“Fili ki he Moʻui Ka Ke Moʻui”

“Kuo u fokotuʻu ʻi ho ʻao ʻa e moʻui mo e mate, ʻa e monu mo e mala: ko ia ke ke fili ki he moʻui ka ke moʻui.”​—TEUTALONOME 30:19.

1, 2. ʻI he ngaahi founga fē naʻe fakatupu ai ʻa e tangatá ʻi he ʻīmisi ʻo e ʻOtuá?

 “TAU ngaohi ʻa e tangata ʻi hotau imisi, ʻo faʻifaʻitaki ki hotau anga.” Ko e fakamatala ko ia ʻa e ʻOtuá ʻoku hiki ʻi he ʻuluaki vahe ʻo e Tohi Tapú. Fakatatau ki ai, “naʻe fakatupu ʻe he ʻOtua ʻa e tangata ʻi he imisi oʻona, ʻio i he imisi ʻo e ʻOtua naʻa ne fakatupu ia,” ko e fakamatala ia ʻa e Senesi 1:​26, 27. Ko ia ʻoku kehe ai ʻa e ʻuluaki tangatá mei he ngaahi meʻa fakatupu kehe kotoa pē ʻi he māmaní. Naʻá ne meimei tatau mo hono Tokotaha-Fakatupú, ʻi he malava ke ne tapua atu ha fakakaukau hangē ko e ʻOtuá ʻi he fakaʻuhingá, ʻi hono fakahāhā ʻa e ʻofá, fakamaau totonú, potó pea mo e mālohí. Naʻá ne maʻu ʻa e tufakanga ko e konisēnisí ke tokoniʻi ia ke ne lavaʻi ʻa e ngaahi fili ʻa ia ʻe ʻaonga kiate ia tonu pea fakahōifua ki heʻene Tamai fakahēvaní. (Loma 2:15) ʻI hono fakanounoú, naʻe maʻu ʻe ʻĀtama ʻa e tauʻatāina ke fili. ʻI heʻene vakai ki hono ngaohi ʻo hono foha ʻi he māmaní, naʻe fai ai ʻe Sihova ʻa e fakafuofua ko ení ʻo fekauʻaki mo ʻene ngāué: “Tā [ʻoku] lelei ʻaupito.”—Senesi 1:31; Sāme 95:6.

² ʻI he hoko ko e hako ʻo ʻĀtamá, ko kitautolu foki naʻe ngaohi ʻi he ʻīmisi pea mo e anga ʻo e ʻOtuá. Kae kehe, ʻoku lava moʻoni ke tau fai ha fili ʻi he meʻa ʻoku tau faí? Neongo ʻoku malava ʻa Sihova ke ʻafioʻi ki muʻa ʻa e meʻa ʻe hokó, ʻoku ʻikai te ne tomuʻa fakapapauʻi tāutaha ʻa ʻetau ngaahi ngāué mo hono ikuʻangá. ʻOku ʻikai ʻaupito te ne fakaʻatā ʻa ʻene fānau ʻi he māmaní ke puleʻi ʻe he tomuʻa fakatufakangaʻí. Ke tokoniʻi kitautolu ke tau mahinoʻi ʻa e mahuʻinga ʻo hono ngāueʻaki ʻa ʻetau tauʻatāina ke filí ki hono fai ʻa e ngaahi fili totonú, tau ʻuluaki ako angé ha lēsoni mei he puleʻanga ʻIsilelí.—Loma 15:4.

 Tauʻatāina ke Fili ʻi ʻIsileli

 3. Ko e hā ʻa e ʻuluaki fekau ʻi he Fekau ʻe Hongofulú, pea naʻe anga-fēfē ʻa e fili ʻa e kau ʻIsileli faitōnungá ke talangofua ki aí?

