Ko ha Sila ‘ʻa Sukali’

ʻI HE senituli hono fitu K.M., naʻe ikunaʻi ai ʻa Selusalema ʻe he pule Kalitia ko ia ko Nepukanesá, ʻo ne tutu ʻa e fuʻu koló, pea maumauʻi ʻa hono ngaahi ʻaá. Naʻá ne puke ʻo fakakuihi ʻa Setekaia, ʻa e tuʻi ʻo Siutá. ʻIkai ngata aí, “naʻe tamateʻi foki ʻe he Tuʻi Papilone ʻa e houʻeiki Siuta kotoa.”—Selemaia 39:​1-8.

Ko e taha ʻo e houʻeiki, pe pilinisi ʻo Siuta ʻa ia ʻoku ngalingali naʻe fakapoongi ʻe he kau Pāpiloné, ko Sukali ko e foha ʻo Silimaia. Ko e talanoa kia Sukalí ko ha fakamatala foʻou ia ki he tokotahá ni. Kae kehe, ki muʻa ke tau lāulea ki aí, tau sio angé ki he meʻa ʻoku leaʻaki ʻe he Tohi Tapú ʻo kau kia Sukali pea mo hono taimí.

“ʻE ʻIkai Te Nau Lavaʻi Koe”

Naʻe fekauʻi ʻe Sihova ʻa e palōfita ko Selemaiá ke ne fakahoko ha pōpoaki ʻo e fakamaau ki Siuta mo Selusalema. Naʻe tala ʻe he ʻOtuá kia Selemaia ʻe “tau” mo ia ʻa e ngaahi tuʻí, kau pilinisí, kau taulaʻeikí mo e kakai ʻo Siutá. “Ka ʻe ʻikai te nau lavaʻi koe: he ʻoku ou ʻiate koe ke fai ho fakahaofi,” ko e folofola ia ʻa Sihová.—Selemaia 1:​17-19.

Lolotonga ʻa hono ʻākoloʻi ʻe Pāpilone ʻa e kolomuʻa ʻo Siutá, ʻa Selusalema, naʻe tuʻo ua ʻa hono fekauʻi ʻe Tuʻi Setekaia ha ongo talafekau kia Selemaia ke ʻiloʻi pe ʻe mavahe koā ʻa Nepukanesa mei he koló pea ke kole ange ki he palōfitá ke ne lotu ke hoko ʻa e meʻa ko iá. Ko e taha ʻo e kau talafekau ʻa e tuʻí ko Sukali, ʻa ia naʻe toe ʻiloa ko Sihukalí. Ko e fekau naʻe ʻoange ʻe he ʻOtuá kia Selemaiá ʻe fakaʻauha ʻe he kau Pāpiloné pe kau Kalitiá ʻa e koló. Ko ha taha pē mei Selusalema naʻe kei nofo ʻi he koló, ʻe mate ia ʻi he fiekaiá, mahaki fakaʻauhá pea mo e heletaá. ʻI he tafaʻaki ʻe tahá, ko e faʻahinga ko ia te nau hū atu ki tuʻa ki he kau Kalitiá te nau hao moʻui. He fakaʻitaʻi lahi moʻoni ʻe he ngaahi lea ʻa Selemaiá ʻa e kau pilinisi ʻo Siutá!—Selemaia 21:​1-10; 37:​3-10; 38:​1-3.

Ko Sukalí ko e taha ia ʻo e kau pilinisi ʻa ia naʻa nau fakaʻaiʻai ʻa Setekaia ʻo pehē: “Tamateʻi muʻa ʻa e tangata ni [ʻa Selemaia]; he . . . ʻoku malumaea ai ʻa e nima ʻo e kau tangata tau.” Naʻe toe kau foki mo Sukali fulikivanu ʻi he faʻahinga ko ia naʻa nau lī ʻa Selemaia ki ha lepa pelepelá, ʻa ia naʻe toki fakahaofi mei ai ki mui ʻa e palōfitá. (Selemaia 37:15; 38:​4-6) Koeʻuhi naʻá ne talangofua kia Sihova, naʻe hao ai ʻa Selemaia ʻi he fakaʻauha ʻo Selusalemá, ka ʻoku hā mahino naʻe mate ʻa Sukali ʻi he taimi naʻe fakaʻauha ai ʻa e fokotuʻutuʻu faka-Siu ʻa ia naʻá ne falala ki aí.

