Siʻaki ʻa e “Muna”
Siʻaki ʻa e “Muna”
“Ko ia ʻoku tuli ai pe ki he muna, ko e taha masiva loto.”—PAL. 12:11.
1. Ko e hā e niʻihi ʻo ʻetau ngaahi meʻa mahuʻingá, pea ko e hā ʻa e founga lelei taha ke ngāueʻaki ai iá?
ʻI HE hoko ko e kau Kalisitiané, ʻoku tau maʻu kotoa ʻa e ngaahi meʻa mahuʻinga kehekehe. ʻOku kau nai ai ha tuʻunga moʻui lelei mo e mālohi, ko e ngaahi malava fakaʻatamai naʻa tau tupu mo ia, pe ko e ngaahi koloa. Koeʻuhi ʻoku tau ʻofa kia Sihova, ʻoku tau fiefia ke ngāueʻaki ʻa e ngaahi meʻa ko iá ʻi heʻene ngāué pea tau tali ai ʻa e ekinaki fakamānavaʻi: “Fai ha fakaʻapaʻapa ki he ʻEiki ʻaki hoʻo koloa.”—Pal. 3:9.
2. Ko e hā ʻa e fakatokanga ʻoku ʻomai ʻe he Tohi Tapú fekauʻaki mo e muná, pea ʻoku anga-fēfē hono ngāueʻaki ʻi ha ʻuhinga fakahangatonu ʻa e fakatokanga ko ení?
2 ʻI he tafaʻaki ʻe tahá, ʻoku toe lau ʻa e Tohi Tapú ki he muná pea fakatokanga mai ʻo fekauʻaki mo hono maumauʻi ʻo ʻetau koloá ʻi he tuli ki aí. ʻI he fekauʻaki mo e meʻá ni, fakakaukau angé ki he ngaahi lea ʻi he Palovepi 12:11: “Ko ia ʻoku ngoueʻi hono kelekele ʻe mohu meʻakai: Ka ko ia ʻoku tuli ai pe ki he muna, ko e taha masiva loto.” ʻOku ʻikai faingataʻa ke sio ki he anga hono ngāueʻaki ʻi ha ʻuhinga fakahangatonu ʻa e palōveepi ko iá. Kapau ʻoku fakamoleki ʻe ha tangata hono taimí mo e iví ʻi he ngāue mālohi ke tokoniʻi ʻa hono fāmilí, ʻokú ne ʻi ha faingamālie lelei ai ke maʻu ha maluʻanga. (1 Tim. 5:8) Kae kehe, kapau ʻokú ne fakamoleki ʻene koloá ʻi he tuli ki he muná, ʻokú ne fakahāhā ʻa e “masiva loto,” ko e ʻikai ha fakafuofua mafamafatatau mo e fakaueʻiloto lelei. ʻOku ngalingali ʻe masiva ha tangata pehē.
3. ʻOku anga-fēfē hono ngāueʻaki ki heʻetau lotú ʻa e fakatokanga ʻa e Tohi Tapú fekauʻaki mo e muná?
3 Ko ia ai, fēfē kapau ʻoku tau ngāueʻaki ʻa e tefitoʻi moʻoni ʻo e palōvēpí ki heʻetau lotú? ʻOku tau sio leva ai ko ha Kalisitiane ʻoku tauhi tōtōivi mo faitōnunga kia Sihova ʻokú ne maʻu ʻa e maluʻanga moʻoní. ʻOku lava ke ne falala pau ki he tāpuaki ʻa e ʻOtuá he taimí ni pea maʻu ha ʻamanaki papau ki he kahaʻú. (Mt. 6:33; 1 Tim. 4:10) Kae kehe, ko ha Kalisitiane ʻoku fakaleluʻi ʻe he muná ʻokú ne ʻai ki he tuʻunga fakatuʻutāmaki ʻa hono vahaʻangatae mo Sihová pea mo ʻene ngaahi ʻamanaki ki he moʻui taʻengatá. ʻE lava fēfē ke tau fakaʻehiʻehi mei ai? ʻOku pau ke tau ʻiloʻi ʻa e ngaahi meʻa ʻi heʻetau moʻuí ʻoku “muna” pea fakatupulekina ha fakapapau ke talitekeʻi ia.—Lau ʻa e Taitusi 2:11, 12.
