Ko ha ʻĪsiu ʻOkú Ke Kau ki Ai

ʻOKU ʻi ai hao kaumeʻa pe ko ha mēmipa ʻi he fāmilí ʻoku tautefito ʻa hoʻo ofi ki aí? Fēfē kapau ʻe tukuakiʻi koe ʻe ha taha ko hoʻo tauhi ʻa e vahaʻangatae ko iá ʻoku fai ia ʻi ha ngaahi ʻuhinga siokita ʻataʻatā? ʻIkai te ke ongoʻi loto-mamahi, pea aʻu ʻo ke ʻita nai? Ko e tukuakiʻi tofu pē ia naʻe fai ʻe Sētane ko e Tēvoló ki he faʻahinga kotoa ʻoku nau maʻu ha vahaʻangatae vāofi mo Sihova ko e ʻOtuá.

Fakakaukauloto atu ki he meʻa naʻe hoko ʻi he taimi naʻe lavameʻa ai ʻa Sētane ʻi hono ʻai ʻa e ʻuluaki ongo meʻa fakaetangatá, ʻa ʻĀtama mo ʻIvi, ke na maumauʻi ʻa e lao ʻa e ʻOtuá pea kau fakataha mo ia ʻi heʻene angatuʻu ki he ʻOtuá. ʻOku ʻuhinga ʻa e meʻa naʻe hokó ʻe kei talangofua pē ʻa e kakaí kia Sihova ʻo kapau pē te nau maʻu ʻaonga mei he fai peheé? (Senesi 3:​1-6) ʻI he taʻu nai ʻe 2,500 hili ʻa e angatuʻu ʻa ʻĀtamá, naʻe ʻohake ai ʻe Sētane ʻa e meʻa tofu pē ko ení—ʻo fekauʻaki he taimi ko ení, mo ha tangata ko Siope. Koeʻuhi ko e tukuakiʻi naʻe fai ʻe he Tēvoló ʻoku fakahaaʻi mahino ai ʻa e ʻīsiu ʻoku kau ki aí, tau sivisiviʻi fakalelei angé ʻa e fakamatala ko ia ʻi he Tohi Tapú.

“E Ikai Teu Tukuage Eku Agatonu”

Ko Siopé “ko e tangata haohaoa mo angatonu, ʻoku ʻapasia ki he ʻOtua mo afe mei he kovi.” Kae kehe, naʻe fai ʻe Sētane ha fasituʻu ki he anga-tonu ʻa Siopé. “He ʻoku ʻapasia ʻa Siope ki he ʻAfiona tuʻungaʻa pe?” ko ʻene ʻeke ia kia Sihová. Naʻe lauʻikoviʻi leva ʻe he Tēvoló fakatouʻosi ʻa e ʻOtuá mo Siope ʻaki ʻene tukuakiʻi kuo fakatau ʻe Sihova ʻa e mateaki ʻa Siopé ʻaki hono maluʻi mo tāpuakiʻi ia. “Ka ko eni,” ko e pole ia ʻa Sētané “ala atu muʻa ki heʻene ngaahi meʻa; pea talaatu te ne matuʻaki tafuli meiate koe.”—Siope 1:​8-11.

Ke tali ʻa e ngaahi taukaveʻi ko ení, ʻoku fakaʻatā ai ʻe Sihova ʻa Sētane ke ne ʻahiʻahiʻi ʻa Siope. ʻI ha feinga ke fakatafokiʻi ia mei he tauhi ki he ʻOtuá, ʻoku ʻoatu tahataha ʻe he Tēvoló ʻa e fakatamaki ki he tangata faitōnunga ko iá. Ko e kotoa ʻo e fanga monumanu ʻa Siopé naʻe kaihaʻasi pe fakaʻauha, naʻe fakapoongi ʻa ʻene kau ngāué pea naʻe tāmateʻi ʻa ʻene fānaú. (Siope 1:​12-​19) Ka ʻoku lavameʻa ʻa Sētane? ʻIkai ʻaupito! Neongo ʻa e ʻikai te ne ʻiloʻi ko e Tēvoló ʻa e tupuʻanga ʻo hono ngaahi ʻahiʻahí, ʻoku pehē ʻe Siope: “Ko Sihova naʻa ne foaki, pea ko Sihova kuo ne toʻo atu; kae maloʻia ai pe ʻa e huafa ʻo Sihova.”—Siope 1:21.

