Ngaahi Meʻa Mahuʻinga mei he Tohi Maaké
ʻOku Moʻui ʻa e Folofola ʻa Sihová
Ngaahi Meʻa Mahuʻinga mei he Tohi Maaké
KO E Kōsipeli ʻa Maʻaké ʻa e nounou taha ʻi he Kōsipeli ʻe faá. ʻI hono hiki ʻe Sione Maʻake ʻi he taʻu ʻe 30 nai hili ʻa e pekia mo e toetuʻu ʻa Sīsū Kalaisí, ʻoku ʻi he tuʻunga vave ʻa e fakamatala aí pea fonu ʻi he ngaahi meʻa lalahi naʻe hoko ʻi he ngāue fakafaifekau taʻu ʻe tolu mo e konga ʻa Sīsuú.
ʻI he ngalingali naʻe fakataumuʻa ki he faʻahinga ʻikai ko e Siú, tautefito ki he kau Lomá, ʻoku fakamatalaʻi ʻe he tohi Maaké ʻa Sīsū ko e ʻAlo ngāue fakaemana ia ʻo e ʻOtuá ʻa ia ʻokú ne fakahoko ha feingangāue fakamalanga faivelenga. ʻOku tō ʻa e fakamamafá ʻi he ngaahi ngāue ʻa Sīsuú kae ʻikai ko e meʻa naʻá ne akoʻí. Ko e tokanga ki he Kōsipeli ʻa Maʻaké te ne fakaivimālohiʻi ʻetau tui ki he Mīsaiá pea ueʻi ai kitautolu ke tau hoko ko e kau fanongonongo faivelenga ʻo e pōpoaki ʻa e ʻOtuá ʻi he ngāue fakafaifekau faka-Kalisitiané.—Hep. 4:12.
NGĀUE FAKAFAIFEKAU FISIFISIMUʻA ʻI KĀLELÍ
Hili ʻa e fakamatala ki he ngāue ʻa Sione Papitaisó mo e ʻaʻeva ʻaho ʻe 40 ʻa Sīsū ʻi he toafá ʻi he foʻi veesi pē ʻe 14, ʻoku kamata leva ʻa Maʻake ʻi ha fakamatala fakaueʻiloto fekauʻaki mo e ngāue fakafaifekau ʻa Sīsū ʻi Kālelí. Ko hono toutou ngāueʻaki ʻo e foʻi lea “leva” ʻoku ʻomi ai ha ongo fakavavevave ki he fakamatalá.—Mk. 1:10, 12.
Siʻi hifo he taʻu ʻe tolu, ʻoku fakahoko ai ʻe Sīsū ʻa e feingangāue fakaemalanga ʻe tolu ʻi Kāleli. ʻOku lahilahi fakamatalaʻi fakahokohoko taimi ia ʻe Maʻake. ʻOku ʻikai lave ia ai ki he Malanga he Moʻungá pea pehē ki he ngaahi malanga lōloa ange ʻa Sīsuú.
Tali ki he Ngaahi Fehuʻi Fakatohitapú:
1:15—Ko e hā naʻe hoko ʻa ia naʻe fakamatalaʻi “kuo kakato hono taimi”? Naʻe ʻuhinga ʻa Sīsuú ki he kakato ʻa e taimi ʻa ia naʻe pau ai ke ne kamata ʻa ʻene ngāue fakafaifekaú. Koeʻuhi ko ʻene ʻi ai ʻi he tuʻunga ko e Tuʻi naʻe filí, naʻe ofi ai ʻa e Puleʻanga ʻo e ʻOtuá. ʻE lava leva ai ke tali ʻe he kakai loto-totonú ʻa ʻene ngāue fakamalangá pea fou ʻi he ngaahi sitepu ʻa ia te nau maʻu ai ʻa e hōifua ʻa e ʻOtuá.
