Faʻifaʻitaki ki he Anga-Kātaki ʻa Sihová
Faʻifaʻitaki ki he Anga-Kātaki ʻa Sihová
“ʻOku ʻikai ke fakatuotuai ʻa Sihova ʻi he fekauʻaki mo ʻene talaʻofá, . . . ka ʻokú ne anga-kātaki.”—2 PITA 3:9, NW.
1. Ko e hā ʻa e meʻaʻofa taʻealafakatataua kuo tuku mai ʻe Sihova ki he faʻahinga ʻo e tangatá?
KUO tuku mai ʻe Sihova kiate kitautolu ha meʻa ʻoku ʻikai malava ke tuku mai ia ʻe ha toe taha kehe. Ko e meʻa ia ʻoku mātuʻaki fakamānako mo mahuʻinga fau, ka ʻoku ʻikai malava ke fakatau mai pe ngāueʻi. Ko e meʻa ʻokú ne tuku maí ko e meʻaʻofa ʻo e moʻui taʻengatá—ki he tokolahi taha ʻo kitautolú, ko e moʻui taʻengata ʻi ha māmani palataisi. (Sione 3:16) Ko e toki meʻa fakafiefia ē ʻe hokó! ʻE mole atu ʻa e ngaahi meʻa ʻokú ne fakatupunga ʻa e mamahi lahi faú—fekeʻikeʻí, fakamālohí, masivá, faihiá, mahamahakí pea naʻa mo e maté. ʻE nofo ʻa e kakaí ʻi he melino mo e fāʻūtaha haohaoa ʻi he malumalu ʻo e pule anga-ʻofa ʻa e Puleʻanga ʻo e ʻOtuá. He fakaʻamua lahi ē ʻe kitautolu ʻa e Palataisi ko iá!—Aisea 9:6, 7; Fakahā 21:4, 5.
2. Ko e hā kuo teʻeki ai ke toʻo atu ai ʻe Sihova ʻa e ngaahi meʻa ʻo e fokotuʻutuʻu ʻa Sētané?
2 ʻOku fakatuʻotuʻa atu foki ʻa Sihova ki he taimi ko ia te ne fokotuʻu ai ʻa e Palataisi ʻi he māmaní. He ko hono moʻoní, ko ha tokotaha-ʻofa ia ki he māʻoniʻoní mo e fakamaau totonú. (Sāme 33:5) ʻOku ʻikai te ne fiemālie ke vakai hifo ki ha māmani ʻoku taʻemahuʻingaʻia pe fakafili ki heʻene ngaahi tefitoʻi moʻoni māʻoniʻoní, ha māmani ʻokú ne fakataleʻi fefeka hono mafaí pea ngaohikoviʻi ʻa hono kakaí. Neongo ia, ʻoku ʻi ai ʻa e ngaahi ʻuhinga lelei ʻoku teʻeki ai ke ne ngāue mai ai ke toʻo atu ʻa e ngaahi meʻa ʻo e fokotuʻutuʻu fulikivanu ʻa Sētané. ʻOku felāveʻi ʻa e ngaahi ʻuhinga ia ko iá pea mo e ngaahi ʻīsiu fakaeʻulungāanga fekauʻaki mo hono tuʻunga-haú. ʻI hono fakaleleiʻi ʻa e ngaahi ʻīsiu ko ʻení, ʻe fakahāhā ai ʻe Sihova ha foʻi ʻulungāanga ʻoku tautefito ʻene fakamānakó, ko ha ʻulungāanga ia ʻoku ʻikai maʻu ʻe he tokolahi ʻi he ʻahó ni—ko e anga-kātakí.
3. (a) Ko e hā ʻa e ʻuhinga ʻo e ongo foʻi lea faka-Kalisi mo e faka-Hepelū naʻe liliu ko e “anga-kātaki” ʻi he Tohi Tapú? (e) Ko e hā ʻa e ngaahi fehuʻi te tau lāulea ki ai he taimi ní?
