“ʻOi ʻEku ʻOfa ki Hoʻo Lao Na!”

“ʻOi ʻeku ʻofa ki hoʻo lao na! ʻOku ou fakalaulauloto ki ai he ʻaho kotoa.”—SĀME 119:97.

1, 2. (a) Ko e hā ʻa e tuʻunga naʻe fehangahangai mo ia ʻa e tokotaha-tohi fakamānavaʻi ʻo e Sāme 119? (e) Naʻe anga-fēfē ʻene fakafeangai ki he tuʻunga ko iá, pea ko e hā hono ʻuhingá?

 KO E tokotaha-tohi ʻo e Sāme 119 naʻá ne fehangahangai mo ha ʻahiʻahi kakaha. Ko hono ngaahi fili ʻafungi ne nau liʻaki ʻa e lao ʻa e ʻOtuá naʻa nau manumanukiʻi mo lauʻikoviʻi loi ia. Naʻe faʻufaʻu kovi kiate ia ʻa e houʻeikí pea nau fakatangaʻi ia. Naʻe ʻātakaiʻi ia ʻe he kau fulikivanú, pea naʻe aʻu ʻo nau fakamanamanaʻi ke tāmateʻi ia. Ko e ngaahi meʻá ni kotoa naʻá ne ʻai ai ʻo ‘vaivai maha hono laumalié he mafasiá.’ (Sāme 119:​9, 23, 28, 51, 61, 69, 85, 87, 161) Neongo ʻa e ʻahiʻahi ko ʻení, naʻe hiva ʻa e tokotaha-tohi-sāmé: “ʻOi ʻeku ʻofa ki hoʻo lao na! ʻOku ou fakalaulauloto ki ai he ʻaho kotoa.”—Sāme 119:97.

² ʻE lava ke ke ʻeke hifo kiate koe, “Naʻe anga-fēfē ʻa e hoko ʻa e lao ʻa e ʻOtuá ko ha matavai ia ʻo e fakanonga mo e fakafiemālie ki he tokotaha-tohi-sāmé?” Ko e meʻa naʻá ne fakaivia iá ko ʻene tuipau naʻe mahuʻingaʻia ʻa Sihova ʻiate iá. ʻI he ʻiloʻi ʻa e ngaahi tokonaki ʻofa ʻo e lao ʻa e ʻOtuá naʻá ne ʻai ai ʻa e tokotaha-tohi-sāmé ke ne fiefia, neongo ʻa e ngaahi faingataʻa naʻe fakatupunga ʻe hono kau fakafepakí. Naʻá ne lāuʻilo naʻe fakafeangai faitotonu ʻa Sihova kiate ia. ʻIkai ko ia pē, ko hono ngāueʻaki ʻa e tataki ʻa e lao ʻa e ʻOtuá naʻá ne ʻai ai ʻa e tokotaha-tohi-sāmé ke ne poto ange ʻi hono ngaahi filí pea aʻu ʻo fakatolonga ai ʻene moʻuí. Ko e talangofua ko ia ki he laó naʻá ne ʻai ai ia ke ne maʻu ʻa e nonga mo ha konisēnisi maʻa.—Sāme 119:​1, 9, 65, 93, 98, 165.

 3. Ko e hā ʻoku faingataʻa ai ki he kau Kalisitiané ke nau moʻui ʻi he ʻahó ni ʻo fakatatau ki he ngaahi tuʻunga ʻa e ʻOtuá?

³ ʻOku toe tofanga foki ʻa e niʻihi ʻo e kau sevāniti ʻa e ʻOtuá he ʻaho ní mo e ngaahi ʻahiʻahiʻi fefeka ʻo ʻenau tuí. Mahalo ʻe ʻikai te tau fehangahangai kitautolu mo ha tuʻunga ʻoku fakamanamanaʻi ai ʻetau moʻuí ʻo hangē ko ia naʻe hoko ki he tokotaha-tohi-sāmé, ka ʻoku tau moʻuí ni ʻi ha “ngaahi taimi faingataʻa.” Ko e tokolahi ʻo e kakai takatakai ʻiate kitautolú ʻoku ʻikai haʻanau ʻofa ʻe taha ki he ngaahi meʻa fakalaumālié, ʻoku siokita mo tuli ki he meʻa fakamatelié ʻa ʻenau ngaahi taumuʻá, tōʻonga hīkisia mo anga-taʻefakaʻapaʻapa. (2 Timote 3:​1-5) Ko e kau talavou Kalisitiané kuo pau ke nau fekuki maʻu pē mo e ngaahi meʻa ʻokú ne ʻahiʻahiʻi ʻenau anga-tonu fakaeʻulungāangá. ʻI ha faʻahinga ʻātakai pehē, ʻe lava ke faingataʻa ke tauhi maʻu ʻetau ʻofa kia Sihová pea mo e meʻa ʻoku totonú. ʻE lava fēfē ke tau maluʻi kitautolu?