Hili iá, ʻoku haʻu ai ʻa Sētane ki he ʻao ʻo Sihová, ʻa ia ʻokú ne folofola: “ʻOku ne kei kuku [ʻe Siope] ʻene haohaoa, neongo ʻoku ke oʻi au ke fongia ia tuʻungaʻa pe.” (Siope 2:​1-3) Ko e ʻīsiu mātuʻaki mahuʻingá ko e anga-tonu ʻa Siopé—ko ha ʻulungāanga ʻa ia ʻoku fiemaʻu ai ʻa e mateaki taʻeueʻia ki he ʻOtuá pea mātuʻaki pipiki ki he māʻoniʻoní. ʻI he aʻu mai ki hení kuo ikuna ʻa Siope ʻi he ʻīsiu ʻo e anga-tonú. Kae kehe, ʻoku ʻikai ke foʻi ai ʻa e Tēvoló.

Hokó, ʻoku fai ʻe Sētane ha taukaveʻi fakalūkufua ʻa ia ʻoku kaunga ki ai ʻa e faʻahinga kotoa ʻo e tangatá. “Ko e kili pe ia telia ha kili,” ko ʻene lea ia kia Sihová, “ʻe ʻatu ʻe ha tangata ʻene meʻa kotoa telia ʻene moʻui. Ka ko eni, ala atu muʻa ki hono kili mo hono kakano, pea talaatu te ne matuʻaki tafuli meiate koe.” (Siope 2:​4, 5) ʻI hono ngāueʻaki  ʻa e foʻi lea fakalūkufua ko e “tangata” kae ʻikai ko e hingoa ʻo Siopé, ʻoku fehuʻia ai ʻe he Tēvoló ʻa e anga-tonu ʻa e tangata kotoa pē. Ko hono moʻoní, ʻokú ne fakamatematē: ‘ʻE fai ʻe ha tangata ha meʻa pē ke fakahaofi ʻaki ʻene moʻuí. ʻOmai haku faingamālie, pea ʻe lava ke u fakatafokiʻi ha taha pē mei he ʻOtuá.’ ʻE ʻikai hanganaki mateaki ʻa e tangatá ki he ʻOtuá ʻi he malumalu ʻo e ngaahi tuʻunga kotoa pē pea ʻi he taimi kotoa pē?

ʻOku fakaʻatā ʻe Sihova ʻa e Tēvoló ke ne taaʻi ʻa Siope ʻaki ha mahaki fakatupu mate. ʻOku faingataʻaʻia lahi ʻa Siope ʻo ne lotu ai ke ne mate. (Siope 2:7; 14:13) Kae kehe, ʻoku pehē ʻe Siope: “Teu mate be ka e ikai teu tukuage eku agatonu meiate au.” (Siope 27:​5, PM) ʻOku leaʻaki eni ʻe Siopé koeʻuhi ʻokú ne ʻofa ki he ʻOtuá, pea ʻoku ʻikai ha meʻa ʻe lava ke ne liliu ia. ʻOku fakamoʻoniʻi tonu ʻe Siope ko ha tangata anga-tonu ia. “Ko ia naʻe fai tapuekina hake meia Sihova,” ko e lau ia ʻa e Tohi Tapú, “ʻa e taimi ki mui ʻo Siope ʻi he taimi muʻa.” (Siope 42:​10-17) Kuo ʻi ai ha niʻihi kehe ʻoku hangē ko Siopé? Ko e hā kuo fakahaaʻi ʻi he faai mai ʻa e taimí?

