Maʻu ʻa e Fakamaama Moʻoní

KO E ʻaho 18 ia ʻo Tīsema, 1810. Naʻe kamata ke mamalu ʻa e poʻulí. ʻI he ngaahi tahi hou tuʻu mei he matāfonua fakatonga-hahake ʻo Sikotilaní, naʻe hē ai mei hono halangá ʻa e kiʻi vaka Tau Tahi Pilitānia ko e HMS Pallas. ʻI heʻene ʻalu ke toe fakapoʻuli ange pea toe tō mo e sinoú naʻe faingataʻa ange ai ki he kau kauvaká ke nau ʻiloʻi ʻa e ngaahi maama fakaʻilonga ko ia naʻa nau fiemaʻu ke tatakiʻaki ʻa honau vaká ki he feituʻu malú. Fakaʻuta atu ki heʻenau fiefiá ʻi he faifai pea nau sio ki ha ngaahi maama ʻo nau afeʻi ki ai ʻa honau vaká! Neongo ia, ko e meʻa fakamamahí, he naʻe ʻikai ko e ngaahi maama tataki ia naʻa nau fiemaʻú. Ko hono moʻoní, ko e ngaahi afi ia ʻa ha kau ngāue ʻa ia naʻe ulo ʻo ofi ki he matāfonuá. Naʻe tuiʻi ai ʻe he Pallas ʻa e ngaahi pā maká ʻo ngoto fakaʻaufuli. Naʻe melemo ai ha kau kauvaka ʻe toko 11. Ko ha meʻa fakamamahi moʻoni ia!

ʻI he tuʻunga ʻo e Pallas, naʻe taki atu ia ʻe ha foʻi fehālaaki ki he fakatamakí. Kae kehe, ʻi he ngaahi taimi kehe, naʻe fehangahangai ai ha kau kauvaka mo ha fakatuʻutāmaki ʻoku toe lahi ange, ko e ngaahi maama fakatokanga loi. Ko e ngaahi maama peheé naʻe fokotuʻu iá ke ne tohoakiʻi ʻa e ngaahi vaká ki he ngaahi matāʻutoʻuta makaʻiá koeʻuhi ke lava ai ʻo kaihaʻasi ʻa e ngaahi toetoenga maumaú, fakatatau ki he fakamatala ʻa e tohi ko e Wrecks, Wreckers and Rescuers.

‘Gaahi Tohi Maonioni, Aia Oku Lava ke Taki Atu Ai Koe ki he Fakamouí’

ʻI hoʻo fekumi ki he fakamāmá, ʻokú ke fehangahangai ai mo e ngaahi fakatuʻutāmaki ʻa ia ʻoku meimei tatau mo e ngaahi tuʻunga naʻe fetaulaki mo e kau kauvaka ko iá. Te ke muimui nai ʻi ha fakamatala hala, pe aʻu nai ʻo maʻukovia koe ʻe ha kākā fai fakakaukauʻi. Ko ha taha pē ʻi he ongo hala ko iá ʻe lava ke iku ia ki he tuʻunga fakamamahi. Ko e hā ʻe lava ke ke fai ke maluʻi ai koé? Fakapapauʻi ko hoʻo matavai ʻo e fakamāmá ʻoku moʻoni mo alafalalaʻanga. Kuo poupouʻi ʻo laka hake he taʻu ʻe 125 ʻe he makasini ko ení ʻa e Folofola fakamānavaʻi ʻa e ʻOtuá, ko e Tohi Tapú, ʻi he tuʻunga ko e matavai alafalalaʻanga taha ia ʻo e fakamāmá koeʻuhi ʻoku ʻi ai ‘ae gaahi tohi maonioni, aia oku lava ke taki atu ai koe ki he fakamouí.’—2 Timote 3:​15-17, PM.