3 ʻOku ʻi ai ha foʻi lea faka-Kalisi ʻa ia ʻoku liliu tuʻo tolu ʻi he New World Translation ko e “anga-kātaki.” ʻOku ʻuhinga fakaelea ia ki he “fuoloa ʻa e laumālié” pea ʻoku toutou liliu ai ia ko e “kātaki-fuoloa” pea tuʻo taha ko e “ngāueʻi ʻo e anga-kātakí.” Ko e tukuʻau mai mei he ongo foʻi lea faka-Kalisi mo e faka-Hepelū fakatouʻosi ki he “anga-kātaki” ʻa e foʻi fakakaukau ki he ʻūkumá pea mo e tuai ki he ʻitá. ʻOku anga-fēfē ʻa e ʻaonga kiate kitautolu ʻa e anga-kātaki ʻa Sihová? Ko e hā ʻa e ngaahi lēsoni ke ako mei he anga-kātaki mo e kītaki ʻa Sihová pea mo ʻene kau sevāniti faitōnungá? ʻOku tau ʻilo fēfē ʻoku ʻikai ke taʻefakangatangata ʻa e anga-kātaki ʻa Sihová? Tau vakai ki ai.
Fakakaukau Angé ki he Anga-Kātaki ʻa Sihová
4. ʻI he fekauʻaki mo e anga-kātaki ʻa Sihová, ko e hā naʻe tohi ʻe he ʻapositolo ko Pitá?
4 ʻI he fekauʻaki mo e anga-kātaki ʻa Sihová, naʻe tohi ʻe he ʻapositolo ko Pitá: “Ke ʻoua naʻa puli meiate kimoutolu ʻa e moʻoniʻi meʻa ko ʻení, siʻi faʻahinga ʻofeina, ko e ʻaho ʻe tahá ʻoku tatau ia kia Sihova mo ha taʻu ʻe afe pea ko e taʻu ʻe afé ʻoku tatau ia mo e ʻaho ʻe taha. ʻOku ʻikai ke fakatuotuai ʻa Sihova ʻi he fekauʻaki mo ʻene talaʻofá, ʻo hangē ko e lau ʻa e niʻihi ʻoku fakatuotuai, ka ʻokú ne anga-kātaki kiate kimoutolu koeʻuhi ʻoku ʻikai te ne finangalo ke fakaʻauha ha taha ka ʻokú ne finangalo ke aʻusia ʻe he tokotaha kotoa pē ʻa e fakatomalá.” (2 Pita 3:8, 9, NW) Kātaki ʻo fakatokangaʻi ʻa e ongo poini ʻe ua ʻoku fakahaaʻi heni ʻa ia ʻoku malava ke ne tokoniʻi kitautolu ke tau mahinoʻi ʻa e anga-kātaki ʻa Sihová.
5. ʻOku anga-fēfē kaunga ʻa e vakai ʻa Sihova ki he taimí ki he meʻa ʻokú ne faí?
5 Ko e ʻuluaki poiní ʻoku ʻikai vakai ʻa Sihova ki he taimí ʻo hangē ko ʻetau vakaí. Ki he Tokotaha ʻoku moʻui taʻengatá, ko ha taʻu ʻe afe ko e ʻaho pē ia ʻe taha. ʻOku ʻikai ke taʻotaʻofi ia pe fakafaingataʻaʻiaʻi ʻe he taimí, ka ʻoku ʻikai te ne ngāue fakatuotuai. ʻI hono maʻu ʻa e poto taʻefakangatangatá, ʻoku ʻafioʻi tonu matematē ai ʻe Sihova ʻa e taimi lelei taha ke ngāue mai ai ki he lelei maʻá e faʻahinga kotoa ʻoku tokanga mai ki aí, pea ʻokú ne tatali anga-kātaki ki he hoko mai ʻa e taimi ko iá. Kae kehe, ʻoku totonu ke ʻoua naʻa tau fakaʻosiʻaki ʻo pehē ʻoku ʻikai tokotokanga mai ʻa Sihova ia ki ha faʻahinga faingataʻa pē ʻoku hokosia nai ʻe heʻene kau sevānití ʻi he taimi tatau. Ko ha ʻOtua “manavaʻofa ongongofua” ia, ko e fakasino mai ia ʻo e ʻofá. (Luke 1:78, NW; 1 Sione 4:8) ʻOkú ne malava ke kaniseli fakaʻaufuli mo tuʻuloa ha faʻahinga maumau pē kuo fakatupunga nai ʻe he fakaʻatā fakataimi ko ʻeni ʻo e faingataʻá.—Sāme 37:10.
