ʻOua ʻe Manavahē​—ʻOku Kau ʻa Sihova mo Koe!

LAKA hake he taʻu ʻe 50 kuo maliu atú, taimi nounou mei he pā ʻa e ʻuluaki ngaahi foʻi pomu niukiliá, naʻe pehē ai ʻe he faisaienisi maʻu pale fakalāngilangi ko Harold C. Urey ʻo fekauʻaki mo e kahaʻú: “Te tau kai manavahē, mohe manavahē, moʻui ʻi he manavahē pea mate ʻi he manavahē.” ʻI he ʻahó ni, ko e moʻoni ko hotau foʻi māmaní ʻoku fonu ʻi he manavaheé pea ʻoku ʻikai ha ofo ai! ʻI he ʻaho kotoa pē, ʻoku fanongonongo mai ai ʻe he nusipepá ʻa e ngaahi fakamatala fakalilifu ʻo e tautoitoí, ngaahi hia fakamālohí mo e ngaahi mahaki fakaleleloto.

ʻI he tuʻunga ko e kau Kalisitiané, ʻoku tau ʻilo ʻa e ʻuhinga ʻo e ngaahi tuʻunga ko iá. ʻOku nau fakahaaʻi ʻoku tau moʻui ʻi he “kuonga fakamui” ʻo e fokotuʻutuʻu fulikivanu ko ení, ʻa ia naʻe tomuʻa tala ʻe he Tohi Tapú ʻe fakaʻilongaʻiʻaki ʻa e “ngaahi taimi faingataʻa” ke fekuki mo ia. (2 Timote 3:1) ʻOku fakaivimālohiʻi ai ʻa ʻetau falala pau ʻe vavé ni ke hanga ʻe Sihova ko e ʻOtuá ʻo ʻomai ha māmani foʻou ʻa ia ʻe nofo ai ʻa e māʻoniʻoní. (2 Pita 3:13) Kae kehe, ʻoku tau hao mei he manavaheé ʻi he lolotongá ni?

Manavaheé mo e Kau Sevāniti ʻa e ʻOtuá

Ko Sēkope, Tēvita mo ʻIlaisiaá naʻa nau ʻi he lotolotonga ʻo e kau sevāniti ʻa Sihova ʻa ia naʻa nau ʻi ha tuʻunga ʻo e manavaheé ʻi he taimi naʻa nau fehangahangai ai mo e fakatamakí. (Senesi 32:​6, 7; 1 Samiuela 21:​11, 12; 1 Tuʻi 19:​2, 3) Ko e kau tangatá ni naʻe ʻikai ke siʻi ʻenau tuí. Ka ʻi hono kehé, naʻa nau fakahāhā ʻa e falala taʻeueʻia kia Sihova. Neongo ia, ko e kau tangata pē ʻa Sēkope, Tēvita mo ʻIlaisiā; ko ia ai, naʻa nau ala moʻuangofua ki he manavaheé. “Ko Ilaija, koe tagata ia nae aga tatau mo kitautolu,” ko e tohi ia ʻa e ākonga ko Sēmisí.—Semisi 5:​17, PM.

Te tau ongoʻi manavasiʻi nai ʻi he fakakaukau atu ki ha fakafaingataʻaʻiaʻanga ʻoku tau fehangahangai mo ia he taimí ni pe ko ha taha te tau fetaulaki nai mo ia ʻi he kahaʻú. Ko e manavahē peheé ʻoku ala mahinoʻi ia. He ko ē ʻoku pehē ʻe he Tohi Tapú ʻoku fakapapauʻi ʻe Sētane ko e Tēvoló ke “fai tau” mo e faʻahinga ʻoku nau “tauhi ʻa e ngaahi tuʻutuʻuni ʻa e ʻOtua, mo nau puke maʻu ʻenau fakamoʻoni kia Sisu.” (Fakahā 12:17) Lolotonga ʻoku ngāueʻaki fakahangatonu ʻa e ngaahi lea ko iá ki he kau Kalisitiane paní, naʻe tohi ʻe Paula: “Ko kinautolu kotoa pe ʻoku loto ke moʻui lotu moʻoni ʻia Kalaisi Sisu ʻe fakatanga kinautolu foki.” (Fakaʻītali ʻamautolu; 2 Timote 3:12) Ka, ʻoku ʻikai fiemaʻu ke hanga ʻe he manavaheé ʻo lōmekina kitautolu ʻi heʻetau fehangahangai mo e ngaahi palopalemá. Ko e hā hono ʻuhingá?