 4. Naʻe anga-fēfē hono fakahāhā ʻe he tokotaha-tohi-sāmé ʻa e houngaʻia ʻi he lao ʻa e ʻOtuá, pea ʻoku totonu nai ke fai pehē mo e kau Kalisitiané?

⁴ Ko e meʻa naʻá ne tokoniʻi ʻa e tokotaha-tohi-sāmé ke ne matuʻuaki ʻa e ngaahi pole naʻá ne hokosiá ko ʻene vaheʻi ko ia ʻa e taimi ke ako mo fakalaulauloto houngaʻia ai ʻi he lao ʻa e ʻOtuá. ʻI he founga ko iá, naʻá ne fakatupulekina ai ʻa e ʻofa ki he lao ʻa e ʻOtuá. Ko e moʻoni, ko e meimei veesi kotoa pē ʻo e Sāme 119 ʻoku lave ai ki ha tafaʻaki ʻo e lao ʻa Sihová. a Ko e kau Kalisitiane he ʻaho ní ʻoku ʻikai kei haʻi kinautolu ki he Lao ʻa Mōsesé, ʻa ia naʻe ʻoange ʻe he ʻOtuá ki he puleʻanga ʻo ʻIsileli ʻo e kuonga muʻá. (Kolose 2:14) Kae kehe, ko e ngaahi tefitoʻi moʻoni ʻoku fakahaaʻi ʻi he Lao ko iá ʻoku kei ʻaonga pē ia. Ko e ngaahi tefitoʻi moʻoni ko iá naʻe hoko ia ko ha fakafiemālie ki he tokotaha-tohi-sāmé, pea ʻe toe lava ke hoko pehē pē ki he kau sevāniti ʻa e ʻOtuá ʻa ia ʻoku nau fāinga ke fekuki mo e ngaahi faingataʻa ʻo e moʻui ʻi onopōní.

 5. Ko e hā ʻa e ngaahi tafaʻaki ʻo e Lao ʻa Mōsesé te tau lāulea ki aí?

⁵ Tau sio angé ki he fakalototoʻa ʻe lava ke tau  maʻu mei he tafaʻaki pē ʻe tolu ʻo e Lao ʻa Mōsesé: ko e fokotuʻutuʻu ki he Sāpaté, ko e tokonaki ki he tufí pea mo e fekau ke ʻoua ʻe mānumanú. ʻI he tuʻunga taki taha, te tau ʻiloʻi ai ko hono mahinoʻi ʻa e ngaahi tefitoʻi moʻoni ʻoku fakatuʻunga ai ʻa e ngaahi lao ko ʻení ʻoku mātuʻaki mahuʻinga ia kapau ʻoku tau fekuki mo e ngaahi pole faingataʻa ʻo hotau taimí.

Fakalato ʻEtau Fiemaʻu Fakalaumālié

 6. Ko e hā ʻa e ngaahi fiemaʻu tefito ʻoku maʻu ʻe he kakai kotoa pē?

⁶ Naʻe fakatupu ʻa e tangatá fakataha mo ʻene ngaahi fiemaʻu tefito. Ko e fakatātaá, ko e meʻakaí, inú mo ha nofoʻanga, ʻoku fiemaʻu tefito ia ki ha tokotaha kae lava ke kei ʻi ha tuʻunga moʻui lelei fakaesino. Neongo ia, ʻoku toe fiemaʻu pē ki he tangatá ke ne tokanga ki heʻene fiemaʻu fakalaumālié. ʻE ʻikai ke hoko ia ʻo fiefia moʻoni kae ʻoua leva kuó ne tokanga ki heʻene fiemaʻu fakalaumālié. (Mātiu 5:3) Naʻe vakai ʻa Sihova ia ki hono fakalato ʻo e fiemaʻu tefito ko ʻení ko ha meʻa ia ʻoku mātuʻaki mahuʻinga, ʻo ne fekauʻi ai ʻa hono kakaí ke taʻofi ʻenau ngaahi ngāue anga-mahení ʻi he ʻaho kakato ʻe taha ʻi he uike, koeʻuhi ke nau tokanga ai ki he ngaahi meʻa fakalaumālié.