³ “Ko au ko Sihova ko ho ʻOtua, ʻa ia naʻa ku ʻomi koe mei Isipite, mei he fale popula,” ko e folofola ia ʻa Sihova ki he kau ʻIsilelí. (Teutalonome 5:6) ʻI he 1513 K.M., naʻe hoko ai ki ʻIsileli ha fakahaofi fakaemana mei he nofo pōpula ʻi ʻIsipité pea ʻi heʻene peheé naʻe ʻikai ha ʻuhinga ke nau veiveiua ai ʻi he ngaahi lea ko iá. ʻI he ʻuluaki fekau ʻi he Fekau ʻe Hongofulú, naʻe fakahaaʻi ai ʻe Sihova fakafou ʻi heʻene tangata lea ko Mōsesé: “ʻOua naʻa ai hao ʻOtua kehe, ʻo uaʻaki Au.” (Ekisoto 20:​1, 3) ʻI he taimi ko iá, naʻe fili ai ʻa e puleʻanga ʻIsilelí ke nau talangofua. Naʻa nau fai loto-lelei kia Sihova ʻa e anga-līʻoa maʻataʻataá.​—Ekisoto 20:5; Nomipa 25:11.

 4. (a) Ko e hā ʻa e fili naʻe tuku ʻe Mōsese ki ʻIsilelí? (e) Ko e hā ʻa e fili ʻoku tau maʻu he ʻaho ní?

⁴ ʻI he taʻu nai ʻe 40 ki mui ai, naʻe fakamanatu mālohi ai ʻe Mōsese ki he toe toʻutangata ʻe taha ʻo e kau ʻIsilelí ha fili naʻe pau ke nau fai. “ʻOku ou ui ni ki langi mo mamani ke hopo he ʻaho ni mo kimoutolu, ke fakamoʻoni” ko ʻene fakahāʻí ia, “kuo u fokotuʻu ʻi ho ʻao ʻa e moʻui mo e mate, ʻa e monu mo e mala: ko ia ke ke fili ki he moʻui ka ke moʻui, ʻa koe mo ho hako.” (Teutalonome 30:19) ʻI he tuʻunga meimei tatau ʻi he ʻahó ni, ʻe lava ke tau fai ha fili. ʻIo, ʻe lava ke tau fai ha fili ke tauhi faitōnunga kia Sihova fakataha mo e vakai atu ki he moʻui taʻengatá, pe ko ʻetau fili ke talangataʻa kiate ia pea fuesia hono ngaahi nunuʻá. Vakai angé ki he fakatātā ʻe ua ʻo e kakai naʻa nau fai ʻa e ngaahi fili kehekehe.

5, 6. Ko e hā ʻa e fili naʻe fai ʻe Siosiuá, pea ko e hā hono olá?

⁵ ʻI he 1473 K.M., naʻe taki atu ai ʻe Siosiua ʻa e kau ʻIsilelí ki he Fonua ʻo e Talaʻofá. ʻI ha ekinaki mālohi naʻá ne leaʻaki ki muʻa heʻene maté, naʻe kōlenga ai ʻa Siosiua ki he puleʻangá fakakātoa: “Pea kapau ʻoku ha kovi kiate kimoutolu ke tauhi ʻa Sihova, mou fai hoʻomou fili he ʻaho ni pe ko hai te mou tauhi ki ai; ʻa e ngaahi ʻotua naʻe tauhi ʻe hoʻomou ngaahi kui naʻe nofo ʻi he tuʻa Vaitafe, pe ko e ngaahi ʻotua ʻo e kakai Amoli, ʻa ia ʻoku mou nofo ʻi honau fonua.” Pea ʻi heʻene lave leva ki hono fāmilí, naʻá ne hoko atu: “Ka ko au mo hoku fale te mau tauhi ʻa Sihova.”—Fakaʻītali ʻamautolu; Siosiua 24:15.