1:44; 3:12; 7:36—Ko e hā naʻe ʻikai loto ai ʻa Sīsū ke talanoaʻi holo ʻa ʻene ngaahi maná? ʻI he ʻikai ʻai ʻa e kakaí ke nau fai ha fakamulituku naʻe fakatuʻunga ʻi ha ngaahi līpooti fakaueʻiloto pe ngaahi fakamatala kuo mioʻí, naʻe loto ʻa Sīsū ke nau sio tonu ʻo ʻiloʻi ko ia ʻa e Kalaisí pea fai ha fili fakafoʻituitui ʻo makatuʻunga ʻi he fakamoʻoni sio tonu ko iá. (Ai. 42:1-4; Mt. 8:4; 9:30; 12:15-21; 16:20; Luke 5:14) Tuku kehe pē mei ai ʻa e meʻa naʻe hoko ki ha tangata naʻe uluisino ki muʻa ai ʻa e tēmenioó ʻi he fonua ko Kelasiní. Naʻe tala kiate ia ʻe Sīsū ke ne foki ki ʻapi pea tala ʻa e meʻa naʻe hokó ki hono kāingá. Naʻe ʻosi fai e kole kia Sīsū ke ne mavahe mei he feituʻu ko iá, ko ia ai ʻe mātuʻaki siʻisiʻi pe ʻikai ʻi ai ha taimi ke ne fetaulaki ai mo e kakai ʻi aí. Ko e ʻi honau ʻaó mo e fakamoʻoni ʻa ha tangata ʻa ia naʻe fai ki ai ʻe Sīsū ʻa e ngāue anga-ʻofa ko ʻení ʻe lava ke hoko ia ko ha meʻa ke ne fakahalaki ha faʻahinga talanoa fakangali kovi pē ʻo fekauʻaki mo e mate ʻa e fanga puaká.—Mk. 5:1-20; Luke 8:26-39.
2:28—Ko e hā ʻoku ui ai ʻa Sīsū ko e “ʻEiki ia ʻo e Sapate”? ʻOku “maʻu ʻe he Lao ʻa e ʻata pe ʻo e ngaahi lelei ka hoko,” ko e tohi ia ʻa e ʻapositolo ko Paulá. (Hep. 10:1) Hangē ko ia naʻe ʻasi ʻi he Laó, naʻe hoko ʻa e Sāpaté hili ʻa e ʻaho ngāue ʻe ono, pea naʻe fakamoʻui ʻe Sīsū ʻa e tokolahi ʻi he ʻaho ko iá. Naʻe hoko ʻeni ko e ʻata ʻo e mālōlō melino mo e ngaahi tāpuaki kehe ʻe hokosia ʻe he faʻahinga ʻo e tangatá ʻi he malumalu ʻo e Pule Taʻu ʻe Afe ʻa Kalaisi hili ʻa e ngataʻanga ʻo e tuʻunga-pule fakaaoao ʻa Sētané. Ko ia ai, ko e Tuʻi ʻo e Puleʻanga ko iá ʻoku toe ui ko e “ʻEiki ia ʻo e Sapate.”—Mt. 12:8; Luke 6:5.
3:5; 7:34; 8:12—Naʻe lava fēfē ke ʻiloʻi ʻe Maʻake ʻa e ngaahi fakaikiiki fekauʻaki mo e anga ʻo e ongoʻi ʻa Sīsuú? Ko Maʻaké naʻe ʻikai ko ha taha ia ʻo e kau ʻapositolo ʻe toko 12 pea naʻe ʻikai ko ha kaungāmeʻa ofi ia ʻo Sīsū. Kae fakatatau ki he talatukufakaholó, ko e kaungāmeʻa ofi ʻo Maʻaké, ʻa e ʻapositolo ko Pitá, ko e maʻu mei ai ʻa e lahi taha ʻo e fakamatala ʻa Maʻaké.—1 Pita 5:13.
6:51, 52—Ko e hā ʻa e ʻuhinga ʻo e “ngaahi foʻi ma” naʻe ʻikai ke mahinoʻi ʻe he kau ākongá? ʻI he ngaahi houa siʻi pē ki muʻá, naʻe fafangaʻi ʻe Sīsū ʻa e kau tangata ʻe toko 5,000 tuku kehe ʻa e kau fefine mo e fānau ʻaki ʻa e foʻi mā pē ʻe nima mo e mataʻi ika ʻe ua. Ko e ʻuhinga ʻo e “ngaahi foʻi ma” ʻa ia naʻe totonu ke mahinoʻi ʻe he kau ākongá mei he meʻa ko ia ne hokó, kuo fakamafeia ʻa Sīsū ʻe Sihova ko e ʻOtuá ke ne fakahoko ʻa e ngaahi maná. (Mk. 6:41-44) Kapau ne nau mahinoʻi ʻa e lahi ʻo e mālohi kuo ʻoange kia Sīsuú, ne ʻikai te nau mei ofoofo pehē ʻi he taimi naʻá ne luelue fakaemana ai ʻi he fukahi vaí.
8:22-26—Ko e hā naʻe fakamoʻui ai ʻe Sīsū ʻa e tangata kuí ʻi he founga ʻe uá? Naʻe fai nai ʻeni ʻe Sīsū ʻi he anga-lelei ki he tangatá. Ko hono toe fakafoki māmālie ʻa e sio ʻa ha tangata ʻa ia naʻe anga ki he fakapoʻulí ʻi ha taimi lōloá, naʻe lava ke fakaʻatā ai ia ke ne feinga ke anga hono matá ki he maama ʻo e ulo ʻa e laʻaá.