7, 8. (a) Naʻe anga-fēfē hono fakafaikehekeheʻi ʻe he ʻOtuá ʻa e Sāpaté mei he ngaahi ʻaho kehé? (e) Ko e hā ʻa e taumuʻa naʻe fokotuʻu ai ʻa e Sāpaté?

⁷ Ko e fokotuʻutuʻu ki he Sāpaté naʻe fakamamafaʻi ai ʻa e mahuʻinga ʻo e tuli ki he ngaahi meʻa fakalaumālié. Ko e fuofua hā ʻa e foʻi lea “sapate” ʻi he Tohi Tapú ʻoku fekauʻaki ia mo e tokonaki ʻo e maná ʻi he toafá. Naʻe tala ki he kau ʻIsilelí ko hono tānaki ʻo e mā fakaemana ko ʻení ʻoku totonu ke fai ia ʻi he ʻaho ʻe ono. ʻI he ʻaho hono onó, naʻe pau ai ke nau tānaki ʻa e “ma ʻo e ʻaho ʻe ua,” koeʻuhí ʻi he ʻaho hono fitú, ʻe ʻikai toe tokonaki ha mana ia. Ko e ʻaho hono fitú naʻe hoko ia ko ha “sapate tapu kia Sihova,” ʻa ia ʻi he ʻaho ko ʻení naʻe totonu ai ki he taha kotoa ke nau taki taha nofo ʻi hono tangutuʻanga. (Ekisoto 16:​13-30) Ko e fekau ʻe taha ʻi he ngaahi Fekau ʻe Hongofulú naʻe fekauʻi ai ʻo pehē ʻe ʻikai fai ha ngāue ʻe taha mātē ʻi he ʻaho Sāpaté. Naʻe toputapu ʻa e ʻaho ko iá. Ko e tautea naʻe fai ki he talangataʻa ki he lao ko iá ko e mate.—Ekisoto 20:​8-11; Nomipa 15:​32-36.

⁸ Naʻe hā ʻi he lao ki he Sāpaté ʻa e tokanga fakatouʻosi ʻa Sihova ki he lelei fakaesino mo fakalaumālie ʻa hono kakaí. Naʻe pehē ʻe Sīsū: “Naʻe fokotuʻu ʻa e Sapate maʻa e tangata.” (Maake 2:27) Naʻe ʻikai ke ngata pē ʻi hono fakaʻatā ai ʻa e kau ʻIsilelí ke nau mālōloó, ka naʻe toe ʻoange ai ʻa e faingamālie ke nau ʻunuʻunu ofi ki honau Tokotaha-Fakatupú pea fakahāhā ʻa e ʻofa kiate Ia. (Teutalonome 5:12) Ko e ʻaho ia naʻe vaheʻi fakaʻaufuli pē ki he ngaahi meʻa fakalaumālié. Naʻe kau ki ai ʻa e lotu fakataha mo e fāmilí, lotú mo e fakalaulauloto ki he Lao ʻa e ʻOtuá. Naʻe ʻai ʻa e fokotuʻutuʻu ko iá ke maluʻiʻaki ʻa e kau ʻIsilelí mei hono ngāueʻaki ʻa e kotoa ʻo honau taimí mo e iví ʻi he tuli ki he meʻa fakamatelié. Naʻe fakamanatu ange kiate kinautolu ʻe he Sāpaté ko honau vahaʻangatae mo Sihová ʻa e meʻa mahuʻinga taha ʻi heʻenau moʻuí. Naʻe toe leaʻaki ʻe Sīsū ʻa e tefitoʻi moʻoni taʻealaliliu ko iá ʻi heʻene pehē: “Kuo tohi, oku ikai moʻui ʻa e tangata ʻi he ma pe, ka ʻi he ngāhi folofola kotoa pe ʻoku ʻalu atu mei he fofonga ʻo e ʻOtua.”—Mātiu 4:4.

