange ʻa e tokotaha [koví] kia Setane; koeʻuhi ke fakaʻauha hono anga kakano, heiʻilo ʻe haofaki hono anga laumalie”? ʻI he taimi ʻoku tuʻusi ai mei he fakatahaʻangá ha tokotaha taʻefakatomala naʻá ne fai ha angahala mamafa, ʻokú ne toe hoko ai ko ha konga ʻo e māmani fulikivanu ʻa Sētané. (1 Sione 5:19) Ko ia ai, ʻoku fakamatala ai ko e tokotaha ko iá ʻoku tukuange ia kia Sētane. Ko hono kapusi  ʻa e tokotahá ʻoku iku ai ki he fakaʻauha, pe ko e fakamavaheʻi ʻo e tākiekina fakatupu maumaú mei he fakatahaʻangá pea mo hono fakatolonga ʻa e laumālie pe mālohinga ʻo e fakatahaʻangá.—2 Tim. 4:22.

7:33, 34—Ko e hā ʻoku ʻuhinga ki ai ʻa e “meʻa ʻo mamani” ʻa ia ʻoku loto-moʻua ki ai ha tangata pe ko ha fefine ʻosi mali? ʻOku ʻuhinga ʻa Paulá ki he ngaahi meʻa anga-maheni ʻi he moʻuí ʻa ia ʻoku fiemaʻu ke tokanga ki ai ʻa e kau Kalisitiane ʻosi malí. ʻOku kau ki heni ʻa e meʻakai, vala, mo e nofoʻanga, ka ʻoku ʻikai kau ki ai ʻa e ngaahi meʻa ʻoku kovi ʻo e māmani ko ʻení, ʻa ē ʻoku fakaʻehiʻehi mei ai ʻa e Kalisitiané.—1 Sione 2:15-17.

11:26 (Ko e Taulua)—ʻOku totonu ke fakamanatu “maʻu pē” ʻa e pekia ʻa Sīsuú ʻo tuʻo fiha, pea ʻe fai ia “kaeʻoua” ke aʻu ki he taimi fē? Naʻe ʻikai ke ʻuhinga ʻa Paulá ʻe fakamanatu hokohoko maʻu pē ʻa e pekia ʻa Sīsuú. Ko e foʻi lea faka-Kalisi naʻe ngāueʻaki ki he “maʻu pē” ʻoku ʻuhingá ko e “ʻi he taimi pē” pe “ʻi he taimi kotoa pē ʻoku.” Ko ia ai, naʻe ʻuhinga ʻa Paulá ko e taimi kotoa pē ʻoku kai mo inu ai ʻa e kau Kalisitiane paní ʻa e maá mo e uainé ʻi he Fakamanatú, ʻa ia ko e tuʻo taha ʻi he taʻu ʻi Nīsani 14, ʻoku nau ‘fanongonongo ai ʻa e pekia ʻa e ʻEikí.’ ʻOku nau fai ʻeni “kaeʻoua kuó ne liuaki mai,” ʻa ia, ko ʻene talitali ia kinautolu ki hēvani ʻi he toetuʻú.—1 Tes. 4:14-17.

13:13—ʻI he founga fē ʻoku tuʻu-ki-muʻa ai ʻa e ʻofá ʻi he tuí mo e ʻamanakí? ʻI he taimi ʻoku hoko moʻoni ai ʻa e “ngaahi meʻa ʻoku ʻamanekina” pea ʻi he hoko ʻa e “fakasino” ʻo e ngaahi meʻa ko iá, ko ʻene ngata leva ia ʻa e tuí mo e ʻamanakí. (Hep. 11:1) ʻOku tuʻu-ki-muʻa ʻa e ʻofá ʻi he tuí mo e ʻamanakí he ʻoku nofo maʻu ia ʻo taʻengata.

