Ko e Hā ke Fai Ai ʻa e Meʻa ʻOku Totonú?

NAʻE fakamatala ha tangata mataotao ʻi he taimi ʻe taha ʻo pehē: “ʻOku tolotui mai ʻa e fie fai lelei, ka ko hono fai, ʻoku ʻikai. ʻIo, ko e lelei ʻoku ou fie fai ʻoku ʻikai te u fai; kaekehe, ko e kovi, ʻa ia ʻoku ʻikai te u fie fai, ko ia ia ʻoku ou feia.” Ko e hā naʻe faingataʻa ai ki he tangatá ni ke ne fai ʻa e meʻa lelei naʻá ne fakaʻamu ki aí? Naʻá ne fakamatala: “Ko ia ʻoku ou ongona, lolotonga ʻoku te tokanga kita ki he Lao, ke te fai lelei, ta ʻoku tolotui mai kia kita ʻa e fai kovi. Seuke, ʻoku te kaungā-malieʻia mo e lao ʻa e ʻOtua, ʻa hoto tangata-ʻi-loto; ka ʻoku ha kiate au ha lao kehe ʻoku nofo i hoku ngaahi kupu, ʻo fai tau mo e lao ʻo hoku loto, mo takipopula au ki he lao angahalaʻia ʻoku nofo ʻi hoku ngaahi kupu.”—Loma 7:​18, 19, 21-23.

Ko e ngaahi lea ko eni ʻa e ʻapositolo ko Paulá, ʻa ia naʻe hiki ʻi he meimei taʻu ʻe 2,000 kuohilí, ʻoku fakamatalaʻi ai ʻa e ʻuhinga ʻoku faingataʻa ai ki he tangata taʻehaohaoá ʻa hono fai ʻa e meʻa ʻoku totonú. Ko e pipiki ki he ngaahi tefitoʻi moʻoni totonú, tautefito ʻi he ngaahi tuʻunga faingataʻá, ʻoku fiemaʻu ki ai ʻa e mālohi fakaeʻulungāanga. Ko ia ʻoku lelei ke tau ʻeke, Ko e hā ʻa e ʻuhinga mahuʻinga taha ki hono fai ʻa e meʻa ʻoku totonú?

Fakakaukau ki he meʻa ʻoku leaʻaki ʻe he Tohi Tapú fekauʻaki mo e kahaʻu ʻo ha tokotaha ʻulungāanga totonu. ʻI he Sāme 37:​37, 38, (PM) ʻoku tau lau ai: “Vakai ki he tagata haohaoa, mo tokaga ki he agatonu: he koe gataaga oe tagata koia koe melino. Ka e fakaauha fakataha ae kau agahala: koe ikuaga oe agakovi e motuhi ia.” ʻOku tala mai ʻe he Palovepi 2:​21, 22: “He ko e kau angatonu te nau nofoʻia ʻa e fonua, pea ko e haohaoa te ne ʻi ai ai pe. Ka ko e kakai kovi ʻe tuʻusi mei he fonua, ʻio, ko kinautolu ʻoku fai kākā ʻe taʻaki mei ai.”

Neongo ko e ngaahi talaʻofá ni mo e ngaahi talaʻofa kehe ʻoku maʻu ʻi he Tohi Tapú ʻoku ʻomai ai kia kitautolu ha taumuʻa ke tuli ai ki he ʻalunga ʻa ia ʻoku fakahōifua ki he ʻOtuá, ʻoku ʻikai te nau hoko ko e ʻuhinga tefito ia ki he fai peheé. Ko e ʻuhinga ko iá ʻoku felāveʻi ia mo ha ʻīsiu ʻa ia ʻoku kaunga fakafoʻituitui ki he ngaahi meʻamoʻui maʻu ʻatamai kotoa pē. Ko e kupu hokó ʻoku lāulea ai ki he ʻīsiu ko iá mo e anga ʻene kaunga kia kitautolú.