 9. Ko e hā ʻa e lēsoni ʻoku ʻomai ʻe he fokotuʻutuʻu ki he Sāpaté ki he kau Kalisitiané?

 ⁹ ʻOku ʻikai kei fiemaʻu ia ki he kakai ʻa e ʻOtuá ke nau talangofua ki ha mālōlō houa ʻe 24 he ʻaho Sāpaté, ka ko e fokotuʻutuʻu ki he Sāpaté ʻoku ʻikai ko ha meʻa fakahisitōlia pē ia ʻo ngata ai. (Kolose 2:16) ʻIkai ko ha fakamanatu mai ia kuo pau foki mo kitautolu ke tau fakamuʻomuʻa ʻa e ngaahi meʻa fakalaumālié? Ko e ngaahi meʻa toputapú ʻoku totonu ke ʻoua ʻe kāsia ia ʻi he moʻua he tuli ki he meʻa fakamatelié pe fakafiefiá. (Hepelu 4:​9, 10) Ko ia te tau ʻeke hifo nai kiate kitautolu: “Ko e hā ʻa e meʻa ʻoku ou fakamuʻomuʻa ʻi heʻeku moʻuí? ʻOku ou fakamuʻomuʻa ʻa e ako fakafoʻituituí, lotú, maʻu ʻa e ngaahi fakataha faka-Kalisitiané mo hono vahevahe atu ʻa e ongoongo lelei ʻo e Puleʻanga ʻo e ʻOtuá? Pe ʻoku ou femoʻuekina au ia ʻi he ngaahi meʻa kehé?” Kapau te tau fakamuʻomuʻa ʻa e ngaahi meʻa fakalaumālié ʻi heʻetau moʻuí, ʻoku fakapapauʻi mai ʻe Sihova ʻe ʻikai te tau taʻemaʻu ai ʻa e ngaahi fiemaʻu tefito ʻo e moʻuí.—Mātiu 6:​24-33.

10. ʻE lava fēfē ke tau maʻu ʻaonga mei hono vaheʻi ʻa e taimi ki he ngaahi meʻa fakalaumālié?

¹⁰ Ko e taimi ʻoku tau fakamoleki ʻi hono ako ʻa e Tohi Tapú mo e ngaahi tohi makatuʻunga Fakatohitapú, pea pehē foki ki he fakakaukau loloto ki he pōpoaki ʻoku ʻomai aí, ʻe lava ke ne tokoniʻi ai kitautolu ke tau ʻunuʻunu ofi ange kia Sihova. (Semisi 4:8) Ko Susan, ʻa ia ʻi he meimei taʻu ʻe 40 kuo maliu atú naʻá ne kamata vaheʻi ʻa e taimi ki he ako tuʻumaʻu ʻo e Tohi Tapú, ʻokú ne pehē ʻi heʻene kamata fai iá naʻe ʻikai ke fakamānako. Naʻe hoko ia ko ha meʻa fakapipiko. Ka ʻi he lahi ange ʻene lau iá, ko e lahi ange ia ʻene saiʻia aí. ʻI he taimi ní, te ne loto-mamahi ʻaupito kapau ʻe ʻikai lava ʻene ako fakafoʻituituí koeʻuhí pē ko ha faʻahinga ʻuhinga. Naʻá ne pehē: “Kuo tokoniʻi au ʻe hono ako ʻa e Tohi Tapú ke faifai ʻou ʻiloʻi ʻa Sihova ʻo vakai kiate ia ko ha Tamai. ʻOku ou lava ke tuipau, falala mo fakaofiofi tauʻatāina kiate ia ʻi he lotu. ʻOku fakaofo moʻoni ke sio atu ki he lahi ʻo e ʻofa ʻa Sihova ʻi heʻene kau sevānití, anga ʻo ʻene tokangaʻi fakafoʻituitui aú pea mo e anga ʻo ʻene tokoniʻi aú.” He fiefia lahi ē ʻe lava ke tau toe maʻu foki ʻe kitautolu mei heʻetau tokanga ki heʻetau ngaahi fiemaʻu fakalaumālié!