6. Ko e hā ʻoku ʻikai totonu ke tau fakaʻosiʻaki fekauʻaki mo e ʻOtuá, pea ko e hā hono ʻuhingá?
6 Ko hono moʻoní, ʻoku ʻikai faingofua ke tatali ki ha meʻa ʻokú te fakaʻamu ki ai. (Palovepi 13:12) Ko ia ai, ʻi he taimi ʻoku ʻikai ke fakahoko vave ai ʻe he kakaí ʻenau ngaahi talaʻofá, ʻe fakaʻosiʻaki nai ʻe he niʻihi kehé ʻoku ʻikai te nau taumuʻa ke fai ia. He taʻefakapotopoto ē ke fakakaukau pehē ki he ʻOtuá! Kapau ʻoku tau maʻuhala ʻa e anga-kātaki ʻa e ʻOtuá ki he fakatuotuai, ʻi he faai atu ʻa e taimí ʻe malavangofua ke fakatupunga ai kitautolu ke tau veiveiua mo loto-siʻi, pea ʻai ai kitautolu ki he tuʻunga fakatuʻutāmaki ko e hoko ʻo tulemohe fakalaumālie. Ko e toe kovi angé, ʻe takihalaʻi nai ai kitautolu ʻe he faʻahinga ko ia naʻe fakatokanga ki ai ʻa Pita ki muʻa angé—ko e kau manuki, ko e faʻahinga taʻetui. ʻOku lea manuki ʻa e faʻahingá ni: “Komaʻā[i]a ʻa e talaʻofa ʻo ʻene hoko mai? he talu ʻa e mohe ʻa e kau mātuʻa, mo e pehe ni pe ʻa e meʻa kotoa pe, ʻio, ʻa ia ai pe talu mei he kamataʻanga ʻo mamani.”—2 Pita 3:4.
7. ʻOku anga-fēfē ʻa e felāveʻi ʻa e anga-kātaki ʻa Sihová mo ʻene finangalo ke fakatomala ʻa e kakaí?
7 Ko ha poini hono ua ʻoku malava ke tau toʻo mei he ngaahi lea ʻa Pitá ko Sihová ʻoku anga-kātaki koeʻuhi ʻokú ne loto ke aʻusia ʻa e fakatomalá ʻe he tokotaha kotoa. Ko e faʻahinga ko ia ʻoku nau fakafisi loto-fefeka ke tafoki mei heʻenau ngaahi founga koví ʻoku nau fehangahangai mo hono fakaʻauha ʻe Sihová. Kae kehe, ʻoku ʻikai ke fiefia ʻa e ʻOtuá ʻi he mate ʻa e fulikivanú. Ka, ʻokú ne fiefia ke sio ʻoku fakatomala ʻa e kakaí, ʻo tafoki mei heʻenau ngaahi founga koví, pea hokohoko moʻui atu. (Isikeli 33:11) Ko e ʻuhinga ia, ʻokú ne ngāueʻaki ai ʻa e anga-kātakí pea ʻai ʻa e ongoongo leleí ke fanongonongo ʻi he kotoa ʻo e māmaní koeʻuhi ke lava ʻo maʻu ai ʻe he kakaí ha faingamālie ke moʻui.
8. ʻOku anga-fēfē ʻa e hā ʻa e anga-kātaki ʻa e ʻOtuá ʻi heʻene ngaahi feangainga mo e puleʻanga ʻIsilelí?
8 ʻOku toe hā ʻa e anga-kātaki ʻa e ʻOtuá ʻi heʻene ngaahi feangainga mo e puleʻanga ʻIsileli ʻo e kuonga muʻá. ʻI he laui senituli, naʻá ne kātakiʻi ai ʻenau talangataʻá. Fakafou ʻi heʻene kau palōfitá, naʻá ne toutou naʻinaʻi ai kiate kinautolu: “Foki mai mei homou ngaahi ʻalunga kovi, pea mou tauhi ʻeku ngaahi tuʻutuʻuni mo ʻeku ngaahi fekau, ʻo tatau mo e fuʻu lao naʻa ku fokotuʻu ki hoʻomou ngaahi kui, pea u tuku atu ia kiate kimoutolu ʻi heʻeku kau tamaioʻeiki ko e kau palofita.” Ko e hā ʻa e olá? Ko hono pangó, ko e kakaí “naʻe ʻikai te nau tokanga.”—2 Tuʻi 17:13, 14.