Founga Kuo Tali Ai ʻa e Polé

ʻI he vahe 11 ʻo e tohi Hepeluú, ʻoku fakahaaʻi ai ʻe he ʻapositolo ko Paulá ha kau tangata mo e kau fefine faitōnunga ʻi he ngaahi taimi ki muʻa ʻi he Kalisitiané, ʻo kau ai ʻa Noa, ʻĒpalahame, Sela mo Mōsese. ʻOku fakahaaʻi leva ʻe he ʻapositoló: “ʻOku siʻi ʻa e taimi ke fakamatala [ai ki he niʻihi kehé].” (Hepelu 11:32) Ko e kau sevāniti faitōnunga ko eni ʻa e ʻOtuá naʻa nau fuʻu tokolahi ʻo lave ai ʻa Paula kia kinautolu ko ha “ʻao [ʻo e] kau fakamoʻoni ʻoku fuʻu pehe fau,” ʻo fakahoa kinautolu ki ha fuʻu konga ʻao lahi ʻoku mafola ʻi he langí. (Hepelu 12:1) ʻIo, ʻi he faai mai ʻa e ngaahi senitulí, kuo ngāueʻaki ai ʻe he fuʻu kakai tokolahi taʻefaʻalaua ʻenau tauʻatāina ke filí ʻo nau fili ke fai ʻenau mateakí kia Sihova ko e ʻOtuá.​—Siosiua 24:15.

Ko e tali māʻolunga taha ki he taukaveʻi ʻa Sētane ʻe lava ke ne fakatafokiʻi ʻa e tangatá meia Sihová naʻe hoko mai ia mei he ʻAlo tonu ʻo e ʻOtuá, ʻa Sīsū Kalaisi. Naʻe mo e langa lahi fakaʻulia ʻo e mate ʻi ha ʻakau fakamamahí naʻe ʻikai ke maumauʻi ai ʻene anga-tonu ki he ʻOtuá. ʻI he heʻaki ʻe Sīsū ʻa ʻene mānava fakaʻosí, naʻá ne kalanga: “ʻE Tamai, ʻoku ou tuku hoku laumalie ki ho nima.”—Luke 23:46.

Ko e faai mai ʻa e taimí kuo fakahaaʻi mahino ai kuo ʻikai malava ke fakatafokiʻi ʻe he Tēvoló ʻa e tokotaha kotoa mei he tauhi ki he ʻOtua moʻoní. Kuo hoko ʻa e faʻahinga taʻefaʻalaua ʻo e tangatá ʻo ʻiloʻi ʻa Sihova pea ‘ʻofa kiate ia, ʻo fai ʻaki ʻa e kotoa ʻo honau lotó, mo e kotoa ʻo honau laumalié, mo e kotoa ʻo honau ʻatamaí.’ (Mātiu 22:37) Ko ʻenau mateaki taʻeueʻia kia Sihová kuo fakahalaki ai ʻa Sētane ʻi he ʻīsiu fekauʻaki mo e anga-tonu ʻa e tangatá. Ko koe foki ʻe lava ke ke fakahalaki ʻa e Tēvoló ʻi he hoko ko ha tangata pe fefine anga-tonu.

Ko e Hā Kuo Pau Ke Ke Faí?

Ko e finangalo ia ʻo e ʻOtuá “ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.” (1 Timote 2:4) ʻE lava fēfē ke ke fai iá? Vaheʻi ha taimi ke ako ai ʻa e Tohi Tapú pea ‘fai ke ʻilo ʻa e Otua moʻonia pe tahá, pea mo Sisu naʻá ne fekau mai ko e Misaiá.’​—Sione 17:3.