4. ʻI ha ʻuhinga fakalūkufua, ko e hā ʻa e muná?
4 Ko e hā leva ʻa e muná? ʻI ha ʻuhinga fakalūkufua, ʻoku lava ke pehē ko ha meʻa pē ʻokú ne fakaleluʻi kitautolu mei he tauhi ʻaufuatō kia Sihová. Ko e fakatātaá, ʻoku lava ke kau ai ʻa e ngaahi founga kehekehe ʻo e fakafiefiá. Ko e moʻoni, ko e fakafiefiá ʻoku ʻaonga ʻa hono fai fakafeʻungá. Ka ʻi he taimi ʻoku tau fakamoleki ai ʻa e taimi lahi ʻi he ngaahi meʻa “fakaolí” ʻo liʻaki ai ʻa e ngaahi ngāue ʻoku fekauʻaki mo ʻetau lotú, ʻoku hoko ai ʻa e fakafiefiá ko ha muna, ʻi heʻene uesia kovi ʻetau ʻi ha tuʻunga lelei fakalaumālié. (Koh. 2:24; 4:6) Ke fakaʻehiʻehi mei he meʻa ko iá, ʻoku fakatupulekina ʻe ha Kalisitiane ʻa e mafamafatatau, ʻo siofi fakalelei ʻa e founga ʻo ʻene ngāueʻaki ʻa hono taimi mahuʻingá. (Lau ʻa e Kolose 4:5.) Kae kehe, ʻoku ʻi ai ʻa e muna ʻoku fakatuʻutāmaki lahi ange ia ʻi he fakafiefiá. ʻOku kau ʻi he ngaahi meʻá ni ʻa e ngaahi ʻotua loí.
Siʻaki ʻa e Ngaahi ʻOtua Muná
5. ʻOku anga-fēfē hono faʻa ngāueʻaki ʻe he Tohi Tapú ʻa e foʻi lea ko e “muna”?
5 ʻOku taau ke fakatokangaʻi ʻi he lahi taha ʻo e ngaahi veesi Tohi Tapu ʻa ia ʻoku hā ai ʻa e foʻi lea ko e “muna,” ʻoku ngāueʻaki ai ia ki he ngaahi ʻotua loi. Ko e fakatātaá, naʻe folofola ʻa Sihova ki ʻIsileli: “ʻE ʻikai te mou ngaohi hamou ʻotua noa [pe muna], pea ʻe ʻikai te mou fokotuʻu hamou tamapua pe pou, pea ʻe ʻikai te mou tuku ʻi homou fonua ha maka tongitongi ke lotu ki ai: he ko Sihova au ko homou ʻOtua.” (Liv. 26:1) Naʻe tohi ʻe Tuʻi Tēvita: “He ʻoku lahi ʻa Sihova, pea ʻoku totonu ke lahi hono fakamaloʻia: ʻOku hulu hono ngeia ʻi he ngaahi ʻotua kotoa. He ko e aitoli [pe muna] pe ʻa e ngaahi ʻotua ʻo e ngaahi faʻahinga: Ka naʻe ngaohi ʻa e langi ʻe Sihova.”—1 Kal. 16:25, 26.
6. Ko e hā ʻoku muna ai ʻa e ngaahi ʻotua loí?
6 Hangē ko ia naʻe fakahaaʻi ʻe Tēvitá, ʻoku takatakaiʻi kitautolu ʻe he fakamoʻoni ʻo e tuʻunga lahi ʻo Sihová. (Sāme 139:14; 148:1-10) Ko ha monū ē ko ia ki he kau ʻIsilelí ke nau ʻi ha vahaʻangatae fuakava mo Sihova! He fakavalevale moʻoni ko kinautolu ʻi heʻenau tafoki meiate ia ʻo punou ki he ngaahi ʻīmisi kuo tongi mo e ngaahi pou toputapú! ʻI he ngaahi taimi faingataʻá, naʻe fakamoʻoniʻi ai ʻe honau ngaahi ʻotua loí ʻenau muna moʻoní, ʻa e ʻikai hanau mālohi ke fakahaofi kinautolu pea toe pehē foki ki heʻenau kau lotú.—Fkm. 10:14, 15; Ai. 46:5-7.
7, 8. ʻOku lava fēfē ke hoko ʻa e “Koloa” ko ha ʻotua?