9. Naʻe anga-fēfē ʻa e tapua atu ʻe he anga-kātaki ʻa Sīsuú ʻa e anga-kātaki ʻa ʻene Tamaí?
9 Fakaʻosí, naʻe fekau mai ʻe Sihova hono ʻAló, ʻa ia naʻe kōlenga hokohoko ki he kau Siú ke nau hoko ʻo vālelei mo e ʻOtuá. Naʻe tapua haohaoa mai ʻe he anga-kātaki ʻa Sīsuú ʻa e anga-kātaki ʻa ʻene Tamaí. ʻI hono ʻiloʻi lelei naʻe panaki ʻa hono tāmateʻi iá, naʻe tangilāulau ʻa Sīsū: “E Jelusalema, Jelusalema, akoe oku ke tamateʻi ae kau balofita, mo ke tologaki aki ae maka akinautolu oku fekau atu kiate koe, kuo liuga fiha eku fie tanaki fakataha hoo fānau, o hage koe tanaki fakataha e he motua moa ene fānau i hono lalo kabakau, ka nae ikai te mou loto ki ai!” (Mātiu 23:37, PM) Ko e ngaahi foʻi lea maongo ko ʻení ʻoku ʻikai ko ha ngaahi foʻi lea ia ʻa ha fakamaau taʻefaimeesi ʻokú ne loto-vēkeveke ke tautea ha taha ka ko e ngaahi foʻi lea ia ʻa ha kaumeʻa ʻofa ʻokú ne anga-kātaki ki he kakaí. Ko Sīsū, hangē ko ʻene Tamai ʻi hēvaní, naʻá ne fiemaʻu ʻa e kakaí ke nau fakatomala pea hao mei he fakamaau tamakí. Naʻe tali lelei ʻe he niʻihi ʻa e ngaahi fakatokanga ʻa Sīsuú pea nau hao ai mei he fakamaau fakalilifu naʻe hoko ki Selusalema ʻi he 70 T.S.—Luke 21:20-22.
10. ʻI he founga fē kuo ʻaonga ai kiate kitautolu ʻa e anga-kātaki ʻa e ʻOtuá?
10 ʻIkai ko e anga-kātaki ʻa e ʻOtuá ko ha meʻa ia ke tau ofoofo ai? Neongo ʻa e lahi fau ʻa e talangataʻa ʻa e tangatá, kuo fakaʻatā mai ʻe Sihova kiate kitautolu taki taha, fakataha mo e laui miliona kehe ʻo e kakaí, ʻa e faingamālie ke hoko ʻo ʻiloʻi ia pea ke maʻu ʻa e ʻamanaki ʻo e fakamoʻuí. “Mou lau ʻa e kataki fuoloa ʻa hotau ʻEiki ko e koto fakamoʻui,” ko e tohi ia ʻa Pita ki he kaungā Kalisitiané. (2 Pita 3:15) ʻIkai ʻoku tau houngaʻia he kuo fakaava ʻe he anga-kātaki ʻa Sihová ʻa e matapā ki he fakamoʻuí kiate kitautolu? ʻIkai ʻoku tau lotu ke kei hokohoko atu ʻa e anga-kātaki ʻa Sihová kiate kitautolu ʻi heʻetau tauhi kiate ia ʻi he ʻaho ki he ʻahó?—Mātiu 6:12.
11. ʻE ueʻi kitautolu ʻi hono mahinoʻi ʻa e anga-kātaki ʻa Sihová ke tau fai ʻa e hā?