⁶ Ki muʻa angé, naʻe ekinaki ai ʻa Sihova kia Siosiua ke ne loto-toʻa mo tuʻu kalikali, ʻo fakahinohinoʻi ia ke ʻoua te ne afe mei he talangofua ki he Lao ʻa e ʻOtuá. ʻI hono kehé, ko hono lau leʻo-siʻi ʻi he ʻaho mo e pō ʻa e Laó, ʻe malava ai ke monūʻia ʻa Siosiua ʻi he hala ʻokú ne fou aí. (Siosiua 1:​7, 8) Pea ko e meʻa ia naʻe hokó. Ko e fili ʻa Siosiuá naʻe iku ai ki he ngaahi tāpuaki. “Naʻe ʻikai ke to kelekele ha momoʻi meʻa ʻe taha ʻi he ngaahi lelei naʻa ne talaʻofa ki haʻa Isileli,” ko e fakahā ia ʻe Siosiuá. “Naʻe hoko hono kotoa.”—Siosiua 21:45.

 7. ʻI he ʻaho ʻo ʻAiseá, ko e hā ʻa e fili naʻe fai ʻe he kau ʻIsileli ʻe niʻihi, pea ko e hā hono ngaahi nunuʻá?

⁷ ʻI hono kehé, fakakaukau angé ki he tuʻunga ʻi ʻIsileli ʻi he taʻu nai ʻe 700 ki muí. ʻI he aʻu ki he taimi ko iá, naʻe muimui ai ʻa e kau ʻIsileli tokolahi ʻi he ngaahi tōʻonga fakapanganí. Ko e fakatātaá, ʻi he ʻaho fakaʻosi ʻo e taʻú, naʻe haʻohaʻo takai ai ʻa e kakaí ʻi ha tēpile naʻe fonu ʻi he meʻakai ifo kehekehe mo e uaine melie. Naʻe ʻikai ko ha fakatahataha fakafāmili pē eni. Ko ha kātoanga fakalotu ia naʻe fakalāngilangiʻi ai ʻa e ongo ʻotua pangani. Naʻe tohi ʻe he palōfita ko ʻAiseá ʻa e fakakaukau ʻa Sihova ki he taʻefaitōnunga ko ení: “Ko e meʻa kiate kimoutolu kuo mou liʻaki ʻa Sihova, ʻa e faʻahinga ʻoku fakangalongaloʻi hoku moʻunga tapu, ʻa e faʻahinga ʻoku teu ʻa e tepile kia Monū, mo fakatau ʻa e kava kia Pau.” Naʻa nau tui ko e utu ʻo e taʻú naʻe fakatuʻunga ia, ʻo ʻikai ʻi hono maʻu ʻa e tāpuaki ʻa Sihová, ka ʻi hono fakafiemālieʻi ʻa e ʻotua ko “Monū” mo e ʻotua ko “Pau.” Ko ia ai, ko hono moʻoní, ko honau ʻalunga angatuʻú mo e fili loto-leleí naʻe fakapapauʻi ai honau ikuʻangá. “Kuo u tuku pau kimoutolu ki he heleta,” ko e folofola ia ʻa Sihová, “pea te mou punou kotoa ki he tamateʻi: koeʻuhia naʻa ku ui, pea naʻe ʻikai te mou tali; naʻa ku lea, pea naʻe ʻikai te mou fanongo; pea naʻa mou fai ʻa e meʻa naʻe ha kovi kiate au, pea ko e meʻa naʻe ʻikai te u manako ki ai ʻa ia naʻa mou fili ki ai.” (Aisea 65:​11, 12) Ko ʻenau fili taʻefakapotopotó naʻe iku ai ki honau fakaʻauhá, pea naʻe ʻikai ha mālohi ʻo e ongo ʻotua ko Pau mo Monuú ke taʻofi ia.

 Ko Hono Fai ʻa e Fili Totonú

 8. Fakatatau ki he Teutalonome 30:​20, ko e hā ʻoku kau ki hono fai ʻa e fili totonú?

⁸ ʻI he taimi naʻe ekinaki ai ʻa Mōsese ki ʻIsileli ke nau fili ki he moʻuí, naʻá ne fakahaaʻi ʻa e sitepu ʻe tolu naʻe totonu ke nau fou ai: “Ke ʻofa kia Sihova ko ho ʻOtua, ke fakaongo ki hono leʻo, pea ke pikitai kiate ia.” (Teutalonome 30:20) Tau sivisiviʻi tahataha ange eni koeʻuhi ke tau lava ʻo fai ai ʻa e fili totonú.