Ko e moʻoni, ke ke maʻu ʻa e tuipau ki he Tohi Tapú ko ha maama tataki alafalalaʻangá, ʻoku ʻuhinga lelei ke ke vakaiʻi ʻa hono ngaahi tuʻunga  falalaʻangá. (Sāme 119:105; Palovepi 14:15) ʻOku lelei ke ke tohi ki he kau faipulusi ʻo e makasini ko ení ke maʻu mei ai ha fakamatala ʻa ia kuo tokoni ki hono fakatuipauʻi ki he laui miliona ʻoku moʻoni ko e Tohi Tapú ko e fakamānava ia ʻa e ʻOtuá. Ko e fakatātaá, lau ʻa e vahe 2 ʻo e tohi ʻoku fakakaveinga Ko e Hā ʻOku Akoʻi Moʻoni ʻe he Tohi Tapú? a ʻOku ʻomai ai ʻa e fakamatala lahi ʻoku fakahaaʻi ai ko e Tohi Tapú ʻoku totonu, alafalalaʻanga mo fakamānavaʻi.

Ngaahi Moʻoni Tefito

Ko e hā leva ʻa e niʻihi ʻo e ngaahi moʻoni tefito ʻoku ʻi he “gaahi tohi maonioni” ko ení? Fakakaukau angé ki he ngaahi fakatātā ko ení.

ʻOku ʻi ai ʻa e ʻOtua Māfimafi-Aoniu mo e Tokotaha-Fakatupu pē ʻe taha ʻa ia naʻá ne ngaohi ʻa e meʻa kotoa pē. (Senesi 1:1) ʻOku tau moʻuí pē koeʻuhi naʻe “ngaohi [ʻe he ʻOtuá] ʻa e meʻa kotoa pē” pea ʻomai kia kitautolu ʻa e moʻuí. (Fakahā 4:11) Ko e ʻuhinga ia, ko ia toko taha ai pē ʻoku taau ke tau lotu ki aí. Ko e Tokotaha-Fakatupú ʻa e Matavai taupotu ʻo e fakamaama kotoa pē. (Sāme 36:9; Aisea 30:​20, 21; 48:​17, 18) ʻOku ʻi ai hono huafa fakafoʻituitui ʻa ia ʻokú ne fiemaʻu mai ke tau ngāueʻaki. (Ekisoto 3:15) Ko e huafa ko iá, ʻi hono tohi ʻi he ngaahi mataʻitohi faka-Hepeluú pea ʻi he ʻalafapeti YHWH, ʻoku hā tuʻo 7,000 nai ia ʻi he Tohi Tapú. Kuo ngāueʻaki ia ʻi he ngaahi taʻu lahi ʻi he lea faka-Tongá ʻi he foʻi lea ko e “Sihova.”—Sāme 83:18.

Naʻe ngaohi ʻe Sihova ʻa e kakai tangatá mo e kakai fefiné ke nau moʻui taʻengata ʻi he ngaahi tuʻunga Palataisi ʻi heni tonu ʻi māmani. Naʻá ne foaki ki he tangatá ʻa e ngaahi ʻulungāanga fakalaumālie ʻoku tapua atu ai ʻa hono ʻulungāangá. Naʻá ne foaki ange kia kinautolu ʻa e ngaahi pōtoʻi mo e malava ʻa ia ʻe ʻai ai ke nau fiefia ʻi ha moʻui fakaetangata taʻehanongataʻanga mo fakafiemālie ʻi māmani. (Senesi 1:​26-28) Naʻe ʻikai ʻaupito te ne fakataumuʻa ki he māmaní ke hoko ko ha faʻahinga feituʻu ia ke ʻahiʻahiʻi ai ʻa e kakai tangatá mo e kakai fefiné, ko ha lakaʻanga ki ha moʻui laumālie ʻi hēvani, ʻo hangē ko e feituʻu pē ia ʻe taha ʻe toki lava ke nau maʻu ai ha vahaʻangatae mo e ʻOtuá.