7 ʻI he ngaahi fonua lahi he ʻahó ni, ʻoku kei punou pē ai ʻa e kakaí ki he ngaahi ʻīmisi ngaohi ʻe he tangatá, pea ko e ngaahi ʻotua peheé ʻoku nau muna tatau pē he taimí ni mo ia ʻi he kuohilí. (1 Sione 5:21) Kae kehe, ʻoku fakamatala ʻa e Tohi Tapú ki he ngaahi meʻa kehe ko e ngaahi ʻotua, tuku kehe ʻa e ngaahi ʻīmisí. Ko e fakatātaá, fakakaukau angé ki he ngaahi lea ko eni ʻa Sīsuú: “ʻOku ʻikai ke lava ʻe ha taha ke ne ʻeikiʻaki ha ʻeiki ʻe toko ua: he te ne fehiʻa ki he taha kae ʻofaʻi ʻa e taha, pe te ne piki ki he taha kae taʻetokaʻi ʻa e taha. ʻOku ʻikai te mou lava ke eikiʻaki ʻa e ʻOtua mo Koloa fakatouʻosi.”—Mt. 6:24.
8 ʻOku lava fēfē ke hoko ʻa e “Koloa” ʻo hangē ha ʻotuá? Sai, ko ha fakatātā, fakakaukau atu ki ha fuʻu maka ʻoku ʻi ha loto ʻapi ʻi ʻIsileli ʻo e kuonga muʻá. Ko ha fuʻu maka pehē ʻe lava ke ʻaonga ia ki he langa ʻo ha fale pe ko ha ʻā. ʻI he tafaʻaki ʻe tahá, kapau naʻe fokotuʻu ia ko ha “pou [toputapu]” pe ko ha “maka tongitongi,” naʻe hoko ia ko ha tūkiaʻanga ki he kakai ʻa Sihová. (Liv. 26:1) ʻI he founga meimei tatau, ʻoku ʻi ai pē hono ʻaonga ʻo e paʻangá. ʻOku tau fiemaʻu ia koeʻuhi pē ke tau moʻui, pea ʻe lava ke tau ngāueʻaki lelei ia ʻi he ngāue ʻa Sihová. (Koh. 7:12; Luke 16:9) Ka ʻo kapau ʻoku tau fakamuʻomuʻa ʻa e tuli ki he paʻangá ʻi heʻetau ngāue faka-Kalisitiané, ko hono moʻoní, ʻoku hoko ai ʻa e paʻangá ko ha ʻotua kiate kitautolu. (Lau ʻa e 1 Timote 6:9, 10.) ʻI he māmani ko ení, ʻa ia ʻoku mātuʻaki mahuʻinga ai ki he kakaí ʻa e tuli ki he koloá, kuo pau ke tau fakapapauʻi ʻoku tau tauhi maʻu ha vakai mafamafatatau ki he meʻá ni.—1 Tim. 6:17-19.
9, 10. (a) ʻOku anga-fēfē ʻa e vakai ʻa ha Kalisitiane ki he akó? (e) Ko e hā ha fakatuʻutāmaki ʻo e ako māʻolunga angé?
9 Ko e toe faʻifaʻitakiʻanga ʻe taha ʻo ha meʻa ʻaonga ʻa ia ʻoku lava ke hoko ko ha muna ko e ako fakaemāmaní. ʻOku tau loto ke ako lelei ʻetau fānaú koeʻuhi ke lava ʻo maʻu mei ai haʻanau moʻui. Ko e meʻa ʻoku toe mahuʻinga angé, ko ha Kalisitiane ako lelei ʻokú ne malava lelei ange ai ke lau ʻa e Tohi Tapú fakataha mo e mahino, ʻo fakaʻuhinga ʻi he ngaahi palopalemá pea hoko ai ki ha ngaahi fakamulituku lelei, ʻo faiako ʻaki ʻa e ngaahi moʻoni Fakatohitapú ʻi ha founga mahino mo fakatuimālohi. Ko hono maʻu ʻo ha ako leleí ʻoku fiemaʻu ki ai ʻa e taimi, ka ko ha taimi ia ʻoku ngāueʻaki lelei.