Lao ʻa e ʻOtuá Fekauʻaki mo e Tufí

11. Naʻe anga-fēfē ʻa hono fakahoko ʻa e fokotuʻutuʻu ki he tufí?

¹¹ Ko e tafaʻaki hono ua ʻo e Lao ʻa Mōsesé ʻa ia ʻoku hā ai ʻa e tokanga ʻa e ʻOtuá ki he lelei ʻa hono kakaí ko e totonu ko ia ke tufí. Naʻe fekauʻi ʻe Sihova ʻo pehē ʻi he taimi ʻe utu ai ʻe ha tokotaha ngoue ʻIsileli ʻa e ngaahi fua ʻo ʻene ngoué, naʻe totonu leva ke fakaʻatā ʻa e masivá ke ne tānaki ʻa e meʻa naʻe toe ʻi he utu-taʻu ʻa e kau ngāué. Naʻe ʻikai ngofua ki he kau ngoué ke nau utu kātoa ʻa e ngaahi tafatafaʻaki ʻo ʻenau ngoué, pe ko hono tānaki ʻa e ngaahi toetoenga kālepí pe ʻōlivé. Ko e ngaahi uite naʻe moʻungaloa ʻi he ngoué naʻe ʻikai totonu ke toe tānaki ia. Ko ha fokotuʻutuʻu ʻofa ʻeni ia maʻá e masivá, kau ʻāunofo mulí, kau paeá mo e kau uitoú. Ko e moʻoni, naʻe fiemaʻu meiate kinautolu ke nau ngāue mālohi ʻi he tufí, ka neongo ia, naʻe lava ai ke nau hao mei he kolekolé.—Livitiko 19:​9, 10; Teutalonome 24:​19-22; Sāme 37:25.

12. Ko e hā ʻa e faingamālie naʻe ʻoange ki he kau ngoué ʻe he fokotuʻutuʻu ki he tufí?

¹² Ko e lao fekauʻaki mo e tufí naʻe ʻikai ke tala mahino ia ai ʻa e lahi naʻe fiemaʻu ke tuku ʻe he kau ngoué maʻá e masivá. Ko e meʻa pē ia ʻa kinautolu pe ʻe fālahi pe fāsiʻi ʻa e ngaahi ngatangataʻanga ʻo e uite ʻe ʻikai utu ʻi he ngaahi tafaʻaki takatakai ʻo e ngoué. ʻI hono faʻu ʻa e laó ni, naʻe akoʻi ai ʻe he fokotuʻutuʻu ki he tufí ʻa e nima-homó. Naʻe ʻoange ai ʻa e faingamālie ki he kau ngoué ke nau fakahāhā ʻa e houngaʻia ki he Tokotaha-Tokonaki ʻo e utu-taʻú, koeʻuhi “ko ia ʻoku fai ʻofa ki he fusimoʻomo ʻoku ne fakaongolelei ʻa [hono Tokotaha-Ngaohí].” (Palovepi 14:31) Ko Pōasi ko e tokotaha ia naʻe fai pehē. Naʻá ne anga-lelei ʻo fakapapauʻi naʻe tānaki ʻe Lute ha uite lahi feʻunga, ʻa ia ko ha uitou naʻá ne tufi ʻi heʻene ngoué. Naʻe fakapaleʻi feʻungaʻānoa ʻe Sihova ʻa Pōasi ʻi heʻene nima-homó.—Lute 2:​15, 16; 4:​21, 22; Palovepi 19:17.

13. Ko e hā ʻoku akoʻi mai kiate kitautolu ʻe he lao ʻi he kuonga muʻá fekauʻaki mo e tufí?

¹³ Ko e tefitoʻi moʻoni ʻoku makatuʻunga ai ʻa e lao fekauʻaki mo e tufí kuo ʻikai liliu ia. ʻOku ʻamanekina ʻe Sihova ʻene kau sevānití ke nau nima-homo, ʻo fai pehē tautefito ki he masivá. Ko e lahi ange ʻo ʻetau nima-homó, ko e lahi ange ia ʻo e ngaahi tāpuaki te tau maʻú. Naʻe pehē ʻe Sīsū: “ʻAnge [pe foaki] pea ʻe toe ʻomi kiate kimoutolu—kuo fua fakalaka, kuo faʻo tuki ki he puha fua, kuo lūlūʻi, kuo fonu mokulu; ʻe pehē ʻa ʻenau to e ʻatu ki homou konā. He ko e fua ʻoku mou fuaʻaki, ko ia pe ʻe fua ʻaki hoʻomou totongi.”—Luke 6:38.