Ngaahi Lēsoni kia Kitautolu:
2:18; 7:11; 12:18; 13:3. ʻOku fakamatala ʻa Maʻake ki he ngaahi anga-fakafonua, ngaahi fakalea, tui mo e ngaahi feituʻu naʻe ʻikai maheni nai mo ia ʻa e kau lautohi ʻikai ko e Siú. Naʻá ne fakamahino mai naʻe “ʻaukai” ʻa e kau Fālesí, ko e kōpanó ko ha meʻaʻofa “kuo tuku ki he ngaue ʻa e ʻEiki,” naʻe pehē ʻe he kau Sātusí “ʻoku ʻikai ha toetuʻu,” pea ko e temipalé naʻe “hanga” ki he “moʻunga ko ʻOlive.” Koeʻuhi ʻe mahuʻinga ʻo tautefito pē ki he kau Siú ʻa e laine hohoko ʻo e Mīsaiá, naʻe liʻaki kotoa ia ʻe Maʻake. ʻOku ʻomai leva ai ʻe Maʻake ha faʻifaʻitakiʻanga kiate kitautolu. ʻOku totonu ke tau fakakaukau ki he puipuituʻa ʻo ʻetau kau fanongó ʻi he taimi ʻoku tau kau ai ki he ngāue fakafaifekau faka-Kalisitiané pe ko hano fai ha konga ʻi he ngaahi fakataha ʻa e fakatahaʻangá.
3:21. Ko e kāinga ʻo Sīsuú naʻe ʻikai te nau tui. ʻI heʻene peheé, ʻokú ne kaungāongoʻi mo e faʻahinga ʻoku fakafepakiʻi pe manukiʻi ʻe honau ngaahi fāmili ʻoku ʻikai ke nau ʻi he tuí.
3:31-35. ʻI heʻene papitaisó, naʻe hoko ai ʻa Sīsū ko e ʻAlo fakalaumālie ʻo e ʻOtuá, pea ko ʻene faʻeé ʻa e “Selusalema mei ʻolunga.” (Kal. 4:26) Talu mei ai, naʻe ofi mo mahuʻinga ange kia Sīsū ʻa ʻene kau ākongá ʻi hono ngaahi kāinga fakaekakanó. ʻOku akoʻi mai ʻe he meʻá ni kia kitautolu ke tau fakamuʻomuʻa ʻa e ngaahi meʻa fakalaumālié ʻi heʻetau moʻuí.—Mt. 12:46-50; Luke 8:19-21.
8:32-34. ʻOku totonu ke tau fakavave ke ʻiloʻi pea talitekeʻi ha faʻahinga faleʻi pē ʻoku fai mai ʻe he niʻihi kehé ke tau fakafiefiemālie. Ko ha muimui ʻo Kalaisi kuo pau ke ne mateuteu ke ne “liaki eia ia,” ʻa ia, ko hono fakaʻikaiʻi ia pea talitekeʻi ʻa e ngaahi holi mo e ngaahi taumuʻa siokitá. ʻOku totonu ke ne loto-lelei ke “too hake ene akau mafajia”—ke faingataʻaʻia kapau ʻe hoko, pe hoko ʻo lumaʻi pe fakatangaʻi pe aʻu ʻo tāmateʻi koeʻuhi ko ʻene hoko ko ha Kalisitiané. Pea kuo pau ke hoko atu ʻene “muimui” kia Sīsuú, ʻo faʻifaʻitaki ki Heʻene founga moʻuí. Ko e ʻalunga ʻo e tuʻunga ākongá ʻoku fiemaʻu ia ke tau fakatupulekina pea tauhi maʻu ha laumālie feilaulauʻi-kita ʻo hangē ko ia ko Kalaisi Sīsuú.—Mt. 16:21-25, PM; Luke 9:22, 23.
9:24. ʻOku ʻikai totonu ke tau mā ke tala ki he niʻihi kehé ʻetau tuí pe lotu ke maʻu ha tui lahi ange.—Luke 17:5.
MĀHINA FAKAʻOSÍ
ʻI he ofi ki he ngataʻanga ʻo e 32 T.S., ʻoku haʻu ʻa Sīsū ki he “tafaʻaki fonua ʻo Siutea mo Tuʻa-Sioatani,” pea naʻe toe ō mai ha fuʻu kakai kiate ia. (Mk. 10:1) Hili ʻene malanga ʻi aí, ʻoku hoko atu ʻene fonongá ki Selusalema.
ʻI Nīsani 8, ʻoku ʻi Pētani ʻa Sīsū. ʻOkú ne tokoto ai ʻi ha houa kai lolotonga ia ʻa e haʻu ha fefine ʻo tākai hono ʻulú ʻaki ha lolo namu lelei. Ko e ngaahi meʻa ne hoko ʻi he hū fakamaʻalali ʻa Sīsū ki Selusalemá ʻo aʻu ki heʻene toetuʻú ʻoku fakamatalaʻi fakahokohoko lelei ia.