11 ʻI he taimi ʻoku tau mahinoʻi ai ʻa e ʻuhinga ʻoku anga-kātaki ai ʻa Sihová, ʻoku tokoniʻi ai kitautolu ke tau tatali anga-kātaki ki he fakamoʻui te ne ʻomaí, ʻo ʻikai ʻaupito ke fakaʻosiʻaki ʻo pehē ʻokú ne fakatuotuai ʻi hono fakahoko ʻene ngaahi talaʻofá. (Tangilaulau 3:26) Lolotonga ʻoku tau hokohoko atu ʻa e lotu ke hoko mai ʻa e Puleʻanga ʻo e ʻOtuá, ʻoku tau falala ʻoku ʻafioʻi ʻe he ʻOtuá ʻa e taimi lelei taha ke tali ai ʻa e lotu ko iá. ʻIkai ngata aí, ʻoku ueʻi kitautolu ke tau faʻifaʻitaki kia Sihova ʻaki hono fakahāhā ʻa e anga-kātaki fakaʻotuá ʻi heʻetau ngaahi feangainga mo hotau fanga tokouá pea mo e faʻahinga ko ia ʻoku tau malanga ki aí. Ko kitautolu foki ʻoku ʻikai ke tau loto ke fakaʻauha ha taha ka ke sio kiate kinautolu ʻoku nau fakatomala pea maʻu fakataha mo kitautolu ʻa e ʻamanaki ʻo e moʻui taʻengatá.—1 Timote 2:3, 4.
Fakakaukau Atu ki he Anga-Kātaki ʻa e Kau Palōfitá
12, 13. ʻI he fehoanaki mo e Semisi 5:10, naʻe anga-fēfē ʻa e ngāueʻaki lavameʻa ʻe he palōfita ko ʻAiseá ʻa e anga-kātakí?
12 ʻI he fakakaukau atu ki he anga-kātaki ʻa Sihová, ʻoku tokoniʻi ai kitautolu ke tau fakatou houngaʻia mo fakatupulekina ʻa e ʻulungāanga ko iá. ʻOku ʻikai ke faingofua ki he faʻahinga taʻehaohaoa ʻo e tangatá ke fakatupulekina ʻa e anga-kātakí, ka ʻoku malava ke fai ia. ʻOku tau ako mei he kau sevāniti fuoloa ʻa e ʻOtuá. Naʻe tohi ʻe he ākonga ko Sēmisí: “Siʻoku kainga, kapau ʻoku mou fiemaʻu ha faʻifaʻitakiʻanga ʻo e mamahi mo e kataki, ko e kau Palofita ʻena, ʻa ia naʻa nau lea ʻi he huafa ʻo e ʻEiki.” (Semisi 5:10) ʻOku fakafiemālie mo fakalototoʻa ke ʻilo kuo fehangahangai lavameʻa ʻa e niʻihi kehe mo e meʻa kuo pau ke tau fehangahangai mo iá.
13 Ko e fakatātaá, ko e palōfita ko ʻAiseá, naʻe fiemaʻu moʻoni kiate ia ʻa e anga-kātakí ʻi hono vāhenga-ngāué. Naʻe fakahaaʻi ia ʻe Sihova ʻaki ʻene tala ange kiate ia: “ʻAlu, ʻo lea ki he kakai na, ʻo pehe, Mou fanongo ai ā, kae ʻikai ʻatā; pea mou mamata ai ʻā, kae ʻikai ʻilo. Ngaohi ʻa e loto ʻo e kakai ni ke ngeʻengeʻe, pea ngaohi honau telinga ke tutuli, pea ko honau mata ke ke pulusi; naʻa ʻiloange te nau sio ʻaki honau mata, mo ongoʻaki honau telinga, mo ʻilo ʻaki honau loto, ʻo tafoki, ʻo ai ha faitoʻo ʻe fai ki ai.” (Aisea 6:9, 10) Neongo ʻa e taʻefiefanongo ʻa e kakaí, naʻe fanongonongo anga-kātaki ʻe ʻAisea ʻa e ngaahi pōpoaki fakatokanga ʻa Sihová ʻo ʻikai toe siʻi hifo ʻi he taʻu ʻe 46! ʻI he founga meimei tatau, ʻe tokoniʻi kitautolu ʻe he anga-kātakí ke tau kātaki ʻi heʻetau ngāue ko ia ko hono malangaʻi ʻa e ongoongo leleí, neongo ʻoku taʻefiefanongo ʻa e tokolahi.
14, 15. Ko e hā naʻá ne tokoniʻi ʻa Selemaia ke ne fekuki mo e ngaahi faingataʻá mo e loto-siʻí?