 9. ʻE lava fēfē ke tau fakahāhā ʻetau ʻofa kia Sihová?

⁹ Ke ʻofa kia Sihova ko hotau ʻOtuá: ʻOku tau fili ke tauhi kia Sihová koeʻuhi ʻoku tau ʻofa kiate ia. Ko e tokanga ki he fakatātā fakaefakatokanga mei he taimi ʻo ʻIsilelí, ʻoku tau talitekeʻi ai ʻa e fakatauele kotoa pē ke fai ʻa e ʻulungāanga taʻetāú pea ʻoku tau ʻeʻehi ai mei he tōʻonga moʻui ʻe fakatupunga nai ai ke tau tō ki he fuʻu vanu ʻo e tuli ki he meʻa fakamatelié ʻi he māmaní. (1 Kolinito 10:11; 1 Timote 6:​6-​10) ʻOku tau pīkitai kia Sihova pea tauhi ʻene ngaahi tuʻutuʻuní. (Siosiua 23:8; Sāme 119:​5, 8) Ki muʻa ke hū ʻa e kau ʻIsilelí ki he Fonua ʻo e Talaʻofá, naʻe ekinaki ʻa Mōsese kia kinautolu: “Vakai kuo u ako kiate kimoutolu ha ngaahi tuʻutuʻuni mo konisitutone, ʻo hange ko hoku fekau ʻe Sihova ko hoku ʻOtua, ke mou fai hange ko ia ʻi he fonua ʻoku mou ʻalu ki ai ke maʻu. Ko ia mou tauhi ia, mo fai ki ai; he ko hoʻomou ngali poto ia, mo hoʻomou ngali ʻatamai ʻi he vakai ʻa e ngaahi kakai, ʻa ia te nau fanongo ki he koto tuʻutuʻuni ni.” (Teutalonome 4:​5, 6) Ko e taimi eni ke fakahāhā ai ʻetau ʻofa kia Sihová ʻaki hono fakamuʻomuʻa ʻa e finangalo ʻo Sihová ʻi heʻetau moʻuí. ʻE faitāpuekina moʻoni ai kitautolu kapau ʻoku tau fili ke fai pehē.​—Mātiu 6:33.

10-12. Ko e hā ʻa e ngaahi lēsoni ʻoku tau ako mei he fakakaukau atu ki he meʻa naʻe hoko ʻi he ngaahi ʻaho ʻo Noá?

¹⁰ Ke fakaongo ki he leʻo ʻo e ʻOtuá: Ko Noá “naʻa ne malangaʻaki ʻa e maʻoniʻoni.” (2 Pita 2:5) Ko e meimei kakai kotoa ki muʻa ʻi he Lōmakí naʻe fakaleluʻi pea “naʻe ʻikai te nau ʻaloʻiloa” fekauʻaki mo e ngaahi fakatokanga ʻa Noá. Ko e hā hono nunuʻá? Naʻe “hoko mai ʻa e Lomaki, ʻo ʻave kinautolu fulipe.” Naʻe fakatokanga ʻa Sīsū ʻo pehē ʻe meimei tatau pē ʻi hotau taimí, lolotonga ʻa e “hoko mai [pe ʻi ai] ʻa e Fanautama ʻa Tangata.” Ko e meʻa naʻe hoko ʻi he ʻaho ʻo Noá ko ha fakatokanga mālohi ia ki he kakai ʻi he ʻahó ni ʻa ia ʻoku nau fili ke ʻoua ʻe tokanga ki he pōpoaki ʻa e ʻOtuá.—Mātiu 24:39.