15:29—ʻOku ʻuhinga ki he hā ʻa e “papitaiso maʻa e pekia”? Naʻe ʻikai ke ʻuhinga ʻa Paula ia ʻe papitaiso ʻa e kakai ʻoku moʻuí maʻa e faʻahinga naʻe mate teʻeki ai papitaisó. ʻOku ʻuhinga heni ʻa Paula fekauʻaki mo e hū ʻa e kau Kalisitiane pani ʻe he laumālié ki ha ʻalunga moʻui ʻa ia ʻoku nau tauhi ai ʻenau anga-tonú ʻo aʻu ki heʻenau mate pea hoko atu ai ki he toetuʻu ki he moʻui laumālié.

Ngaahi Lēsoni kia Kitautolu:

1:26-31; 3:3-9; 4:7. Ko e pōlepole anga-fakatōkilalo ʻia Sihova kae ʻikai ʻiate kitautolú, ʻoku pouaki ai ʻa e fāʻūtahá ʻi he fakatahaʻangá.

2:3-5. Lolotonga ʻene faifakamoʻoni ʻi Kolinitō, ko ha senitā ʻo e filōsofia mo e ako faka-Kalisí, naʻe hohaʻa nai ai ʻa Paula pe te ne malava ke fakatuipauʻi ʻene kau fanongó. Kae kehe, naʻe ʻikai te ne fakaʻatā ha faʻahinga vaivaiʻanga pe manavahē naʻá ne maʻu nai ke ne fakahohaʻasi ʻa ʻene fakahoko ʻa e ngāue fakafaifekau naʻe vaheʻi ange ʻe he ʻOtuá. ʻI he tuʻunga meimei tatau, ʻoku totonu ke ʻoua te tau fakangofua ha ngaahi tuʻunga kehe ke ne taʻofi kitautolu mei hono talaki ʻa e ongoongo lelei ʻo e Puleʻanga ʻo e ʻOtuá. ʻE lava ke tau hanga loto-papau ki he tokoni ʻa Sihová ʻo hangē ko ia ko Paulá.

2:16. Ke maʻu ʻa e “finangalo ʻo Kalaisi” kuo pau ke ʻiloʻi ʻa e anga ʻo ʻene fakakaukaú, ke fakakaukau tatau mo ia, ke mahinoʻi kakato ʻa hono ʻulungāangá, pea ke faʻifaʻitaki ki heʻene faʻifaʻitakiʻangá. (1 Pita 2:21; 4:1) He mahuʻinga ē ke tau ako fakalelei ʻa e moʻui mo e ngāue fakafaifekau ʻa Sīsuú!

3:10-15; 4:17. ʻOku totonu ke tau sivisiviʻi pea fakaleleiʻi ʻa ʻetau malava ke faiako mo ngaohi ākongá. (Mt. 28:19, 20) Kapau ʻe ʻikai lelei ʻetau faiakó, ʻe ʻikai nai ke lavaʻi ʻe heʻetau tokotaha akó ʻa e ngaahi ʻahiʻahi ʻo e tuí, pea te tau tofanga nai ai ʻi ha mole ʻoku mātuʻaki fakamamahi ʻo hoko ai ʻa e fakamoʻuí kiate kitautolu ʻo “hange ha hao mei he loto afi.”

6:18. Ke ‘hola mei he fai feʻauakí’ ʻoku ʻikai ke ngata pē ʻi he fiemaʻu ke fakaʻehiʻehi mei he ngaahi tōʻonga ʻo e por·neiʹa kae toe pehē foki ki he ʻata fakalieliá, taʻemaʻa fakaeʻulungāangá, ʻunaloto fakalieliá, fakamalingá—mo ha meʻa pē ʻoku lava ke iku atu ki he feʻauakí.—Mt. 5:28; Sem. 3:17.

7:29. ʻOku totonu ke tokanga ʻa e ngaahi hoa malí ke ʻoua te nau fuʻu nōfoʻi pē kiate kinautolu ʻo hoko ai ʻa e ngaahi meʻa ʻo e Puleʻangá ko e meʻa fika ua ia ʻi heʻenau moʻuí.

