Ongo Mēmipa Foʻou ʻo e Kulupu Pulé

ʻI HE pongipongi Pulelulu ʻo ʻAokosi 24, 2005, ko e ngaahi fāmili Pēteli ʻo e ʻIunaite Seteté mo Kānata, naʻa nau fanongo ai ʻi hano fakamafola ʻi he vitioó ha fanongonongo fakafiefia. Kamata ʻi Sepitema 1, 2005—ʻe tānaki atu ai ʻa e ongo mēmipa foʻou—ko Geoffrey W. Jackson mo Anthony Morris III ki he Kulupu Pule ʻo e Kau Fakamoʻoni ʻa Sihová.

Naʻe kamata tāimuʻa ʻa Tokoua Jackson ʻi Fepueli 1971 ʻi Tasimēnia, ko e motu ia ʻi he vahefonua ʻo ʻAositelēliá. ʻI Sune 1974, naʻá ne mali ai mo Jeanette (Jenny). ʻIkai fuoloa mei ai, naʻe vaheʻi kinaua ke na ngāue ko e ongo tāimuʻa makehe. ʻI he 1979 ki he 2003, ne na ngāue ai ko e ongo misinale ʻi Tuvalu, Haʻamoa mo Fisi—ko e ngaahi puleʻanga ʻotu motu ʻi he Pasifiki Sauté. Lolotonga ʻena ʻi he ʻotu motú, naʻe toe tokoni lahi foki ai ʻa Tokoua mo Tuofefine Jackson ki he ngāue ʻo hono liliu ʻa e ngaahi tohi Fakatohitapú. Kamata ʻi he 1992, naʻe ngāue ai ʻa Tokoua Jackson ʻi he Kōmiti Vaʻa ʻi Haʻamoá, pea ʻi he 1996 ʻi he Kōmiti Vaʻa ʻi Fisí. ʻI ʻEpeleli 2003, naʻá ne hoko ai mo Jenny ko e konga ʻo e fāmili Pēteli ʻo e ʻIunaite Seteté pea naʻá ne kamata ngāue ʻi he Potungāue Ngaahi Ngāue ki he Liliu-Leá. ʻIkai fuoloa mei ai, naʻe ʻai ai ʻa Tokoua Jackson ko ha tokotaha tokoni ki he Kōmiti Faiako ʻo e Kulupu Pulé.

Naʻe hū ʻa Tokoua Morris ki he ngāue tāimuʻá ʻi he 1971 ʻi he ʻIunaite Seteté. ʻI Tīsema ʻi he taʻu ko iá, naʻá ne mali ai mo Susan, pea ne na hokohoko atu ai ʻi he tāimuʻá ʻi he meimei taʻu ʻe fā ʻo aʻu ki hono fāʻeleʻi ko ia ʻa hona foha ko Jesse. Faifai atu pē, ne na toe maʻu ha toe foha ʻe taha ko Paul. Naʻe toe hū ʻa Tokoua Morris ki he ngāue taimi-kakató ʻi he 1979 ko ha tokotaha tāimuʻa tuʻumaʻu. Naʻe kau atu ki ai ʻa hono uaifí ʻi he taimi naʻe hū ai ʻa e ongo tamaikí ki he akó. Naʻe ngāue ʻa e fāmilí ʻi he feituʻu naʻe lahi ai ʻa e fiemaʻú ʻi Rhode Island mo North Carolina, ʻi he ʻIunaite Seteté. ʻI North Carolina, naʻe ngāue ai ʻa Tokoua Morris ko ha tokotaha taufetongi ki he ʻovasia sēketí, pea naʻe kau ai ʻa hono ongo fohá ki he ngāue tāimuʻa tuʻumaʻú. Naʻe fakaafeʻi ʻa Jesse mo Paul ki he vaʻa ʻi he ʻIunaite Seteté ʻi hona taʻu 19. Lolotonga iá, naʻe kamata ai ʻa Tokoua Morris ʻi he ngāue fakasēketí. ʻI he 2002 leva, naʻe fakaafeʻi ai ia mo Susan ki Pēteli, ʻo kamata ʻi hona vāhenga-ngāue foʻoú ʻi ʻAokosi 1. Naʻe ngāue ʻa Tokoua Morris ʻi he Potungāue Ngāué ʻi Patterson pea ki mui ai ko ha tokotaha tokoni ki he Kōmiti Ngāue ʻo e Kulupu Pulé.

Tānaki atu ki he ongo mēmipa foʻou ko ʻení, ʻoku kau ki he Kulupu Pulé ʻa C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; mo D. Sydlik. Ko e kotoa ʻo e kau mēmipa ʻo e Kulupu Pulé ko e kau Kalisitiane pani.