10 Ko ia fēfē ʻa e ako māʻolunga ange, ʻa ē ʻoku maʻu ʻi ha kolisi pe ko ha ʻunivēsiti? ʻOku fai ʻa e vakai lahi ki heni ʻoku mātuʻaki mahuʻinga ki he hoko ʻo lavameʻá. Neongo ia, ko e tokolahi ʻoku nau tuli ki he ako peheé ʻoku iku ʻo fakafonuʻaki honau ʻatamaí ʻa e ngaahi fakakaukau fakatupu maumau. Ko e ako peheé ʻoku fakamoleki ai ʻa e ngaahi taʻu mahuʻinga fakatalavou ʻa ia naʻe mei lava lelei ke ngāueʻaki ʻi he ngāue ʻa Sihová. (Koh. 12:2 [Koh 12:1, PM]) Mahalo pē ʻoku ʻikai fakaʻohovale he ʻi he ngaahi fonua ʻa ia kuo maʻu ai ʻe he tokolahi ʻa e ako peheé, ʻoku toe māʻulalo ange ai ʻi ha toe taimi ʻa e tui ki he ʻOtuá. ʻI he ʻikai sio ki he ngaahi founga fakaeako fakalakalaka ʻa e māmani ko ení ki ha maluʻangá, ʻoku falala ha Kalisitiane ia kia Sihova.—Pal. 3:5.
ʻOua ʻe Tuku ʻa e Holi Fakakakanó ke Hoko ko ha ʻOtua
11, 12. Ko e hā naʻe pehē ai ʻe Paula fekauʻaki mo e niʻihi: “Oku nau otua aki ho nau kete”?
11 ʻI heʻene tohi ki he kau Filipaí, ʻoku fakahaaʻi ai ʻe he ʻapositolo ko Paulá ʻa e toe meʻa kehe ʻoku lava ke hoko ko ha ʻotua. ʻOkú ne lau ai ʻo fekauʻaki mo e niʻihi ʻa ia ko e kaungālotu kinautolu ki muʻa ʻo ne pehē: “Oku aeva ae toko lahi, akinautolu kuo liuga lahi eku lea ai kiate kimoutolu, bea oku ou toe lea ai eni mo tagi, koe kau fili akinautolu ki he akau o Kalaisi: Ko ho nau gataaga koe auha, oku nau otua aki ho nau kete, o vikiviki i he mea fakama, o nau moua ki he mea fakamama.” (Fili. 3:18, 19, PM) ʻOku lava fēfē ke hoko ha kete ʻo ha taha ko ha ʻotua?
12 ʻOku hā ko e ngaahi maheni ko ia ʻo Paulá naʻe hoko ʻia kinautolu ha hoholi ke fai ki he ngaahi holi fakakakanó ʻo mahuʻinga ange ia ʻi heʻenau tauhi kia Sihova fakataha mo Paulá. Kuo maʻu moʻoni nai ʻe he niʻihi ʻa e meʻakaí pe inú ʻo fuʻu hulu ʻo aʻu ki he tuʻunga ʻo e kai fakaputa pe konā. (Pal. 23:20, 21; fakafehoanaki mo e Teutalonome 21:18-21.) Kuo fili nai ʻa e niʻihi ke ngāuekakatoʻaki ʻa e ngaahi faingamālie naʻe ala maʻu ʻi he māmani ʻo e ʻuluaki senitulí pea fakaleluʻi ai kinautolu mei he tauhi kia Sihová. ʻOfa ke ʻoua ʻaupito ʻe fakaʻatā ha holi ki he moʻui lelei ʻoku laú ke ne fakatupunga ke tau māmālie ʻi heʻetau ngāue ʻaufuatō kia Sihová.—Kol. 3:23, 24.
13. (a) Ko e hā ʻa e mānumanu, pea naʻe anga-fēfē hono fakamatalaʻi ia ʻe Paulá? (e) ʻE lava fēfē ke tau fakaʻehiʻehi mei he mānumanú?