¹¹ Ko e kau manuki ki he fakatokanga fakaʻotua ʻoku fakaongo atu ʻe he kau sevāniti ʻa e ʻOtuá ʻi onopōní ʻoku totonu ke nau ʻiloʻi ʻa e meʻa ʻe iku ki ai ʻa e taʻetokanga ki he fakatokangá. Naʻe pehē ʻe he ʻapositolo ko Pitá ʻo fekauʻaki mo e kau manuki ko iá: “ʻOku puli ʻiate kinautolu ʻa e meʻa ni—ka ko honau loto foki—Tokua ko e folofola ʻa e ʻOtua naʻe tuʻu ai ʻa e ngaahi langi ʻi muʻa, pea fokotuʻu ai ʻa e fonua mei he vai pea ʻaki ʻa e vai: ʻa ia naʻe lomaki vai ai ʻa e maama ʻo onoʻaho, ʻo ʻauha: ka ko e ngaahi langi mo e fonua ʻo onopōni kuo tauhi ʻaki ʻa e folofola ʻa ʻEne ʻAfio, ʻo taʻofi ki he afi, ʻo ka toki hoko ʻa e ʻaho ʻo e fakamāuʻi mo e fakaʻauha ʻo e kakai fakaʻotuamate.”—2 Pita 3:​3-7.

¹² Naʻe kehe mei he kakaí ni ʻa e fili naʻe fai ʻe Noa mo hono fāmilí. “Ko tui naʻe ngaue ai ʻa Noa, ʻi hono valokia ki ha ngaahi meʻa kuo teʻeki hamai; pea ʻi heʻene manavahe ki ai, naʻa ne faʻu ʻa e Aake.” Ko ʻene tokanga ki he fakatokangá naʻe fakahaofi ai ʻa hono fāmilí. (Hepelu 11:7) ʻOfa ke tau hoko ʻo vave ke fanongo ki he pōpoaki ʻa e ʻOtuá pea tokanga leva ʻo talangofua ki ai.​—Semisi 1:​19, 22-​25.

13, 14. (a) Ko e hā ʻoku mātuʻaki mahuʻinga ai ʻa e ‘pikitai kia Sihová’? (e) ʻOku totonu ke fēfē ʻetau fakaʻatā ʻa Sihova ʻa ia ko hotau “tufunga,” ke ne fakafuo kitautolú?

¹³ Ke pīkitai kia Sihova: Ke ‘fili ki he moʻuí ke moʻuí,’ ʻoku ʻikai ngata pē ʻi he pau ke tau ʻofa kia Sihova mo fanongo kiate iá ka kuo pau foki ke tau ‘pikitai kia Sihova,’ ʻa ia ko e kīvoi ʻi hono fai hono finangaló. “ʻI hoʻomou kītaki te mou maʻu mai homou laumālie,” ko e lea ia ʻa Sīsuú. (Luke 21:19) Ko hono moʻoní, ko e fili ʻoku tau fai ʻi he meʻa ko ení ʻoku fakahaaʻi ai ʻa e meʻa ʻoku ʻi hotau lotó. “Monuʻiaā ka ko e tangata ʻoku manavahe tuʻu: ka ko ia ʻoku fakafefeka hono loto, te ne to ki he kovi,” ko e lau ia ʻa e Palovepi 28:14. Ko Felo ʻo ʻIsipite ʻi he kuonga muʻá ko ha fakatātā ia ʻo e meʻá ni. ʻI he tō tahataha ki ʻIsipite ʻa e Mala ʻe Hongofulú, naʻe fakafefeka ʻe Felo ʻa hono lotó kae ʻikai fakahāhā ʻa e manavahē ki he ʻOtuá. Naʻe ʻikai fakamālohiʻi ʻe Sihova ʻa Felo ki ha ʻalunga talangataʻa, ka naʻá ne fakaʻatā ʻa e pule hīkisia ko iá ke ne fai ha fili. Ko e hā pē  ʻa e tuʻungá, naʻe fakahoko ʻa e finangalo ʻo Sihová, ʻo hangē ko ia naʻe fakamatalaʻi ʻe he ʻapositolo ko Paulá ʻo kau ki he vakai mai ʻa Sihova kia Feló: “Ko e meʻa pe ia naʻa ku fokotuʻu ai koe, koeʻuhi ke u ʻai ke ha ʻeku māfimafi ʻiate koe, pea koeʻuhi ke ongoongoa ai hoku hingoa ʻi mamani katoa.”—Loma 9:17.

