Fānau, Manatu ki Homou Tupuʻangá
Fānau, Manatu ki Homou Tupuʻangá
“Manatu eni ki ho Tubuaga i he gaahi aho o hoo kei jii.”—KOH. 12:1 (12:2), PM.
1. ʻOku anga-fēfē hono fakahāhā ʻe Sihova ʻa e falala pau ki heʻene kau lotu ko e fānaú?
ʻOKU vakai ʻa Sihova ki he kau talavou Kalisitiané ʻoku nau mahuʻinga mo fakatupu fakaivifoʻou ʻo hangē ko e hahaú. Ko e moʻoni, naʻá ne tomuʻa tala ko e ʻaho ʻo e “fakate tau” ai ʻa hono ʻAló, ʻe “tali ko au” ʻa e fānau tangata mo e fefine ki he ngāue ʻa Kalaisí. (Sāme 110:3) Ko e kikite ko iá naʻe teu ke fakahoko ia ʻi ha taimi ʻe anga-taʻefakaʻotua ai ʻa e tokolahi taha ʻo e kakaí, ʻo nau nōfoʻi kiate kinautolu pē mo e paʻangá, pea nau talangataʻa. Ka, naʻe ʻafioʻi ʻe Sihova ko e fānau kuo lotu kiate iá te nau kehe kinautolu. He falala pau ē ko Ia kiate kimoutolu fānau ko e fanga tokoua mo e fanga tuofāfine!
2. Ko e manatu kia Sihová ʻoku kau ki ai ʻa e hā?
2 Sioloto atu ki he fiefia kuo pau ʻoku ongoʻi ʻe he ʻOtuá ʻi he sio ki he fānaú ʻi heʻenau manatua ia ko honau Tupuʻangá. (Koh. 12:1 [12:2], PM) Ko hono moʻoní, ko e manatu kia Sihová ʻoku kau ki ai ʻa e meʻa lahi ange ʻi he fakakaukau pē kiate iá. ʻOku ʻuhinga ia ki hono fai ʻa e ngāue—ko hono fai ʻa e meʻa ʻoku fakahōifua kiate iá, ʻo tuku ke tataki kitautolu ʻe heʻene ngaahi laó mo ʻene ngaahi tefitoʻi moʻoní ʻi heʻetau moʻui fakaʻahó. ʻOku toe ʻuhinga iá ko e falala kia Sihova, ʻi he ʻiloʻi ʻoku ʻi hono lotó ʻa e lelei taha maʻa kitautolú. (Sāme 37:3; Ai. 48:17, 18) Ko e anga ia hoʻo ongoʻi fekauʻaki mo ho Tupuʻanga?
“Falala kia Jihova Aki Ho Loto Kotoa”
3, 4. Naʻe anga-fēfē hono fakahāhā ʻe Sīsū ʻa e falala kia Sihová, pea ko e hā ʻoku mahuʻinga ai ke falala kia Sihova ʻi he ʻaho ní?
3 Ko e faʻifaʻitakiʻanga lelei taha ʻo e tokotaha naʻe falala ki he ʻOtuá, ko e moʻoni, ko Sīsū Kalaisi. Naʻá ne moʻuiʻaki ʻa e ngaahi lea ʻo e Palovepi 3:5, 6 (PM): “Falala kia Jihova aki ho loto kotoa; bea oua naa ke faaki ki ho boto oou. Ke ke fakaogoogo kiate ia i ho hala kotoabe, bea e fakatonutonu eia ho gaahi aluaga.” ʻIkai fuoloa hili ʻene papitaisó, naʻe fakaofiofi ʻa Sētane kia Sīsū, ʻo ne feinga ke fakataueleʻi ia ke ne tali ʻa e mafai mo e lāngilangi ʻo e māmaní. (Luke 4:3-13) Ka naʻe ʻikai ke tō ai ʻa Sīsū. Naʻá ne ʻiloʻi ko e “koloa mo e ongoongo mo e moʻui” moʻoní ko e ‘haʻu ia mei he angamalu mo e ʻapasia kia Sihová.’—Pal. 22:4.
