Fakamafola ʻa e Ongoongo Leleí ʻi he Tuʻunga Kehekehe ʻo Haití

KO Haiti mo e Lepupilika Tominiká ʻokú na fakatou tuʻu ʻi he motu fakatalopiki ko Hisipaniolá, ʻa ia ʻoku ʻi ai ʻa e ʻotu moʻunga māʻolunga taha ʻi he Kalipiané. Ko e ngaahi tumutumu ʻe niʻihi ʻoku aʻu ʻo laka hake honau māʻolungá ʻi he mita ʻe 2,400. Lolotonga ʻa e ngaahi māhina “momokó,” ʻoku maʻu ai ʻa e ngaahi hahau ʻaisi mo e kongokonga ʻaisi ʻi he fanga kiʻi vai ʻi he ngaahi feituʻu māʻolungá.

Ko e ngaahi moʻunga mo e teleʻa ʻi he fakatonga ʻo Haití ʻoku ʻufiʻufi ia ʻe he vaotā fakatalopiki tupu ʻāfaʻafa. ʻI he feituʻu kehé, ʻoku meimei tuʻu tekelei, kevekeva, ʻo tekeutua mata māsila ai ʻa e ʻotu moʻungá—ko e tupu mei hono fakaʻauha ʻo e vaotaá. Kapau te ke folau ki he tokelaú pe ko e tongá, te ke ʻiloʻi ai ʻa e fakaʻofoʻofa ʻo Haití. ʻI he niʻihi ʻo e ngaahi hala fāsiʻi, mo pikopiko ʻi he moʻungá, te ke sio ai ki ha mātanga fakaholomamata feliliuaki ʻo e fonuá mo e tahí. ʻE lava ke ke sio ai ki he ngaahi matalaʻiʻakau fakaʻofoʻofa mo lanu uloulo kehekehe ʻi he feituʻu kotoa pē.

Ko e kakai ʻe toko 8.3 miliona ʻi he fonua tuʻunga kehekehe ko ení ko e meimei kakai nofo kolo ʻuta kinautolu, ko honau fonua tupuʻangá ko ʻAfilika. Neongo ko e tokolahi tahá ʻoku siʻi ʻaupito ʻenau meʻa fakamatelié, ʻoku nau anga-lelei mo anga-talitali kakai. ʻI he taʻu nai ʻe 60, kuo fiefia ai ʻa e Kau Fakamoʻoni ʻa Sihová ʻi hono ʻave ʻa e ongoongo lelei ʻo e Puleʻanga ʻo e ʻOtuá kia kinautolú pea kuo talitali māfana kinautolu.—Mātiu 24:14.

Malanga ʻi ha Kolo ʻUta

Ko e tuʻunga anga-maheni eni ʻo e hokosia ʻa ha misinale ʻi heʻene ʻuluaki ʻaʻahi ki ha kolo ʻuta. Naʻá ne tohi:

“ʻI he ʻaho ʻe taha ʻi Maʻasi 2003, naʻa mau ō ai ʻo malanga ʻi Casale, ko ha kiʻi kolo ʻoku haafe houa nai ʻa e ʻalu ki aí mei Cabaret, ʻa ia ʻoku tuʻu ai homau ʻapi misinalé, ʻi he kilomita ʻe 30 he tokelau ʻo Poata-Pilinisí, ko e kolomuʻá. Naʻe malanga fakamuimui ʻa e Kau Fakamoʻoní ʻi Casale ʻi he 1999, ko ia naʻa mau ongoʻi mātuʻaki fakatuʻotuʻa ki ai ʻi heʻemau kamata fononga ʻi he 7:00 pongipongi. Ko e toko 22 ʻo kimautolu—ko e meimei kotoa ia ʻo ʻemau fakatahaʻangá—naʻa mau heka ʻi ha ongo veeni mālohi ʻe ua. Naʻe talanoa mo kakata fiefia ʻa e tokotaha kotoa ʻi heʻemau lele ʻi he ngaahi hala kelekele tahaké ʻo mau aʻu ai ki ha teleʻa ʻoku ʻi ai ʻa e ngaahi ʻuluʻakau lalahi. ʻOku tafe ha vaitafe ʻi he teleʻá, pea ʻoku tuʻu ʻa e kolo ko Casale ʻi loto ʻo fakatou maʻu ʻa e ongo tafaʻaki ʻo e vaitafé.