10:8-11. Naʻe houhau lahi ʻa Sihova ʻi he taimi naʻe lāunga tuʻu ai ʻa e kau ʻIsilelí kia Mōsese mo ʻĒloné. ʻOku fakapotopoto ke tau fakaʻehiʻehi mei hono fakatupulekina ʻa hono tōʻongaʻaki ʻa e lāungá.

 16:2. Ko ʻetau foaki fakapaʻanga ke laka ki muʻa ai ʻa e ngaahi meʻa ʻo e Puleʻangá ʻe fai hokohoko ia kapau ʻoku tomuʻa palaniʻi pea fokotuʻutuʻu lelei.

‘MOU FEʻUNUʻAKI AI PĒ’

(2 Kol. 1:1–13:13 [13:14, PM])

ʻOku tala ange ʻe Paula ki he kau Kolinitoó ʻoku totonu ke nau ‘fakamolemole mo fakafiemalie’ ha tokotaha faihala kuo fakatomala ʻa ia naʻe valokiʻi. Neongo naʻe fakalotomamahiʻi kinautolu ʻe heʻene ʻuluaki tohí, ʻoku fiefia ʻa Paula koeʻuhi naʻa nau ‘mamahi ʻo nau fakatomala.’—2 Kol. 2:6, 7; 7:8, 9.

‘Hange ko ʻenau hulu atu ʻi he meʻa kotoa peé,’ ʻoku fakalototoʻaʻi ʻe Paula ʻa e kau Kolinitoó ke nau “hulu atu” ʻi he foakí. Hili ʻene tali ki he kau fakafepakí, ʻokú ne ʻomai ʻa e akonaki fakaʻosi ki he tokotaha kotoa: “Mou fiefia pe, mou fakamaʻopoʻopo [pe feʻunuʻaki] kimoutolu, tali ʻeku fakafiemalie, mou loto taha, mou nonofo melino.”—2 Kol. 8:7; 13:11.

Tali ki he Ngaahi Fehuʻi Fakatohitapú:

2:15, 16—ʻOku anga-fēfē ʻetau hoko ko e ‘ngangatu ʻo Kalaisí’? ʻOku hoko ʻení koeʻuhi ʻoku tau pipiki ki he Tohi Tapú mo kau ʻi hono talaki ʻa e pōpoaki ʻi aí. Lolotonga ko e “ngangatu” ko iá ʻe namukū ia ki he faʻahinga tāutaha taʻemāʻoniʻoní, ʻoku namu-lelei ia kia Sihova pea ki he faʻahinga loto-totonú.

5:16—ʻOku anga-fēfē ʻa e ‘ʻikai ʻilo ha taha fakaetangata’ ʻe he kau Kalisitiane paní? ʻOku ʻikai ke nau vakai ki he kakaí ʻi he founga fakaetangatá, ʻo fakahāhā ʻa e filifilimānako ʻo fakatuʻunga ʻi he koloá, matakalí pe faʻahingá pe fonua tupuʻangá. Ko e meʻa ʻoku mahuʻinga kiate kinautolú ko honau vahaʻangatae fakalaumālie mo e ngaahi kaungātuí.

11:1, 16; 12:11—Naʻe sesele ʻa Paula ʻi heʻene feangai mo e kau Kolinitoó? ʻIkai, naʻe ʻikai te ne pehē. Kae kehe, naʻe hā ngali nai ki he niʻihi naʻá ne pōlepole mo sesele koeʻuhi ko e meʻa naʻe ueʻi ia ke ne leaʻakí ʻi he taukapoʻi ʻa hono tuʻunga ʻapositoló.

12:1-4—Ko hai naʻe ‘punakaki ki Palataisí’? Koeʻuhi ʻoku ʻikai ha lave ʻa e Tohi Tapú ki ha toe tokotaha kehe naʻá ne maʻu ha vīsone pehē pea ʻoku hiki ʻa e konga tohí ʻo hoko atu ʻi he taukapoʻi ʻe Paula ʻa hono tuʻunga ʻapositoló, ʻoku pau pē ko ʻene fakamatala ʻaʻana ki haʻane hokosia fakafoʻituitui. Ko e meʻa naʻe vīsone ki ai ʻa e ʻapositoló ʻoku ngalingali ko e palataisi fakalaumālie ia naʻe ʻi ai ʻa e fakatahaʻanga Kalisitiané ʻi he “taimi fakamui.”—Tan. 12:4.

