ʻOkú Ke Vakai ki he Niʻihi Kehé ʻo Hangē ko e Vakai ʻa Sihová?
ʻOkú Ke Vakai ki he Niʻihi Kehé ʻo Hangē ko e Vakai ʻa Sihová?
“Ke ʻoua naʻa ai ha mavahevahe ʻi he sino; ka ke tatau ʻa e fetokangaʻaki ʻa e ngaahi kupu.”—1 KOL. 12:25.
1. Naʻe anga-fēfē hoʻo ongoʻí ʻi he taimi naʻá ke ʻuluaki hū ai ki he palataisi fakalaumālié?
ʻI HEʻETAU ʻuluaki haʻu mei he māmani fulikivanú ʻo kamata feohi mo e kakai ʻa Sihová, ʻoku pau pē ne tau fiefia ʻi hono aʻusia ʻa e ʻofa mo e fetokangaʻaki māfana ʻoku lotolotoi ʻiate kinautolú. He kehekehe moʻoni ē mei he kakai anga-kovi, fetāufehiʻaʻaki, mo fekeʻikeʻi ʻoku ʻi he malumalu ʻo e pule ʻa Sētané! Kuo tau ō mai kitautolu ki he palataisi fakalaumālie ʻa ia ʻoku fonu ʻi he melino mo e fāʻūtaha.—Ai. 48:17, 18; 60:18; 65:25.
2. (a) Ko e hā te ne uesia nai ʻa ʻetau vakai ki he niʻihi kehé? (e) Ko e hā ʻe fiemaʻu nai ke tau faí?
2 Kae kehe, ʻi he ʻalu ʻa e taimí, te tau kamata vakai nai ai ki hotau fanga tokouá fakafou ʻi he lauʻi sioʻata nenefu ʻo e taʻehaohaoá. ʻE lava ke ʻai ʻe heʻetau taʻehaohaoá ke tau fakaʻata lahi ʻe kitautolu ʻa e ngaahi fehālaaki ʻa hotau fanga tokouá kae ʻikai sio ki honau ngaahi ʻulungāanga fakalūkufua fakalaumālié kotoa. Hangē ko e laú, kuo ngalo ia ke tau vakai kiate kinautolu ʻo hangē ko e vakai ʻa Sihová. Kapau ʻe hoko ʻeni kiate kitautolu, kuo taimi ke fai ha tokanga ki he anga ʻetau vakaí pea ʻomi ia ke tatau mo e vakai totonu ʻa Sihová.—Eki. 33:13.
Anga ʻo e Vakai ʻa Sihova ki Hotau Fanga Tokouá
3. ʻOku fakahoa ki he hā ʻe he Tohi Tapú ʻa e fakatahaʻanga Kalisitiané?
3 Hangē ko ia ʻoku lēkooti ʻi he 1 Kolinito 12:2-26, naʻe fakahoa ʻe he ʻapositolo ko Paulá ʻa e fakatahaʻanga ʻo e kau Kalisitiane paní ki ha sino ʻoku “lahi hono ngaahi kupu.” Hangē tofu pē ko e kehekehe ʻa e ngaahi ʻōkani taki taha ʻi he sinó, ʻoku ʻi ai ʻa e faikehekehe lahi ʻi he ngaahi mēmipa ʻi he fakatahaʻangá ʻi honau ngaahi ʻulungāangá mo e malavá. Neongo ia, ʻoku tali ʻe Sihova ʻa e ngaahi tuʻunga kehekehe ko ʻení. ʻOkú ne ʻofaʻi mo fakamahuʻingaʻi ʻa e mēmipa taki taha. ʻOku pehē pē ʻa e faleʻi mai ʻa Paula ʻoku totonu “ke tatau ʻa e fetokangaʻaki ʻa e ngaahi kupu” ʻi he fakatahaʻangá. ʻE faingataʻa nai ʻeni koeʻuhí ʻe lava ke kehe ʻa e ngaahi angaʻitangata ʻo e niʻihi kehé mei haʻatautolu.
