Ngaahi Fehuʻi mei he Kau Lautohí

Ko e hā naʻe ʻuhinga ki ai ʻa Sīsū ʻi heʻene tala ange kia Nikotīmasi: “Kuo teʻeki ke ʻalu hake ha toko taha ʻo hu ki langi, ngata pe ʻiate ia naʻe ʻalu hifo mei he langi, ko e Fanautama ʻa Tangata”?—Sione 3:13.

Naʻe ʻi māmani ʻa Sīsū ʻi he taimi ko iá, pea naʻe teʻeki ai ke ne ʻalu hake, pe foki ki hēvani. Kae kehe, ko e meʻa ʻoku tau ʻiloʻi fekauʻaki mo Sīsū pea mo e potutohi ʻo ʻene ngaahi leá ʻoku lava ke ne tokoniʻi kitautolu ke mahinoʻi ai ʻa ʻene ʻuhingá.

Ko Sīsuú “naʻe ʻalu hifo mei he langi” he naʻá ne moʻui ki muʻa ʻi he nofoʻanga laumālié fakataha mo ʻene Tamaí, ka ʻi he taimi kotofá, naʻe hiki hifo ai ʻa e moʻui ʻa e ʻAló ki he manava ʻo Melé, ʻo iku ai ki hono ʻaloʻi ʻa Sīsū ko ha tangata. (Luke 1:​30-​35; Kaletia 4:4; Hepelu 2:​9, 14, 17) Hili ʻene pekiá, naʻe pau ke fokotuʻu hake ai ʻa Sīsū ko ha meʻamoʻui laumālie ʻo ne foki ke nofo mo Sihova. Ko ia ai, ʻi he taimi nounou ki muʻa ke fakapoongi iá, naʻe lava ke lotu ai ʻa Sīsū: “Tamai, ke ke fakalangilangiʻi au ʻe koe, he fakataha mo e ʻAfiona, ʻaki ʻa e langilangi naʻa ku maʻu ʻi he teʻeki ke tuʻu ʻa mamani ʻi heʻeku feangai mo ko e.”—Sione 17:5; Loma 6:​4, 9; Hepelu 9:24; 1 Pita 3:18.

ʻI he taimi naʻe talanoa ai ʻa Sīsū mo Nikotīmasi, ʻa ia ko ha Fālesi pea ko ha faiako ʻi ʻIsilelí, naʻe teʻeki ai ke foki ʻa Sīsū ki hēvani. Ko e moʻoni, ne ʻikai ha toe taha ʻi he faʻahinga ʻo e tangatá naʻe mate pea ʻalu hake ki he nofoʻanga laumālié, ki hēvani. Naʻe fakahaaʻi ʻe Sīsū tonu ko Sione Papitaisó naʻá ne māʻolunga ʻi he tuʻunga ko ha palōfita ʻa e ʻOtuá, ka “ko ia oku jii taha be i he buleaga oe lagi oku lahi ia iate ia.” (Mātiu 11:​11, PM) Pea naʻe fakamatalaʻi ʻe he ʻapositolo ko Pitá naʻa mo e tokotaha faitōnunga ko Tuʻi Tēvitá kuó ne mate, pea naʻá ne kei ʻi hono fonualotó pē; naʻe ʻikai ke ʻalu hake ʻa Tēvita ia ki hēvani. (Ngāue 2:​29, 34) Naʻe ʻi ai ha ʻuhinga naʻe ʻikai ʻalu ai ki hēvani ʻa Tēvita, Sione Papitaiso mo e kau tangata kehe ʻo e tuí, ʻa ia naʻa nau mate ki muʻa ʻia Sīsuú. Naʻa nau mate ki muʻa ke tofa ʻe Sīsū ʻa e hala, pe ko e faingamālie ke fokotuʻu hake ai ʻa e tangatá ki he moʻui fakahēvaní. Naʻe tohi ʻe he ʻapositolo ko Paulá ʻo pehē ko Sīsuú, ʻi heʻene hangē ha takimuʻá, ‘ne ne tofa ha hala foʻou mo moʻui’ ki hēvani.​—Hepelu 6:​19, 20; 9:​24; 10:​19, 20.

Koeʻuhi ne teʻeki ai ke pekia ʻa Sīsū pea fokotuʻu hake, ko e hā naʻá ne ʻuhinga ki ai ʻi heʻene pehē kia Nikotīmasi: “Kuo teʻeki ke ʻalu hake ha toko taha ʻo hu ki langi, ngata pe ʻiate ia naʻe ʻalu hifo mei he langi, ko e Fanautama ʻa Tangata”? (Sione 3:13) Fakakaukau angé ki he potutohí, pe ko e meʻa naʻe fetalanoaʻaki ki ai ʻa Sīsū mo Nikotīmasí.

ʻI he taimi naʻe haʻu fakafufū ai ʻa e pule Siu ko iá kia Sīsū ʻi he poʻulí, naʻe tala ange ʻe Sīsū kiate ia: “Koe mooni, koe mooni, oku ou tala kiate koe, Kabau e ikai fanauʻi foou ha tagata, e ikai aubito mamata ia ki he buleaga oe Otua.” (Sione 3:​3, PM) ʻI he tali ki aí, naʻe ʻeke ange ʻe Nikotīmasi: ‘ʻO lava fēfē ia? ʻE lava fēfē ke toe fanauʻi tuʻo ua ha tangata?’ Naʻe ʻikai te ne mahinoʻi ʻa e akonaki fakaʻotua ko eni fekauʻaki mo e hū ki he Puleʻanga ʻo e ʻOtuá. Naʻe toe ʻi ai ha founga ʻe lava ke ne ako ai ʻo fekauʻaki mo e meʻá ni? Sai, ʻe ʻikai lava ia ʻi he vakai ʻa e tangatá; naʻe ʻikai ha tangata naʻe lava ke ne fakahinohinoʻi ia fekauʻaki mo e meʻá ni koeʻuhí he naʻe teʻeki ke ʻi hēvani ha taha ʻo ne ʻi ha tuʻunga ai ke ne fakamatalaʻi ha meʻa pē fekauʻaki mo e hū ki he Puleʻangá. Tuku kehe pē ʻa Sīsū. Naʻe lava ke ne akoʻi ʻa Nikotīmasi mo e niʻihi kehé koeʻuhi naʻá Ne ʻalu hifo mei hēvani pea naʻá ne taau ai ke fakahinohinoʻi ʻa hono kakaí ʻo fekauʻaki mo e ngaahi meʻa ko iá.

Ko e foʻi fehuʻi ʻi he konga tohi ko ení ʻoku fakatātaaʻi ai ha poini mahuʻinga fekauʻaki mo hono ako ʻo e Folofola ʻa e ʻOtuá. ʻOku ʻikai ʻuhinga lelei ke veiveiua ʻi ha kupu koeʻuhí pē ko ʻene hā ngali faingataʻa ke mahinoʻí. Ko e meʻa ʻoku leaʻaki ʻe he Tohi Tapú ʻi ha kupu ʻe tahá kuo pau ke vakai ki ai ʻi he tokoni ʻa e ngaahi kupu kehé pea ke feongoongoi mo ia. ʻIkai ko ia pē, ʻoku faʻa lava ʻo tokoniʻi kitautolu ʻe he potutohí, ʻa e tuʻungá pe ko e meʻa naʻe fai ki ai ʻa e lāuleá, ke tau maʻu ai ʻa e ʻuhinga lelei mo totonu ʻo ha konga tohi ʻoku fakatupu puputuʻu.