Ngaahi Lēsoni kia Kitautolu:

3:5. ʻI he tuʻunga ko e tefitoʻi moʻoní, ʻoku tala mai ʻe he veesi ko ʻení ʻoku ngāueʻaki ʻe Sihova ʻa ʻene Folofolá, ko hono laumālie māʻoniʻoní mo e konga ʻo ʻene kautaha ʻi māmaní, ke fakapapauʻi ʻoku taau feʻunga ʻa e kau Kalisitiané ki he ngāue fakafaifekaú. (Sione 16:7; 2 Tim. 3:16, 17) ʻOku lelei ke tau ako tōtōivi ʻa e Tohi Tapú mo e ngaahi tohi Fakatohitapú, kīvoi ʻi he lotu ke kau mai ʻa e laumālie māʻoniʻoní, pea maʻu mo kau maʻu pē ʻi he ngaahi fakataha faka-Kalisitiané.—Sāme 1:1-3; Luke 11:10-13; Hep. 10:24, 25.

4:16. Koeʻuhi ʻoku hanga ʻe Sihova ʻo ‘fakafoʻou hotau tangata ʻi lotó ʻo hokohoko ʻaho,’ ʻoku totonu ke tau ngāueʻaongaʻaki maʻu pē ʻa e ngaahi tokonaki ʻa Sihová, ʻo ʻoua ʻe tuku ke ʻosi atu ha ʻaho ʻoku teʻeki ai fai ha fakakaukau ki he ngaahi meʻa fakalaumālié.

4:17, 18 (PM). Ko e manatuʻi ʻoku ‘maamaa mo ojigofua ʻa e mamahí’ ʻe lava ke ne tokoniʻi kitautolu ke tau hanganaki faitōnunga kia Sihova lolotonga ʻa e faingataʻá.

5:1-5. He mālie ē ko hono fakamatalaʻi ʻe Paula ʻa e ongoʻi ʻa e kau Kalisitiane paní ki heʻenau ʻamanaki ʻo e moʻui fakahēvaní!

10:13. ʻI he tuʻunga ko ha tuʻutuʻuni fakalūkufua, tuku kehe kapau kuo fai ha ngaahi fokotuʻutuʻu pau kiate kitautolu ke tau tokoni ʻi he feituʻu ʻoku lahi ange ai ʻa e fiemaʻú, ʻoku totonu ke tau ngāue pē ʻi he feituʻu ngāue kuo ʻosi vaheʻi mai ki heʻete fakatahaʻangá.

13:5. Ke ‘sivi pe ʻoku tau lotu moʻoní,’ ʻoku fiemaʻu ke fuatautau hotau ʻulungāangá pe ʻoku fehoanaki mo e meʻa ʻoku tau ako mei he Tohi Tapú. Ke ‘ʻeke fakamoʻoni meiate kitautolu,’ ʻoku fiemaʻu ke tau sivisiviʻi ʻa e lahi ʻo hotau tuʻunga fakalaumālié, ʻo kau ai ʻa e ongongofua ʻo hotau “ngaahi ongoʻanga” pea mo e lahi ʻo ʻetau ngaahi ngāue ʻo e tuí. (Hep. 5:14; Sem. 1:22-25) ʻI hono ngāueʻaki ʻa e akonaki ʻaonga ʻa Paulá, ʻe lava ke tau hokohoko atu ai ʻa e ʻaʻeva ʻi he ʻalunga ʻo e moʻoní.

[Fakatātā ʻi he peesi 26, 27]

Ko e hā ʻa e ʻuhinga ʻo e pehē “ko hoʻomou kai maʻu pē he mā ko ení, mo inu he ipú”?—1 Kol. 11:26