4. Ko e hā ʻe fiemaʻu nai ai ke fakatonutonu ʻa e anga ʻo ʻetau vakai ki hotau fanga tokouá?
4 ʻE aʻu nai ʻo tau hehema ke sio taha pē ki he ngaahi vaivaiʻanga ʻa hotau fanga tokouá. ʻI he fai peheé, ʻoku tau ngāueʻaki ai ha meʻa faitā ʻa ia ʻoku fakahangataha pē ai ʻa e lauʻi sioʻatá ki ha kiʻi ʻata siʻisiʻi pē. Ka, ko e vakai ia ʻa Sihová ʻoku fakafou ia ʻi ha lauʻi sioʻata fālahi, ʻa ia ʻoku lava ke ne maʻu kotoa ʻa e ʻatá fakataha mo hono ngaahi ʻātakaí. Te tau hehema nai ke fakaʻatalahi ha faʻahinga meʻa ʻoku ʻikai te tau saiʻia ai, lolotonga iá ʻoku vakai ʻa Sihova ia ki he tokotahá kakato, ʻo kau ai ʻa hono ngaahi ʻulungāanga leleí kotoa. Ko e lahi ange ʻetau feinga ke hangē ko Sihová, ko e lahi ange ia ʻetau pouaki ʻa e laumālie ʻo e ʻofa mo e fāʻūtaha ʻi he fakatahaʻangá.—Ef. 4:1-3; 4:32e, 33 (Ef 5:1, 2, PM).
5. Ko e hā ʻoku ʻikai totonu ai ke tau fakamāuʻi ʻa e niʻihi kehé?
5 Naʻe ʻiloʻi lelei ʻe Sīsū ko e faʻahinga taʻehaohaoa ʻo e tangatá ʻoku nau faʻa maʻu ʻa e hehema ke fakamāuʻi ʻa e niʻihi kehé. Naʻá ne akonaki ʻo pehē: “Tuku ʻa e faifakamāú koeʻuhi ke ʻoua ʻe fakamāuʻi kimoutolu.” (Mt. 7:1, NW) Fakatokangaʻi ange naʻe ʻikai ke pehē ʻe Sīsuú: “ʻOua naʻa mou fakamaau”; naʻá ne pehē: “Tuku ʻa e faifakamāú.” Naʻá ne ʻiloʻi ʻe ia ko e tokolahi ʻi heʻene kau fanongó naʻa nau ʻosi angaʻaki ʻe kinautolu ʻa hono fakaangaʻi ʻa e niʻihi kehé. ʻE lava nai ke pehē kuo tau fakatupulekina ʻe kitautolu ʻa e anga ko iá? Kapau ʻoku tau maʻu ʻa e hehema ko iá, ʻoku fiemaʻu ke tau fai ha feinga lahi ke liliu, koeʻuhí ke ʻoua ʻe fakamaau tamaki kitautolu. Ko hono moʻoní, ko hai kitautolu ke tau fakamāuʻi ha tokotaha ʻa ia ʻoku ngāueʻaki ʻe Sihova ʻi ha tuʻunga kuo fakanofo ki ai, pe ko haʻatau pehē ʻoku ʻikai totonu ke ne hoko ko ha konga ʻo e fakatahaʻangá? ʻE ʻi ai nai ha ngaahi tōnounou ʻa ha tokoua, ka ʻo kapau ʻoku kei tali pē ia ʻe Sihova, ʻe totonu nai kiate kitautolu ke ʻoua te tau talitali lelei ia? (Sione 6:44) ʻOku tau tui moʻoni ʻoku tataki ʻe Sihova ʻa ʻene kautahá pea kapau ʻe ʻi ai ha ngaahi fakatonutonu ʻe fiemaʻu, te ne fai ha ngāue ki ai ʻi heʻene taimi kotofa ʻaʻaná?—Lau ʻa e Loma 14:1-4.
6. ʻOku anga-fēfē ʻa e vakai ʻa Sihova ki heʻene kau sevānití?