4 ʻOku puleʻi ʻa e māmani ko ʻení ʻe he mānumanú mo e siokitá. ʻI ha ʻātakai pehē, ʻoku fakapotopoto ke tau muimui ki he faʻifaʻitakiʻanga ʻa Sīsuú. Manatuʻi foki, ʻe fai ʻe Sētane ha faʻahinga meʻa pē ke fakataueleʻi ʻa e kau sevāniti ʻa Sihová ke nau hē mei he hala fāsiʻi ʻoku taki atu ki he moʻuí. ʻOku loto ia ke sio ki he tokotaha kotoa ʻoku nau ʻaʻeva ʻi he hala fālahi ʻa ē ʻoku iku atu ki he ʻauhá. ʻOua ʻe tō ʻiate ia! ʻI hono kehé, fakapapauʻi ke ke manatu ki ho Tupuʻangá. Falala kakato kiate ia, pea piki ke maʻu ki he “moʻui moʻoni,” ʻa ia ʻoku pau mo ofí ni ke hokó.—1 Tim. 6:19.
Fānau, Mou Fakapotopoto!
5. ʻOku anga-fēfē hoʻo ongoʻi fekauʻaki mo e kahaʻu ʻo e māmani ko ʻení?
5 Ko e fānau ʻoku nau manatu ki honau Tupuʻangá, ʻoku nau poto ange kinautolu ʻi honau toʻumeʻá. (Lau ʻa e Sāme 119:99, 100.) Koeʻuhi ko ʻenau ohi ʻa e fakakaukau ʻa e ʻOtuá, ʻoku nau lāuʻilo kakato ai ki he fakapōpōʻuli moʻoni ʻa e ngaahi taumuʻa ʻo e māmani ko ʻení. Naʻa mo hoʻomou kei taʻu siʻi ʻi he moʻuí, ʻoku ʻikai ha veiveiua ko kimoutolú fānau kuo mou sio ki he tupulaki ʻa e manavaheé mo e loto-moʻuá. Kapau ʻokú ke kei ako, ʻoku pau pē kuó ke fanongo ʻi he ʻuliʻi ʻo e ʻātakaí, ʻalu ke mafana ange ʻa e foʻi kolopé, ko hono tā ʻa e ʻuluʻakaú pea mo e ngaahi palopalema meimei tatau. ʻOku hohaʻatuʻu ʻa e kakaí ʻi he ngaahi fetōʻaki ko ʻení, ka ko e Kau Fakamoʻoni pē ʻa Sihová ʻoku nau mahinoʻi kakato ko e konga pē ia ʻo e fakaʻilonga ʻoku fakahaaʻi ai ʻa e ngataʻanga ʻo e māmani ʻo Sētané.—Fkh. 11:18.
6. Kuo anga-fēfē ʻa e tō ʻa e fānau ʻe niʻihi ʻi he fakatauelé?
6 Ko e meʻa fakamamahí, ko e niʻihi ʻo e fānau ko e kau sevāniti ʻa e ʻOtuá kuo ʻikai te nau kei ʻāʻā pea kuo nau fakaʻatā ai ke nenefu ʻenau sio ki he siʻisiʻi ʻa e taimi ʻoku toe ki he māmani ko ʻení. (2 Pita 3:3, 4) Kuo tō ʻa e niʻihi ʻi he fakatauele ʻo e angahala mamafá tupu mei he feohi koví mo e fakatātā fakalieliá. (Pal. 13:20) He fakamamahi moʻoni ē ʻo ka mole ʻa e hōifua ʻa e ʻOtuá meiate kita ʻi heʻetau ofi peheni ʻaupito ki he ngataʻangá! ʻI hono kehé, ako mei he meʻa naʻe hoko ki he kau ʻIsilelí ʻi he 1473 K.M. ʻi he taimi ne nau ʻapitanga ai ʻi he Manafa ʻo Mōapé, ʻi heʻenau ofi ʻaupito ke hū ki he Fonua ʻo e Talaʻofá. Ko e hā naʻe hoko aí?
Ne Nau Tō ʻi he Meimei Aʻu ki he Tepí
7, 8. (a) Ko e hā ʻa e founga naʻe ngāueʻaki ʻe Sētane ʻi he Manafa ʻo Mōapé? (e) Ko e hā ʻa e founga ʻoku ngāueʻaki ʻe Sētane ʻi he ʻaho ní?