“Ko e hisitōlia ʻo e kiʻi kolo nonga ko ení ʻoku ʻi he konga ki muʻa ia ʻo e 1800 tupú ʻi he taimi naʻe tokoniʻi ai ʻe he kau sōtia Pōlani ʻa ia naʻa nau haʻu ki Haití ʻa e kau pōpula ki muʻá ke nau maʻu ʻenau tauʻatāiná, ʻo nau nofo ai ʻi he teleʻa kelekele lelei ko ení fakataha mo honau ngaahi uaifi Haití. Naʻe tupu mei ai ha tuifio ʻo ha kakai fakaʻofoʻofa. ʻOku fakatoʻoaloto ke sio ki he kakai ʻo e fonuá ʻoku nau kili hinehina, mēmea, melomelo, kanoʻimata lanu mata, lanu melomelo fakapoʻupoʻuli, mo e hā fua.

“Ko e tokotaha naʻá ne fakaava ʻa e ʻuluaki matapā naʻa mau tukituki aí naʻe ʻikai te ne mahuʻingaʻia. ʻI heʻemau tafokí, naʻe lue mai ai ha tangata ʻi he halá ke fakafetaulakiʻi kimautolu. Naʻá ne fieʻilo pe ʻoku mau tui ʻoku ʻi ai ha faikehekehe ʻia Sīsū mo e ʻOtuá. ʻI heʻemau kole angé, naʻá ne toʻo hake ʻene Tohi Tapú, pea ko e fetalanoaʻaki Fakatohitapu naʻe hoko atu aí naʻe fakatuipauʻi ai kiate  ia ko Sīsuú ko e ʻAlo ia ʻo e ʻOtuá pea ko Sihova ʻa e “Otua moʻonia pe taha.” (Sione 17:3) Naʻe fakaafeʻi kimautolu ʻe he kakai tokolahi ke mau tangutu ʻo talanoa mo kinautolu. Naʻe ʻeke mai ʻe he niʻihi, ‘Te mou foki mai ʻafē ʻo ako Tohi Tapu mo kimautolú?’

“ʻI he hoʻatā efiafí, naʻa mau maʻu ai ha feituʻu malumalu lelei ʻo teuteu ai ki he kai hoʻataá. Naʻe haka ai ʻe ha ongo tuofāfine ha fuʻu kulo ika. Naʻe ifo ʻaupito! ʻI heʻemau kiʻi nofo ai ʻo kai mo talanoá, naʻa mau toe malanga foki ki he faʻahinga naʻe fononga mai aí. Naʻa mau kolosi leva ʻi he vaitafé ki he tafaʻaki ʻe taha ʻo e koló. Naʻa mau fiefia ʻi he talanoa ki he kakai anga-fakakaumeʻa ko eni ʻa ia naʻa nau nofo ʻi he ngaahi lalo ʻakau ofi ki honau fanga kiʻi ʻapí. He lelei moʻoni ē ko e fanongo ki he leʻo ʻo e fānau naʻe vaʻingá, kau fefine naʻa nau fō he vaitafé, mo hono momosi ʻe he kau fineʻeikí ʻa e kofí!

“Naʻe vave e hoko ʻa e faá, pea naʻe fononga ʻemau kulupu fiefiá ki he ongo vēní ke foki ki Cabaret. Naʻá ku fiefia moʻoni mo hoku husepānití ʻi heʻema ʻuluaki ʻaʻahi ki Casale, mo hono kakai anga-talitali kakai mo anga-fakakaumeʻá.”

Talu mei he tūʻuta ʻa e ʻuluaki kau misinale Fakamoʻoní ʻi Haiti ʻi he 1945, mo e tupu māmālie ʻa e tokolahi ʻo e kau fanongonongo ʻo e Puleʻangá ʻi he fonuá ni, ko ia ʻoku ʻi ai he taimí ni ʻa e toko 14,000 nai ʻoku nau kau ʻi he malangá pea ʻi hono fai ʻa e ngaahi ako Tohi Tapu ʻi ʻapi laka hake he 22,000. Kuo nau ueʻi ʻa e moʻui ʻa e kakai ʻe toko 59,372 ʻa ia naʻa nau maʻu ʻa e Fakamanatú ʻi Maʻasi 2005 pea hanganaki talaki ʻa e ongoongo lelei ʻo e Puleʻanga ʻo e ʻOtuá ki he kakaí. Fakakaukau atu ki he ngaahi founga lahi ʻa ia kuo ueʻi ai ʻa e kakaí ʻe he ngāue ʻa e Kau Fakamoʻoni ʻa Sihová.