6 Ko ha meʻa fisifisimuʻa fekauʻaki mo Sihová, ʻoku malava ke ne ʻafioʻi ʻi he Kalisitiane taki taha ʻa e meʻa te nau malava ke faí ʻi heʻenau aʻusia pē ko ia ʻa e haohaoá ʻi he māmani foʻoú. ʻOkú ne toe ʻiloʻi foki ʻa e fakalakalaka fakalaumālie kuo nau ʻosi aʻusiá. Ko ia ai, ʻoku ʻikai ha ʻuhinga ia ke ne hangataha pē ki he vaivaiʻanga fakaekakanó. ʻOku tau lau ʻi he Sāme 103:12: “Hange ko hahake mo hihifo hona vamamaʻo, ʻoku mamaʻo pehē ʻene ʻave ʻiate kitaua ʻeta ngaahi maumau lao.” He fakamālōʻia fakafoʻituitui ē ko kitautolu ʻi he meʻa ko iá!—Sāme 130:3.
7. Ko e hā ʻoku tau ako mei he anga ʻo e vakai ʻa Sihova kia Tēvitá?
7 ʻOku tau sio ki he fakamoʻoni ʻi he Tohi Tapú ki he malava fisifisimuʻa ʻa Sihova ke hangataha pē ki he lelei ʻi ha tokotaha. Naʻe fakamatalaʻi ʻe he ʻOtuá ʻa Tēvita “ko ʻeku tamaioʻeiki ko Tevita, ʻa ia naʻa ne tauhi ʻeku ngaahi tuʻutuʻuni, ʻo ne muimui kiate au ʻaki hono loto kotoa ke fai pe ʻa e meʻa ʻoku ha totonu kiate au.” (1 Tuʻi 14:8) Ko e moʻoni, ʻoku tau ʻiloʻi naʻe fai ʻe Tēvita ʻa e ngaahi meʻa naʻe hala. Neongo ia, naʻe fili ʻa Sihova ke hangataha ki heʻene leleí koeʻuhí naʻá ne ʻafioʻi naʻe loto-totonu ʻa Tēvita.—1 Kal. 29:17.
Vakai ki Ho Tokouá Hangē ko e Vakai ʻa Sihová
8, 9. (a) ʻI he founga fē ʻe lava ke tau hoko ai ʻo hangē ko Sihová? (e) ʻE anga-fēfē nai hono fakatātaaʻi ʻení, pea ko e hā ʻa e lēsoni kiate kitautolú?
8 ʻOku lava ke sio ʻa Sihova ki he lotó, lolotonga iá ʻoku ʻikai ke tau malava ia. Ko e tuʻungá ni ʻiate ia pē, ko ha ʻuhinga lelei ia kiate kitautolu ke ʻoua te tau faifakamaau. ʻOku ʻikai te tau ʻilo ki he kotoa ʻo e ngaahi fakaueʻiloto ʻa ha tokotaha. ʻOku totonu ke tau feinga ke faʻifaʻitaki kia Sihova ʻo ʻoua ʻe tokangataha ki he ngaahi taʻehaohaoa fakaetangatá, ʻa ia ʻe faifai atu pē ʻo pulí. ʻIkai ko ha taumuʻa lelei ia ke hoko ʻo hangē ko Iá ʻi he fekauʻaki mo e meʻá ni? Ko ʻetau fai peheé ʻe tokoni lahi ia ki he vahaʻangatae melino mo hotau fanga tokouá mo e fanga tuofāfiné.—Ef. 4:23, 24.