Naʻe ʻikai ha kovi ʻi he fakatupu fakaetangata ʻa e ʻOtuá. Naʻe toki hoko pē ʻa e koví ʻi he taimi naʻe ngāuehalaʻaki ai ʻe he niʻihi ʻo e ngaahi meʻa fakatupu ʻa e ʻOtuá, fakaetangatá mo e fakalaumālié fakatouʻosi, ʻa ʻenau tauʻatāina ke filí pea angatuʻu ki he ʻOtuá. (Teutalonome 32:5) Naʻe toʻo ʻe heʻetau ʻuluaki ongo mātuʻá ʻa e totonu ke fakapapauʻi ʻia kinaua pē ʻa e meʻa naʻe leleí mo ia naʻe koví. (Senesi 2:​17; 3:​1-5) Naʻe ʻomai ʻe he meʻa ko iá ʻa e mate ki he fāmili ʻo e tangatá. (Senesi 3:​19; Loma 5:​12) Ke fakaleleiʻi ʻa e ngaahi meʻa naʻe langaʻi ʻe he angatuʻú, naʻe fili ai ʻe Sihova ke fakaʻatā fakataimi ʻa e fulikivanú. Ka ko ʻene taumuʻa ki he māmaní pea ki he fāmili fakaetangatá kuo teʻeki ai pē ke liliu. (Aisea 45:18) ʻE moʻui taʻengata ʻa e kakai tangatá mo e kakai fefiné ʻi he ngaahi tuʻunga Palataisi ʻi ha māmani maʻa.​—Mātiu 6:​10; Fakahā 21:​1-5.

Ko Sīsū Kalaisí, ʻoku ʻikai ko e ʻOtua Māfimafi-Aoniú ia, ka ko e ʻAlo ʻo e ʻOtuá. Naʻe akoʻi ʻe Sīsū Kalaisi tonu ʻa hono kau muimuí ke nau lotu: “Ko ʻemau Tamai ʻoku ʻi Hevani, ke tapuhā ho Huafa.” (Mātiu 6:9) Naʻe ʻikai ʻaupito te ne taukaveʻi ʻokú ne tatau mo e ʻOtuá. ʻI hono kehé, naʻá ne pehē: “ʻOku lahi ʻa e Tamai ʻiate au.”—Sione 14:28.

ʻOku fakahoko ʻe Sīsū ha tafaʻaki mātuʻaki mahuʻinga ʻi hono ngāueʻi ʻo e taumuʻa ʻa e ʻOtuá.  Naʻe fekau mai ia ʻe he ʻOtuá “ki māmani ko e maama, koeʻuhi he ʻilonga ha taha ʻoku tui pikitai kiate [iá], pea ʻoua te ne kei nofo ai pe ʻi he poʻuli.” (Sione 12:46) Fakatatau ki he ʻapositolo ko Pitá, “ʻoku ʻikai ke tuʻu ʻi ha taha kehe ʻa e fakamoʻui.” (Ngāue 4:12) ʻOku moʻoni eni koeʻuhi ʻoku fakatuʻunga hotau fakamoʻuí ʻi he taʻataʻa maʻongoʻonga ʻo Kalaisí. (1 Pita 1:​18, 19) Naʻe foaki ʻe Sīsū Kalaisi ʻene moʻuí ko ha feilaulau huhuʻi ke huhuʻiʻaki ʻa e faʻahinga ʻo e tangatá mei he angahala naʻe fakahoko mai ʻe heʻetau ʻuluaki ongo mātuʻá, ʻe ʻĀtama mo ʻIvi, ki he fāmili ʻo e tangatá. (Mātiu 20:28; 1 Timote 2:6) Pehē foki, naʻe ngāueʻaki ʻe he ʻOtuá ʻa Sīsū ke ne fakaeʻa ʻa Hono finangaló mo ʻene taumuʻá.​—Sione 8:​12, 32, 46, 47; 14:6; Ngāue 26:23.