¹⁴ ʻI ha laui senituli hili hono fakahaofi ʻa ʻIsileli mei he pule ʻa Feló, naʻe fakahaaʻi ai ʻe he palōfita ko ʻAiseá: “Ko eni, ʻe Sihova, ko ʻemau tamai koe; ko kimautolu ko e ʻumea, pea ko koe ko ʻemau tufunga; pea ko e ngaue ʻa ho nima ʻa kimautolu kotoa pe.” (Aisea 64:8) ʻI heʻetau fakaʻatā ʻa Sihova ke ne fakafuo kitautolu fakafou heʻetau ako fakafoʻituituí mo hono ngāueʻaki ʻa ʻene Folofolá, ʻoku tau ʻai māmālie ai ʻa e tangata foʻoú. ʻOku tau hoko ai ʻo anga-vaivai ange mo ala fakafuongofua ange, ʻo ʻai ai ke faingofua ʻetau pīkitai mateaki kia Sihová koeʻuhi he ʻoku tau loto moʻoni ke fakahōifuaʻi ia.​—Efeso 4:​23, 24; Kolose 3:​8-​10.

‘Ke Ke Fakamatala Ia’

15. Fakatatau ki he Teutalonome 4:​9, naʻe fakamanatu ai ʻe Mōsese ki ʻIsileli ʻa e fatongia lōua ko e hā?

¹⁵ Naʻe pehē ʻe Mōsese ki he puleʻanga ʻIsileli naʻe fakatahataha ʻo fangafanga hū ki he Fonua ʻo e Talaʻofá: “Ke ke tokanga kia koe, mo lamalama lahi ho laumalie ʻi he ʻaho kotoa pe ʻo hoʻo moʻui, naʻa ngalo ʻa e ngaahi meʻa ne mātaʻi ʻe ho mata, pea naʻa mole ia mei ho loto; ka ke fakamatala ia ki hoʻo fanau, mo e fanau ʻa hoʻo fanau.” (Teutalonome 4:9) Ke maʻu ʻa e tāpuaki ʻa Sihová pea lakalakaimonū ʻi he fonua naʻe teu ke nau maʻú, naʻe pau ke fakahoko ai ʻe he kakaí ha fatongia lōua ʻi he ʻao ʻo Sihova ko honau ʻOtuá. Naʻe pau ke ʻoua naʻa ngalo ʻia kinautolu ʻa e ngaahi meʻa fakaofo kuo fakahoko ʻe Sihova ʻo nau mamata ki aí, pea naʻe pau ke nau akoʻi ia ki he ngaahi toʻutangata hoko maí. ʻI he hoko ko e kakai ʻa e ʻOtuá he ʻaho ní, kuo pau ke tau fai ʻa e meʻa tatau ʻo kapau ʻoku tau loto ke ‘fili ki he moʻuí ke moʻui.’ Ko e hā kuo tau mātā kuo fakahoko ʻe Sihova maʻatautolú?

16, 17. (a) Ko e hā kuo malava ʻo fakahoko ʻe he kau misinale kuo ako ʻi Kiliatí ʻi he ngāue malangaʻi ʻo e Puleʻangá? (e) Ko e hā ʻa e ngaahi faʻifaʻitakiʻanga ʻo e tauhi maʻu ʻo e faivelenga taʻemamotu ʻokú ke ʻiloʻí?