Ko e Ongoongo Leleí ʻi he ʻAati Lanu Kehekehe

Ko e tokolahi taha ʻo e kau Haití ʻoku nau manako ʻi he lanu mataʻāʻaá. ʻOku hā eni ʻi honau valá, ʻi he vali honau ngaahi falé, ʻi he matalaʻiʻakau kehekehe ʻi heʻenau ngoué, pea ʻi heʻenau ʻātí. Ko e ngaahi lauʻi lā ʻoku tā valivali ʻi he sīpinga fakalotofonua lanu mataʻāʻā ʻoku ʻiloa ko e L’Art faka-Haití ʻoku fakaʻaliʻali ia ʻi he ngaahi hala kotoa ʻo Poata-Pilinisí. ʻOku haʻu ki ai ʻa e kau fakatau mei he ngaahi feituʻu lahi ʻo e māmaní.

ʻOku hā ʻa e ngaahi lanu mataʻāʻā ʻo ʻikai ʻi he ngaahi lauʻi laá pē. Ko e ngaahi hala ʻo Poata-Pilinisí ʻoku fonu ia ʻi he ngaahi meʻalele uta pāsese ʻoku ui ko e camionette, pe tap-tap, ʻa ia ʻoku tā valivali fakalelei ʻi he ngaahi tisaini fakaʻofoʻofa. ʻOkú te faʻa sio ʻi he ngaahi tisaini ko iá ki ha  ngaahi tā ʻoku fakatuʻunga ʻi he ngaahi fakatātā ʻoku maʻu ʻi he Tohi Tapú.

ʻI hoʻo lue he ngaahi halá, ʻoku ʻasi fakafokifā hake ai ha fakatātā anga-maheni, hangē ko ia ʻo ʻĀtama mo ʻIvi ʻi ʻĪtení. ʻIo, ʻokú ke sio ki ai, ʻoku tā valivali ʻi he sioʻata mui ʻo e camionette ne toki fakalaka haké. ʻOku faʻa toutou hā ʻa e ngaahi konga Tohi Tapu pe ngaahi lea ʻoku ʻi ai ʻa e huafa Sihová ʻoku tā valivali ʻi he ngaahi meʻalele ko ení pe fakakau ʻi he ngaahi hingoa ʻo ʻenau ngaahi kautaha fakakomēsialé.

Vahevahe Atu ʻa e Ongoongo Leleí ʻi he ʻApiakó

ʻOku maʻu ʻe he fānau Fakamoʻoni ʻi Haití ʻa e ngaahi faingamālie lelei ke tokoniʻi ʻa e ngaahi kaungāakó ke nau ako ʻo fekauʻaki mo e Tohi Tapú. Ko e līpooti hono hoko mei ha taʻahine Fakamoʻoni taʻu 17 ko ha fakatātā ia.

“Naʻe fakaofiofi mai kiate au ʻi he ʻaho ʻe taha ha taha ʻi heʻemau kalasí ʻo ʻeke pe ko e hā ʻa e ʻuhinga ʻo e ‘feʻauakí.’ ʻI he fakakaukau naʻá ne feinga ke fakamaheni mai kiate aú, naʻe ʻikai te u tokanga kiate ia. Ka ʻi heʻene ʻeke ki ha tamasiʻi ako ʻa e foʻi fehuʻi tatau, naʻe hoko ʻo mahuʻingaʻia ai ʻa e kalasí kotoa. Ko ia ʻi he uike hoko maí, hili ʻeku fai ha fekumi ʻi he kaveingá, naʻá ku lea ai ʻi he kalasí, ʻo fakamatalaʻi ʻa e ʻuhinga ʻoku feinga ai ʻa e Kau Fakamoʻoni ʻa Sihová ke nau maʻa fakaeʻulungāanga, fakalaumālie mo fakaesinó.