13 Naʻe toe lave ʻa Paula ki ha tafaʻaki ʻe taha ʻo e lotu loí. Naʻá ne tohi: “Ko ia mou ʻai ke mate leva homou ngaahi kupu ʻoku ʻi mamani, ko e feʻauaki, angaʻuli, havala, holi pango; kaeʻumaʻā ʻa e manumanu, ʻa ia ko e tauhi aitoli tofu pe ia.” (Kol. 3:5) Ko e mānumanú ko ha holi mālohi ia ki ha meʻa ʻoku ʻikai ke tau maʻu. ʻOku lava ke fai ia ki he ngaahi meʻa fakamatelié. ʻOku toe lava ke kau ki ai ʻa e holi ki he fehokotaki fakasino taʻefakalaó. (Eki. 20:17) ʻIkai ʻoku ʻuhinga lelei ke fakakaukau ko ha ngaahi holi pehē ʻoku tatau ia mo e tauhi ʻaitoli, ʻo lotu ki ha ʻotua loi? Naʻe ngāueʻaki ʻe Sīsū ha fakamatala māʻalaʻala ke fakahaaʻiʻaki ʻa e mahuʻinga ʻo e feinga lahi ke mapuleʻi ha ngaahi holi hala pehē.—Lau ʻa e Maake 9:47; 1 Sione 2:16.
Tokanga Fekauʻaki mo e Ngaahi Lea Muná
14, 15. (a) Ko e hā ʻa e “muna” naʻá ne fakatūkiaʻi ʻa e tokolahi ʻi he ʻaho ʻo Selemaiá? (e) Ko e hā naʻe mahuʻinga ai ʻa e ngaahi lea ʻa Mōsesé?
14 Ko e muná ʻoku lava ke kau ki ai ʻa e ngaahi leá. Ko e fakatātaá, naʻe folofola ʻa Sihova kia Selemaia: “Oku kikite loi i hoku huafa ae kau balofita: nae ikai teu fekau akinautolu, be tala kiate kinautolu, bea nae ikai teu lea kiate kinautolu: kuo nau lea aki ae miji loi moe kikite kākā, moe mea vaiga [“muna,” NW], bea moe kākā o ho nau loto.” (Sel. 14:14, PM) Ko e kau palōfita loi ko iá naʻa nau taukaveʻi ʻoku nau lea ʻi he huafa ʻo Sihová, ka naʻa nau pouaki ʻenau fakakaukau pē ʻanautolu, ʻa honau poto pē ʻonautolu. Ko ia ai, ko ʻenau ngaahi leá ko ha “muna.” Ko e ngaahi muna ia pea naʻe hoko moʻoni ai ha fakamanamana ki he lotu moʻoní. ʻI he 607 K.M., ko e tokolahi naʻa nau tokanga ki he ngaahi lea muna peheé naʻa nau mate mutukia ʻi he nima ʻo e kau sōtia Pāpiloné.
15 ʻI hono kehé, naʻe pehē ʻe Mōsese ki he kau ʻIsilelí: “Fakatokagaʻi ho mou loto ki he gaahi lea kotoabe aia oku ou fakababau kiate kimoutolu he aho ni, . . . He oku ikai koe mea vaiga [pe muna] ia kiate kimoutolu; ka ko hoo mou moui ia: bea koe mea eni te mou fakatologa ai ho mou gaahi aho i he fonua, aia oku mou alu ai ki he tua Joatani ke maʻu ia.” (Teu. 32:46, 47, PM) ʻIo, ko e ngaahi lea ʻa Mōsesé naʻe fakamānavaʻi ʻe he ʻOtuá. Ko ia ai, naʻe mahuʻinga, ʻo mātuʻaki mahuʻinga moʻoni ki he lelei ʻa e puleʻangá. Ko e faʻahinga naʻe tokanga ki aí naʻa nau moʻui fuoloa mo tuʻumālie. ʻOfa ke tau siʻaki maʻu pē ʻa e ngaahi lea muná pea pipiki ki he ngaahi lea mahuʻinga ʻo e moʻoní.
16. ʻOku anga-fēfē ʻetau vakai ki he ngaahi fakamatala ʻa e kau saienisí ʻoku fepaki mo e Folofola ʻa e ʻOtuá?