7 ʻI he taimi ko iá, ʻoku hā mahino naʻe loto ʻa Sētane ke ʻoua ʻe maʻu ʻe he kau ʻIsilelí ʻa honau tofiʻa ne talaʻofá. Hili ʻa e ʻikai te ne lava ʻo ʻai ʻa e palōfita ko Pēlamí ke ne tuku ha mala kiate kinautolú, naʻe ngāueʻaki ʻe Sētane ha founga olopoto ange; naʻá ne feinga ke ʻai kinautolu ke ʻoua te nau taau ke maʻu ʻa e tāpuaki ʻa Sihová. Naʻe ngāueʻaki ʻa e kakai fefine anga-fakatauele ʻo Mōapé ke fakataueleʻiʻaki kinautolu, pea ʻi he taimi ko ʻení naʻe ʻi ai ʻa e lavameʻa ʻa e Tēvoló. Naʻe kamata fai ʻulungāanga taʻetaau ʻa e kakaí mo e ngaahi ʻofefine ʻo Mōapé pea nau kamata lotu kia Pēali-Peoli! Neongo naʻe ofi ʻaupito ʻa honau tofiʻa maʻongoʻongá, ʻa e Fonua ʻo e Talaʻofá, naʻe mole ʻa e moʻui ʻa e kau ʻIsileli ʻe toko 24,000 nai. He meʻa fakamamahi moʻoni ia ne hokó!—Nom. 25:1-3, 9.
8 ʻI he ʻahó ni, ʻoku vave ʻetau fakaofiofi atu ki ha fonua ʻo e talaʻofa ʻoku toe lelei ange ia—ko e fokotuʻutuʻu foʻoú. Hangē ko ia ʻokú ne angaʻakí, ʻoku toe ngāueʻaki ʻe Sētane ʻa e fehokotaki fakasino taʻetāú ke fakameleʻi ʻa e kakai ʻa e ʻOtuá. Kuo tōlalo ʻaupito ʻa e tuʻunga fakaʻulungāanga ʻo e māmaní ʻo fai ai ʻa e vakai ki he feʻauakí ko e meʻa anga-maheni pē ia pea ko e faka-Sōtomá ʻoku fai ʻa e fakakaukau ko e meʻa pē ke fili fakafoʻituitui ki ai. Naʻe pehē ʻe ha tuofefine Kalisitiane ʻe taha, “Ko ʻapi pē mo e Fale Fakatahaʻangá ʻoku ako ai ʻe heʻeku fānaú ʻo ʻilo ʻoku kovi ʻi he ʻafio mai ʻa e ʻOtuá ʻa e faka-Sōtomá mo e fehokotaki fakasino ʻi tuʻa ʻi he nofo malí.”
9. Ko e hā ʻe hoko nai lolotonga ʻa e “tuʻunga ko e talavoú,” pea ʻe lava fēfē ke ikuʻi ʻeni ʻe he fānaú?
9 Ko e fānau ʻoku nau manatu ki honau Tupuʻangá ʻoku nau ʻiloʻi ko e fekoekoeʻi fakaefehokotaki fakasinó ko ha meʻaʻofa toputapu ia ʻoku felāveʻi mo e moʻuí pea mo e fakafanaú. Ko ia ai, ʻoku nau lāuʻilo ko e vā fakaefehokotaki fakasinó ʻoku totonu ke fai pē ia ʻi he founga ʻoku fakahinohino mai ʻe he ʻOtuá—ʻi loto ʻi he fokotuʻutuʻu ʻo e nofo malí. (Hep. 13:4) Kae kehe, lolotonga ʻa e “tuʻunga ko e talavoú”—ʻa e vahaʻa taimi ʻoku mālohi ai ʻa e ngaahi ongo fakaefehokotaki fakasinó pea lava ai ke ne takiheeʻi ʻa ʻete fakakaukaú—ʻe lava ke faingataʻa ʻa e tauhi ʻo e anga-maʻá. (1 Kol.1Ko 7:36, NW) Ko e hā ʻe lava ke ke faí ʻi he taimi ʻoku hūhū ai ki ho ʻatamaí ʻa e ngaahi fakakaukau taʻetāú? Lotu fakamātoato kia Sihova ke tokoniʻi koe ke ke hangataha ki he ngaahi meʻa leleí. ʻOku fanongo maʻu pē ʻa Sihova ki he faʻahinga ʻoku nau hanga loto-totonu kiate iá. (Lau ʻa e Luke 11:9-13.) Ko e fetalanoaʻaki fakatupu langa haké ʻe lava foki ke tokoni ia ke toe huʻufataha ʻa e fakakaukaú.
Fili Fakapotopoto ʻa Hoʻo Ngaahi Taumuʻá!