“Naʻe ʻeke ʻe he kau akó ʻa e ngaahi fehuʻi lahi pea naʻa nau tali lelei ʻa e ngaahi tali naʻá ku ʻoange mei he Tohi Tapú. Naʻa mo e pule akó, ʻa ia naʻá ne muʻaki toumouá, naʻá ne ʻeke ʻa e ngaahi fehuʻi lahi pea fokotuʻutuʻu ke u lea ʻi he ngaahi kalasi kehé. Naʻá ku fakahaaʻi kia kinautolu ʻa e tohi Ngaahi Fehuʻi ʻOku ʻEke ʻe he Toʻutupú—Tali ʻOku ʻAongá, a pea naʻe mahuʻingaʻia ai ʻa e tokolahi. ʻI he ʻaho hono hokó, naʻá ku tufa ai ʻa e tohi ʻe 45 ki he kaungāakó. Naʻe ʻosi vave hono lau ʻe he tokolahi ʻenau tataú, pea ʻoku lolotonga ako Tohi Tapu ʻa e niʻihi mo e Kau Fakamoʻoni ʻoku nofo ofi kia kinautolú. Ko e tokotaha ako ʻe taha ʻoku nofo ʻi hoku feituʻu kaungāʻapí ʻokú ne maʻu he taimí ni ʻa e ngaahi fakatahá kotoa.”

Ngāueʻaki ʻa e Lea Kiliolá

Ko e kakaí mo e fonuá ʻoku ʻi he tuʻunga kehekehe mo fakamānako, pea ʻoku pehē pē mo e lea Kiliola faka-Haití, ʻa ia ʻoku fakatahaʻi ai ʻa e ngaahi foʻi lea faka-Falaniseé mo e kalama faka-ʻAfilika Hihifó. Ko e lea fakafonua eni ʻa Haití, ʻa e lea ʻoku aʻu ki honau lotó. ʻOku fakahoko tefito ʻe he Kau Fakamoʻoni ʻa Sihová ʻenau ngāue fakafaifekaú ʻi he lea ko ení, pea ʻoku fai ʻa e ngaahi fokotuʻutuʻu ke faʻu ʻa e ʻū tohi lahi ange ʻi he lea Kiliola faka-Haití.

ʻI he 1987 naʻe liliu ai ʻa e polosiua ko e Moʻui Fiefia ʻi he Māmaní ʻo Taʻengata! ʻi he lea Kiliola faka-Haití, ʻo hoko atu ai ʻa e tohi ko e ʻIlo ʻA Ia ʻOku Taki Atu ki he Moʻui Taʻengatá pea hoko leva ai ʻa e polosiua Ko e Hā ʻOku Fiemaʻu ʻe he ʻOtuá Meiate Kitautolú? Ko e ʻū tohí ni kuo tokoni lahi ia ki he kau ako Tohi Tapu foʻou ʻoku nau loto ke maʻu ha mahino tefito ki he Folofola ʻa e ʻOtuá. Naʻe toe pulusi ʻo kamata ʻi Sepitema 1, 2002, ʻa e Taua Leʻo ʻi he Kiliola faka-Haití. ʻOku kei ngāueʻaki pē ʻa e ʻū tohi lea faka-Falaniseé, neongo ia ʻoku saiʻia ange ʻa e tokolahi ia ʻi hono lau ʻa e ʻū tohí ʻi he lea pē ʻanautolú.

ʻAve ʻa e Ongoongo Leleí ki he Faʻahinga ʻi he ʻApi Pōpulá

Kuo kamata ki muí ni ke ʻave ʻe he Kau Fakamoʻoni ʻa Sihová ʻa e ongoongo leleí ki he kakai tangata mo e kakai fefine ʻi he ngaahi ʻapi pōpula Fakapuleʻangá. Ko e Kau Fakamoʻoni ʻoku nau fai ení ʻoku nau fiefia ke ʻave ha pōpoaki ʻo e fakafiemālie ki he faʻahinga ʻi he tuʻunga mātuʻaki fakamamahi ko ení. ʻOku līpooti ʻe ha faifekau Kalisitiane:

“ʻI heʻemau ʻuluaki ʻaʻahi ki he ʻapi pōpula ʻe taha, naʻe ʻomai ai ʻa e kau pōpulá ki ha fuʻu loki lahi ke nau feʻiloaki mo kimautolu. Ne mau fifili pe ʻe fēfē ʻenau fakafeangaí. ʻI heʻemau fakamatala ko ʻemau ʻi aí ke tokoniʻi kinautolu ke nau mahinoʻi ʻa e Tohi Tapú, naʻe talitali lelei kimautolu ʻe he toko 50 kotoa ʻi aí. Naʻa mau fakaʻaliʻali ʻa e ngaahi pulusinga faka-Kiliola ʻo e ongo polosiua ko e Apply Yourself to Reading and Writing mo e Moʻui  Fiefia ʻi he Māmaní ʻo Taʻengata! pea kamata ha ako Tohi Tapu mo e toko 26 ʻo kinautolu. Ko e toko hongofulu ʻi ai naʻe ʻikai te nau poto he lautohí, ka naʻa nau fakahaaʻi ʻa e mahuʻingaʻia ʻi heʻemau fakahāhā ʻa e founga ʻo hono ngāueʻaki ʻa e ngaahi fakatātā ʻi he ongo polosiuá ko ha tokoni ke mahinoʻi ʻa e ngaahi foʻi leá.”