Tali ki he Ngaahi Fehuʻi Fakatohitapú:
10:17, 18—Ko e hā naʻe fakatonutonu ai ʻe Sīsū ha tangata ʻi heʻene ui ia ko e “Tangataʻeiki lelei”? ʻI he fakafisi ke tali ʻa hono vikia ia ʻaki ʻa e hingoa fakalakanga ko iá, naʻe fakahanga ʻe Sīsū ia ʻa e lāngilangí kia Sihova pea fakahā ko e ʻOtua moʻoní ʻa e matavai ʻo e ngaahi meʻa lelei kotoa pē. ʻIkai ko ia pē, naʻe fakahanga ʻe Sīsū ʻa e tokangá ki he moʻoni tefito ko e Tokotaha-Fakatupu ʻo e meʻa kotoa pē, ʻa Sihova ko e ʻOtuá, ko ia pē ʻa e tokotaha ʻokú ne maʻu ʻa e totonu ke fokotuʻu ʻa e ngaahi tuʻunga ki he leleí mo e koví.—Mt. 19:16, 17; Luke 18:18, 19.
14:25—Ko e hā naʻe ʻuhinga ki ai ʻa Sīsuú ʻi heʻene pehē ki heʻene kau ʻapositolo faitōnungá: “ʻE ʻikai ʻaupito te u toe inu mei he fua ʻo e vaine, ʻo aʻu ki he ʻaho ko ia te u toki inu ia kuo foʻou ʻi he Puleʻanga ʻo e ʻOtua”? Naʻe ʻikai ke pehē ʻe Sīsuú ia ʻoku ʻi ai ha uaine moʻoni ʻi hēvani. Kae kehe, koeʻuhi ko hono faʻa fakatātaaʻi ʻa e fiefiá ʻaki ʻa e uainé, naʻe ʻuhinga ʻa Sīsū ia ki he fiefia ʻo e feohi fakataha mo hono kau muimui pani ʻe toetuʻú ʻi he Puleʻangá.—Sāme 104:15; Mt. 26:29.
14:51, 52—Ko hai ʻa e talavou naʻe “hola telefua”? Ko Maʻake tokotaha pē ʻoku lave ki he meʻá ni, ko ia ʻoku lava ke tau fakamulituku ʻaki ko ʻene lea pē ʻaʻana ʻo kau kiate ia tonu.
15:34—Naʻe mole nai ʻa e tui ʻa Sīsuú ʻi heʻene lea ko ia ʻo pehē “Ko hoku ʻOtua, ko hoku ʻOtua, naʻa ke liʻaki au kae hā?” ʻIkai. Lolotonga ʻoku ʻikai te tau fakapapauʻi ʻa e meʻa naʻá ne ueʻi ʻa Sīsū ke ne lea pehē aí, ʻe lava ke fakahaaʻi ʻe he lea ko iá ʻa e ʻiloʻi ʻe Sīsū kuo toʻo ʻe Sihova ʻa ʻEne maluʻí koeʻuhi kae lava ʻo ʻahiʻahiʻi kakato ʻa e anga-tonu ʻa Hono ʻAló. ʻOku toe lava ke pehē ko hono leaʻaki ʻeni ʻe Sīsuú koeʻuhi naʻá ne loto ke fakahoko ʻa e meʻa naʻe tomuʻa tala ʻo fekauʻaki mo ia ʻi he Sāme 22:1.—Mt. 27:46.
Ngaahi Lēsoni kia Kitautolu:
10:6-9. Ko e taumuʻa ʻa e ʻOtuá ke nofo fakataha maʻu ai pē ʻa e ngaahi hoa malí. Ko ia ai, ʻi he ʻikai fakavave ki he veté, ʻoku totonu ke feinga ʻa e husepānití mo e uaifí ke ngāueʻaki ʻa e ngaahi tefitoʻi moʻoni Fakatohitapú ke ikuʻiʻaki ha faʻahinga faingataʻa pē ʻe hoko nai ʻi he nofo malí.—Mt. 19:4-6.
12:41-44. Ko e faʻifaʻitakiʻanga ʻa e uitou masivá ʻoku akoʻi mai ai kia kitautolu ʻa e totonu ke ʻoua te tau siokita ʻi hono fai ha foaki maʻá e lotu moʻoní.
[Fakatātā ʻi he peesi 29]
Ko e hā naʻe tala ai ʻe Sīsū ki he tangatá ni ke ne tala ki hono kāingá ʻa e meʻa kotoa kuo hoko kiate iá?