10. Ko e hā ʻa e faʻahinga fakakaukau ʻikai lelei ʻoku fiemaʻu ke tau fakaʻehiʻehi mei aí, pea ko e hā ʻa e ngaahi fehuʻi ʻe lava ke tau ʻeke hifó?
10 Ko e ʻuhinga ʻe taha ʻoku hoko ai ʻa e fānau tokolahi ʻi he māmaní ʻo taʻemapuleʻi pea moʻui pē ki he ngaahi mālie fakakakanó ko e ʻikai haʻanau “palofisai”—ʻa ia ko e ʻikai ha tataki fakaʻotua pe ʻamanaki papau ki he kahaʻú. (Pal. 29:18) ʻOku nau hangē ko e kau ʻIsileli anga taʻefakaʻotua ʻi he ʻaho ʻo ʻAiseá ʻa ia naʻa nau moʻui pē ke “fakafiefia . . . mo e mavava . . . ko e kai kakano mo e inu uaine.” (Ai. 22:13) ʻI he ʻikai ke fuaʻa ki he kakai peheé, ko e hā ʻoku ʻikai ke ke fakakaukauloto atu ai ki he ʻamanaki maʻongoʻonga kuo fokotuʻu ʻe Sihova maʻa ʻene faʻahinga mateakí? Kapau ko ha sevāniti kei siʻi koe ʻa e ʻOtuá, ʻokú ke vēkeveke fakatuʻamelie atu ki he māmani foʻoú? ʻOkú ke feinga tōtōivi ke “moui aga fakabotoboto . . . o tatali ki he amanaki fakamonuia” kuo ʻomi ʻe Sihova maʻaú? (Tai. 2:12, 13, PM) Ko hoʻo talí te ne tākiekina ʻa hoʻo ngaahi taumuʻá mo e ngaahi meʻa ʻokú ke fakamuʻomuʻá.
11. Ko e hā ʻoku totonu ai ki he fānau Kalisitiane ʻoku kei akó ke nau ngāue mālohí?
11 ʻOku loto ʻa e māmaní ke tuku taha ʻe he fānaú honau iví ki he ngaahi taumuʻa fakamāmaní. Ko e moʻoni, ko kimoutolu ko ia ʻoku kei akó ʻoku totonu ke mou ngāue mālohi ke maʻu ha tuʻunga fakaako tefito lelei. He ʻoku totonu ke ke manatuʻi, ko hoʻo taumuʻá ʻoku ʻikai ko e kumi pē ha ngāue feʻungamālie ka ke toe meʻangāueʻaki foki koe ʻe he fakatahaʻangá pea hoko ko ha tokotaha fanongonongo ola lelei ʻo e Puleʻangá. Ke aʻusia iá, ʻoku fiemaʻu ke ke malava ʻo lea lelei, fakakaukau lelei, pea ke fakaʻuhinga ʻi he anga-malū mo e anga-fakaʻapaʻapa ki he niʻihi kehé. Neongo ia, ko e fānau ʻoku nau ako ʻa e Tohi Tapú pea feinga ke ngāueʻaki ʻa e ngaahi tefitoʻi moʻoni aí ʻi heʻenau moʻuí, ʻoku nau maʻu ʻa e ako lelei taha ʻoku ala maʻú pea fokotuʻu ai ha fakavaʻe lelei ki ha kahaʻu lavameʻa mo taʻengata.—Lau ʻa e Sāme 1:1-3. a
12. Ko e hā ʻa e faʻifaʻitakiʻanga ʻe fakapotopoto ke faʻifaʻitaki ki ai ʻa e ngaahi fāmili Kalisitiané?
12 ʻI ʻIsileli, ko e ako naʻe maʻu ʻe he fānaú mei heʻenau mātuʻá ko ha meʻa mātuʻaki mahuʻinga ʻaupito ia. Ko e ako ko iá naʻe kau ki ai ʻa e meimei tafaʻaki kotoa pē ʻo e moʻuí, tautautefito ki he ngaahi meʻa fakalaumālié. (Teu. 6:6, 7) Ko ia ai, ko e fānau ʻIsileli ne nau fanongo ki heʻenau ongo mātuʻá mo e faʻahinga manavahē-ʻOtua kehe taʻumotuʻa angé, naʻa nau maʻu ʻa e ʻiló pea pehē foki ki he poto, fakamaama, mahino, mo e mafai fakaefakakaukau—ko e ngaahi ʻulungāanga ʻoku hāhāmolofia ke ʻasi ʻa ia ʻe lava ke ʻomai ʻe he ako fakaʻotuá. (Pal. 1:2-4; 2:1-5, 11-15) Ko e ngaahi fāmili Kalisitiane he ʻaho ní ʻoku totonu ke nau fai ʻa e tokanga tatau ki he akó.