9 Ke fakatātaaʻi, fakakaukau atu ki ha fale ʻoku motuʻa ʻaupito—ʻoku fehomokaki hifo ʻa e ʻū fakatalí, mafahifahi ʻa e luvá pea tutulu mo e ʻaofí. ʻE vakai nai ʻa e tokolahi taha ʻo e kakaí ki he falé pea fakamulitukuʻaki ʻo pehē ʻoku totonu ke holoki; ʻoku palakū ʻaupito ia ki he sió. Ka ʻe haʻu nai ha taha ia ʻoku kehe ʻaupito ʻa e anga ʻo ʻene vakai ʻaʻana ki aí. ʻE malava nai ke sio fakalaka atu ia ʻi he ngaahi palopalema ʻoku hā ki tuʻá ʻo sio ia ki he alanga falé ʻoku mālohi pea ʻe lava pē ke toe fakaleleiʻi. ʻOkú ne fakatau leva ʻa e falé ʻo fai ha monomono ki he ngaahi maumau ʻoku hā ki tuʻá pea fakaleleiʻi ke hā fakaʻofoʻofa ange. Hili iá, ʻoku talanoa ʻa e faʻahinga ʻoku lue haké ki he fakaʻofoʻofa ʻa e falé. ʻE lava nai ke tau hangē ko e tokotaha ko ʻeni naʻá ne ngāue ke monomono pe toe fakafoʻou ʻa e falé? ʻI he ʻikai hangataha pē ki he ngaahi tōnounou ʻoku hā mai ʻi hotau fanga tokouá, ʻe lava nai ke tau fakatokangaʻi ʻenau ngaahi anga ʻoku leleí mo ʻenau malava ke tupulekina fakalaumālie lahi angé? Kapau ʻe pehē, te tau hoko ai ʻo ʻofa ki hotau fanga tokouá koeʻuhi ko ʻenau fakaʻofoʻofa fakalaumālié, ʻo hangē pē ko Sihová.—Lau ʻa e Hepelu 6:10.
10. ʻE lava fēfē ke tokoniʻi kitautolu ʻe he faleʻi ʻoku hā ʻi he Filipai 2:3, 4?
10 Naʻe fai ʻe he ʻapositolo ko Paulá ha faleʻi ʻa ia ʻe lava ke ne tokoniʻi kitautolu ʻi hotau vahaʻangatae mo e faʻahinga kotoa ʻi he fakatahaʻangá. Naʻá ne ekinaki ki he kau Kalisitiané: “ʻOua ʻe feinga ki ha meʻa ko e fakafekākeʻi, pe ko e fieongoongoa; ka ʻi hoʻomou loto taʻehiki mou taki taha lau ʻoku lelei hake ʻa hono kainga ʻiate ia: pea ʻoua naʻa taki taha tokanga ki heʻene meʻa aʻana pe, ka ki he meʻa ʻa e kakai kehe foki.” (Fili. 2:3, 4) ʻE tokoniʻi kitautolu ʻe he anga-fakatōkilaló ke tau maʻu ʻa e vakai totonu ki he niʻihi kehé. Ko hono fakahāhā ʻa e mahuʻingaʻia fakafoʻituitui ʻi he niʻihi kehé mo e sio ki he lelei ʻiate kinautolú, ʻe toe tokoni foki ia ke tau vakai ai kiate kinautolu ʻo hangē ko e vakai ʻa Sihová.
11. Ko e hā ʻa e ngaahi liliu ʻa ia kuo hoko ki he ngaahi fakatahaʻanga ʻe niʻihi?
11 ʻI he ngaahi taimi ki muí ni maí, kuo iku ai ʻa e ngaahi fakalakalaka fakamāmanilahí ki he ngaahi fengaʻunuʻaki lahi ʻi he kakaí. Ko e ngaahi kolo ʻe niʻihi kuo nofoʻi ia ʻe he kakai tokolahi mei he ngaahi fonua kehé. Ko e niʻihi ʻo e kakai ʻoku nau omi foʻou ki hotau feituʻú kuo nau hoko ʻo mahuʻingaʻia ʻi he moʻoni he Tohi Tapú, pea kuo nau kau fakataha mo kitautolu ʻi he lotu kia Sihová. Ko e faʻahinga ʻeni “mei he puleʻanga kotoa pē, mo e ngaahi matakali, mo e ngaahi faʻahinga, mo e ngaahi lea.” (Fkh. 7:9) Ko hono olá, ʻoku hoko ai ʻi ha tuʻunga ʻa ʻetau ngaahi fakatahaʻanga lahi ʻo toe fakavahaʻapuleʻanga ange.