Naʻe poleʻi ʻe Sētane ʻa e anga-tonu ʻa e tangatá ʻaki ʻene fehuʻia ʻa e ngaahi taumuʻa ʻa e tangatá ki heʻenau tauhi ki he ʻOtuá. Kapau ʻe tākiekina ʻe he ʻiló ʻa hoʻo ngaahi taumuʻá, kuo pau ke aʻu ia ki ho lotó. Pea ke hoko ʻa e meʻá ni, ʻoku fiemaʻu ke ke fai ʻa e meʻa lahi ange ʻi he kumi pē ʻa e fakamatala mei he Tohi Tapú. Fakatupulekina ʻa e tōʻonga ʻo e fakalaulauloto ki he meʻa ʻokú ke akó. (Sāme 143:5) ʻI hono lau ʻa e Tohi Tapú pe ko ha tohi makatuʻunga ʻi he Tohi Tapú, fakapapauʻi ke vaheʻi ʻa e taimi ke fakakaukauloto ai ki he ngaahi fehuʻi hangē ko ení: ‘Ko e hā ʻoku akoʻi mai ʻe he meʻá ni kiate au fekauʻaki mo Sihová? Ko e hā ʻa e ngaahi ʻulungāanga ʻo e ʻOtuá ʻoku ou sio ʻoku fakamatalaʻi hení? Ko e ngaahi tafaʻaki fē ʻo ʻeku moʻuí ʻoku fiemaʻu ai ke u hangē ko ení? Ko e hā ʻoku hōifua pe ʻikai hōifua ki ai ʻa e ʻOtuá? ʻOku anga-fēfē ʻa e kaunga ʻa e meʻa ko iá ki he anga ʻo ʻeku ongoʻi fekauʻaki mo e ʻOtuá?’ Ko e fakalaulauloto peheé ʻe fakafonu ai ho lotó ʻaki ʻa e ʻofa mo e houngaʻia ki he Tokotaha-Fakatupú.

Ko e anga-tonu ki he ʻOtuá ʻoku ʻikai fakangatangata pē ia ki he tafaʻaki ʻo e tui fakalotú. (1 Tuʻi 9:4) Ko hono tauhi maʻu ʻa hoʻo anga-tonu kia Sihova ko e ʻOtuá ʻoku fiemaʻu ki ai ʻa e lelei fakaeʻulungāanga ʻi he tafaʻaki kotoa pē ʻo e moʻuí. Kae  kehe, ko e tauhi maʻu ʻo e anga-tonú heʻikai fakamasivaʻi ai koe ʻi ha faʻahinga tuʻunga pē. Ko Sihova ʻa e “ʻOtua Mohu Monuʻia” pe fiefiá, pea ʻokú ne fiemaʻu koe ke ke fiefia ʻi he moʻuí. (1 Timote 1:11) Fakakaukau he taimí ni ki he ngaahi tōʻonga pau ʻoku fiemaʻu ke ke fakaʻehiʻehi mei ai koeʻuhi ke ke hanganaki maʻa fakaeʻulungāanga pea maʻu ai ha moʻui fiefia ange pea fakahōifuaʻi ai ʻa e ʻOtuá.

Fakaʻehiʻehi mei he Tōʻonga Kovi Fakaefehokotaki Fakasinó

Kuo fokotuʻu ʻe Sihova tonu ʻa e tuʻunga ki he nofo malí ʻi heʻene Folofolá, ʻa e Tohi Tapú, ʻa ia ʻoku pehē ai: “ʻE tukuange ʻe he tangata ʻene tamai mo ʻene faʻe, kae pikitai ki hono uaifi: pea te na hoko ko e kakano pe taha.” (Senesi 2:​21-24) Koeʻuhi kuo hoko ʻa e ngaahi hoa malí ko e “kakano pe taha,” ʻoku nau fakaʻapaʻapaʻi ʻa e fokotuʻutuʻu fakaemali ʻa e ʻOtuá kapau ʻoku nau fakangatangata ʻa honau ngaahi vā fakaefehokotaki fakasinó kia kinautolu pē. Naʻe fakahaaʻi ʻe he ʻapositolo ko Paulá: “Ke lauʻi lelei ʻa e mali ʻe he kakai kotoa pe; pea ke taʻeʻuliʻi ʻa e mohenga: he ko e kau feʻauaki, mo e tonoʻunoho ʻe fakamāu kinautolu ʻe he ʻOtua.” (Hepelu 13:4) Ko e foʻi lea “mohenga” ʻoku fakahaaʻi ai ko e fehokotaki fakasinó ke ʻi he vahaʻa ia ʻo ha tangata mo ha fefine kuó na mali fakalao. Ke fai ʻe ha taha ʻia kinaua ha fehokotaki fakasino ʻi tuʻa mei he nofo malí ko hono fai ia ʻo e tonó pea ʻe lava ke hoko mai ai ʻa e fakamaau fakatupu ʻauha mei he ʻOtuá.​—Malakai 3:5.