¹⁶ ʻOku tau fiefia ke sio ki he anga hono tāpuakiʻi ʻe Sihova ʻetau ngāue fakamalangá mo e ngaohi-ākongá. Talu mei hono kamata ʻa e Akoʻanga Tohi Tapu Taua Leʻo ko Kiliatí ʻi he 1943 mo e takimuʻa ʻa e kau misinalé ʻi he ngāue ngaohi-ākongá ʻi he ngaahi fonua lahi. ʻOku aʻu mai ki he ʻahó ni ʻa hono tauhi maʻu ʻe he muʻaki kau maʻu tohi fakamoʻoni ako ʻi he akoʻangá ni ha faivelenga ki hono malangaʻi ʻo e Puleʻangá, neongo ʻoku nau taʻumotuʻa pea fakangatangata e malava ʻa e niʻihi ʻi he tuʻunga fakaesinó. Ko e faʻifaʻitakiʻanga lelei ʻe taha ko Mary Olson, ʻa ia naʻe maʻu tohi fakamoʻoni ako mei Kiliati ʻi he 1944. Kuó ne ngāue ko ha misinale, ʻuluakí ʻi ʻUlukuei, hokó ʻi Kolomupia pea ʻi he taimí ni ʻi Pueto Liko. Neongo ʻoku fakangatangata ʻe he ngaahi palopalema ʻo e taʻumotuʻá, ʻoku tauhi maʻu ʻe Tuofefine Olson ʻa ʻene loto-māfana ki he malangá. ʻI hono ngāueʻaki ʻa ʻene ʻilo ki he lea faka-Sipeiní, ʻokú ne fakataimitēpileʻi ʻa e taimi ʻi he uike taki taha ke kau fakataha ai mo e kau malanga fakalotofonuá ʻi he ngāue fakamalangá.

¹⁷ Ko Nancy Porter, ko ha uitou ia he taimí ni, ʻa ia naʻe maʻu tohi fakamoʻoni ako mei he Akoʻanga Kiliatí ʻi he 1947, ʻokú ne kei ngāue ʻi he  ʻOtu Motu Pahamá. Ko e toe misinale ia ʻe taha ʻokú ne hanganaki femoʻuekina ʻi he ngāue fakamalangá. “Ko hono akoʻi ki he niʻihi kehé ʻa e moʻoni faka-Tohitapú kuo hoko ia ko ha matavai makehe ʻo e fiefiá,” ko e fakamatala ia ʻa Tuofefine Porter ʻi heʻene talanoa ki he moʻuí. a “ʻOku ʻomai ai ha founga tuʻumaʻu fakalaumālie maau ʻa ia kuó ne ʻomai ha fokotuʻutuʻu mo ha makatuʻunga ki heʻeku moʻuí.” ʻI he fakakaukau atu ʻa Tuofefine Porter mo e kau sevāniti faitōnunga kehé ki he kuohilí, ʻoku ʻikai ngalo ʻia kinautolu ʻa e meʻa kuo fai ʻe Sihová. Fēfē kitautolu? ʻOku tau vakai atu fakataha mo e loto-houngaʻia ki he anga hono tāpuakiʻi ʻe Sihova ʻa e ngāue ʻo e Puleʻangá ʻi hotau feituʻu kaungāʻapí?—Sāme 68:11.

18. Ko e hā ʻoku lava ke tau ako mei hono lau ʻa e ngaahi talanoa ki he moʻui ʻa e kau misinalé?

¹⁸ ʻOku tau fiefia ʻi he meʻa kuo fakahoko pea ʻoku kei fakahoko ʻe he siʻi kau taʻumotuʻa ko ení. Ko hono lau ʻenau ngaahi talanoa ki he moʻuí ko ha matavai ia ʻo e fakalototoʻa kia kitautolu, koeʻuhí ʻi heʻetau sio ki he meʻa kuo fai ʻe Sihova maʻá e faʻahinga faitōnunga ko ení, ʻoku ʻai ai ke mālohi ʻetau fakapapauʻi ke tauhi kia Sihová. ʻOkú ke lau maʻu pē ʻa e ngaahi fakamatala fakaueʻiloto pehē ʻoku pulusi ʻi he Taua Leʻo pea fakalaulauloto ki ai?