14, 15. ʻE Lava fēfē ke tau fakahāhā ʻa e nima-homó, pea ko e hā ʻa e ngaahi ʻaonga ʻe ala maʻu ʻe kitautolu pea mo e faʻahinga ko ia ʻoku tau tokoniʻí?

 ¹⁴ ʻOku ekinaki mai ʻa e ʻapositolo ko Paulá ke tau “fai lelei ki he kakai kotoabe, kae ajili be kiate kinautolu oku i he fale oe tui.” (Kaletia 6:​10, PM) Ko ia ai, ʻoku fiemaʻu moʻoni ke tau fakapapauʻi ko hotau ngaahi kaungā Kalisitiané ʻoku nau maʻu ʻa e tokoni fakalaumālie ʻi ha taimi pē ʻoku nau fehangahangai ai mo hano ʻahiʻahiʻi ʻo ʻenau tuí. Ka ʻoku nau toe fiemaʻu nai ha tokoni ʻaonga, ʻo hangē ko hono ʻave kinautolu ki he Fale Fakatahaʻangá pe ko hono fai ʻenau fakataú? ʻOku ʻi ai nai ha kau taʻumotuʻa, mahamahaki pe faʻahinga ʻoku toka mohenga ʻi ho fakatahaʻangá te nau fiefia ʻi haʻo ʻaʻahi fakalototoʻa pe ko hano fai ha tokoni? Kapau te tau feinga ke tokanga loto-vēkeveke ki he ngaahi fiemaʻu peheé, ʻe lava leva ai ke ngāueʻaki nai ʻe Sihova kitautolu ke taliʻaki ʻa e ngaahi lotu ʻa e faʻahinga ʻoku nau fiemaʻu tokoní. Neongo ko e fetokangaʻaki ki he ngaahi fiemaʻú ko ha moʻua faka-Kalisitiane ia ke fai, ko e fai peheé ʻoku toe tokoni ia ki he tokotaha ʻokú ne fai e tokoní. ʻI hono fakahāhā ʻa e ʻofa moʻoni ki he ngaahi kaungālotú ko ha matavai ia ʻo e fiefia lahi mo e fiemālie lahi ʻi hono maʻu ʻa e hōifua ʻa Sihová.—Palovepi 15:29.

¹⁵ Ko ha toe founga mahuʻinga ʻe taha ʻa ia ʻoku fakahāhā ai ʻe he kau Kalisitiané ha fakakaukau taʻesiokitá ko hono ngāueʻaki ko ia ʻo honau taimí mo e iví ke lea ʻo fekauʻaki mo e ngaahi taumuʻa ʻa e ʻOtuá. (Mātiu 28:​19, 20) Ko ha taha pē kuó ne aʻusia ʻa e fiefia ʻi hono tokoniʻi ha tokotaha kehe ke ne aʻu ki he tuʻunga ko hono fakatapui ʻene moʻuí kia Sihová ʻokú ne aʻusia ʻa e moʻoni ʻo e ngaahi lea ʻa Sīsū: “ʻOku te monuʻia lahi [pe fiefia lahi ange] ʻi he fai ha foaki atu, ʻi heʻete maʻu ha foaki mai.”—Ngāue 20:35.

Maluʻi mei he Mānumanú

16, 17. Ko e hā naʻe tapui ʻe he fekau hono hongofulú, pea ko e hā hono ʻuhingá?