Kuo fokotuʻu ʻe he ʻOtuá ha Puleʻanga, pe founga-pule fakahēvani, ʻoku faʻuʻaki ʻa Sīsū Kalaisi mo e faʻahinga kuo fili mei he faʻahinga ʻo e tangatá. Ko e kaveinga ko eni ʻoku toutou ʻohaké ʻoku maʻu ia ʻi he kotoa ʻo e Tohi Tapú. Kuo tuku ʻe he ʻOtuá ki he founga-pulé ni ʻa e ngāue ko hono fakapapauʻi ʻoku fai hono finangaló ʻi māmani ʻo hangē ko ia ʻi hēvaní. (Mātiu 6:​10) Naʻe ʻikai ko ha konga ia ʻo e muʻaki taumuʻa ʻa e ʻOtuá ki ha taha pē mei he faʻahinga ʻo e tangatá ke ʻalu ki hēvani. Ko honau ʻapí ko e foʻi māmaní. Ka ʻi he hili ʻa e tō ʻa e tangatá ki he angahalá, naʻe fakataumuʻa ai ʻe he ʻOtuá ha meʻa foʻou. Naʻá ne fokotuʻutuʻu ke fili ʻa e kakai “mei he faahiga, moe lea, moe kakai, moe buleaga kotoabe . . . [ke nau pule] koe gaahi tuʻi” fakataha mo Kalaisi ʻi ha founga-pule fakahēvani. (Fakahā 5:​9, 10, PM) Ko e Puleʻanga ko iá kuo vavé ni ke ne “laiki mo fakaʻauha” ʻa e ngaahi pule fakaetangata kotoa pē, ʻa ia kuó ne ʻomai ʻa e mamahi mo e langa lahi ʻaupito ki he fāmili ʻo e tangatá.​—Taniela 2:44.

ʻOku ʻikai ha konga ʻo e tangatá ʻe taʻefaʻamate. Ko e foʻi moʻoni tefito Fakatohitapu ko ení ʻokú ne fakamāʻalaʻala ʻa e meʻa lahi fekauʻaki mo e tangatá pea mo e ngaahi meʻa ʻoku ʻamanekina ʻi heʻene moʻuí. ʻOkú ne toe toʻo ʻa e taʻemahino mo e fakamatala hala ʻa ia kuó ne ʻai ke puputuʻu ʻa e kakaí ʻo fekauʻaki mo e tuʻunga ʻo e kau maté.

“Ko e tohi Koheleti 9:​5, 10 ʻoku tala mai ai: “He ko e kau moʻui ʻoku nau ʻilo ai pe te nau pekia; ka ko e kau pekia ʻoku ʻikai te nau ʻilo ha momoʻi meʻa, . . . ʻoku ʻikai ha ngaue, pe ha fakakaukau, pe ha ʻilo, pe ha poto ʻi lolofonua, ʻa e feituʻu ʻoku ke fononga ki ai.” ʻOkú ke sio ki he ʻuhinga ʻo e meʻa ko iá? ʻOku ʻikai ha konga ʻo e tangatá ʻe moʻui atu ʻi he hili ʻa e maté. ʻI he taimi ʻoku mate ai ʻa e tangatá te ne toe “foki ki he kelekele.”​—Senesi 3:19.

Ko e faʻahinga kuo maté ʻe lava ke toe fakafoki ki he moʻuí fakafou ʻi ha toetuʻu. ʻI he hili ʻa e vahaʻa taimi ʻo hono fakaʻatā fakataimi ʻe he ʻOtuá ʻa e fulikivanú, “ʻe fanongo ai ki hono leʻo [ʻo Sīsuú] ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai; ko kinautolu naʻe ngaue lelei, ki he toetuʻu ke moʻui, ko kinautolu naʻe fai kovi, ki he toetuʻu ke fakamāu.” (Sione 5:​28, 29; Ngāue 24:15) ʻE toe fakafoki ʻa e  kakaí fakafou ʻi he toetuʻú ki he moʻui fakaetangata ʻi ha māmani palataisi, ʻa e faʻahinga moʻui ko ia naʻe muʻaki fakataumuʻa ʻe he ʻOtuá ki hono fāmili fakaetangatá.