16 ʻOku tau fanongo ki hano leaʻaki he ʻahó ni ʻa e muná? ʻIo. Ko e fakatātaá, ʻoku pehē ʻe he kau saienisi ʻe niʻihi ko e fakakaukau fakamahalo fakaʻevalūsiō mo e ngaahi ʻilo fakasaienisi ʻi he ngaahi malaʻe kehé ʻoku fakahāhā ai ʻoku ʻikai kei ʻi ai ha fiemaʻu ke tui ki he ʻOtuá, he ʻoku lava ke fakamatalaʻi ʻa e meʻa kotoa pē ʻe he ngaahi founga fakanatula. ʻOku totonu ke fakahohaʻasi kitautolu ʻe he ngaahi fakamatala hīkisia peheé? ʻIkai ʻaupito! ʻOku kehe ʻa e poto fakaetangatá mei he poto fakaʻotuá. (1 Kol. 2:6, 7) Kae kehe, ʻoku tau ʻiloʻi ʻi he taimi ʻoku fepaki ai ʻa e ngaahi akonaki fakaetangatá mo e meʻa kuo fakahaaʻi ʻe he ʻOtuá, ʻoku hala maʻu pē ʻa e ngaahi akonaki fakaetangatá. (Lau ʻa e Loma 3:4.) Neongo ʻa e laka ki muʻa ʻa e saienisí ʻi he ngaahi malaʻe ʻe niʻihi, ko hono fakafuofuaʻi ʻe he Tohi Tapú ʻa e poto fakaetangatá ʻoku kei moʻoni ai pē: “Ko e poto ʻo e maama ko eni, ko e koto vale ia ʻi he vakai ʻa e ʻOtua.” ʻI hono fakahoa ki he poto taʻefakangatangata ʻo e ʻOtuá, ʻoku taʻeʻaonga ʻa e fakaʻuhinga fakaetangatá.—1 Kol. 3:18-20.
17. ʻOku totonu ke fēfē ʻa e vakai ki he ngaahi lea ʻa e kau taki ʻo e Puleʻanga-Haʻa-Kalisitiané mo e kau tafoki mei he moʻoní?
17 Ko e toe faʻifaʻitakiʻanga ʻe taha ʻo e ngaahi lea muná ʻoku maʻu ʻi he kau taki lotu ʻo e Puleʻanga-Haʻa-Kalisitiané. ʻOku taukaveʻi ʻe he faʻahingá ni ʻoku nau lea ʻi he huafa ʻo e ʻOtuá, ka ko e lahi taha ʻenau leá ʻoku ʻikai fakatefito ia ʻi he Tohi Tapú, pea ko e meʻa ʻoku nau leaʻakí ko e muna moʻoni. Ko e kau tafoki mei he moʻoní foki ʻoku nau leaʻaki ʻa e ngaahi lea muna, ʻi he taukaveʻi ʻoku nau poto lahi ange ʻi he “tamaioeiki agatonu mo boto” kuo fakanofó. (Mt. 24:45-47, PM) Kae kehe, ʻoku lea ʻa e kau tafoki mei he moʻoní ʻi he poto pē ʻonautolú, pea ko ʻenau ngaahi leá ko e muna, ko ha tūkiaʻanga ki ha taha pē nai ʻe fanongo. (Luke 17:1, 2) ʻE lava fēfē ke tau fakaʻehiʻehi mei haʻanau takihalaʻi?
Founga ke Siʻaki Ai ʻa e Lea Muná
18. ʻI he ngaahi founga fē ʻoku lava ke tau ngāueʻaki ai ʻa e akonaki ʻoku maʻu ʻi he 1 Sione 4:1?
18 Ko e ʻapositolo taʻumotuʻa ko Sioné naʻá ne fai ʻa e akonaki lelei fekauʻaki mo e meʻá ni. (Lau ʻa e 1 Sione 4:1.) ʻI he fehoanaki mo e akonaki ʻa Sioné, ʻoku tau fakalototoʻaʻi maʻu pē ʻa e faʻahinga ʻoku tau fetaulaki mo ia ʻi he ngāue fakamalangá ke ʻahiʻahiʻi ʻa e meʻa kuo akoʻi kiate kinautolú ʻaki hono fakahoa ia ki he Tohi Tapú. Ko ha tuʻunga lelei foki ia kiate kitautolu. Kapau ʻoku tau fanongo ki ha fakamatala pē ʻoku fakaangaʻi ai ʻa e moʻoní pe lauʻikoviʻi ai ʻa e fakatahaʻangá, ko e kau mātuʻá, pe ko ha taha pē ʻo hotau fanga tokouá, ʻoku ʻikai ʻaupito te tau tali ia. ʻI hono kehé, ʻoku tau ʻeke: “Ko e tokotaha ko ia ʻokú ne fakamafola ʻa e talanoá ni ʻokú ne ngāue ʻo fehoanaki mo e meʻa ʻoku leaʻaki ʻe he Tohi Tapú? ʻOku pouaki ʻe he ngaahi talanoa pe fakamatala ko ení ʻa e taumuʻa ʻa Sihová? ʻOku nau pouaki ʻa e melino ʻi he fakatahaʻangá?” Ko ha meʻa pē ʻoku tau fanongo ai ʻokú ne holoki hifo ʻa e fetokouaʻakí kae ʻikai langa hake ko ha muna ia.—2 Kol. 13:10, 11.