“Ko e ʻOtua Mohu Fakamoʻuiʻanga”

Naʻe tohi ʻe he tokotaha-tohi-saame ko Tēvitá: “Ko e nofo ʻa Ela kiate kitaua, ko e ʻOtua mohu fakamoʻuiʻanga.” (Sāme 68:20) Kuo toutou fakahāhā ʻe Sihova ʻa ʻene malava ke fakahaofi ʻa hono kakaí, ʻi heʻene fakahaofi kinautolu mei he ngaahi tuʻunga fakatuʻutāmakí pe ʻi hono ʻoange ʻa e mālohi ke nau kītaki ai. (Sāme 34:17; Taniela 6:23 [6:​22, PM]; 1 Kolinito 10:13) Mei hoʻo ako ʻa e Tohi Tapú, ko e ngaahi ‘fakamoʻui’ pehē ʻe fiha ʻokú ke manatuʻí?

ʻI hono ngāueʻaki ʻo e Watch Tower Publications Index, a fēfē ke ke fai ha fekumi ʻi he ngaahi meʻa moʻoni naʻe hoko ʻi he moʻuí ʻo hangē ko e Lōmaki naʻe hoko ʻi he foʻi kolopé ʻi he ʻaho ʻo Noá, ko hono fakahaofi ʻo Lote mo hono ongo ʻofefiné mei Sōtoma mo Komolá, ko e hiki fononga ʻa ʻIsileli mei ʻIsipité pea mo e fononga ʻi he Tahi Kulokulá, pe ko e faʻufaʻu taʻelavameʻa ʻa Hāmani ke fakaʻauha ʻa e kakai Siú? Ko e lau pea fakakaukauloto ki he ngaahi fakamatala fakatoʻoaloto ko ení te ne fakaivimālohiʻi ai ʻa hoʻo tui kia Sihova ko e ʻOtua faifakamoʻuí. ʻE tokoniʻi ai koe heni ke ke fehangahangai taʻemanavahē mo e ngaahi ʻahiʻahiʻi ʻa hoʻo tuí.

Ngaahi Faʻifaʻitakiʻanga ʻi Onopooni

ʻE lava ke ke fakakaukau ki ha ngaahi faʻifaʻitakiʻanga ʻi onopooni ʻo e kātakí ʻi ho feituʻú tonu? Mahalo  ko ha taha nai naʻe tuku pilīsone koeʻuhi ko ha ʻalunga faitōnunga. ʻOkú ke ʻilo nai ha Kalisitiane taʻumotuʻa ʻoku tauhi kia Sihova neongo ʻa ʻene mahamahakí. Pe fakakaukau ki he kau talavou ʻoku nau hanganaki mavahe mei he māmaní neongo ʻa e tenge lahi fakaʻulia mei honau ngaahi kaungāakó. ʻOku ʻi ai foki mo e ngaahi mātuʻa tautau toko taha, ʻa ia ʻi he ʻikai hanau hoá ʻoku nau tauhi hake ha fānau, pe ko e faʻahinga taʻemali tāutaha ʻoku nau tauhi nai kia Sihova neongo ʻa e ongoʻi taʻelatá. Ko e hā ʻokú ke ako mei he faʻahinga ko ení? Ko e fakalaulauloto ki honau ʻalunga faitōnungá ʻe malava ke tokoniʻi ai koe ke ke kātaki pea hanganaki taʻemanavahē neongo ha faʻahinga ʻahiʻahi pē te ke fehangahangai nai mo ia.