¹⁶ Ko e tafaʻaki hono tolu te tau lāulea ki ai ʻi he Lao ʻa e ʻOtuá ki ʻIsilelí ko e fekau hono hongofulú, ʻa ia naʻe tapui ai ʻa e mānumanú. Naʻe pehē ʻe he Laó: “ʻOua te ke manumanu ki he fale ʻo ho kaungaʻapi. ʻOua te ke manumanu ki he uaifi ʻo ho kaungaʻapi, pe ki haʻane tamaioʻeiki, pe ki haʻane kaunanga, pe ki haʻane pulu, pe ki haʻane asi, pe ki ha meʻa ʻe taha ʻoku ʻa ho kaungaʻapi.” (Ekisoto 20:17) ʻOku ʻikai ha taha ia ʻi he faʻahinga ʻo e tangatá ʻe lava ke ne faʻu ha fekau pehē, koeʻuhí ʻoku ʻikai lava ha taha ia ke sio ki he lotó. Kae kehe, ko e fekau ko iá ʻokú ne ʻohake ʻe ia ʻa e Laó ki ha tuʻunga ʻoku māʻolunga ange ia ʻi he fokotuʻutuʻu fakaelao ʻa e tangatá. Naʻá ne ʻai ʻa e tokotaha  ʻIsileli taki taha ke ne ʻiloʻi naʻe pau ke ne fai ha fakamatala fakahangatonu kia Sihova, ʻa ia ʻokú ne malava ke ʻiloʻi ʻa e ngaahi hehema ʻo e lotó. (1 Samiuela 16:7) ʻIkai ko ia pē, naʻe taumuʻa ʻa e fekau ia ko ʻení ki he tupuʻanga tefito ʻo e ngaahi tōʻonga taʻetotonú.—Semisi 1:14.

¹⁷ Ko e lao ke ʻoua ʻe mānumanú naʻá ne ueʻi ʻa e kakai ʻa e ʻOtuá ke nau fakaʻehiʻehi mei he tuli ki he meʻa fakamatelié, havalá pea mo e lāunga ʻo fekauʻaki mo e ngaahi tuʻunga ne nau ʻi aí. Naʻe toe maluʻi foki ai kinautolu mei he fakataueleʻi ke fai ha kaihaʻa pe ko ha ʻulungāanga taʻetaau. ʻE ʻi ai maʻu pē ʻa e faʻahinga ia ʻoku ʻi ai ʻenau ngaahi koloa fakamatelie ʻoku tau manumanumelieʻia ai pe faʻahinga ʻoku hā ngali ʻoku nau lavameʻa ange ʻiate kitautolu ʻi ha faʻahinga tafaʻaki. Kapau ʻe ʻikai te tau mapuleʻi ʻa ʻetau fakakaukaú ʻi he ngaahi tuʻunga peheé, ʻe lava ke tau hoko ai ʻo loto-mamahi mo meheka ki he niʻihi kehé. ʻOku ui ʻe he Tohi Tapú ʻa e mānumanú ko ha tafaʻaki ia ʻe taha ʻo e “loto kovi.” ʻOku mātuʻaki lelei ange kiate kitautolu ke ʻoua te tau mānumanu.—Loma 1:​28-30.

18. Ko e hā ʻa e laumālie ʻoku nofoʻia ʻi he māmaní ʻi he ʻaho ní, pea ko e hā ʻa e ngaahi uesia kovi ʻe lava ke ne fakatupungá?

¹⁸ Ko e laumālie ʻoku nofoʻia ʻi he māmaní ʻi he ʻaho ní ʻokú ne fakaʻaiʻai ʻe ia ʻa e tuli ki he meʻa fakamatelié pea mo e feʻauʻauhí. Fakafou ʻi he tuʻuakí, ʻoku langaʻi ai ʻe he pisinisí ʻa e holi ki he ngaahi koloa foʻoú pea faʻa tuku atu ai ʻa e fakakaukau ʻo pehē ʻe ʻikai ke tau fiefia kitautolu kae ʻoua leva kuo tau maʻu ʻa e ngaahi koloá ni. Ko e faʻahinga laumālie tofu pē ʻeni naʻe fakahalaki ʻe he Lao ʻa Sihová. Naʻe toe kau ki ai ʻa e holi ko ia ke lavameʻa ʻi he moʻuí ʻo tatau ai pē pe ko e hā, pea pehē foki ki he tānaki koloá. Naʻe fakatokanga mai ʻa e ʻapositolo ko Paulá: “Ko kinautolu kuo pau honau loto ke koloaʻia, ʻoku nau to ki he ʻahiʻahi, mo e tauhele, mo e ngaahi holi kehekehe, ʻa ia ʻoku fakasesele pea ko e meʻa ʻoku te lavea ai; ko e faʻahinga meʻa ʻoku nau lomekina ʻa e kakai ki he ʻauha mo e malaʻia. He ko e ʻofa ki he paʻanga ko e aka ʻoku tupu mei ai ʻa e ngaahi kovi kotoa pe, pea ko e niʻihi ʻi heʻenau ala ki he meʻa ko ia kuo nau hē mei he lotu, pea kuo nau hokohokaʻi ʻaki ʻa kinautolu ʻa e ngaahi mamahi lahi.”—1 Timote 6:​9, 10.