12. Ko e hā ʻa e faʻahinga vakai ki he tokotaha taki taha ʻoku fiemaʻu ke tau tauhi maʻú, pea ko e hā ʻe hoko nai ai ʻeni ʻo faingataʻa ʻi he taimi ʻe niʻihi?
12 ʻI heʻetau fakatahaʻangá, ʻe fiemaʻu nai ai ke tau tokanga lahi ange ke tauhi maʻu ha vakai totonu ki he niʻihi kehé. ʻOku fakamanatu mai ke tau manatuʻi ʻa e akonaki ʻa e ʻapositolo ko Pitá ke fakahāhā ʻa e “feʻofaʻaki fakalotu ʻoku taʻeloi” pea ke “tōtōivi [ʻi he] fai ʻofa ʻa e taha ki he taha, ʻo fai mei he loto.” (1 Pita 1:22) Ko hono fakatupulekina ʻa e ʻofa mo e manavaʻofa moʻoní ʻe lava ke faingataʻa ia ʻi ha fakatahaʻanga ʻoku tokolahi ai ʻa e kakai mei he feituʻu kehekehe. Ko e anga fakafonua ʻo hotau kaungālotú ʻe faikehekehe lahi nai ia mei haʻatautolú, pea pehē ki honau puipuituʻa fakaako, fakaʻekonōmika mo e fakamatakali. ʻOku faingataʻa nai kiate koe ke ke mahinoʻi ʻa e fakakaukau pe ngaahi tōʻonga ʻa ha niʻihi? Te nau ongoʻi nai ʻa e meʻa tatau pē ʻo fekauʻaki mo koe. Ka neongo ia, ʻoku fakahinohino mai kia kitautolu hono kotoa: “Maʻu ʻa e ʻofa ki he feohiʻanga fakakātoa ʻo e fanga tokouá.”—1 Pita 2:17, NW.
13. Ko e hā ʻa e ngaahi fakatonutonu ʻi heʻetau fakakaukaú ʻe fiemaʻu nai ke tau faí?
13 ʻE fiemaʻu nai ke fai ha ngaahi fakatonutonu ʻi heʻetau fakakaukaú kae lava ke fano atu ʻetau ʻofá ki he kotoa hotau fanga tokouá. (Lau ʻa e 2 Kolinito 6:12, 13.) Kuo tau ʻosi fakatokangaʻi hifo nai ʻoku tau leaʻaki ha meʻa hangē ko ʻení, “ʻOku ʻikai ke u tomuʻa fehiʻa au, ka . . . ” pea tau fakalau ʻe kitautolu ʻa e niʻihi ʻo e ngaahi ʻulungāanga ʻikai lelei ʻa ia ʻoku tau pehē ʻoku hokolahia ʻi he kakai ʻo ha faʻahinga matakali? Ko ha faʻahinga ongoʻi pehē ʻe fakaeʻa nai ai ʻa e fiemaʻu ke taʻaki fuʻu ʻa e tomuʻa fehiʻa ʻoku tau kei tukulotoá. Te tau ʻeke hifo nai kiate kitautolu, ‘ʻOku ou fai ha feinga tuʻumaʻu ke u ʻiloʻi ʻa e kakai ʻo ha anga fakafonua ʻoku kehe mei haʻakú?’ Ko ha sivisiviʻi-kita pehē ʻe lava ke ne tokoniʻi kitautolu ke ʻai ke tau hoko ʻo lelei ange ʻi hono tali pea mo koloaʻaki ʻa ʻetau fetokouaʻaki fakavahaʻapuleʻangá.
14, 15. (a) ʻOmai ʻa e faʻifaʻitakiʻanga ʻo e toko ua naʻá na fakatonutonu ʻa e anga ʻo ʻena vakai ki he niʻihi kehé. (e) ʻE lava fēfē ke tau faʻifaʻitaki kiate kinaua?