ʻOku fiemaʻu ʻa e taʻemanavaheé ʻo ʻikai ʻi heʻetau fehangahangai pē mo e fakafepakí pea mo e fakatangá kae toe pehē foki kapau ʻoku kamata ke tau veiveiua ki he ʻofa mai ʻa Sihova kia kitautolú. ʻOku fiemaʻu ke tau fakatupulekina ʻa e tuipau ko e huhuʻi ʻa Kalaisí ʻoku ngāueʻaki ia kia kitautolu ʻi hotau tuʻunga tāutahá. (Kaletia 2:20) ʻE lava leva ai ke tau fakaofiofi kia Sihova ʻo ʻikai ha manavahē pe ilifia taʻetotonu. Kapau ʻoku tau ongoʻi ʻoku tau taʻefeʻunga mo e ʻofa ʻa Sihová, ʻe lava ke tau fakakaukauloto atu ki he lea ʻa Sīsū ki hono kau muimuí: “ʻIkai ʻoku fakatau ha ongo kiʻi misi ʻe toko ua ki ha konga seniti pe? ka ʻe ʻikai patū ki he kelekele hana taha taʻe meʻa ki ai ʻe hoʻomou Tamai. Ka ko e meʻa kiate kimoutolu, ko homou ngāhi tuʻoni louʻulu kuo ʻosi lau fakalautelau. Ko ia ʻoua te mou manavahe: ʻoku mou mahuʻinga kimoutolu ʻi ha fanga misi tokolahi.”—Fakaʻītali ʻamautolu; Mātiu 10:​29-31.

ʻOku faʻa pulusi ʻe he makasini Taua Leʻo mo e ʻĀ Hake! ʻa e ngaahi meʻa naʻe hokosia ʻe he Kau Fakamoʻoni ʻa Sihova ʻi onopooni, ʻa ia naʻa nau fehangahangai taʻemanavahē mo e ngaahi tuʻunga faingataʻá. ʻOku ʻikai ke ʻuhinga eni ia naʻe ʻikai te nau ongoʻi kovi ʻi honau tuʻunga faingataʻaʻiá. Ka naʻe ʻikai te nau tuku ʻa e ngaahi ongo peheé ke ne taʻofi ʻenau tauhi kia Sihová. ʻE malava ke tokoni kia koe ʻenau ngaahi fakamatala kuo pulusi maí ke ke kītaki taʻemanavahē foki. Vakai angé ki ha ongo fakatātā ʻe ua.

Liliuʻi ʻe ha Lavea ʻa ʻEne Moʻuí

ʻI he ʻīsiu ʻo e Awake! ʻo ʻEpeleli 22, 2003, ʻoku ʻi ai ʻa e kupu ko ení, “Anga Hono Liliuʻi ʻe ha Lavea ʻa ʻEku Moʻuí.” ʻOku fakamatalaʻi nounou ai ʻe Stanley Ombeva, ko e taha ʻo e Kau Fakamoʻoni ʻa Sihova ʻi Keniaá, ʻa e ngaahi faingataʻa naʻá ne fehangahangai mo ia tupu mei hano tuiʻi ʻe ha meʻalele naʻe lele oma. ʻI he hōloa ʻa hono tuʻunga moʻui leleí, naʻe mole ai ʻa ʻene ngāué mo e ngaahi monū kotoa pē. ʻOku fakahā ʻe Tokoua Ombeva ʻi heʻene fakamatalá: “ʻI heʻene hoko ʻo mahino kiate au ʻa e tuʻunga moʻoni ʻoku ou ʻi aí, naʻá ku ongoʻi kovi, siokita mo ʻitangofua. ʻI he taimi ʻe niʻihi, naʻá ku ʻita mo ʻingoʻingo.” Neongo ʻa e tuʻunga fakamamahi naʻe hokosia ʻe he tangata Kalisitiane ko ení, naʻá ne kei taʻemanavahē pē. Naʻe ʻikai te ne tuku ʻa e loto-mamahí ke ne lōmekina ia pea ʻai ai ke ne foʻi fakaʻaufuli. Ka ʻi hono kehé, naʻá ne falala kia Sihova. ʻOku pehē ʻe Tokoua Ombeva: “Naʻe tokoniʻi maʻu pē au ʻe Sihova ʻi he meʻa kotoa naʻá ku fuesiá—ʻo aʻu ki ha tuʻunga ʻa ia naʻá ku mā ai ʻiate au ʻi he taimi ʻe niʻihi. Naʻá ku fai ha fakapapau mālohi ke lau mo fakalaulauloto ki he ngaahi konga Tohi Tapu naʻá ku ʻilo naʻe hoko ko e fakafiemālie ki hoku tuʻungá.”