Fēfē ʻa e fehokotaki fakasino ki muʻa ʻi he malí? Ko e meʻa ko iá foki ʻoku fepaki ia mo e ngaahi tuʻunga fakaeʻulungāanga ʻoku fokotuʻu mai ʻe Sihová. “Ko eni ʻa e finangalo ʻo e ʻOtua . . . ke mou fakaʻehiʻehi mei he feʻauaki,” ko e lau ia ʻa e Tohi Tapú. (1 Tesalonaika 4:3) Ko e faka-Sōtomá, hia fakamalaʻiá mo e fehokotaki fakasino mo e manú ko e toe ngaahi angahala foki mo ia ki he ʻOtuá. (Livitiko 18:​6, 23; Loma 1:​26, 27) Ko ha taha pē ʻoku loto ke fakahōifua ki he ʻOtuá pea maʻu ha moʻui fiefia moʻoni kuo pau ke ne fakamamaʻo mei he ngaahi tōʻonga taʻetāú.

Fēfē ʻa e tōʻonga langaʻi holi fakaefehokotaki fakasino ki muʻa ʻi he malí? Ko e tōʻongá ni ʻoku taʻefakahōifua ia kia Sihova. (Kaletia 5:​19) Kuo pau foki ke toe tauhi ke maʻa ʻa e ʻatamaí mei he ngaahi fakakaukau taʻetāú. Naʻe pehē ʻe Sīsū: “ʻIlonga ʻa ia te ne fakasio ki ha fefine ke tafunaki ʻene holi ki ai, kuo ne tonoʻi ia ʻi hono loto.” (Mātiu 5:28) Ko e ngaahi lea ko iá ʻoku ngāueʻaki tatau ia ki he mamata ʻi he ngaahi fakatātā taʻetaau ʻi ha pepa, ko ha filimi pe ko e ʻInitanetí; ki he lau ʻa e ngaahi talanoa ki he fehokotaki fakasinó; pea ki he fanongo ki he ngaahi lea taʻefeʻunga ʻo e ngaahi hivá. Ko e fakaʻehiʻehi mei he ngaahi naunau peheé ʻoku fakahōifuaʻi ai ʻa e ʻOtuá pea ʻoku ʻi ai ʻene tākiekina fakatupu langa hake ki heʻete moʻuí.

Fēfē ʻa e fakamalingá? Ko e fakamalingá ʻoku fakamatalaʻi ia ko e tōʻonga “fakaemanako launoa pe fakatauele fakaefehokotaki fakasino.” Ke fakahanga ʻe ha tangata pe fefine mali ha tokanga pehē ki ha tokotaha ʻi tuʻa mei heʻene nofo malí ʻoku fepaki ia mo e ngaahi tefitoʻi moʻoni Fakatohitapú pea ko ha fakaʻilonga ia ʻo e taʻefakaʻapaʻapa kia Sihova. (Efeso 5:​28-​33) He taʻefeʻunga ē ki he kakai taʻemalí ke nau fefaiʻaki ha ngaahi fakaʻilonga fakaemanako ke maʻu pē ai ʻenau fiefiá! Fēfē kapau ʻoku tali fakamātoato ʻa e fakamalinga ko iá ʻo ʻikai ko e meʻa ia naʻe fakataumuʻa ki aí? Fakakaukau atu ki he mamahi fakaeongo ʻa ia ʻe lava ke ne fakatupungá. ʻOku fakatupu fakakaukau foki ʻa e moʻoniʻi meʻa ko ia ʻe lava ke taki atu ʻa e fakamalingá ki he tono pe ko e feʻauaki. ʻI he tafaʻaki ʻe tahá, ko e tōʻongafai anga-maʻa ki he kakai fefiné pe kakai tangatá ʻoku fakatupulekina ai ʻete tokaʻi-kitá.​—1 Timote 5:​1, 2.