14 ʻOku ʻomai ʻe he Tohi Tapú ʻa e ngaahi faʻifaʻitakiʻanga lelei ʻo e faʻahinga naʻa nau fai ʻa e fakatonutonu, ʻa ia ko e taha ʻo kinautolu ko e ʻapositolo ko Pitá. ʻI he tuʻunga ko ha Siú, naʻe mei fakaʻehiʻehi ai ʻa Pita mei he hū ki he ʻapi ʻo ha Senitaile. Kiʻi sioloto atu ki he anga ʻene ongoʻí ʻi he taimi naʻe kole ange ai ke ne ʻaʻahi ki he ʻapi ʻo e Senitaile taʻekamu ko Koliniusí! Naʻe fai ʻe Pita ʻa e ngaahi fakatonutonu, ʻi he ʻiloʻi ko e finangalo ia ʻo e ʻOtuá ke hoko ʻa e kakai ʻo e puleʻanga kotoa pē ko e konga ʻo e fakatahaʻanga Kalisitiané. (Ng. 10:9-35) Ko Saula, ʻa ia naʻe hoko ki mui ko e ʻapositolo ko Paulá, naʻe pau foki kiate ia ke ne fai ha ngaahi liliu pea ke siʻaki ʻa e tomuʻa fehiʻá. Naʻá ne tala totonu ʻa ʻene fehiʻa ʻaupito ʻi he kau Kalisitiané ʻo ‘makehe atu ʻene fakatangaʻi ʻa e siasi ʻa e ʻOtuá, mo ʻene laiki iá.’ Neongo ia, ʻi he taimi naʻe fakatonutonu ai ʻa Paula ʻe he ʻEiki ko Sīsuú, naʻá ne fai leva ha ngaahi liliu lahi pea aʻu ʻo kamata ke ne tali ʻa e fakahinohino mei he faʻahinga naʻá ne ʻuluaki fakatangaʻí.—Kal. 1:13-20.
15 ʻOku ʻikai ha veiveiua ʻe lava ke tau fai ha ngaahi fakatonutonu ʻi heʻetau fakakaukaú ʻaki ʻa e tokoni mei he laumālie ʻo Sihová. Kapau ʻoku tau ʻiloʻi hifo ʻoku ʻi ai ha ngaahi fāliunga ʻo e tomuʻa fehiʻá ʻoku kei puli ʻiate kitautolu, tau feinga leva ke taʻaki fuʻu ia pea ke “tauhi ʻaki ʻa e noʻo ko e melino, ʻa e taha kuo fakatupu ʻe he Laumalie.” (Ef. 4:3-6) ʻOku fakalototoʻaʻi kitautolu ʻe he Tohi Tapú ke tau “kofutuʻaʻaki ʻa e ngaahi meʻa ko ia katoa ʻa e ʻofa, ʻa ia ko e fakamaʻu ʻo e haohaoa.”—Kol. 3:14.
Faʻifaʻitaki kia Sihova ʻi he Ngāue Fakafaifekaú
16. Ko e hā ʻa e finangalo ʻo e ʻOtuá ki he kakaí?
16 “ʻOku ʻikai ha filifilimānako ʻi he ʻOtua,” ko e tohi ia ʻe he ʻapositolo ko Paulá. (Loma 2:11) Ko e taumuʻa ia ʻa Sihová ke kau ʻa e kakai ʻo e puleʻanga kotoa pē ʻi heʻene fokotuʻutuʻu ki he lotú. (Lau ʻa e 1 Timote 2:3, 4.) Ke lavaʻi iá, kuó ne fokotuʻutuʻu ai ke talaki ʻa e “ogoogolelei taegata . . . ki he buleaga kotoabe, moe faahiga, moe lea, moe kakai.” (Fkh. 14:6, PM) Naʻe pehē ʻe Sīsū: “Ko e ngoue ko māmani.” (Mt. 13:38) Ko e hā ʻa e kaunga ʻo e meʻa ko iá kiate koe mo ho fāmilí tonu?