Fanongo ki he Faʻahinga ʻOku ʻOfa ʻIate Koé
13. Ko e hā ʻa e faʻahinga faleʻi ʻoku maʻu ʻe he kau talavou ʻe niʻihi, pea ko e hā ʻoku totonu ai ke nau tokangá?
13 ʻOku maʻu ʻe he fānaú ʻa e faleʻi mei he faʻahinga kakai kehekehe kotoa pē—ʻo kau ai ʻa e kau faifaleʻi ʻi he ʻapiakó, ʻa kinautolu ʻoku nau fakakaukau ʻataʻatā pē ki he lavameʻa ʻi he ngāue fakaemāmaní. ʻOfa mai ʻo fuatautau ʻa e faleʻi pehē kotoa pē ʻi he faʻa lotu fakataha mo e fakamaama ʻa e Folofola ʻa e ʻOtuá pea mo e meʻakai fakalaumālie ʻoku tokonaki mai ʻe he kalasi tamaioʻeiki anga-tonu mo potó. Mei hoʻo ako ʻa e Tohi Tapú, ʻokú ke ʻiloʻi ai ko e faʻahinga kei siʻi mo taʻetaukeí ko e tāketi tefito ia ʻa Sētané. Ko e fakatātaá, ʻi he ngoue ʻo ʻĪtení, naʻe fanongo ai ʻa e taʻetaukei ko ʻIví kia Sētane, ko ha sola ʻa ia naʻe ʻikai haʻane meʻi ʻofa ʻe taha ʻia ʻIvi. He mei kehe moʻoni ē ko e olá kapau naʻá ne fanongo kia Sihova, ʻa e tokotaha naʻá ne ʻosi fakamoʻoniʻi ʻene ʻofa kiate iá ʻi he ngaahi tuʻunga lahi!—Sen. 3:1-6.
14. Ko e hā ʻoku totonu ke tau fanongo fakatouʻosi ai kia Sihova pea mo e ongo mātuʻa ʻi he tuí?
14 ʻOku ʻofa foki ʻa ho Tupuʻangá ʻiate koe, pea ʻokú ne fai pehē ʻi ha tuʻunga ʻoku haohaoa fakaʻaufuli. ʻOkú ne finangalo ke ke fiefia ʻo taʻengata, ʻo ʻikai ʻi he taimí ni pē! Ko ia ai, ʻi heʻene maʻu ʻa e ongoʻi manavaʻofa ʻo ha mātuʻa tokanga, ʻokú ne folofola mai kiate koe mo e faʻahinga kotoa ʻoku lotu kiate iá: “Ko eni ʻa e hala, fou ai.” (Ai. 30:21) Kapau ʻokú ke maʻu ha ongo mātuʻa ʻi he tuí ʻokú na ʻofa moʻoni ʻia Sihova, ko ha toe tāpuaki ia. Fanongo anga-fakaʻapaʻapa ki heʻena akonakí ʻi hono fokotuʻu ʻa e ngaahi meʻa ke fakamuʻomuʻá pea mo e ngaahi taumuʻá. (Pal. 1:8, 9) He ko e moʻoni, ʻokú na loto ke ke maʻu ʻa e moʻuí, ko ha meʻa ʻoku mahuʻinga mamaʻo ange ia ʻi he koloá pe ko e ongoongoa ʻi he māmani ko ʻení.—Mt. 16:26.
15, 16. (a) Ko e hā ʻa e loto-falala ʻe lava ke tau maʻu kia Sihová? (e) Ko e hā ʻa e lēsoni mahuʻinga ʻoku tau ako mei he meʻa ne hokosia ʻe Palukí?