19, 20. (a) ʻI he vakai ʻa e tokotaha ʻoku ʻofa ʻi he lao ʻa Sihová, ko e hā ʻa e ngaahi meʻa ʻoku mahuʻinga moʻoní? (e) Ko e hā ʻe lāulea ki ai ʻi he kupu hoko maí?

¹⁹ Ko e faʻahinga ʻoku nau ʻofa ʻi he lao ʻa e ʻOtuá ʻoku nau ʻiloʻi ʻa e ngaahi fakatuʻutāmaki ʻo e faʻahinga laumālie tuli ki he meʻa fakamatelié pea ʻoku nau malu mei ai. Ko e fakatātaá, naʻe lotu ʻa e tokotaha-tohi-sāmé kia Sihova: “Ofeʻi hoku loto ki hoʻo ʻu fakamoʻoni na, ʻo ʻikai ki he paʻanga maʻu kākā. ʻOku lelei lahi kiate au ʻa e lao ne to mei ho fofonga ʻi ha ngaahi afeʻi koula mo siliva.” (Sāme 119:​36, 72) ʻI he hoko ʻo tuipau ki he moʻoni ʻo e ngaahi lea ko iá te ne tokoniʻi ai kitautolu ke tau tauhi maʻu ʻa e mafamafatatau ʻa ia ʻoku fiemaʻu ke fakaʻehiʻehi ai mei he ngaahi tauhele ʻo e tuli ki he meʻa fakamatelié, havalá, pea mo e taʻetopono ʻi hotau tuʻunga ʻi he moʻuí. Ko e “aga [līʻoa] faka-Otua,” kae ʻikai ko e tānaki koloá, ʻa e kī ki hono maʻu ʻa e koloa lahi taha ʻe ala maʻú.—1 Timote 6:​6, PM.

²⁰ Ko e ngaahi tefitoʻi moʻoni ʻoku fakatuʻunga ai ʻa e Lao naʻe ʻoange ʻe Sihova ki he puleʻanga ʻo ʻIsileli ʻo e kuonga muʻá, ʻoku mahuʻinga tatau pē ia ki hotau taimi faingataʻá ni ʻo hangē pē ko e taimi ko ia naʻe ʻoange ai ʻe Sihova ʻa e Laó kia Mōsesé. Ko e lahi ange ʻetau ngāueʻaki ʻa e ngaahi tefitoʻi moʻoni ko ʻení ʻi heʻetau moʻuí, ko e lahi ange ia ʻetau mahinoʻi iá, ko e lahi ange ia ʻetau hoko ʻo ʻofa aí, pea ko e toe lahi ange ai pē ia ʻetau fiefiá. ʻOku fakatolonga mai ʻe he Laó ʻa e ngaahi lēsoni mahuʻinga kia kitautolu, pea mo e ngaahi fakamanatu maʻalaʻala mahuʻinga ʻa ia ʻoku fakahaaʻi ʻi he moʻui mo e ngaahi hokosia ʻa e faʻahinga ʻoku talanoa ki ai ʻi he Tohi Tapú. Ko e niʻihi ʻo e faʻahingá ni ʻe lāulea ki ai ʻi he kupu hoko maí.

[Fakamatala ʻi lalo]

ʻE Fēfē Haʻo Tali?

• Ko e hā naʻe ʻofa ai ʻa e tokotaha-tohi ʻo e Sāme 119 ʻi he lao ʻa Sihová?

• Ko e hā ʻe lava ke ako ʻe he kau Kalisitiané mei he fokotuʻutuʻu ki he Sāpaté?

• Ko e hā ʻa e meʻa mahuʻinga ʻoku fakatolonga mai ʻi he lao ʻa e ʻOtuá fekauʻaki mo e tufí?

• ʻOku anga-fēfē hono maluʻi kitautolu ʻe he fekau ke ʻoua ʻe mānumanú?

[Fehuʻi ki he Ako]

[Fakatātā ʻi he peesi 21]

Ko e hā naʻe fakamamafaʻi ʻe he lao ki he Sāpaté?

[Fakatātā ʻi he peesi 23]

Ko e hā ʻoku akoʻi mai kiate kitautolu ʻe he lao fekauʻaki mo e tufí?