19. ʻE lava fēfē ke ngāueleleiʻaki ʻe he ngaahi mātuʻa Kalisitiané ʻa e ngaahi talanoa ki he moʻuí ʻoku hiki ʻi he Taua Leʻo?

¹⁹ Naʻe fakamanatu ʻe Mōsese ki he kau ʻIsilelí ke ʻoua naʻa ngalo ʻia kinautolu ʻa e ngaahi meʻa kotoa kuo fai ʻe Sihova maʻanautolú pea ko e ngaahi meʻá ni ke ʻoua naʻa mahuʻi ia mei honau lotó ʻi he ngaahi ʻaho kotoa ʻo ʻenau moʻuí. Naʻá ne tānaki atu leva ki ai ha toe sitepu: “Ke fakamatala ia ki hoʻo fanau, mo e fanau ʻa hoʻo fanau.” (Teutalonome 4:9) Ko e ngaahi talanoa ki he moʻuí ʻoku ʻi ai hono fakamānako makehe. Ko e fānau tupú ʻoku nau fiemaʻu ha ngaahi faʻifaʻitakiʻanga lelei. Ko e fanga tuofāfine teʻeki malí ʻe lava ke nau ako ha ngaahi lēsoni mei he faʻifaʻitakiʻanga faitōnunga ʻa e fanga tuofāfine taʻumotuʻa ʻa ē ʻoku fakamatalaʻi ʻa e ngaahi talanoa ki heʻenau moʻuí ʻi he Taua Leʻo. Ko e ngāue ʻi ha feituʻu lea muli ʻi honau fonua tupuʻangá ʻoku ʻoange fakatouʻosi ai ki he fanga tokouá mo e fanga tuofāfiné ʻa e ngaahi faingamālie lahi ange ke femoʻuekina ai ʻi hono malangaʻi ʻo e ongoongo leleí. Ngaahi mātuʻa Kalisitiane, ko e hā ʻoku ʻikai te mou ngāueʻaki ai ʻa e ngaahi hokosia ʻa e kau misinale faitōnunga naʻe ʻi Kiliatí mo e niʻihi kehé ke ueʻi ai hoʻomou fānaú ke nau fili ki ha moʻui ʻi he ngāue taimi-kakató?

20. Ko e hā kuo pau ke tau fai ke “fili ki he moʻui”?

²⁰ ʻE lava fēfē leva ke tau taki taha “fili ki he moʻui”? ʻAki hono ngāueʻaki ʻa e meʻaʻofa fisifisimuʻa ʻo e tauʻatāina ke filí ke fakahaaʻi ai kia Sihova ʻoku tau ʻofa kiate ia pea ʻi he hokohoko atu ʻi hono fai ʻetau lelei tahá ʻi heʻene ngāué lolotonga ʻene fakaʻatā kitautolu ki he monū ko iá. “He,” hangē ko ia naʻe fakahaaʻi ʻe Mōsesé, ko Sihova “hoʻo moʻuiʻanga, mo e loloaʻanga ʻo ho ngaahi ʻaho.”—Teutalonome 30:​19, 20.

[Fakamatala ʻi lalo]

ʻE Lava Ke Ke Manatuʻi?

• Ko e hā kuó ke ako mei he ngaahi fakatātā ʻo e ngaahi fili kehekehe kuo tau lāulea ki aí?

• Ko e hā ʻa e ngaahi ʻalunga kuo pau ke tau fou ai koeʻuhi ke “fili ki he moʻui”?

• Ko e hā ʻa e fatongia lōua ʻoku ekinaki mai ke tau fakahokó?

[Fehuʻi ki he Ako]

[Fakatātā ʻi he peesi 26]

“Kuo u fokotuʻu ʻi ho ʻao ʻa e moʻui mo e mate”

[Fakatātā ʻi he peesi 29]

Ko e fakaongo ki he leʻo ʻo e ʻOtuá naʻe fakahaofi ai ʻa Noa mo hono fāmilí

[Fakatātā ʻi he peesi 30]

Mary Olson

[Fakatātā ʻi he peesi 30]

Nancy Porter