14 Ko hono moʻoní, ʻi hono fakahoko ʻe he kau palōfitá ʻenau ngāue fakafaifekaú, naʻe pau ke nau fekuki mo e meʻa lahi ange ia ʻi he taʻefiefanongó; naʻa nau tofanga ʻi he fakatanga. Naʻe tuku ʻa Selemaia ʻi ha ʻakau kiiʻi, naʻe tuku ia “ki he pilisone,” pea naʻe lī ki ha lepa. (Selemaia 20:2; 37:15; 38:6) Naʻá ne tofanga ʻi he ngaohikoviʻi ko ʻení ʻi he nima ʻo e kakai tonu pē ko ia naʻá ne fakaʻamu ke tokoniʻí. Neongo ia, naʻe ʻikai ke hoko ʻa Selemaia ʻo loto-kona, pea naʻe ʻikai te ne faisāuni. Naʻá ne kītaki anga-kātaki ʻi he ngaahi hongofuluʻi taʻu.
15 Naʻe ʻikai ke hanga ʻe he fakatangá mo e manukí ʻo fakasīlongoʻi ʻa Selemaia, pea ʻoku ʻikai te na fakasīlongoʻi kitautolu ʻi he ʻaho ní. Ko hono moʻoní, ʻoku tau ongoʻi loto-siʻi nai ʻi ha ngaahi taimi. Naʻe ongoʻi loto-siʻi mo Selemaia. “Ko e folofola ʻa Sihova kuo hoko ko e meʻa ke manukiʻi ai au, mo ʻiohoʻekina ʻi he ʻaho kotoa pe,” ko ʻene tohí ia. “Pea kau ka pehe, ʻE ʻikai te u toe hueʻekina ia, pea ʻe ʻikai te u toe lea ʻi hono huafa.” Ko e hā leva ʻa e meʻa naʻe hokó? Naʻe taʻofi ʻe Selemaia ʻa e malangá? Naʻá ne hoko atu: “Toki hoko [ʻa e folofola ʻa e ʻOtuá] ʻi hoku loto ʻo hange ko e afi vela kuo loki ʻi hoku hui, pea ʻoku ou fiu ʻi he fakamaʻumaʻu au, ʻo ʻikai te u malava.” (Selemaia 20:8, 9) Fakatokangaʻi ko e taimi ko ia naʻá ne tokangataha ai ki he manuki ʻa e kakaí, naʻe mole ai ʻene fiefiá. ʻI he taimi naʻá ne fakahanga ai ʻene tokangá ki he fakaʻofoʻofa mo e mahuʻinga ʻo e pōpoakí ʻiate ia peé, naʻe toe langaʻi ai ʻene fiefiá. ʻIkai ngata aí, naʻe kau mai ʻa Sihova kia Selemaia “hange ha helo fakangeingei,” ʻo fakaivimālohiʻi ia ke ne fanongonongo ʻa e folofola ʻa e ʻOtuá ʻaki ʻa e faivelenga mo e loto-toʻa.—Selemaia 20:11.
16. ʻE malava fēfē ke tau tauhi maʻu ʻa e fiefia ʻi heʻetau ngāue ko ia ko hono malangaʻi ʻa e ongoongo leleí?
16 Naʻe maʻu ʻe he palōfita ko Selemaiá ha fiefia ʻi heʻene ngāué? ʻAupito! Naʻá ne pehē kia Sihova: “Naʻe fetaulaki mo au hoʻo ngaahi folofola, pea u kai ia; pea naʻe hoko hoʻo ngaahi lea ko hoku nekenekaʻanga, mo e fiefiaʻanga ʻo hoku loto: he naʻe uiʻaki au ho huafa, ʻe Sihova.” (Selemaia 15:16) Naʻe fiefia ʻa Selemaia ʻi hono monū ko hono fakafofongaʻi ʻa e ʻOtua moʻoní mo malangaʻi ʻene folofolá. ʻOku malava ke tau fiefia mo kitautolu foki. Tānaki atu ki ai, ʻoku tau fiefia, ʻo hangē ko e kau ʻāngelo ʻi hēvaní, ʻi he tokolahi fau ʻi māmani lahi ʻoku nau tali ʻa e pōpoaki ʻo e Puleʻangá, fakatomala, pea laka atu ʻi he hala ki he moʻui taʻengatá.—Luke 15:10.
“Kataki ʻa Siope”
17, 18. ʻI he founga fē naʻe kītaki ai ʻa Siopé, pea ko e hā hono olá?