Ko e ngaahi fakamatala totonu ʻa Tokoua Ombeva naʻá ne ʻai ai ʻa e tokolahi kehe ke nau kātekina taʻemanavahē ʻa e ngaahi ʻahiʻahí. Ko e tohi eni ʻa ha tuofefine Kalisitiane ʻe taha: “Naʻá ku tangi ʻi heʻeku lau ʻa e kupu ko ení. Naʻá ku ongoʻi naʻe fakahāhā mai ʻe Sihova ʻi he kupú ni ʻa ʻene loto-māfana mo ʻene tokanga anga-ʻofá pea ʻomai ai ʻa e fakafiemālie kiate au.” Naʻe tohi ʻe ha Fakamoʻoni ʻe taha: “Ko e ngaahi kupu hangē ko ení ʻoku hoko ia ko e fakalototoʻa lahi ki he faʻahinga ʻo kitautolu ʻoku tau hokosia ʻa e ngaahi tuʻunga peheé pea mo ʻūkuma ʻa e faingataʻá.”

 Ko e Fekuki mo e Faingataʻaʻia Fakaeongó

Ko ha toe meʻa fakaueʻiloto ʻe taha ko e tuʻunga ko ia ʻo Herbert Jennings ʻa ia naʻe fakamatalaʻi ʻi he kupu, “ʻOku ʻIkai Te Ke ʻIloʻi Pe ʻE Fēfē ʻa Hoʻo Moʻuí ʻApongipongi.” b ʻOku fekuki ai heni ʻa Tokoua Jennings mo e ʻāvanga femaleleakí. ʻI heʻene manatu ki he ngaahi muʻaki ʻaho ʻo ʻene puké, ʻokú ne pehē: “Ko ha fāinga moʻoni ʻa hono maʻu pē ʻo e ngaahi fakataha faka-Kalisitiané. Ka neongo ia, naʻá ku tuipau fakaʻaufuli ki he mahuʻinga ʻo e feohi fakalaumālié. Ke fekuki mo ia, naʻá ku faʻa hū ki he Fale Fakatahaʻangá hili e nofo hifo ki lalo ʻa e kakaí peá u mavahe ʻi he kamata pē ke fai e ngaʻunu holo ʻi he ngataʻanga ʻo e polokalamá.”

Naʻe toe faingataʻa foki ʻa e malangá. ʻOku fakamatala ʻa Tokoua Jennings: “ʻI he taimi ʻe niʻihi, naʻa mo e hili ʻa e aʻu atu ki ha falé, ʻoku ʻikai pē malava ke u toe loto-toʻa au ʻo aʻu ki he tuʻunga ko hono tā ʻa e fafangu ʻi he matapaá. Kae kehe naʻe ʻikai te u tukulolo, koeʻuhi naʻá ku ʻiloʻi ko ʻetau ngāue fakafaifekaú ʻoku ʻuhinga iá ko e fakamoʻui kiate kitautolu pea ki ha taha pē te ne tali leleí. (1 Timote 4:16) Hili ha taimi siʻi, naʻá ku malava ai ke mapuleʻi ʻeku ngaahi ongoʻí, peá u hoko atu ki he matapā hoko maí, ʻo toe ʻahiʻahi ai. ʻI he hokohoko atu ke kau ʻi he ngāue fakafaifekaú, naʻá ku tauhi maʻu ai ʻa e tuʻunga lelei ʻi he moʻuilelei fakalaumālié pea naʻe fakalahi ʻe he meʻa ko iá ʻa ʻeku malava ke fekukí.”