17. ʻE lava fēfē ke tau tokoni ki he faʻahinga kakai kotoa pē?
17 ʻOku ʻikai malava ʻa e taha kotoa ke ō ki he ngaahi feituʻu mamaʻo ʻi he māmaní ke ʻave ʻa e pōpoaki ʻo e Puleʻangá ki he niʻihi kehé. Ka neongo ia, ʻe malava nai ke tau ʻave ʻa e pōpoaki ko ʻení ki he kakai mei he ngaahi feituʻu kehekehe ʻo e māmaní ʻa ia ʻoku nau nofo ʻi hotau feituʻú. ʻOku tau tokanga ki he ngaahi faingamālie ke faifakamoʻoni ai ki he faʻahinga kakai kotoa, ʻo ʻikai ki he faʻahinga pē kuo tau ʻosi malanga ʻi he laui taʻu kia kinautolú? Fēfē ke ke ʻai ia ko hoʻo fakapapau ke aʻu ki he niʻihi ʻa ia kuo teʻeki ai fai ki ai ha faifakamoʻoni fakaʻāulilikí!—Loma 15:20, 21.
18. Ko e hā ʻa e tokanga naʻe fakahāhā ʻe Sīsū ki he kakaí?
18 Naʻe ongoʻi lahi ʻe Sīsū ʻa e fiemaʻu ke tokoniʻi ʻa e tokotaha kotoa. Naʻe ʻikai te ne malanga ʻi he feituʻu pē ʻe taha. ʻOku tala mai ʻe he fakamatala ʻe taha ʻi he Tohi Tapú naʻe “foli ʻe Sisu ʻa e ngāhi kolo mo e ngāhi vilisi.” Pea “ʻi heʻene sio ki he ngāhi fuʻu kakai, naʻe langa hono fatu ʻi he ʻofa kiate kinautolu” peá ne fakahāhā ʻa e fiemaʻu ke tokoniʻi kinautolú.—Mt. 9:35-37.
19, 20. Ko e hā ʻa e ngaahi founga ʻe niʻihi ʻa ia ʻe lava ke tau tapua atu ai ʻa e tokanga ʻoku maʻu ʻe Sihova mo Sīsū ki he kakai ʻo e faʻahinga kotoa pē?
19 Ko e hā ha ngaahi founga ʻe niʻihi ʻe lava ai ke ke fakahāhā ha fakakaukau meimei tatau? Kuo fai ʻe he niʻihi ha feinga ke faifakamoʻoni ʻi he ngaahi feituʻu ʻi honau vāhenga-ngāué ʻa ia kuo ʻikai faʻa ngāueʻi. ʻE kau nai ki heni ʻa e ngaahi feituʻu pisinisí, paʻake, ngaahi taliʻanga fefonongaʻakí pe ʻi muʻa ʻi he ngaahi ʻapi nofoʻanga ʻoku ʻikai lava ke fai ha hū ki aí. Kuo fai ʻe he niʻihi ʻa e feinga ke ako ha lea foʻou ke malanga ai ki ha faʻahinga matakali ʻa ia kuo nau nofo he taimí ni ʻi honau feituʻú pe faʻahinga kuo ʻikai faʻa fai ha fakamoʻoni ki ai ʻi he kuohilí. Ko e ako ki he anga ʻo e fakafeʻiloaki ki he kakai ko iá ʻi heʻenau lea tuʻufonuá ʻe hā ai ʻa e lahi ʻa hoʻo mahuʻingaʻia ʻiate kinautolú. Kapau ʻoku ʻikai ke tau ʻi ha tuʻunga ke ako ha lea ʻe taha, ʻe lava nai ke tau fakalototoʻaʻi ʻa e faʻahinga ʻoku nau fai iá? Ko e moʻoni ʻe ʻikai te tau loto ke fakalotosiʻi pe fehuʻia ʻa e ʻuhinga ʻoku fai ai ʻe he niʻihi kehé ha feinga pehē ke malanga ki he kakai mei ha fonua ʻe taha. ʻOku mahuʻinga ʻa e moʻui kotoa pē ki he ʻOtuá, pea ʻoku tau loto ke vakai ki he ngaahi meʻá ʻi he founga tatau.—Kol. 3:10, 11.