15 Ko e faʻahinga ʻoku nau manatua honau Tupuʻangá ʻoku nau tauhi ke faingofua ʻenau moʻuí, ʻi he loto-falala ʻe “ʻikai siʻi te [ne] mahuʻi” meiate kinautolu “kaeʻumaʻā [haʻane] momoʻi liʻaki” kinautolu. (Lau ʻa e Hepelu 13:5.) Koeʻuhi ko e kauhala kehekehe ʻa e fakakaukau lelei ko ʻení mei he fakakaukau ʻa e māmaní, kuo pau ke tau tokanga ke ʻoua ʻe tuku ʻa e laumālie ʻo e māmaní ke ne tākiekina kitautolu. (Ef. 2:2) ʻI he fekauʻaki mo e meʻá ni, fakakaukau angé ki he faʻifaʻitakiʻanga ʻa e sekelitali ʻa Selemaiá, ʻa Paluki, ʻa ia naʻá ne moʻui lolotonga ʻa e ngaahi ʻaho faingataʻa fakaʻosi ʻo Selusalema naʻe iku atu ki he fakaʻauha ʻo e koló ʻi he 607 K.M.
16 Mahalo pē naʻe loto ʻa Paluki ke ʻai maʻana ha moʻui fakamatelie lelei ange. Naʻe ʻafioʻi ʻeni ʻe Sihova peá ne anga-lelei ʻo fakatokanga kia Paluki ke ʻoua te ne kei kumi maʻana ʻa e “ngaahi meʻa lalahi.” Naʻe fakamoʻoniʻi ʻa e anga-fakatōkilalo mo e poto ʻa Palukí, he naʻá ne fanongo kia Sihova ʻo ne hao moʻui ai ʻi he fakaʻauha ʻo Selusalemá. (Sel. 45:2-5) ʻI he tafaʻaki ʻe tahá, ko e ngaahi toʻumeʻa ʻo Paluki ʻa ia naʻa nau kumi ʻo maʻu ʻa e “ngaahi meʻa lalahi” fakamatelié kae fika ua ʻa Sihová, naʻe ʻikai fuoloa kuo mole ʻenau meʻa kotoa pē ki he nima ʻo e kau Kalitiá (kau Pāpiloné). Naʻe toe mole foki ʻa e moʻui ʻa e tokolahi. (2 Kal. 36:15-18) Ko e meʻa ne hokosia ʻe Palukí ʻoku tokoniʻi ai kitautolu ke tau sio ko e vahaʻangatae lelei mo e ʻOtuá ʻoku mahuʻinga lahi ange ia ʻi he koloa mo e tuʻu-ki-muʻa ʻi he māmani ko ʻení.
Sio ki he Ngaahi Faʻifaʻitakiʻanga Lelei Tahá
17. Ko e hā ko ha kau faʻifaʻitakiʻanga lelei ai ʻa Sīsū, Paula mo Tīmote ki he kau sevāniti ʻa Sihova he ʻaho ní?
17 Ke tokoniʻi kitautolu ʻi he hala ʻoku fakatau ki he moʻuí, ʻoku ʻomi ʻe he Folofola ʻa e ʻOtuá ʻa e ngaahi faʻifaʻitakiʻanga lelei moʻoni. Ko e fakatātaá, ko Sīsū, ko e tangata talēnitiʻia lahi taha ia kuo faifai ange pea moʻuí, neongo ia naʻá ne hangataha ki he meʻa te ne tokoniʻi taʻengata ʻa e kakaí—“a e ongoongolelei . . . ʻa e Puleʻanga.” (Luke 4:43) Ke ʻoange kia Sihova ʻa ʻene lelei tahá, naʻe liʻaki ai ʻe he ʻapositolo ko Paulá ha ngāue māʻolunga pea ngāueʻaki hono taimí mo e iví ke malangaʻi ʻa e ongoongo leleí. Ko Tīmote, ko ha “foha moʻoni ʻi he lotu,” naʻá ne faʻifaʻitaki ki he faʻifaʻitakiʻanga lelei ʻa Paulá. (1 Tim. 1:2) Naʻe fakaʻiseʻisa nai ʻa Sīsū, Paula mo Tīmote ʻi he ʻalunga ʻo ʻenau moʻuí? Mole ke mamaʻo! Ko hono moʻoní, naʻe pehē ʻe Paula naʻá ne vakai ki he meʻa naʻe tuʻuaki ange ʻe he māmaní ko e “kinohaʻa pe” ʻi hono fakahoa atu ki he monū ʻo e tauhi ki he ʻOtuá.—Fili. 3:8-11.
18. Ko e hā ʻa e ngaahi liliu lahi naʻe fai ʻe ha tokoua kei siʻi ʻe taha, pea ko e hā ʻoku ʻikai ai haʻane fakaʻiseʻisá?