19. ʻOku anga-fēfē ʻa e fakapapauʻi ʻe he kau mātuʻá ko ʻenau ngaahi leá ʻoku ʻikai ko e muna?
19 ʻI heʻene hoko mai ki he ngaahi lea muná, ʻoku toe ako foki ʻe he kau mātuʻá ha lēsoni mahuʻinga. ʻI ha taimi pē ʻoku fiemaʻu ai ke nau fai ha akonaki, ʻoku nau manatuʻi honau ngataʻangá pea ʻoku ʻikai ke nau ʻafungi ʻo fai ha akonaki mei he ʻilo ʻataʻatā pē ʻanautolú. ʻOku totonu ke nau lave maʻu pē ki he meʻa ʻoku leaʻaki ʻe he Tohi Tapú. Ko ha tataki lelei ʻoku maʻu ia ʻi he ngaahi lea ʻa e ʻapositolo ko Paulá: “ʻOua naʻa hulu atu ʻi he meʻa kuo tohi.” (1 Kol. 4:6) Ko e kau mātuʻá ʻoku ʻikai te nau mahulu atu ʻi he meʻa kuo tohi ʻi he Tohi Tapú. Pea ʻi hono toe fakalea ʻe tahá, ʻoku ʻikai te nau laka ʻo hulu atu ʻi he akonaki makatuʻunga ʻi he Tohi Tapú kuo hiki ʻi he ʻū tohi ʻa e tamaioʻeiki anga-tonu mo potó.
20. ʻI he ngaahi founga fē ʻoku tokoniʻi ai kitautolu ke tau siʻaki ʻa e ngaahi muná?
20 Ko e muná—pe ko e “ngaahi ʻotua,” ngaahi lea, pe ko ha toe meʻa kehe—ʻoku fakatupu maumau ʻaupito. ʻI he ʻuhinga ko iá, ʻoku tau lotu maʻu pē ʻo kole ʻa e tokoni ʻa Sihová ke tau ʻiloʻi ai ʻa e muná, pea ʻoku tau kumi ʻene tatakí ki he founga ke siʻaki ai iá. ʻI heʻetau fai peheé, ko hono moʻoní ʻoku tau lea fakataha ai mo e tokotaha-tohi-sāmé: “Leʻei hoku mata ke ʻoua te na sio ki he muna, pea fakaakeake au ʻi he ʻalunga ʻo e ʻAfiona.” (Sāme 119:37) ʻI he kupu hoko maí, te tau lāulea lahi ange ai ki he mahuʻinga ʻo hono tali ʻa e tataki ʻa Sihová.
ʻE Lava Ke Ke Fakamatalaʻi?
• ʻI ha ʻuhinga fakalūkufua, ko e hā ʻa e “muna” ʻoku totonu ke tau siʻakí?
• ʻE lava fēfē ke tau fakaʻehiʻehi mei hono tuku ke hoko ʻa e paʻangá ʻo hangē ha ʻotuá?
• ʻI he founga fē ʻoku lava ke hoko ai ko e tauhi ʻaitoli ʻa e ngaahi holi fakakakanó?
• ʻE lava fēfē ke tau siʻaki ʻa e ngaahi lea muná?
[Fehuʻi ki he Ako]
[Fakatātā ʻi he peesi 3]
Naʻe fakalototoʻaʻi ʻa e kau ʻIsilelí ke nau ‘ngoueʻi honau kelekelé,’ kae ʻoua ʻe tuli ki he muná
[Fakatātā ʻi he peesi 5]
ʻOua ʻaupito ʻe fakaʻatā ʻa e holi ki he ngaahi meʻa fakamatelié ke ne fakamāmālieʻi koe ʻi he ngāue ʻa Sihová
[Fakatātā ʻi he peesi 6]
Ko e lea ʻa e kau mātuʻá ʻe lava ke hoko ko e meʻa mahuʻinga lahi