20 Ko hono maʻu ʻa e vakai ʻa e ʻOtuá ki he kakaí ʻoku toe ʻuhinga ia ko e malanga ki he tokotaha kotoa, ʻo tatau ai pē pe ko e hā honau tuʻungá. ʻE ʻikai nai ʻi ai ha ʻapi ʻo ha niʻihi, taʻemaau, pe hā mahino mai ʻoku nau moʻui ʻi ha ʻalunga moʻui taʻetaau. Kapau ʻoku ʻikai anga-lelei mai ha niʻihi, ʻoku ʻikai totonu ke ne ʻai ai kitautolu ke tau fakakaukau ʻikai lelei fekauʻaki mo honau anga-fakafonuá pe matakalí ʻi he tuʻunga fakalūkufuá. Naʻe ngaohikovia ʻa Paula ʻe he niʻihi, ka naʻe ʻikai te ne fakaʻatā ia ke tupu ai ʻene foʻi ʻi he malanga ki he kakai ʻi he faʻahinga puipuituʻa ko iá. (Ng. 14:5-7, 19-22) Naʻá ne loto-falala ʻe lava ke ʻi ai ʻa e niʻihi tāutaha te nau fai ha tali loto-houngaʻia.
21. ʻE anga-fēfē hono tokoniʻi koe ʻe he maʻu ko ia ʻa e anga ʻo e vakai ʻa Sihova ki he niʻihi kehé?
21 ʻOku mātuʻaki mahino leva ʻi he taimí ni ko hono maʻu ha vakai totonú—ʻa e anga ʻo e vakai ʻa Sihová—ʻoku fiemaʻu ia ʻi heʻetau feangainga mo hotau fanga tokoua ʻi hotau feituʻú, mo ʻetau fetokouaʻaki fakavahaʻapuleʻangá pea mo e kakai ʻi he malaʻe malangá. Ko e lahi ange ʻetau tapua atu ʻa e anga ʻo e vakai ʻa Sihová, ko ʻetau hoko lahi ange ia ko ha tākiekina ki he melinó mo e fāʻūtahá. Pea te tau faingamālie ange ai ke tokoniʻi ʻa e niʻihi kehé ke nau koloaʻaki ʻa Sihova, ʻa e ʻOtua ʻoku ʻikai ke “filifilimanako” ka ʻokú ne fakahāhā ʻa e tokanga ʻofa ki he taha kotoa, “he koe gaue a hono nima akinautolu kotoabe.”—Siope 34:19, PM.
ʻE Lava Ke Ke Tali?
• Ko e hā ʻa e faʻahinga vakai ki hotau fanga tokouá ʻoku totonu ke tau feinga ke fakaʻehiʻehi mei aí?
• ʻE lava fēfē ke tau faʻifaʻitaki kia Sihova ʻi he anga ʻo ʻetau vakai ki hotau fanga tokouá?
• Ko e hā ʻa e ngaahi lēsoni naʻá ke ako fekauʻaki mo ʻetau vakai ki heʻetau fetokouaʻaki fakavahaʻapuleʻangá?
• ʻE lava fēfē ke tau faʻifaʻitaki ki he anga ʻo e vakai ʻa Sihová ʻi heʻetau ʻi he ngāue fakafaifekaú?
[Fehuʻi ki he Ako]
[Fakatātā ʻi he peesi 26]
ʻE lava fēfē ke ke hoko ʻo ʻiloʻi ʻa e kakai ʻo e ngaahi anga fakafonua kehé?
[Fakatātā ʻi he peesi 28]
ʻI he ngaahi founga fē ʻe lava ke ke aʻu ai ki he kakai tokolahi ange mo e ongoongo leleí?