18 Ko e fānau Kalisitiane tokolahi he ʻahó ni ʻoku nau faʻifaʻitaki ki he tui ʻa Sīsū, Paula mo Tīmoté. Ko e fakatātaá, naʻe tohi ʻe ha tokoua kei siʻi ʻa ia naʻe ʻi ai haʻane ngāue vahe lelei ki muʻa: “Koeʻuhi ko ʻeku moʻuiʻaki ʻa e ngaahi tefitoʻi moʻoni ʻa e Tohi Tapú, naʻe vave ʻeku maʻu ʻa e ngaahi hikihiki lakangá. Neongo ʻa e ngaahi monū fakapaʻangá, ne u ongoʻi ʻe au ko ʻeku meʻa naʻe faí ko e kai matangi pē. ʻI heʻeku fakalea ki he kōmiti pulé ʻo fakahaaʻi ʻa ʻeku holi ke tuli ki he ngāue fakafaifekau taimi-kakató, ne nau fakavave hake hono tuʻuaki mai ʻa e ngaahi monū fakapaʻanga lahi ange, ʻi he ʻamanekina te u kei ngāue pē. Ka ne u ʻosi fakapapauʻi ʻe au ʻa e meʻa ke faí. Naʻe ʻikai lava ke mahinoʻi ʻe he kakai tokolahi ʻa e ʻuhinga ne u liʻaki ai ha ngāue vahe lelei kae tuli ki he ngāue taimi-kakató. Ko ʻeku tali ki aí ko ʻeku loto moʻoni ke moʻuiʻaki ʻa ʻeku fakatapui ki he ʻOtuá. Koeʻuhi ʻoku tefito ʻeku moʻuí he taimí ni ʻi he ngaahi meʻa fakalaumālié, ʻoku ou maʻu ha fiefia mo e nonga ʻa ia ʻe ʻikai ha lahi ʻo e paʻangá pe ongoongoá te ne lava ke ʻomi kiate au.”
19. Ko e hā ʻa e fili fakapotopoto ʻoku fakalototoʻaʻi ʻa e fānaú ke nau faí?
19 ʻI māmani lahi, ʻoku laui afe ʻa e fānau kuo nau fai ʻa e ngaahi fili fakapotopoto meimei tatau. Ko ia ai fānau, ʻi hoʻomou fakakaukauloto atu ki homou kahaʻú, tauhi maʻu ʻi he fakakaukaú ʻa e ʻaho ʻo Sihová. (2 Pita 3:11, 12) ʻOua ʻe meheka ki he faʻahinga ʻoku tuʻumālie ʻi he māmani ko ʻení. ʻI hono kehé, fanongo ki he faʻahinga ʻoku nau ʻofa moʻoni ʻiate koé. Ko e “faʻoaki koloa . . . ʻi langi” ʻa e fakahū paʻanga malu taha ʻe lava ke ke faí pea ko e meʻa pē ia ʻe maʻu mei ai ʻa e ʻaonga tuʻuloá. (Mt. 6:19, 20; lau ʻa e 1 Sione 2:15-17.) ʻIo, manatu ki ho Tupuʻangá. ʻI hoʻo fai peheé, ʻe tāpuakiʻi ai koe ʻe Sihova.
[Fakamatala ʻi lalo]
a ʻI he fekauʻaki mo e ako māʻolunga angé mo e ngāué, sio ki he Taua Leʻo, ʻOkatopa 1, 2005, peesi 26-31.
ʻE Lava Ke Ke Manatuʻi?
• ʻOku anga-fēfē ʻetau fakahāhā ʻa e falala ki he ʻOtuá?
• Ko e hā ʻa e ako mātuʻaki lelei tahá?
• Ko e hā ʻa e ngaahi lēsoni ʻe lava ke tau ako meia Palukí?
• Ko hai kinautolu naʻe hoko ko e kau faʻifaʻitakiʻanga leleí, pea ko e hā hono ʻuhingá?
[Fehuʻi ki he Ako]
[Fakatātā ʻi he peesi 13]
ʻOku tokonaki mai ʻe Sihova ʻa e ako lelei tahá
[Fakatātā ʻi he peesi 15]
Naʻe fanongo ʻa Paluki kia Sihova peá ne hao moʻui ai ʻi he fakaʻauha ʻo Selusalemá. Ko e hā ʻe lava ke ke ako mei he faʻifaʻitakiʻanga ko iá?