17 ʻI he hili ʻa e fakamatala fekauʻaki mo e kau palōfita fuoloá, naʻe tohi ʻe he ākonga ko Sēmisí: “Kuo mou fanongo ki he kataki ʻa Siope; mou vakai foki hono ikuʻanga mei he ʻEiki: ta ʻoku ʻofa uʻuuʻu ʻa e ʻEiki, mo ʻofangofua.” (Semisi 5:11) Ko e foʻi lea faka-Kalisi naʻe liliu heni ko e “kataki” ʻokú ne maʻu ʻa e ʻuhinga meimei tatau mo e ʻuhinga ʻo e foʻi lea naʻe ngāueʻaki ʻe Sēmisi ʻi he veesi ki muʻá ki he “kataki.” ʻI hono fakahaaʻi ʻa e faikehekehe ʻi he ongo foʻi leá, naʻe tohi ʻe ha mataotao ʻe taha: “Ko e ʻuluaki foʻi leá ko e anga-kātaki ʻi he taimi ʻoku ngaohikoviʻi ai kitautolu ʻe ha faʻahinga, ko e foʻi lea hono uá ko e kītaki loto-toʻa ia ʻi he malumalu ʻo e ngaahi meʻa ʻoku fakalotomamahi kiate kitautolú.”
18 Naʻe hokosia ʻe Siope ʻa e meʻa fakamamahi lahi fau. Naʻá ne tofanga ʻi he tōlalo fakaepaʻanga, mole ʻa ʻene fānaú, pea mo ha mahaki langa lahi. Naʻá ne toe fāinga mo e ngaahi tukuakiʻi loi ʻo pehē naʻe tauteaʻi ia ʻe Sihova. Naʻe ʻikai ke faingataʻaʻia fakalongolongo pē ʻa Siope; naʻá ne tangilāulau ʻi hono tuʻungá pea aʻu ʻo fakahuʻunga naʻá ne māʻoniʻoni ange ia ʻi he ʻOtuá. (Siope 35:2) Kae kehe, naʻe ʻikai ʻaupito ke mole ʻene tuí, naʻe ʻikai te ne maumauʻi ai ʻa ʻene anga-tonú. Naʻe ʻikai te ne leakovi ki he ʻOtuá ʻo hangē ko ia naʻe pehē ʻe Sētane te ne faí. (Siope 1:11, 21) Ko e hā hono olá? Naʻe hanga ʻe Sihova ʻo ‘faitapuekina hake ʻa e taimi ki mui ʻo Siopé ʻi he taimi muʻá.’ (Siope 42:12) Naʻe toe fakafoki mai ʻe Sihova ʻa e moʻui lelei ʻa Siopé, ʻai ke liunga ua ʻene koloá, pea tāpuakiʻi ia ʻaki ha moʻui fiefia kakato fakataha mo e faʻahinga naʻá ne ʻofa aí. Naʻe toe fakaivia ʻa Siope ʻe heʻene kītaki faitōnungá ke ne mahinoʻi kakato ange ʻa Sihova.
19. Ko e hā ʻoku tau ako mei he kītaki anga-kātaki ʻa Siopé?
19 Ko e hā ʻoku tau ako mei he kītaki anga-kātaki ʻa Siopé? ʻI he hangē ko Siopé, ʻoku tau tofanga nai ʻi ha puke pe ko ha ngaahi faingataʻa kehe. ʻOku ʻikai nai te tau mahinoʻi kakato ʻa e ʻuhinga ʻoku fakaʻatā ai ʻe Sihova kitautolu ke tau fuesia ha ʻahiʻahi makehe. Neongo ia, ko e meʻa ʻeni ʻoku tau fakapapauʻí: Kapau te tau faitōnunga ai pē, ʻe faitāpuekina kitautolu. Kuo pau ke fakapaleʻi ʻe Sihova ʻa e faʻahinga ʻoku nau kumi tōtōivi kiate iá. (Hepelu 11:6) Naʻe pehē ʻe Sīsū: “Ko ia te ne kitaki ʻo aʻu ki he ikuʻanga, ko e toko taha ko ia ʻe moʻui.”—Mātiu 10:22; 24:13.