Fakahōifuaʻi ʻa e ʻOtuá ʻi he Ngaahi Tafaʻaki Kehe ʻo e Moʻuí

Ko e ngaahi inu ʻolokaholó ʻoku ala maʻungofua ia ʻi he ngaahi fonua lahi. ʻOku hala ke inu ia? Ko hono inu ʻa e uainé, piá pe ngaahi inu ʻolokaholo kehé ʻo fakafuofuá ʻoku ʻikai tapui ia ʻi he Tohi Tapú. (Sāme 104:15; 1 Timote 5:​23) Kae kehe, ko e inu tōtuʻá mo e konaá ʻoku hala ia ʻi he vakai mai ʻa e ʻOtuá. (1 Kolinito 5:​11-​13) Ko e moʻoni ʻoku ʻikai te ke loto ke inu ʻo fuʻu hulu ke maumauʻi ai hoʻo moʻui leleí pea veuki ai ʻa hoʻo moʻui fakafāmilí.​—Palovepi 23:​20, 21, 29-​35.

Ko Sihova “ʻa e ʻOtua moʻoniā.” (Sāme 31:5) ‘ʻOku ʻikai ʻaupito lava ke loi ʻa e ʻOtuá,’ ko e fakamatala ia ʻa e Tohi Tapú. (Hepelu 6:18) Kapau ʻokú ke fiemaʻu ʻa e hōifua ʻa e ʻOtuá, te ke fakaʻehiʻehi mei he loí. (Palovepi 6:​16-​19; Kolose 3:​ 9, 10) “Mou taki taha lea moʻoni ʻi he feangai mo hono kaungaʻapi,” ko e ekinaki ia ʻa e Tohi Tapú ki he kau Kalisitiané.—Efeso 4:25.

ʻOku toe tōʻongaʻaki foki ʻa e pelepaʻangá. Neongo ʻene manakoa ʻe he tokolahi, ko e pelepaʻangá ko e founga ia ʻo e mānumanú, koeʻuhi ko ha feinga ia ke maʻu paʻanga fakafou ʻi he mole ʻa e niʻihi kehé. ʻOku ʻikai hōifua ʻa Sihova ki he faʻahinga ʻoku nau “havala ki he paʻanga ʻuli.” (1 Timote 3:8) Kapau ʻokú ke fakaʻamu ke fakahōifuaʻi ʻa Sihova, te ke fakaʻehiʻehi leva mei ha founga pē ʻo e pelepaʻangá, ʻo kau ai ʻa e lulú, pingikoú mo e peti ʻi he ngaahi lova hōsí. ʻE iku ʻo ke hoko nai ai ʻo maʻu moʻoni ʻa e paʻanga lahi ange ke feauʻaki ʻa e ngaahi fiemaʻu ʻa ho fāmilí.

Ko e kaihaʻá, ʻa ia ko hono ʻave ʻa e meʻa ʻoku ʻikai ko haʻo meʻá, ko e toe founga ia ʻe taha ʻo e mānumanú. “ʻOua naʻa ke kaihaʻa,” ko e lau ia ʻa e Tohi Tapú. (Ekisoto 20:15) ʻOku hala ke fakatau ha koloa kaihaʻa ʻi he ʻiloʻilo pau pea toʻo taʻefakangofua ha ngaahi meʻa. “Ke ʻoua naʻa kei kaihaʻa ʻe he kaihaʻa,” ko e lau ia ʻa e Tohi Tapú, “ka ne fakafitefitaʻa muʻa, ʻo ngaueʻaki ʻa e ongo nima ko ia ki he meʻa ʻoku lelei, koeʻuhi ke ai haʻane meʻa ke foaki ki he masiva.” (Efeso 4:28) ʻI he ʻikai ke kaihaʻa taimi mei honau pule ngāué, ko e kau ʻofa kia Sihová ʻoku nau ngāue faitotonu. ʻOku nau “loto ke moui agatonu i he mea kotoabe.” (Hepelu 13:​18, PM) Pea ko ha konisēnisi ʻataʻatā ʻoku tokoni moʻoni ia ki heʻete nongá.