ʻI he foki atu ʻa e Kau Fakamoʻoní, naʻe pehē ʻe he tangata ʻe taha: “Kuó u toutou lau ʻa e polosiuá. ʻOku ou fakakaukau maʻu pē ki he meʻa ʻoku lau ki aí, pea kuó u fakatuʻotuʻa ki hoʻomou ʻaʻahí.” Ko ha tangata ʻa ia naʻe puke ʻi haʻane kaihaʻa ʻo ngāueʻaki ʻa e meʻataú naʻá ne pehē ʻokú ne loto ke liliu, pea naʻá ne kole ke fekauʻi ha taha ke ʻalu ʻo ako Tohi Tapu mo hono uaifí. Ko ha tamai ʻa e fānau ʻe toko ua ʻa ia naʻe tuku pōpula naʻá ne fai ʻa e kole tatau koeʻuhi ke lava ʻa hono uaifí ʻo sio ki he faikehekehe ʻi he ngaahi tui moʻoní mo e tui halá. Ko ha faifekau Palotisani naʻe halaia ʻi heʻene kākaaʻi ʻa e kau mēmipa ʻo hono siasí ʻi ha fuʻu paʻanga lahi naʻá ne pehē kuó ne maʻu he taimí ni ʻa e moʻoní pea ʻi he hili ʻene ngāueʻi hono tauteá, te ne tokoniʻi ʻa e kau mēmipa ʻi hono siasí ke nau hoko ko e Kau Fakamoʻoni ʻa Sihova.

Ko e pōpula ʻe taha, ʻi he ʻikai haʻane tatau tonu ʻo e polosiua Fiemaʻu ʻi he lea Kiliolá, naʻá ne hiki kotoa ʻa e tataú mei ha polosiua ʻa ha tokotaha ko hono kaungā loki pea ako maʻuloto ia. Naʻe kamata ke vahevahe ʻe ha pōpula fefine ki he kaungā pōpula ʻe toko hiva ʻa e meʻa naʻá ne akó, pea aʻu ʻo ne ako mo kinautolu. Ko ha pōpula tangata naʻe ʻosi ʻene ako ʻa e polosiuá, pea hoko atu ai ki he tohi ʻIlo, naʻá ne kamata malanga ki he kau pōpula kehé. Naʻe vave ʻene fai ha ako Tohi Tapu mo e toko fā ʻo kinautolu.

Ko Mākoní b naʻá ne ako Tohi Tapu ki muʻa pea ʻoku ʻi ai hono ngaahi kāinga ʻa ia ko e Kau Fakamoʻoni ʻa Sihova kinautolu. Naʻá ne fakalototoʻaʻi ʻa e kau pōpula kehé ke nau lau ʻa e ʻū tohi Fakatohitapu ne ʻoange kiate ia ʻe hono kāingá. ʻOkú ne fakamatala: “ʻI heʻeku tuʻuaki ʻa e ʻū tohí ki he kau pōpulá, ʻoku nau ui au ko e Fakamoʻoni ʻa Sihova. ʻOku ou tala ange ʻoku ʻikai, koeʻuhí he ʻoku ou ʻiloʻi ʻa e tuʻunga moʻoni ʻoku ʻi ai ha tokotaha Fakamoʻoní. ʻOku ou fakakaukau fakamātoato ki he meʻá ni he taimí ni, ke u ako pea papitaiso. ʻI heʻeku kei siʻi angé, kapau naʻá ku muimui ʻi he ʻalunga naʻe fou ai hoku fanga tokoua fakakakanó, ne ʻikai te u mei ʻi heni ʻi he ʻapi pōpulá.”