Vakaiʻi Lelei Fakaʻaho ʻa e Tohi Tapú

ʻOkú ke sio ki he founga ʻe lava ke tokoniʻi ai koe ʻe ha ʻilo ki he ngaahi moʻoni tefito peheé? ʻI he ngaahi taimi faingataʻa mo moveuveu ko ení, ko e ʻilo ko iá ʻe lava ke ne maluʻi koe mei he “ʻIlo-loloto, ka ko e lauhala” ʻoku fakamafola ʻe Sētane ko e Tēvoló. ʻOkú ne fakangalingali ko ha “angelo mei he maama,” pea ko hono kau fakafofongá ʻoku nau fakahaaʻi kinautolu ko e “kau sevaniti ʻa Faitotonu.” (1 Timote 6:20; 2 Kolinito 11:​13-15) Ko e ʻilo totonu Fakatohitapú ʻoku lava ke ne maluʻi koe mei he fakamaama lau pē ʻo makatuʻunga ʻi he ngaahi ʻilo fakaetangata ʻa e “kakai ʻoku poto mo ʻiloʻilo,” ʻa ia kuo “nau fakataleʻi ʻa e folofola ʻa Sihova.”—Mātiu 11:25; Selemaia 8:9.

Koeʻuhi naʻe lahi fau ʻa e ngaahi akonaki mo e ʻilo fakaetangata takihalaʻi ʻi hono ʻahó, naʻe fakatokanga ai ʻa e ʻapositolo ko Sioné ki he kau Kalisitiane ʻi he taimi ʻo e kau ʻapositoló: “ʻOua te mou tui ki he laumalie fulipe.” Naʻá ne pehē: “Sivi pe ʻa e ngaahi laumalie, pe ʻoku mei he ʻOtua ia.” (Fakaʻītali ʻamautolu; 1 Sione 4:1) Fakakaukau ki heni. Kapau naʻá ke maʻu ha pōpoaki ʻa ia naʻe lava ke ʻi ai hano kaunga lahi ki hoʻo moʻuí, te ke tali noaʻia ia koeʻuhí pē ko ʻene hā ngali ʻoku haʻu mei ha matavai leleí? Ko e moʻoni ʻe ʻikai. Te ke vakaiʻi ʻa hono matavaí pea sivisiviʻi ʻa e meʻa ʻoku ʻi aí ki muʻa ke ke ngāue ki ai.

ʻI hono tokonaki mai ha lēkooti ʻo ha tohi fakamānavaʻi ʻoku ʻi ai ʻa e ngaahi moʻoni tefitó, kuo ʻai ai ʻe he ʻOtuá ke malava ʻo ke fai ʻa e meʻa tofu pē ko iá, ke “sivi” ʻo fakapapauʻi ko e ngaahi maama tataki, pe maama fakaʻilonga ʻokú ke muimui ki aí ʻoku moʻoni. (1 Tesalonaika 5:21) Ko e kakai anga-fakaʻeiʻeiki ʻi he taimi ʻo e kau ʻapositoló naʻe fakaongoongoleleiʻi kinautolu ʻi heʻenau “kumi ʻi he Tohitapu ʻi he ʻaho kotoa pe” ke fakapapauʻi ko e meʻa tonu naʻa nau akó ko e moʻoní ia. (Ngāue 17:11) ʻE lava ke ke fai ʻa e meʻa tatau. Tuku ke tataki koe ʻe he Tohi Tapú ki he feituʻu malú, hangē “ha māma oku ulo i he botu fakabouli.” (2 Pita 1:​19-21, PM) Kapau te ke fai ia, “te ke maʻu ʻa e ʻiloʻi ʻo e ʻOtua,” ʻa ia ʻoku ʻomai ai ʻa e fakamaama moʻoní.—Palovepi 2:5.

[Fakamatala ʻi lalo]

[Fakatātā ʻi he peesi 4]

Ko e Folofola ʻa e ʻOtuá ʻoku hangē ha māmá

[Fakatātā ʻi he peesi 5]

Ko hai ʻa e huafa ʻo e ʻOtuá?

[Fakatātā ʻi he peesi 5]

Ko e hā ʻa e kahaʻu ʻo e faʻahinga ʻo e tangatá?

[Fakatātā ʻi he peesi 6]

Ko Sīsū ʻa e ʻOtua Māfimafi-Aoniú?

[Fakatātā ʻi he peesi 6]

ʻOku ʻi fē ʻa e kau maté?

[Fakatātā ʻi he peesi 7]

Ko e toetuʻu ʻa e maté ko e taha ia ʻo e ngaahi moʻoni tefito ʻoku akoʻi ʻi he Tohi Tapú