Ko ha Fakamatala Foʻou Fakatupu Tokanga

ʻE leaʻaki nai ʻo pehē ko e fakamatala foʻou ki he talanoa ʻo kau kia Sukalí naʻe “hiki” ia ʻi Selusalema ki muí ni mai ʻi he 2005. Naʻe keli ʻa e kau keli fakatotoló ʻi ha feituʻu ʻa ia ne nau ʻamanekina ke maʻu ai ʻa e palasi ʻo Tuʻi Tēvitá. Ko e meʻa naʻa nau maʻú ko ha fuʻu maka lahi ʻoku nau tui ne fakaʻauha ʻi he taimi naʻe ikunaʻi ai  ʻe he kau Pāpiloné ʻa Selusalema ʻi he taimi ʻo Selemaiá.

Pe ko e palasi eni ʻo Tēvitá pe ʻikai, ʻoku kei tuʻu taʻepau pē ia. Kae kehe, naʻe maʻu hake ʻe he kau keli fakatotoló ha meʻa ʻe taha—ko e sila ʻumea senitimita ʻe 1 hono fālahí ʻa ia ʻoku hā ʻi he peesi 14. Naʻe ngāueʻaki ia ki muʻa ke silaʻiʻaki ha tohi naʻe fuoloa taʻu ʻene moveté. ʻOku pehē ʻi ha tohi he silá: “Ko e meʻa ʻa Iehukali ko e foha ʻo Selemiahu ko e foha ʻo Sovi.” Ko e tohi ko ení ʻoku hā mahino naʻe ngaohi fakataha ia mo e sila ʻa e tokotaha naʻe fakafepaki kia Selemaia ko Iehukalí, pe Sukali ko e foha ʻo Silimaiá.

Ko e tokotaha keli fakatotolo ko Eilat Mazar, ʻa ia naʻá ne fakaʻuhingaʻi ʻa e meʻa naʻe tohi ʻi he silá, ʻokú ne tohi ko Sihukali ʻa e “minisitā fakatuʻi hono ua,” ʻi he hili pē ʻa Kemalaia, ko e foha ʻo Sāfaní, ʻa ia ko hono hingoá ʻoku hā ia ʻi ha sila naʻe maʻu ʻi he Kolo ʻo Tēvitá. a

Ko e tui ki he Folofola ʻa e ʻOtuá ʻoku ʻikai ke fakatuʻunga ia ʻi hano ʻiloʻi ha faʻahinga ngāue fakameaʻa pē; ka ko hono fakahoko ko ia ʻa e kikite fakamānavaʻí ko ha makatuʻunga lelei ia ke tui ai ki he Tohi Tapú. ʻOku fakamoʻoniʻi ʻe he ngaahi moʻoni fakahisitōliá naʻe tonu ʻa hono tomuʻa tala ʻe Selemaia ʻa hono fakaʻauha ʻo Selusalemá. Ko e ikuʻanga fakamā ʻo e kau fakafepaki kia Selemaiá ʻoku totonu ke fakaivimālohiʻi ai ʻa ʻetau tuipau, kapau ʻoku tau faitōnunga hangē ko Selemaiá, ‘ʻe ʻikai lavaʻi kitautolu [ʻe hotau ngaahi filí]: he ʻoku ʻiate kitautolu ʻa Sihova.’

[Fakamatala ʻi lalo]

[Fakatātā ʻi he peesi 15]

Naʻe ʻikai ke tukulolo ʻa Selemaia ki he tenge ke fakavaivaiʻi ʻa e pōpoaki ʻa e ʻOtuá

[Maʻuʻanga ʻo e Tā ʻi he peesi 14]

Gabi Laron/Institute of Archaeology/ Hebrew University ©Eilat Mazar