Ko e taha ʻo e kau pōpulá ʻa ia naʻá ne maʻu ʻa e ʻū tohi meia Mākoní naʻá ne tala ki he tokotaha Fakamoʻoni naʻe ʻaʻahi ange kiate iá: “Ki muʻa ke ke haʻu ʻi he Mōnite kuo ʻosí, naʻá ku loto-mafasia pea teu ke toʻo ʻeku moʻuí. Ka ʻi he hili ʻeku lau ʻa e ʻū makasiní, naʻá ku lotu ki he ʻOtuá ke ne fakamolemoleʻi au ʻi he ngaahi meʻa kovi kuó u faí pea ke fekauʻi mai ha taha ke ne fakahaaʻi mai ʻa e hala totonú. He ongoʻi fiefia moʻoni ē ko au ʻi hoʻo haʻu he ʻaho hono hokó ʻo tuʻuaki ke ako Tohi Tapu mo e kau pōpulá! ʻOku ou saiʻia ke ke akoʻi au ki he founga ke u tauhi ai kia Sihová.”

ʻAve ʻe he ʻĀ Hake! ʻa e Ongoongo Leleí ki he Tokolahi

Ko e ʻīsiu ʻo e Awake! ʻo Nōvema 8, 2000, naʻe fakaeʻa ai ʻa e ngāue fakaenēsí. Naʻe maʻu ʻe ha fefine ʻa e tatau ʻe 2,000, ʻo ne tufa ia ki he kau neesi naʻa nau kau ki ha seminā ʻi Poata-Pilinisi. Ko e ʻīsiu ʻo e Awake! ʻo Siulai 8, 2002 ʻoku ʻi ai ʻa e ngaahi kupu fekauʻaki mo e kau polisí mo ʻenau ngāué, naʻe tufaki lahi ia ki he kau polisi ʻi Poata-Pilinisí. Naʻa nau saiʻia heni, pea ʻi he aʻu mai ki he taimi ní, ʻoku taʻofi ʻe he niʻihi ʻa e Kau Fakamoʻoní ʻi he halá ʻo kole ha ngaahi tatau lahi ange ʻo e makasini ko iá.

Ki muí ni mai, naʻe fokotuʻutuʻu ai ʻe ha ʻōfisa ʻo e Kautaha Moʻui ʻa Māmaní ha polokalama ke akoʻi ai ʻa e kakaí ʻo fekauʻaki mo e palopalema ʻo e ʻeitisí. Naʻe fakaafeʻi ia ki he ʻōfisi vaʻa ʻo e Kau Fakamoʻoni ʻa Sihová, ʻa ia naʻe fakahaaʻi ange ai kiate ia ʻa e fakamatala ʻo fekauʻaki mo e kaveingá ʻoku pulusi ʻi he Awake! Naʻe maongo kiate ia ʻene sio ki he ngaahi kupu ʻa ia ʻoku lāulea ai mei he Tohi Tapú ki he founga lelei taha ke fakaʻehiʻehi ai mei he ʻeitisí mo e founga ke tokoniʻi ai ʻa e faʻahinga ʻoku puké ke nau fekuki mo honau tuʻungá. Naʻá ne pehē ʻoku tuʻu-ki-muʻa ʻa e Awake! ʻi hono ʻomai ʻa e fakamatala ko ia ʻo fekauʻaki mo e kaveingá.

ʻIo, ʻoku fakamafola ʻe he Kau Fakamoʻoni ʻa Sihová ʻi he ngaahi founga lahi ʻa e ongoongo lelei ʻo e Puleʻangá ʻi he tuʻunga kehekehe ʻo Haití, ʻo hangē tofu pē ko ia ʻoku nau fai ʻi he ngaahi fonua kehe ʻe 234 takatakai ʻi he kolopé. ʻOku tali ʻe he tokolahi ʻa e pōpoaki ko eni ʻo e ʻamanakí pea ʻoku tokoniʻi ai kinautolu ke nau sio fakalaka atu ʻi he ngaahi faingataʻa lolotonga ʻi he moʻuí ki ha māmani foʻou, ʻa ia ʻe maʻu ai ʻe he faʻahinga kotoa ʻoku nau lotu ki he ʻOtua moʻoni ko Sihová, ʻa e moʻui haohaoa ʻi he tuʻunga lahi fau.—Fakahā 21:4.

[Fakamatala ʻi lalo]

[Maʻuʻanga ʻo e Tā ʻi he peesi 9]

Puipuituʻa: ©Adalberto Rios Szalay/photodisc/age fotostock