“ʻE Hoko Mai ʻa e ʻAho ʻo Sihová”
20. Ko e hā ʻoku malava ai ke tau fakapapauʻi ʻe hoko mai ʻa e ʻaho ʻo Sihová?
20 Neongo ʻoku anga-kātaki ʻa Sihova, ʻokú ne toe māʻoniʻoni pea heʻikai te ne kātakiʻi ai pē ʻo taʻengata ʻa e fulikivanú. ʻOku ʻi ai ha ngaahi fakangatangata ʻo ʻene anga-kātakí. Naʻe tohi ʻe Pita: “[Ko e ʻOtuá] naʻe ʻikai te ne momou mei hono tautea ha māmani he kuonga muʻá.” Lolotonga hono fakahaofi moʻui ʻa Noa mo hono fāmilí, naʻe lōmakiʻi ʻa e māmani anga-taʻefakaʻotua ko iá ʻaki ʻa e vai. Naʻe toe fakahoko ʻe Sihova ʻa e fakamaau ki Sōtoma mo Komola, ʻo fakaʻauha fakaʻaufuli kinaua. ʻOku fokotuʻu mai ʻe he ongo fakamaau ko ʻení “ha sīpinga ʻo e ngaahi meʻa ʻe hoko mai ki he faʻahinga anga-taʻefakaʻotuá.” ʻI he meʻá ni, ʻoku lava ke tau fakapapauʻi ai: “ʻE hoko mai ʻa e ʻaho ʻo Sihová.”—2 Pita 2:5, 6; 3:10, NW.
21. ʻE lava fēfē nai ke tau fakahāhā ʻetau anga-kātakí mo e kītakí, pea ko e hā ʻa e tuʻunga-lea te tau lāulea ki ai ʻi he kupu hoko maí?
21 Ko ia, tau faʻifaʻitaki leva ki he anga-kātaki ʻa Sihová ʻaki hono tokoniʻi ʻa e niʻihi kehé ke nau aʻusia ʻa e fakatomalá koeʻuhi ke nau malava ai ke hao. Tau toe faʻifaʻitaki ki he kau palōfitá ʻaki hono fanongonongo anga-kātaki ʻa e ongoongo leleí neongo ʻa e taʻefiefanongo ʻa e faʻahinga ko ia ʻoku tau malanga ki aí. ʻIkai ngata aí, ʻoku malava ke tau fakapapauʻi ʻe tāpuakiʻi lahi ʻe Sihova kitautolu, kapau te tau hangē ko Siopé, ʻo tau kātekina ʻa e ngaahi ʻahiʻahí pea tauhi maʻu ʻa e anga-tonú. ʻOku ʻi ai ʻa e ʻuhinga lahi ʻaupito ke tau fiefia ai ʻi heʻetau ngāue fakafaifekaú ʻi heʻetau ʻiloʻi ʻa e founga kuo faitāpuekina lahi ai ʻe Sihova ʻa e ngaahi feinga ʻa ʻene kakaí ke malangaʻi ʻa e ongoongo leleí ʻi he kotoa ʻo e māmaní. Te tau vakai ki he meʻá ni ʻi he kupu hoko maí.
ʻOkú Ke Manatuʻi?
• Ko e hā ʻoku fakahāhā ai ʻe Sihova ʻa e anga-kātakí?
• Ko e hā ʻoku tau ako mei he anga-kātaki ʻa e kau palōfitá?
• Naʻe anga-fēfē hono fakahāhā ʻe Siope ʻa e kātakí, pea ko e hā hono olá?
• ʻOku tau ʻilo fēfē ʻoku ʻikai ke taʻeʻiai ha ngaahi fakangatangata ʻo e anga-kātaki ʻa Sihová?
[Fehuʻi ki he Ako]
[Fakatātā ʻi he peesi 18]
Naʻe tapua haohaoa mai ʻe he anga-kātaki ʻa Sīsuú ʻa e anga-kātaki ʻa ʻene Tamaí
[Fakatātā ʻi he peesi 20]
Naʻe anga-fēfē hono fakapaleʻi ʻe Sihova ʻa e anga-kātaki ʻa Selemaiá?
[Fakatātā ʻi he peesi 21]
Naʻe anga-fēfē hono fakapaleʻi ʻe Sihova ʻa e kātaki ʻa Siopé?