Ko e fakamatala totonu ʻa Tokoua Jennings naʻe tokoniʻi ai ʻa e kau lautohi tokolahi ke nau fehangahangai mo honau ngaahi faingataʻaʻiá ʻi he tuʻunga taʻemanavahē tatau. Ko e fakatātaá, naʻe tohi ʻe ha tuofefine Kalisitiane ʻe taha: “ʻI he taʻu ʻe 28 kuó u lau ai ʻa e makasini Taua Leʻo mo e ʻĀ Hake!, naʻe teʻeki ai ke ueʻi loloto au ʻo hangē ko ia naʻe hokó ʻi heʻeku lau ʻa e kupu ko ení. Naʻe pau ke u taʻofi ʻa ʻeku ngāue taimi-kakató pea ne u ongoʻi halaia ʻaupito ai, ʻi he ongoʻi kapau naʻe lahi ʻa ʻeku tuí naʻá ku mei hokohoko mai pē. ʻI hono lau ʻa e pau ke tuku ange ʻe Tokoua Jennings ha vāhenga-ngāue ke tokangaʻi ai ʻa hono puké naʻe tokoni ia kia au ke u vakai ʻi ha tuʻunga mafamafatatau ki hoku tuʻungá. Ko hano tali moʻoni eni ʻo ʻeku lotú!”

ʻI he tuʻunga meimei tatau, naʻe tohi ʻe ha tokoua Kalisitiane: “ʻI he hili ha ngāue taʻu ʻe hongofulu ko ha mātuʻa ʻi ha fakatahaʻanga, naʻe pau ai ke u tuku ange ʻa hoku monuú koeʻuhi ko ha puke fakaʻatamai. Ko ʻeku ongoʻi taʻelavameʻá, naʻe ʻi ha tuʻunga ia naʻá ku faʻa ongoʻi fuʻu loto-mafasia ai ke lau ʻa e ngaahi kupu ʻo e talanoa ki he moʻuí, ʻa ia naʻe faʻa fakamatala ai ki he ngaahi lavameʻa lalahi ʻa e kakai ʻa Sihová. Ka ko e kītaki ʻa Tokoua Jennings naʻe fakatupu langa hake ia kiate au. Kuó u toutou lau tuʻo lahi ʻa e kupú ni.”

ʻUnu Atu mo e Loto-Falala

ʻI he hangē ko Tokoua Ombeva mo Jennings, ʻoku tokolahi ʻa e Kau Fakamoʻoni ʻa Sihova ʻoku nau hokohoko taʻemanavahē atu ʻa e lotu kia Sihova ko e ʻOtuá neongo ʻa e ngaahi fakafaingataʻaʻiaʻanga fakalotosiʻí. Kapau ko ha taha koe ʻo kinautolu, ʻoku fiemaʻu ke fakaongoongoleleiʻi koe. Maʻu ʻa e loto-pau: “Talaʻehai ʻoku fai taʻetotonu ʻa e ʻOtua ke ne fakangaloʻi hoʻomou ngaue, mo e ʻofa ki hono huafa naʻe ha ʻiate kimoutolu ʻi hoʻomou tokoni ki he kakai lotu, ʻa ia foki ʻoku mou kei fai.”—Hepelu 6:10.

Hangē pē ko hono tokoniʻi ʻe Sihova ʻa ʻene kakai faitōnunga ʻi he kuonga muʻá ke nau ikuʻi honau ngaahi filí, ʻe malava ke ne tokoniʻi koe ke ke ikuna ʻi ha fakafaingataʻaʻiaʻanga pē te ke fetaulaki nai mo ia. Ko ia ai, tukulotoa ʻa e ngaahi lea naʻe folofola ʻaki ʻe Sihova fakafou ʻi he palōfita ko ʻAiseá: “ʻOua ʻe manavahe, he ʻoku ou ʻiate koe ʻe au; ʻoua ʻe kilokilo holo, he ko ho ʻOtua au: te u poupou koe ʻe au; ʻio, te u tokoni kiate koe; ʻio, te u pukepuke koe ʻaki ʻa e toʻomataʻu o ʻeku faitotonu.”—Aisea 41:10.

[Fakamatala ʻi lalo]

[Fakatātā ʻi he peesi 16]

ʻI he hangē ko Stanley Ombeva (ʻi ʻolungá) mo Herbert Jennings (ʻi toʻomataʻú), ʻoku tauhi taʻemanavahē ʻa e tokolahi kia Sihova

[Maʻuʻanga ʻo e Tā ʻi he peesi 14]

Faitā USAF