ʻOku anga-fēfē ʻa e vakai mai ʻa e ʻOtuá ki ha taha ʻoku ʻita fakamālohi? ʻOku fakatokanga ʻa e Tohi Tapú: “Oua naa ke fakakaiga moe tagata faa ita; bea oua aubito naa ke alu mo ha tagata loto lili.” (Palovepi 22:​24, PM) Ko e ʻita taʻemapuleʻí ʻoku faʻa iku ia ki he ngaahi tōʻonga fakamālohi. (Senesi 4:​5-8) Pea ki he sāuní, ʻoku pehē ʻe he Tohi Tapú: “Neongo pe ko hai, ʻoua te mou totongi ʻene kovi ʻaki ʻa e kovi. Mou tomuʻa fakakaukauʻi hoʻomou ngaahi meʻa ke ha lelei ki he kakai fulipe. Mou nofo melino pe mo e kakai kotoa pe, ʻo kapau ʻe ala lava: kehe pe ke ʻataʻatā meiate kimoutolu. Siʻoku ʻofaʻanga, ʻoua te mou sauni hoʻomou ngaahi meʻa, kae tuku ia ki he Houhau: he kuo tohi, ʻOku aʻaku ʻa e sauni; ko au te u ʻatu hono tuha—ko e folofola e ʻa e ʻEiki.” (Loma 12:​17-19) ʻI heʻetau muimui ʻi he akonaki ko iá, ʻe toe melino ange ai ʻetau moʻuí—pea ʻe fakalahi ai ʻetau fiefiá.

ʻE Lava Ke Ke Lavameʻa

ʻE lava ke ke lavameʻa ʻi hono tauhi maʻu ʻa hoʻo anga-tonu ki he ʻOtuá neongo ʻa e ngaahi tenge ke fai ʻa e meʻa kehé? ʻIo, te ke lava. Ko e meʻa ke lāuʻilo ki aí ʻoku fiemaʻu koe ʻe he ʻOtuá ke ke lavameʻa ʻi hono fakahalaki ʻo Sētane ʻi he ʻīsiu ʻo e anga-tonú, he ʻoku pehē ʻe Heʻene Folofolá: “E hoku foha, ke ke boto koe, bea ke fakafiefiaʻi hoku loto, koeuhi keu faa tali ia aia oku manuki kiate au.”—Palovepi 27:​11, PM.

ʻE lava ke ke lotu kia Sihova ke ne fakaivia koe ke ke fai ʻa e meʻa ʻoku totonú ʻi heʻene ʻafio maí. (Filipai 4:​6, 7, 13) Ko ia fai ha feinga fakapapau ke fakalahi ʻa hoʻo ʻilo ki he Folofola ʻa e ʻOtuá, ʻa e Tohi Tapú. Ko e fakakaukauloto houngaʻia ki he meʻa ʻokú ke ako mei he Tohi Tapú ʻe tokoniʻi ai koe ke fakaloloto hoʻo ʻofa ki he ʻOtuá pea ʻe ueʻi ai koe ke ke fakahōifuaʻi ia. “Ko eni ia ʻa e ʻofa ki he ʻOtua,” ko e lau ia ʻa e 1 Sione 5:​3, 4a, “ʻa ʻetau tauhi ki heʻene ngaahi tuʻutuʻuni. Pea ʻoku ʻikai ke fakamafasia ʻene ngaahi tuʻutuʻuni.” Ko e Kau Fakamoʻoni ʻa Sihova ʻi ho koló te nau fiefia ke tokoniʻi koe ʻi hono ako ʻa e Tohi Tapú. ʻOku fakaafeʻi atu koe ke ke fetuʻutaki kia kinautolu ʻi ho feituʻú, pe ʻe lava ke ke tohi ki he kau faipulusi ʻo e makasini ko ení.

[Fakatātā ʻi he peesi 4]

Naʻe faitōnunga ai pē ʻa Siope ʻi he ʻahiʻahí

[Fakatātā ʻi he peesi 7]

Ko hono fakalahi ʻa hoʻo ʻilo ki he Folofola ʻa e ʻOtuá ʻe fakaivia ai koe ʻi hoʻo fakapapauʻi ke fai ʻa e meʻa ʻoku totonú